“Babeqhutywa Ngumoya Oyingcwele”
“Isiprofeto asizange nangaliphi na ixesha siziswe ngokuthanda komntu, kodwa abantu bathetha ngokuphuma kuThixo njengoko babeqhutywa ngumoya oyingcwele.”—2 PET. 1:21.
IINGONGOMA ONOKUCINGA NGAZO
Isigidimi sikaThixo sadluliselwa njani ngomoya oyingcwele kubabhali beBhayibhile?
Bubuphi ubungqina obubonisa ukuba iBhayibhile iphefumlelwe nguThixo?
Yintoni onokuyenza yonke imihla ukuze uhlale ulixabisa iLizwi likaThixo?
1. Kutheni iLizwi likaThixo eliphefumlelweyo lifuneka?
SIVELA phi? Kutheni silapha nje? Siyaphi? Kutheni ihlabathi linje? Kwenzeka ntoni kuthi xa sisifa? Ehlabathini lonke abantu bayayibuza le mibuzo. Besinokuzazi njani iimpendulo zale mibuzo neminye ebalulekileyo ukuba besingenalo iLizwi likaThixo eliphefumlelweyo? Ukuba bezingekho iZibhalo Ezingcwele, besiya kufunda kumava ethu. Ukuba ke besifundiswa ngamava ethu, ngaba besiya kuvakalelwa ngendlela efana neyomdumisi ‘ngomthetho kaYehova’?—Funda iNdumiso 19:7.
2. Yintoni eya kusinceda sihlale siyixabisa iBhayibhile njengesipho esibalulekileyo sikaThixo?
2 Noko ke, ibuhlungu into yokuba, abanye baluvumele lwaphola uthando ababenalo kuqala ngenyaniso yeBhayibhile. (Thelekisa iSityhilelo 2:4.) Abasahambi kwindlela ekholisa uYehova. (Isa. 30:21) Akuyomfuneko ukuba oko kwenzeke kuthi. Sifanele sizame ukusoloko siyixabisa iBhayibhile neemfundiso zayo. IBhayibhile sisipho esibalulekileyo esivela kuMdali wethu onothando. (Yak. 1:17) Yintoni eya kusinceda sikhulise uxabiso lwethu ‘ngelizwi likaThixo?’ Undoqo kukuphawula indlela ababhali beBhayibhile abakhokelwa ngayo ukuze babhale iZibhalo. Oko kuquka ukukhumbula obunye bobungqina obuyintaphane bokuphefumlelwa kwayo. Ukwenjenjalo kufanele kusikhuthaze ukuba sifunde iLizwi likaThixo suku ngalunye size sisisebenzise isiluleko salo.—Heb. 4:12.
“BABEQHUTYWA NGUMOYA OYINGCWELE”—NJANI?
3. Abaprofeti nababhali beBhayibhile ‘babeqhutywa njani ngumoya oyingcwele’?
3 Kangangeminyaka eli-1 610—ukususela ngowe-1513 B.C.E. ukuya kutsho ngowe-98 C.E.—amadoda awahlukeneyo amalunga nama-40 abhala iBhayibhile. Abanye babengabaprofeti ‘ababeqhutywa ngumoya oyingcwele.’ (Funda eye-2 kaPetros 1:20, 21) Ibinzana lesiGrike eliguqulelwe ngokuthi “babeqhutywa” lidlulisela ingcamango “yokunikela okanye ukuthwala into ukusuka kwenye indawo ukuya kwenye,” yaye “linokusetyenziswa ngeendlela ezahlukahlukeneyo: ukukhuthazeka, ukuqhutywa, ukuchukumiseka.”a Liyasetyenziswa kwiZenzo 27:15 xa kuchazwa isikhephe esadudulwa ngumoya wasisa kwindlela ethile. Abaprofeti nababhali beBhayibhile “babeqhutywa ngumoya oyingcwele” kuba uThixo wayenxibelelana nabo, ebakhuthaza yaye ebakhokela ngamandla akhe asebenzayo. Ngenxa yoko, babhala iingcinga zikaThixo kungekhona ezabo. Maxa wambi abaprofeti nababhali abaphefumlelweyo babengayiqondi intsingiselo yeziprofeto zabo okanye oko babekubhala. (Dan. 12:8, 9) Ngokwenene, “sonke iSibhalo siphefumlelwe nguThixo” yaye asicaciswanga ngokweembono zabantu.—2 Tim. 3:16.
