Shumayela Ukuze Wenze Abafundi

“Xa uPrisila noAkwila bamvayo [uApolo], bamthabathela kubo baza bacokisa ukumcacisela ngokuchane ngakumbi indlela kaThixo.”—IZENZO 18:26.

1. Nangona uApolo “wayevutha ngumoya,” yintoni awayesayiswele?

UPRISILA noAkwila, isibini esitshatileyo esingamaKristu esasiphila ngenkulungwane yokuqala, saphulaphula uApolo enikela intetho kwindlu yesikhungu yesixeko sase-Efese. UApolo wayeyithimbile ingqalelo yabo babemphulaphule ngobuciko bakhe nangobuchule bokweyisela. “Wayevutha ngumoya,” yaye “efundisa ngokuchanileyo izinto ezingoYesu.” Noko ke, kwakubonakala ukuba uApolo ‘wayeqhelene nobhaptizo lukaYohane kuphela.’ Oko uApolo wayekufundisa ngoKristu kwakuyinyaniso kodwa kwakusafuneka aphucule. Ingxaki yayikukuba wayengenalwazi lungako. UApolo wayefanele andise ulwazi lwakhe ngendima kaYesu Kristu ekuphunyezweni kwenjongo kaYehova.—IZenzo 18:24-26.

2. Luluphi ucelomngeni olwamkelwa nguPrisila noAkwila?

² Ngaphandle kokuzilazila, uPrisila noAkwila bayithathela kubo imbopheleleko yokunceda uApolo azigcine “zonke izinto” uKristu awayeziyalele. (Mateyu 28:19, 20) Le ngxelo ithi ‘bamthabathela kubo uApolo baza bacokisa ukumcacisela ngokuchane ngakumbi indlela kaThixo.’ Noko ke, kwakukho izinto ezazinokwenza amanye amaKristu abe mathidala ukufundisa uApolo. Ziziphi ezo zinto? Yaye yintoni esinokuyifunda kwimigudu kaPrisila noAkwila yokuxubusha iZibhalo noApolo? Ukuxubusha le ngxelo yezinto ezenzeka ngokwenene kunokusinceda njani sinikele ingqalelo ekuqaliseni izifundo zeBhayibhile?

Nikela Ingqalelo Kwiimfuno Zabantu

3. Kutheni imvelaphi ka-Apolo ingazange ithintele uPrisila noAkwila ekubeni bamfundise?

³ UApolo wakhulela kwisixeko saseAleksandriya, ezalwa ngamaYuda. Ngelo xesha iAleksandriya yayilikomkhulu laseYiputa yaye isisazulu semfundo enomsila, idume ngendlu yogcino-ncwadi yayo enkulu. Esi sixeko sasinamaYuda amaninzi, kuquka nabaphengululi. Ngenxa yoko, inguqulelo yesiGrike yeZibhalo ZesiHebhere eyaziwa ngokuba yiSeptuagint yaveliswa apho. Yiyo loo nto uApolo “wayezazi kakuhle iZibhalo”! UAkwila noPrisila babengabenzi beentente. Ngaba ubuciko buka-Apolo babenza baziva bebancinane? Akunjalo. Beqhutywa luthando, bacinga ngaye, ngeemfuno zakhe nangendlela ababenokumnceda ngayo.

4. UApolo walufumana phi yaye njani uncedo awayelufuna?

⁴ Kungakhathaliseki ukuba wayeliciko kangakanani na uApolo, wayefanele afundiswe. Uncedo awayelufuna lwalungenakufunyanwa nakwiyiphi na iyunivesithi, kodwa lwalufumaneka kwamanye amalungu ebandla lamaKristu. UApolo wayeza kungenelwa kwiingongoma ezaziza kumenza aliqonde ngendlela echanileyo ilungiselelo likaThixo losindiso. UPrisila noAkwila “bamthabathela kubo baza bacokisa ukumcacisela ngokuchane ngakumbi indlela kaThixo.”

