Uyakhumbula Na?
Ngaba ukhe wacinga nzulu ngeenkupho zakutshanje zeMboniselo? Ukuba kunjalo, uya kukufumanisa kubangel’ umdla ukukhumbula oku kulandelayo:
◻ Izibini ezininzi ezitshatileyo namhlanje ziye zawuxelisa njani umzekelo obalaseleyo ezawushiyelwa nguAkwila noPrisila? UAkwila noPrisila babekhonza kumabandla aliqela awahlukeneyo. Njengabo, uninzi lwamaKristu namhlanje luye lwazinikela ukuba lufudukele apho kukho imfuneko enkulu khona. Kwakhona luye lwafumana uvuyo nolwaneliseko ngenxa yokubona ukwanda kwezilangazelelo zoBukumkani nakukuhlakulela ubuhlobo obuxabisekileyo bobuKristu.—12/15, iphepha 24.
◻ Iyintoni imbono yeBhayibhile ngeziselo ezinxilisayo? Imbono yeBhayibhile ngeziselo ezinxilisayo ilungelelene. Kwelinye icala, iBhayibhile ithi iwayini sisipho esivela kuThixo. (INdumiso 104:1, 15) Ukanti kwelinye icala, iyakugweba ukuzinkcinkca ngokugqith’ emgceni. (Luka 21:34; 1 Timoti 3:8; Tito 2:3; 1 Petros 4:3)—12/15, iphepha 27.
◻ Yiyiphi eyona nkalo ibalaseleyo yencwadi yeBhayibhile kaHagayi? Nangona incwadi kaHagayi iyilwe ziindinyana nje ezingama-38, igama likaThixo lisetyenziswe izihlandlo ezingama-35 apho. Isiprofeto esinjalo asivakali kamnandi xa igama elithi Yehova lithatyathelw’ indawo lelithi “Nkosi.”—1/1, iphepha 6.
◻ Ziziphi izifundo ezinokufundwa kwizono zikaDavide noManase? Nangona uYehova wamxolelayo uDavide noManase, la madoda—kunye noSirayeli—kwafuneka ajamelane nemiphumo yezono zawo. (2 Samuweli 12:11, 12; Yeremiya 15:3-5) Ngokufanayo, ngoxa namhlanje uYehova ebaxolela aboni abaguqukayo, izenzo zabo zisenokuba nemiphumo engaphephekiyo.—1/1, iphepha 27.
◻ ‘Zibukeka’ ngayiphi indlela ‘iinyawo zabo bavakalisa iindaba ezilungileyo’ zoBukumkani bukaThixo? (Isaya 52:7) Ziinyawo into edla ngokuthwala umntu njengoko esiya kushumayela kwabanye. Ezo nyawo zimela kanye loo mntu. Ngoko kwabaninzi ababephulaphula nababesabela kakuhle kwiindaba ezilungileyo zoBukumkani, iinyawo zabathunywa zazintle ngokwenene.—1/15, iphepha 13.
◻ Nguwuphi umsebenzi ontlu-mbini obandakanyekileyo ‘ekuvakaliseni iindaba ezilungileyo’? (1 Korinte 9:16) Okokuqala, simele sivakalise iindaba ezilungileyo zoBukumkani. Inkalo yesibini yalo msebenzi ibandakanya ukufundisa abo basabela kakuhle kwisigidimi soBukumkani.—1/15, iphepha 23.
◻ Ziziphi iingenelo esizifumanayo ngokobuqu ngokucula iingoma zoBukumkani kwiintlanganiso zebandla? Ukucula kusivulel’ ithuba lokubonakalisa indlela esivakalelwa ngayo ngoMdali wethu. (INdumiso 149:1, 3) Ukucula ngentliziyo epheleleyo ebandleni, kunokwenza iingqondo neentliziyo zethu zilungele ucwangciso oluza kulandela. Kunokusenza sibe nesabelo esikhudlwana kunqulo lukaYehova.—2/1, iphepha 28.
◻ Kutheni kusithiwa umhla wokufa ulungile kunomhla wokuzalwa? (INtshumayeli 7:1) Umhla wokufa unokulunga kunomhla wokuzalwa kukabani ukuba ebezenzele igama elihle noYehova, lowo unokubavusa abathembekileyo abafileyo. (Yohane 11:25)—2/15, iphepha 12.
◻ Kutheni le nto incwadi yeNtshumayeli ifanele isincede ngokobuqu? Inokunceda ngamnye kuthi alungelelanise imbono yakhe ngobomi nosukelo lwakhe. (INtshumayelo 7:2; 2 Timoti 3:16, 17)—2/15, iphepha 16.
◻ Ngaba amaNgqina kaYehova angamafundamentali? Hayi. Nangona eneenkolelo ezingqongqo zonqulo, akangawo amafundamentali ngokwendlela elisetyenziswa ngayo eli gama. Wona akabheneli kuqhankqalazo nogonyamelo ngokuchasene nabo bangavumelani nawo. Axelisa iNkokeli yawo, uYesu Kristu.—3/1, iphepha 6.
◻ Ukungabi nalwazi ngelona xesha lithe ngqo lokuza kukaYesu eze kuphumeza impindezelo kaThixo kunawuphi umphumo kumaKristu? Oku kuwenza amaKristu ahlale ephaphile yaye kuwanika nethuba lokubonisa ukuba akamkhonzi uYehova eneentshukumisa zokuzingca.—3/1, iphepha 13.
◻ Yintoni esifanele siyihlole ngaphambi kokumangalela umzalwana osenokuba usiqhathile? Sifanele sihlole imiphumo esenokubangelwa koko kuthi, kwabanye ababandakanyekileyo, ebandleni nakwabangaphandle. (1 Korinte 6:7)—3/15, iphepha 22.
◻ Lunokufunyanwa njani ulonwabo lokwenyaniso? Ulonwabo lokwenyaniso yimeko yentliziyo, lusekelwe kukholo lokwenene nakulwalamano oluhle noYehova. (Mateyu 5:3)—3/15, iphepha 23.
◻ Yintoni afanele ayenze umKristu xa ebizelwa kwiqumrhu labantu abachophele ityala (jury)? UmKristu ngamnye ojamelene nomsebenzi wokuchophela ityala umele agqibe ngekhondo amele alilandele, ngokusekelwe kulwazi analo ngeBhayibhile nakwisazela sakhe. (Galati 6:5)—4/1, iphepha 29.