4-6. UYehova wasidlulisela ngaziphi iindlela isigidimi sakhe kubabhali beBhayibhile? Yenza umzekelo.
4 Noko ke, umoya oyingcwele wasidlulisela njani isigidimi sikaThixo kubabhali beBhayibhile? Ngaba babechazelwa igama negama ababefanele balibhale okanye banikwa iingcamango ababenokuzibeka ngamazwi abo? Cinga nje ngendlela usomashishini anokuyibhala ngayo ileta. Xa efuna kusetyenziswe amagama athile, usomashishini uyibhala ngokwakhe ileta okanye abizele unobhala igama negama amakalibhale. Unobhala uyabhala aze ke usomashishini ayityobele. Maxa wambi, usomashishini uchazela unobhala iingongoma eziziintloko aze ke yena unobhala ayibhale esebenzisa isigama nesimbo sakhe sokubhala. Emva koko, usomashishini unokuyifunda ekhangela iimpazamo aze ke ayibuyisele kunobhala ukuba azilungise ukuba zikho. Ekugqibeleni, usomashishini uyayityobela le leta yaye igqalwa njengevela kuye.
5 Ngendlela efanayo, ezinye iinxalenye zeBhayibhile zabhalwa “ngomnwe kaThixo.” (Eks. 31:18) Kanti uYehova wayebabizela ababhali xa efuna basebenzise amagama akhethekileyo. Ngokomzekelo, kwiEksodus 34:27 sifunda oku: “Waqhubeka wathi uYehova kuMoses: ‘Wabhale phantsi la mazwi, kuba ngawo la mazwi ndenza umnqophiso kunye nawe noSirayeli.’” Ngokufanayo, uYehova wathi kumprofeti uYeremiya: “Zibhalele encwadini onke amazwi endiza kuwathetha kuwe.”—Yer. 30:2.
6 Noko ke, kwiimeko ezininzi, kwathi ngokungummangaliso kwadluliselwa iingcamango kungekhona amagama akhethekileyo kwiingqondo nakwiintliziyo zababhali beBhayibhile, bevunyelwa ukuba bazikhethele amazwi okuzichaza. INtshumayeli 12:10 ithi: “Umhlanganisi wafuna ukufumana amazwi ayolisayo nokubhala amazwi achanileyo enyaniso.” Umbhali weVangeli uLuka, ‘wazilanda zonke izinto ukususela kwasekuqaleni ngokuchanileyo, wazibhala ngolungelelwano olucwangcisiweyo.’ (Luka 1:3) Umoya kaThixo waqinisekisa ukuba ukungafezeki kwabantu akusingxengi isigidimi sakhe.
7. UThixo ububonise njani ubulumko bakhe ngokusebenzisa abantu ukuba babhale iBhayibhile?
7 Ubulumko bukaThixo obungenakuthelekiswa nanto bubonakala ekusebenzisa abantu ukubhala iBhayibhile. Amazwi akadluliseli nje inkcazelo kodwa kwaneemvakalelo. Kuthekani ukuba uYehova wayesebenzise iingelosi? Ngaba zaziza kuzidlulisela njengabantu iimvakalelo ezinjengokoyika, intlungu nokuphoxeka, zinto ezo zixhaphakileyo eluntwini? Ngokuvumela kwakhe abantu abangafezekanga ukuba bakhethe indlela yokuchaza iingcamango abaye bazifumana ngomoya oyingcwele, uThixo wadlulisela isigidimi sakhe ngothando, ngeendlela ezahlukahlukeneyo, nangendlela efikelela iimvakalelo zabantu!