5. Unokubuchaza njani ubumoya bukaPrisila noAkwila?

⁵ UPrisila noAkwila babomelele ngokomoya naselukholweni. Kusenokwenzeka ukuba ‘babesoloko bekulungele ukuzithethelela phambi kwakhe wonk’ ubani ofuna isizathu sethemba labo,’ kungakhathaliseki ukuba usisigwili, ulihlwempu, ngumphengululi okanye likhoboka. (1 Petros 3:15) UAkwila nomkakhe babekwazi ‘ukuliphatha ngokufanelekileyo ilizwi lenyaniso.’ (2 Timoti 2:15) Kuyabonakala ukuba babezimisela xa befundisisa iZibhalo. UApolo wachukunyiswa kakhulu yimfundiso eyayisekelwe ‘kwilizwi likaThixo eliphilileyo nelinamandla,’ eyayifikelela intliziyo.—Hebhere 4:12.

6. Sazi njani ukuba uApolo waluxabisa uncedo awalufumanayo?

⁶ UApolo wawuxabisa umzekelo owawumiselwe ngabo babemfundisa waza wakwazi ngakumbi ukwenza abafundi. Walusebenzisa ngendlela ephumelelayo ulwazi lwakhe kumsebenzi wokuvakalisa iindaba ezilungileyo, ngokukodwa kumaYuda. UApolo wayenobuchule obungathethekiyo ekoyiseleni amaYuda kuKristu. ‘Ekubeni wayenamandla kwiZibhalo,’ wakwazi ukubabonisa ubungqina bokuba bonke abaprofeti bamandulo babekhangele phambili ekuzeni kukaKristu. (IZenzo 18:24, Kingdom Interlinear Translation) Le ngxelo yongezelela isithi wesuka apho uApolo waya eAkaya, waza “wabanceda kakhulu abo babekholiwe ngenxa yobubele obungasifanelanga bukaThixo; kuba ngokucokiseke kakhulu wawangqina esidlangalaleni amaYuda ukuba aphosisile, ngoxa wayebonakalisa ngeZibhalo ukuba uYesu unguKristu.”—IZenzo 18:27, 28.

Funda Kumzekelo Wabanye Abafundisi

7. UAkwila noPrisila bakwazi njani ukuba ngabafundisi abaphum’ izandla?

⁷ UAkwila noPrisila babufumana njani ubuchule bokufundisa iLizwi likaThixo? Ukongezelela ekukhuthaleleni isifundo sobuqu neentlanganiso zebandla, bamele ukuba bancedwa kakhulu kukunxulumana nompostile uPawulos. UPawulos wahlala kwikhaya likaPrisila noAkwila eliseKorinte iinyanga ezili-18. Babesebenza kunye besenza yaye belungisa iintente. (IZenzo 18:2, 3) Unokuyithelekelela ke nawe incoko yeZibhalo enzulu abamele ukuba babesiba nayo. Ibe hayi indlela ekumele ukuba kwabakha ngayo ngokomoya ukunxulumana noPawulos! “Ohamba nezilumko uya kuba sisilumko naye,” itsho IMizekeliso 13:20. Unxulumano oluhle lwaba nemiphumo emihle kwimikhwa yabo yokomoya.—1 Korinte 15:33.

8. Yintoni eyafundwa nguPrisila noAkwila ngokubukela uPawulos kubulungiseleli bakhe?

⁸ Xa uPrisila noAkwila babejonga uPawulos njengomvakalisi woBukumkani, babona umzekelo omhle womntu onobuchule bokufundisa. Ingxelo ekwiZenzo ithi uPawulos “wayenikela intetho kwindlu yesikhungu [yaseKorinte] iisabatha zonke, eseyisela amaYuda namaGrike.” Kamva, xa wathelelwa nguSilas noTimoti, uPawulos “waxineka lilizwi, enikela ubungqina kumaYuda bokungqina ukuba uYesu unguKristu.” Xa kwafumaniseka ukuba amalungu endlu yesikhungu ayengenamdla, uPrisila noAkwila baphawula ukuba uPawulos wemka apho waya kwindawo awayeza kuphulaphulwa kuyo, kumzi owawayamene nendlu yesikhungu. Kuloo ndlu uPawulos wanceda uKrispo, “igosa elongamelayo kwindlu yesikhungu,” ukuba abe ngumfundi. Kusenokwenzeka ukuba uPrisila noAkwila baphawula ukuba ukuguquka kwale ndoda kwaba nomphumo omhle kakhulu kuloo ntsimi. Le ngxelo ithi: “UKrispo . . . waba likholwa eNkosini, ngokunjalo nabo bonke abendlu yakhe. Kwaye abaninzi eKorinte abevayo bakholwa baza babhaptizwa.”—IZenzo 18:4-8.

