“Niyiguqule Indlela Ebendivakalelwa Ngayo Ngamangqina KaYehova”
LEYO yindlela elinye igosa lentolongo yasePoland elasabela ngayo kwinqaku elingomsebenzi wamaNgqina kaYehova, njengoko kubhaliwe kwinkupho kaOktobha 15, 1998. Eli nqaku lithi, “Xa Umntu Onentliziyo Elilitye Eguquka,” lachaza impumelelo yamaNgqina kaYehova ekusebenzeni namabanjwa aseWołów, ePoland.
Ngaphambi kokukhutshwa kweli phephancwadi elikhankanywe ngasentla eliya kuwonke-wonke IMboniselo, kwalungiselelwa intlanganiso ekhethekileyo yamabanjwa ngoSeptemba 13, 1998, kwintolongo yaseWołów. Kwabo babemenyiwe kwakukho namaNgqina asekuhlaleni, abhaptiziweyo namanye amabanjwa anomdla, kwakunye neqela lamagosa entolongo. Naku okwaphawulwa ngabo babezile.
UJerzy, ongomnye wamaNgqina kaYehova owabhaptizwa entolongweni kwiminyaka emihlanu edluleyo, wathi: “Ndivuya gqitha, njengoko namhlanje ndikwazi ukufunda ngomgudu omkhulu abazalwana abakumabandla akufuphi abaye bawenza ukuze basincede.” Wongeza ngelithi: “Ndisoloko ndizabalazela ukuphucula, yaye ndiyayibona indlela uYehova ebendixonxa ngayo.”
Elinye ibanjwa, eligama linguZdzisław, lathi ngokuphathelele umsebenzi wokushumayela entolongweni: “Ngoku, amabanjwa amane alungiselela ubhaptizo, yaye abasandul’ ukuba nomdla basaqhubeka besiya kwiintlanganiso kwiholo yethu. Eli nqaku liyimpembelelo enamandla kuthi ekuhambiseleni phambili umsebenzi kule ntsimi.” Esinjani sona ukuba sihle isimo sengqondo, xa sicinga ukuba uZdzisław kusafuneka ethothoze iminyaka eli-19 entolongweni!
Emva kokufunda inqaku ngentolongo yaseWołów, elinye igosa lentolongo lathi: “Siziva sineqhayiya ngokukhethekileyo. Andizange ndicinge ukuba kuya kuze kuthethwe kakuhle kangaka ngale ntolongo kangangeelwimi ezili-130 ehlabathini. Ndiyanithanda, yaye ndiyayixabisa imigudu yenu eniyenza ngenxa yamabanjwa.” Elinye igosa longezelela lisithi: “Niyiguqule indlela ebendivakalelwa ngayo ngamaNgqina kaYehova. Ngaphambili, bendinijonga njengabantu abanenzondelelo yempambano ngonqulo. Ngoku ndiyabona ukuba ningabantu abaphila ngemigaqo.”
Umalathisi wentolongo yaseWołów, uMarek Gajos, wancuma waza wathi: “Ekuqaleni sasicinga ukuba akukho nto ingako eniza kuyenza. Sasicinga ukuba nilolunye nje unqulo olulangazelela ukufundisa amabanjwa iBhayibhile. Noko ke, ngokubona imiphumo yomsebenzi wenu wokuqala, sagqiba kwelokuba sisebenzisane kangangoko sinako nani. Ngoku sele nisiza apha iminyaka esithoba ningadinwa, yaye ndiyakuxabisa kakhulu oko nikwenzileyo ukuza kuthi ga ngoku.”
Noko ke, abantu abaqhelekileyo abakwintolongo yaseWołów balifumanisa linjani eli nqaku? Amabanjwa ayenomdla gqitha kangangokuba amaNgqina asentolongweni aphelelwa ngamaphephancwadi. Amagosa entolongo abonakalisa umdla ngokuzicelela imibhalo eyongezelelekileyo engama-40. Ukuhlangabezana nale mfuno yandileyo, amabandla asekuhlaleni anceda aza anikela ngemibhalo engakumbi eli-100 kubazalwana abasentolongweni. Kwangaxeshanye, banda abantu ababesiza ezintlanganisweni entolongweni.
UPiotr Choduń, igosa lasentolongweni elalisebenzisana kakuhle namaNgqina kaYehova, lathi: “Sigqibe kwelokuba silibeke eli nqaku kuzo zonke iibhokisi zemiboniso kwintolongo yethu. Sinethemba lokuba onke amabanjwa angekafundisisi iBhayibhile kunye nani alifunde eli phephancwadi.”
Umzekelo omhle wamaNgqina nemigudu yawo yokushumayela usaqhubeka unemiphumo emihle. Ukongezelela kumabanjwa ali-15 aye enza inkqubela de abhaptizwa, amagosa entolongo ama-2 aye ahlulela ubomi bawo kuYehova yaye elinye igosa licele isifundo seBhayibhile. Kakade ke, abazalwana abashumayela kwintolongo yaseWołów basa lonke uzuko kuYehova uThixo ngempumelelo yabo.—Thelekisa eyoku-1 kwabaseKorinte 3:6, 7.
[Umfanekiso okwiphepha 28]
AmaNgqina amathathu nebanjwa kwindawo yokubonisa iphephancwadi kwiholo yokufundisa yasentolongweni