UBUNGQINA MABUHLALE BUBONAKALA
8. Kutheni kunokuthiwa ayikho enye incwadi yonqulo efana neBhayibhile?
8 Kukho ubungqina obuninzi obubonisa ukuba iBhayibhile iLizwi likaThixo eliphefumlelweyo. Ayikho enye incwadi yonqulo esinceda simazi uThixo ngaphezu kweBhayibhile. Ngokomzekelo, iincwadi zamaHindu eziquka amaculo eVedic, iincwadi ezithetha ngala maculo, zisichazela ngemibhiyozo yecawa, imibhalo yentanda-bulumko ekuthiwa ziiUpanishads, nemiqulu yamabali ebizwa ngokuba yiRamayana neMahabharata. IBhagavad Gita, incwadi echaza indlela yokuziphatha, iyinxalenye yeMahabharata. KwiTipitaka yamaBhuda (Imiqulu Emithathu), omnye umqulu ugxininisa kwimigaqo nemithetho ezimele ziphile ngayo iimonki noonongendi. Omnye umqulu ugxininisa kwiinkolelo zamaBhuda. Owesithathu uyingxelo yeemfundiso zobuBhuda. UBhuda akazange athi unguthixo, engazange athethe nakangako ngoThixo. Iincwadi zobuConfucius zingumxube weengxelo ngeziganeko, imigaqo yokuziphatha, imilingo neengoma. Eneneni, incwadi engcwele yamaSilamsi ikhuthaza ukukholelwa kuThixo omnye, owazi yonke into olazi kwangaphambili ikamva kodwa awuthethi nto ngegama likaThixo, uYehova elivela kangangezihlandlo ezingamawakawaka eBhayibhileni.
9, 10. Sinokufunda ntoni ngoThixo eBhayibhileni?
9 Nangona uninzi lweencwadi zonqulo zingathethi kangako ngoThixo, iBhayibhile iyasixelela ngoYehova uThixo nemisebenzi yakhe. Isinceda sazi iinkalo ezininzi zobuntu bakhe. IBhayibhile ithetha ngoThixo kungekuphela nje njengonamandla onke, olulumkileyo nosesikweni, iphinde imchaze njengoThixo osithandayo. (Funda uYohane 3:16; neyoku-1 kaYohane 4:19.) Ukongezelela, iBhayibhile isixelela ukuba: “UThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZe. 10:34, 35) Ngandlel’ ithile, ukubakho kweBhayibhile kububungqina bale nyaniso. Iingcali zeelwimi zithi, kwiilwimi ezimalunga nama-6 700 ezithethwa ehlabathini lonke namhlanje, ezili-100 kuzo zithethwa ngama-90 ekhulwini abantu abasehlabathini. Sekunjalo, iBhayibhile epheleleyo okanye inxalenye yayo iye yaguqulelwa kwiilwimi ezingaphezu kwama-2 400. Phantse wonke umntu emhlabeni ubuncinane unenxalenye yayo.
10 UYesu wathi: “UBawo uyasebenza kude kube ngoku, nam ke ndiyasebenza.” (Yoh. 5:17) ‘Ukususela kwixesha elingenammiselo ukusa kwixesha elingenammiselo uYehova nguThixo.’ Ngoko, cinga ngazo zonke izinto azenzileyo! (INdu. 90:2) YiBhayibhile kuphela esichazela ngemisebenzi kaThixo yexesha elidluleyo neyangoku yaye ityhila noko aya kukwenza kwixa elizayo. Kwakhona iZibhalo zisifundisa ngoko kumkholisayo nokungamkholisiyo, yaye zisixelela nendlela esinokusondela ngayo kuye. (Yak. 4:8) Masingaze sivumele naluphi usukelo lwethu okanye izinto esizixhalabeleyo zisenze simke kuye.