9. UPrisila noAkwila basabela njani kumzekelo kaPawulos?

⁹ Umzekelo kaPawulos kubulungiseleli basentsimini waxeliswa ngabanye abavakalisi boBukumkani, abanjengoPrisila noAkwila. Lo mpostile wabongoza amanye amaKristu esithi: “Yibani ngabaxelisa mna, njengoko nam ndixelisa uKristu.” (1 Korinte 11:1) Ngokuvisisana nomzekelo kaPawulos, uPrisila noAkwila banceda uApolo ukuba aqonde iimfundiso zamaKristu ngendlela echane ngakumbi. Naye wanceda abanye. Alithandabuzeki elokuba uPrisila noAkwila bafak’ isandla ekwenzeni abafundi eRoma, eKorinte nase-Efese.—IZenzo 18:1, 2, 18, 19; Roma 16:3-5.

10. Ufunde ntoni kwiZenzo isahluko 18 eya kukunceda kumsebenzi wokwenza abafundi?

¹⁰ Yintoni esinokuyifunda kule ngxelo yeZenzo isahluko 18? Kanye njengokuba uAkwila noPrisila besenokuba bafunda kuPawulos, sinako ukuphucula ubuchule bethu bokwenza abafundi ngokulandela umzekelo wabafundisi abaphumelelayo beLizwi likaThixo. Sinokunxulumana nabo ‘baxineka lilizwi’ “nabanikela ubungqina ngokucokisekileyo” kwabanye. (IZenzo 18:5, Kingdom Interlinear Translation) Sinokuphawula indlela abazifikelela ngayo iintliziyo zabantu besebenzisa ubuchule bokufundisa ngokweyisela. Obo buchule bunokusinceda senze abafundi. Xa sifundisisa iBhayibhile nomntu, sinokumcela ameme nelinye ilungu lentsapho okanye ummelwane ukuba abekho esifundweni. Okanye sinokumbuza enoba bakho na abantu acinga ukuba bangathanda ukuqhutyelwa isifundo seBhayibhile.—IZenzo 18:6-8.

Vula Amathuba Okwenza Abafundi

11. Banokufunyanwa phi abafundi abatsha?

¹¹ UPawulos namanye amaKristu bazimisela ukwenza abafundi ngokushumayela kwindlu ngendlu, kwiindawo zembutho, naxa babeseluhambweni—kuyo yonke indawo. Njengomsebenzi woBukumkani onenzondelelo ofuna ukwenza abafundi, ngaba unokuyandisa inkonzo yakho yasentsimini? Ngaba unokuwasebenzisa kakuhle amathuba okukhangela abafanelekayo uze ushumayele kubo? Ziziphi ezinye zeendlela abanye abavakalisi beendaba ezilungileyo abaye babafumana ngazo abafundi? Makhe siqale ngokuqwalasela ukunikela ubungqina ngomnxeba.

12-14. Ukuze ubonise iingenelo zokunikela ubungqina ngomnxeba, balisa amava akho okanye ke la akwezi ziqendu.

