Abavakalisi BoBukumkani Bayabalisa
Ukusasaza Imbewu YoBukumkani Ngawo Onke Amaxesha
ILIZWI likaThixo, iBhayibhile, likhuthaza ukukhuthala. UKumkani uSolomon wathi: “Kusasa hlwayela imbewu yakho, nangokuhlwa ungasiphumzi isandla sakho; ngokuba ungazi ukuba kolunga yiphi na, nokuba yile nokuba yileya, kusina na, nokuba zolunga kunye zombini na.”—INtshumayeli 11:6.
Nanini na kuvela ixesha elifanelekileyo, amaNgqina kaYehova atyala “imbewu” ngokushumayela iindaba ezilungileyo zoBukumkani bukaThixo. Kumazwe angaphezu kwama-230 namaqela eziqithi, ayaqhubeka ‘ngaphandle kokuyekelela efundisa kwaye evakalisa iindaba ezilungileyo ezingoKristu, uYesu.’ (IZenzo 5:42) La mava alandelayo abonisa indlela amaNgqina kaYehova ‘angaziyekeleli ngayo izandla zawo ziphumle’ kumsebenzi wokushumayela.
◻ KwiRiphabliki yaseCape Verde, elinye lamaNgqina kaYehova lalihamba kufuphi nentolongo ngoxa lalikubulungiseleli basentsimini. Kumabala entolongo, amanye amabanjwa ayekhwele emthini. Xa abona eli Ngqina lisezantsi kwawo, la mabanjwa alikhwaza efuna amaphephancwadi. Eli Ngqina laqhinela iqela lamaphephancwadi IMboniselo noVukani! elityeni laza lawagibisela ngaphakathi kweendonga zentolongo. Ngenxa yalo mdla waboniswa ekuqaleni, kwaqaliswa izifundo zeBhayibhile ezili-12. Amathathu kuloo mabanjwa ahlulela ubomi bawo kuThixo aza azinikezela ngokubhaptizwa emanzini. Elinye laloo mabanjwa belikhonza njengomvangeli wexesha elizeleyo okanye uvulindlela, ngaphezu konyaka ngoku. Ngoko ke, awenza njani umsebenzi wenkonzo yasentsimini entolongweni? Okokuqala le ntolongo yahlulwe yayimimandla. Wandula ke lo mmandla wahlulelwa amaNgqina amathathu ukuze asebenze isisele ngasinye. Aba bavakalisi boBukumkani balandela abo babonakalisa umdla ngendlela efanayo namaNgqina kaYehova ehlabathini lonke—ngokwenza amabuyelo. Noko ke, umahluko mnye, ngowokuba izifundo zeBhayibhile ziqhutywa rhoqo. Kunokufundisisa iBhayibhile kanye kuphela okanye kabini ngeveki kangangeyure okanye ngaphezulu, wambi amabanjwa afundisisa yonke imihla! Ukongezelela koko, amaNgqina aye avunyelwa ngumalathisi jikelele wentolongo ukuba aqhube zonke iintlanganiso zebandla ngaphakathi entolongweni.
◻ Ibhinqa elithile lasePortugal lazuz’ ilifa iimpapasho eziliqela zeWatch Tower emva kokufelwa ngumakhulu walo. Ekubeni lalingeloNgqina likaYehova, lalingafuni kuzigcina ezo ncwadi. Noko ke, alizange lifune ukuzitshabalalisa. Ngenye imini laxelela elinye lamaNgqina kaYehova elafika kulo likubulungiseleli bendlu ngendlu ngeli thala leencwadi. Eli Ngqina lalibuza enoba lalilazi kusini na ixabiso lokwenene leli thala leencwadi. Eli bhinqa laphendula lathi: “Eneneni, andilazi ixabiso lazo, kodwa ndinokukufumanisa njani oko?” Eli bhinqa lasamkela isifundo seBhayibhile, laza kwangoko lanoxabiso ngethala leencwadi likamakhulu walo. Ngoku nalo liliNgqina likaYehova elibhaptiziweyo. Ngaphezu koko, intombazana yalo nomhlobo osondeleyo wale ntsapho nabo bafundisisa iBhayibhile. Hayi indlela ekungqineke kulilifa elixabiseke ngayo ukuqokelela ezi ncwadi!