11. Bubuphi ubulumko obungenakuthelekiswa nanto nobunokuthenjwa obufumaneka eBhayibhileni?
11 Ubulumko obungenakuthelekiswa nanto obuseBhayibhileni bukwabonisa ukuba le ncwadi ivela kuMthombo ongentla kunabantu. Umpostile uPawulos wabhala wathi: “Ngubani na oyaziyo ingqondo kaYehova, ukuze amyalele?” (1 Kor. 2:16) Le ndinyana isekelwe koko umprofeti uIsaya wakubuza abantu bexesha lakhe: “Ngubani na olinganise umoya kaYehova, yaye ngubani na onokuthi njengendoda emcebisayo amazise nantoni na?” (Isa. 40:13) Impendulo izicacele, akakho. Yiloo nto ukusebenzisa icebiso leZibhalo emtshatweni, ekuqeqesheni abantwana, ekuzonwabiseni, kunxulumano, kwindlela esisebenza ngayo, ekunyanisekeni nasekuziphatheni kusoloko kusiba nemiphumo esemagqabini! IBhayibhile ayinakuze isilahlekise. Kwelinye icala, abantu abasoloko benobulumko bokunikela amacebiso aluncedo. (Yer. 10:23) Amacebiso abo atshintsha umhla nezolo kuba bafumanisa ukuba bayasilela. IBhayibhile ithi: “Iingcamango zabantu . . . zingumphunga.”—INdu. 94:11.
12. IBhayibhile iye yasinda phantsi kwayiphi imigudu ukutyhubela iinkulungwane?
12 Obunye ubungqina obubonisa ukuba uThixo nguMbhali weBhayibhile, bobo butyhilwa yimbali ngokuphathelele imigudu eyenziweyo yokutshabalalisa isigidimi sayo. Ngowe-168 B.C.E., uKumkani waseSiriya uAntiochus IV wakha wagqogqa iincwadi eziphefumlelweyo zoMthetho ngenjongo yokuzitshisa. Ngowama-303 C.E. uMlawuli waseRoma, uDiocletian, wakhupha ilizwi lokuba kutshatyalaliswe iindawo zokuhlanganisana zamaKristu kuze kutshiswe neZibhalo zawo. Loo ntlaselo yaqhubeka kangangeshumi leminyaka. Emva kwenkulungwane ye-11, oopopu bakhokela kwimigudu yokuthintelwa kokusasazwa kolwazi lweBhayibhile, bekuchasa ukuguqulelwa kweZibhalo ngeelwimi zabantu abaqhelekileyo. Nakuba uSathana namahlakani akhe babesenza loo migudu, iBhayibhile iye yalondolozwa de kube ngoku. UYehova akazange avumele nabani na ukuba onakalise esi sipho sakhe siya ebantwini.
UBUNGQINA OBUYE BEYISELA ABANTU ABANINZI
13. Bubuphi ubungqina bokuba iBhayibhile iphefumlelwe?
13 Kukho nobunye ubungqina bokuphefumlelwa kweBhayibhile: iyangqinelana, ichanile ngokwenzululwazi, ezinye iziprofeto zayo zizalisekile, ithetha phandle, inamandla okuguqula izimilo, ichanile ngokwembali yaye izichaza ngendlela eyanelisayo izinto ezikwisiqendu 1. Phawula oko kuye kwanceda abanye abantu babona ukuba iBhayibhile ivela kuThixo.
14-16. (a) Yintoni eyeyisela umSilamsi, umHindu nomntu owayengaqiniseki ngobukho bukaThixo, ukuba iBhayibhile ivela kuThixo? (b) Bubuphi ubungqina bokuphefumlelwa kweBhayibhile ongathanda ukubusebenzisa kubulungiseleli?
14 UAnwarb wakhula engumSilamsi kwilizwe elikuMbindi-Mpuma. Ngoxa wayehlala okwexeshana kuMntla Merika, watyelelwa ngamaNgqina kaYehova. UAnwar uthi: “Ngelo xesha, ndandingafuni nokuzibona iicawa zamaKristu ngenxa yeeMfazwe zoMnqamlezo nangenxa yokuNcinwa. Noko ke, ngenxa yokuba ngemveli ndingumntu othanda ukwazi, ndavuma ukuqhutyelwa isifundo seBhayibhile.” Akuzange kube kudala, uAnwar wagoduka waza akaphinda adibane namaNgqina. Kwiminyaka kamva, wafudukela eYurophu apho waqalisa ukufunda iBhayibhile waza wafikelela kwesi sigqibo: “Ukuzaliseka kweziprofeto zeBhayibhile, ukungqinelana kweZibhalo Ezingcwele, ukungaphikisani kweBhayibhile nothando oluphakathi kwabakhonzi bakaYehova, kwandenza ndeyiseka ekubeni iBhayibhile liLizwi likaThixo.” UAnwar wabhaptizwa ngowe-1998.