¹² Xa wayeshumayela kwindlu ngendlu eBrazil, umKristu esiza kumbiza ngokuba nguMaria wanika ibhinqa eliselula elaliphuma kwisakhiwo esinamagumbi okuhlala iphecana. Esebenzisa umxholo welo phecana njengentshayelelo, uMaria walibuza, “Ngaba ungathanda ukwazi ngakumbi ngeBhayibhile?” Eli bhinqa lathi: “Ewe ndingathanda. Ingxaki nje kukuba ndingutitshalakazi, kwaye loo nto indityela lonke ixesha endinalo.” UMaria walichazela ukuba banako ukuxubusha imibandela yeBhayibhile ngomnxeba. Eli bhinqa lamnika inombolo yalo yomnxeba, kwaye ngaloo ngokuhlwa kanye, waqalisa isifundo ngencwadana enemifanekiso ethi Yintoni UThixo Ayifunayo Kuthi?a

¹³ Xa washumayela ngomnxeba, umlungiseleli wexesha elizeleyo wase-Ethiopia wothuka xa wathi esathetha nendoda ethile weva kukho isiphithiphithi esiqhubekayo kule ndawo ikuyo. Le ndoda yamcela ukuba ayitsalele umnxeba ngelinye ixesha. Xa wayitsalelayo umnxeba, le ndoda yacela uxolo imxelela ukuba xa ebeyitsalele umnxeba ngaphambilana, yayixabana nenkosikazi yayo. Lo dade wasebenzisa loo nkcazelo njengethuba lokuyibonisa ulwalathiso lobulumko lweBhayibhile ngendlela yokulungisa iingxaki zentsapho. Wayixelela ukuba iintsapho ezininzi zincedwe yincwadi ethi Imfihlelo Yolonwabo Lwentsapho, epapashwe ngamaNgqina kaYehova. Kwiintsuku ezingephi eyithumele loo ncwadi, lo dade wayitsalel’ umnxeba kwakhona le ndoda. Yadanduluka isithi: “Le ncwadi iwusindisile umtshato wam!” Yayibize intlanganiso yentsapho ukuze iyichazele iingongoma ezintle eyayizifunde kule ncwadi. Kwaqaliswa isifundo seBhayibhile, yaye kungekudala le ndoda yaqalisa ukuya rhoqo kwiintlanganiso zamaKristu.

¹⁴ Umvakalisi woBukumkani waseDenmark owaqalisa isifundo seBhayibhile ngokushumayela ngomnxeba uthi: “Umveleli wenkonzo wandikhuthaza ukuba ndishumayele ngomnxeba. Ekuqaleni ndaba mathidala, ndisithi: ‘Andiyithandi noko ke le into.’ Noko ke, ngenye imini ndaqweb’ isibindi ndaza ndaqalisa ukutsalel’ umnxeba umninimzi wokuqala. Kwaphendula uSonja waza, emva kwencoko emfutshane, wavuma ukuba ndimthumelele uncwadi olusekelwe eBhayibhileni. Ngenye ingokuhlwa saxubusha ngendalo, ibe wafuna ukufunda incwadi ethi Life—How Did It Get Here? By Evolution or by Creation.b Ndamxelela ukuba kwakuya kuba kuhle ukuba sidibane size sixubushe lo mbandela. Wavuma. Ndafika uSonja sele esilungele isifundo, kwaye siye safundisisa veki nganye ukususela ngoko.” Lo dade ongumKristu uqukumbela ngelithi: “Sele kuyiminyaka ndithandazela isifundo seBhayibhile, kodwa bendingazi ukuba ndiya kusifumana ngokunikela ubungqina ngomnxeba.”

15, 16. Ngawaphi amava onokuwabalisa abonisa iingenelo zokuphaphela iindlela ezahlukeneyo zokuqalisa izifundo zeBhayibhile?

¹⁵ Abaninzi bayaphumelela ngokusebenzisa amacebiso okunikela ubungqina ebantwini naphi na apho bakhoyo. Elinye ibhinqa elingumKristu laseUnited States lamisa inqwelo-mafutha yalo ecaleni kweveni kwindawo yokupaka. Xa ibhinqa elalikule veni lambonayo lo dade, waqalisa ukulicacisela ngomsebenzi wethu wokufundisa ngeBhayibhile. Eli bhinqa laphulaphula, lehla evenini, leza kungena kwinqwelo-mafutha yalo dade. Lathi: “Ndiyavuya kuba uye weza kuthetha nam. Sele kulithuba ndingasalufumani uncwadi lwenu lweBhayibhile. Ngaphezu koko, ndifuna ukufundisisa iBhayibhile kwakhona. Ungandiqhubela isifundo?” Ngaloo ndlela udade wethu wavula ithuba elihle lokushumayela iindaba ezilungileyo.

¹⁶ Omnye udade waseUnited States usibalisela la mava alandelayo ngotyelelo lwakhe kwikhaya labangenakuzinyamekela: Waya kumalathisi othile kwesi sakhiwo waza wamxelela ukuba angathanda ukuba litshantliziyo ekunyamekeleni iintswelo zokomoya zabo bakweli khaya. Lo dade wongezelela esithi angakuthanda ukuqhuba isifundo seBhayibhile sesisa veki nganye kunye nabo bonke abathandayo ukubakho. Umalathisi wamvumela ukuba abatyelele abo bantu kumagumbi abo. Kungekudala, waqhuba isifundo seBhayibhile kathathu ngeveki nabantu abangama-26, ibe omnye wabo uya rhoqo kwiintlanganiso zethu.

17. Yiyiphi indlela edla ngokuphumelela yokuqalisa izifundo zeBhayibhile?

¹⁷ Kwabanye abavakalisi boBukumkani, ukucela isifundo seBhayibhile ngokungqalileyo kuba nemiphumo emihle. Ngenye intsasa ibandla elinabavakalisi abali-105 lenza umgudu okhethekileyo wokucela ukuqhubela umninimzi ngamnye abadibana naye isifundo seBhayibhile. Bangama-86 abavakalisi ababeye entsimini, kwaye emva kokuchitha iiyure ezi-2 kumsebenzi wokushumayela, bafumanisa ukuba ubuncinane kwakuqaliswe izifundo zeBhayibhile ezitsha ezili-15.

Qhubeka Ufuna Abafanelekayo

18, 19. Luluphi ulwalathiso olubalulekileyo oluvela kuYesu esifanele silukhumbule, yaye ngenxa yoko yintoni esifanele sizimisele ukuyenza?

¹⁸ Njengomvakalisi woBukumkani, usenokuzama la macebiso acetyiswe kweli nqaku. Kakade ke, kuya kuba bubulumko ukucinga ngezithethe zasekuhlaleni xa ucinga ngendlela oya kunikela ubungqina ngayo. Okona kubalulekileyo kukuba sikhumbule ulwalathiso lukaYesu lokufuna abafanelekayo size sibancede babe ngabafundi.—Mateyu 10:11; 28:19.

¹⁹ Ukuze senze oko, ngamana ‘singaliphatha ngokufanelekileyo ilizwi lenyaniso.’ Sinokwenjenjalo ngokusebenzisa iZibhalo ukuze seyisele abantu. Loo nto iya kusinceda sifikelele iintliziyo zabanomdla size sibashukumisele kwisenzo. Njengoko sizimisela ukukholosa ngoYehova, sinokuba negalelo ekuncedeni abanye babe ngabafundi bakaYesu Kristu. Ibe hayi indlela onomvuzo ngayo lo msebenzi! Ngoko ke ‘masenze unako-nako ukuba sizinikele sikholekile kuThixo,’ sisoloko simzukisa uYehova njengabavakalisi boBukumkani abanenzondelelo, abashumayela ngenjongo yokwenza abafundi.—2 Timoti 2:15.

[Imibhalo esemazantsi]

Usakhumbula Na?

• Yintoni eyabangela ukuba kufuneke uApolo acaciselwe ngokupheleleyo indlela kaThixo?

• UPrisila noAkwila bafunda njani kumpostile uPawulos?

• Yintoni oyifundileyo ngomsebenzi wokwenza abafundi kwiZenzo isahluko 18?

• Unokuwavula njani amathuba okwenza abafundi?

[Umfanekiso okwiphepha 18]

UPrisila noAkwila ‘bacokisa ukucacisela uApolo ngokuchane ngakumbi indlela kaThixo’

[Umfanekiso okwiphepha 20]

UApolo waba nobuchule bokwenza abafundi

[Umfanekiso okwiphepha 21]

UPawulos washumayela kuyo yonke indawo awayesiya kuyo

[Imifanekiso ekwiphepha 23]

Vula amathuba okushumayela