15 UAsha oneminyaka elishumi elinesithandathu ubudala uzalwa kwintsapho ezinikele kubuHindu. Uthi: “Ndandithandaza kuphela xa ndiye etempileni okanye xa izinto zingandihambeli kakuhle, kodwa ndandingacingi nokucinga ngoThixo xa kumnandi.” Walek’ umsundulo esithi: “Noko ke, xa kwankqonkqoza amaNgqina kaYehova ekhaya, ubomi bam batshintsha ngokupheleleyo.” UAsha wafunda iBhayibhile waza wazi ukuba uThixo unguMhlobo wakhe. Yintoni eyameyisela ekubeni iBhayibhile iphefumlelwe nguThixo? Uthi: “IBhayibhile iphendula nawuphi na umbuzo endiwubuzayo. Yandinceda ndanokholo nangona ndandingamboni uThixo—kunokuba ndiye kuqubuda kwizithixo ezisetempileni.”
16 UPaula ukhule engumKatolika, kodwa njengoko wayekhula wayengaqiniseki ngobukho bukaThixo. Emva koko kwenzeka into ethile. Uyabalisa: “Ndadibana nomhlobo wam ekwakusele kuziinyanga eziliqela ndingaboni. Elo xesha yayilixesha leehippie. Xa ndabona indlela awayetshintshe ngayo—sele echebe kakuhle yaye onwabile—ndambuza, ‘Kwenzeke ntoni kuwe, yaye ubuphi ixesha elide kangaka?’ Wathi ebefunda iBhayibhile namaNgqina kaYehova waza wasele eshumayela kum.” Akubona indlela inyaniso yeZibhalo enamandla ngayo, uPaula owayekade engaqiniseki ngobukho bukaThixo, waba nomdla kwisigidimi seBhayibhile waza wayamkela njengephefumlelwe nguThixo.
“ILIZWI LAKHO LISISIBANE ELUNYAWENI LWAM”
17. Kuya kukunceda njani ukufunda nokucamngca ngeLizwi likaThixo yonke imihla?
17 IBhayibhile sisipho esimangalisayo uYehova asinike sona ngomoya wakhe oyingcwele. Kunandiphe ukuyifunda yonke imihla, yaye uya kuyithanda ngakumbi uze uthande noMbhali wayo. (INdu. 1:1, 2) Thandaza xa uza kuyifunda, ucela umoya kaThixo ukuba walathise iingcinga zakho. (Luka 11:13) IBhayibhile ineengcinga zikaThixo, yaye njengoko ucamngca ngazo, nawe uya kuba neengcinga zikaThixo.
18. Kutheni ufanele uqhubeka ufunda iBhayibhile?
18 Ngoxa uqhubeka ukhula elwazini oluchanileyo lwenyaniso, phila ngokuvisisana nezinto ozifundayo. (Funda iNdumiso 119:105.) Qondela kwiZibhalo njengoko ubuya kwenjenjalo esipilini. Ukuba uyabona ukuba kufuneka wenza utshintsho kwiinkalo ezithile, yenza njalo. (Yak. 1:23-25) ILizwi likaThixo lisebenzise njengekrele lokukhusela iinkolelo zakho nelokususa iimfundiso zobuxoki kwiintliziyo zabalulamileyo. (Efe. 6:17) Njengoko usenjenjalo, yiba nombulelo ngesibakala sokuba abaprofeti namadoda awayebhala isigidimi seBhayibhile ngokwenene ‘ayeqhutywa ngumoya oyingcwele.’
[Imibhalo esemazantsi]
a IGreek-English Lexicon of the New Testament kwakunye neOther Early Christian Literature.
b Amanye amagama atshintshiwe.
[Amagama acatshulweyo akwiphepha 29]
Funda iBhayibhile yonke imihla, yaye uya kumthanda ngakumbi uMbhali wayo
[Umfanekiso okwiphepha 26]
Ileta ivela kuloo mntu uyityobeleyo