Xa Isono Singasekho

“NGABA sazalelwa esonweni?” Lo mbuzo wamtsho wayindindi umfundi onesidanga kwelaseUnited States kamsinya nje emva kokuba eqalise ukufundisisa iBhayibhile. Ngenxa yemvelaphi yakhe yobuHindu, wayeyizibula ingcamango yesono esizuzwe njengelifa. Wayeyihl’ amahlongwane le nto esithi, ukuba ngokwenene isono sizuzwe njengelifa, ukubukhanyela okanye ukungabukhathaleli ubukho baso kuya kuba kukudlala ngexesha. Umntu angayifumana njani ke impendulo yalo mbuzo?

Ukuba sizuzwe njengelifa, isono simele ukuba sinesiqalo. Ngaba umntu wokuqala wadalwa engendawo, ukuze adlulisele iimpawu ezimbi kubantwana bakhe? Okanye ngaba eso siphako savela mva? Saqala nini kanye kanye isono? Kwelinye icala, ukuba isono siyinto okanye umgaqo ombi kanaphakade, ngaba sinokuze sibe nethemba lokukhululeka kuso?

Ngokwenkolo yamaHindu, ukubandezeleka nobubi zingumtya nethunga nendalo. Umphengululi wamaHindu yena wahlomla ngelithi: “Ukubandezeleka [okanye ububi], kufana nqwa nesifo samathambo esingapheliyo, esisuka apha siye phayaa kodwa singenakususwa ngokupheleleyo.” Ngokuqinisekileyo ububi bebuyinxalenye yehlabathi loluntu ukutyhubela imbali. Ukuba bavela kuqala kuneengxelo zabantu ezingokwembali, makube iimpendulo ezinokuthenjwa ngemvelaphi yabo zinokuvela kumthombo ophakame kakhulu kunomntu. Iimpendulo zimele zivele kuThixo.—INdumiso 36:9.

Umntu—Wadalwa Engenasono

Iingcaciso ezingokudalwa komntu ezifumaneka kwiiVedas ziyimifuziselo, sivuma ngelitshoyo isithandi sobulumko samaHindu uNikhilananda. Ngokunjalo, nenkoliso yeenkonzo zaseMpuma inikela nje kuphela iingcaciso eziyintsomi ngendalo. Sekunjalo, kukho izizathu ezisengqiqweni nezingokwenzululwazi ezibangela ukuba sikholelwe kwingxelo yeBhayibhile yokudalwa komntu wokuqala.a Isahluko sayo sokuqala sithi: “Wamdala ke uThixo umntu ngokomfanekiselo wakhe; wamdala ngokomfanekiselo kaThixo; wadala indoda nenkazana.”—Genesis 1:27.

Kuthetha ukuthini ukudalwa “ngokomfanekiselo kaThixo”? Kuthetha ukuthi: Umntu wenziwa ngokufana noThixo, eneempawu zobuthixo—ezinjengokuba sesikweni, ubulumko nothando—oko kwamahlula kwizilwanyana. (Thelekisa eyabaseKolose 3:9, 10.) Ezi mpawu zamnika amandla okukhetha ukwenza okulungileyo okanye okubi, zamenza wasisidalwa esinenkululeko yokuzenzela izigqibo. Ekudalweni kwakhe, umntu wokuqala wayengenasono, kungekho bubi okanye ukubandezeleka ebomini.

Kumntu onguAdam, uYehova uThixo wawisa lo mthetho: “Yonke imithi yomyezo ungayidla uyidle; ke wona umthi wokwazi okulungileyo nokubi uze ungawudli; kuba mhlana uthe wawudla, uya kufa.” (Genesis 2:16, 17) Ngokukhetha ukuthobela, uAdam nomkakhe, uEva, babenokunikel’ indumiso nozuko kuMdali wabo baze bahlale bengenasono. Kwelinye icala, isenzo sokungathobeli sasiya kubonakalisa ukusilela kwabo ukuhlangabezana nemilinganiselo kaThixo egqibeleleyo size sibashiye bengafezekanga—benesono.

UAdam noEva abazange badalwe benobuthixo. Noko ke, babenomlinganiselo othile weempawu zobuthixo namandla okwenza izigqibo. Ekubeni babedalwe nguThixo, babengenasono, okanye befezekile. (Genesis 1:31; Duteronomi 32:4) Ukudalwa kwabo akuzange kuphazamisane nemvisiswano ebisoloko ikho phakathi koThixo nendalo kangangeminyaka emininzi ukuza kuthi ga ngelo xesha. Saqala njani ke isono?

Imvelaphi Yesono

Isono savela okokuqala kummandla womoya. Ngaphambi kokudalwa komhlaba nomntu, uThixo wadala izidalwa zomoya ezikrelekrele—iingelosi. (Yobhi 1:6; 2:1; 38:4-7; Kolose 1:15-17) Enye yezi ngelosi yayizicingela kakhulu ngenxa yobuhle nobukrelekrele bayo. (Thelekisa uHezekile 28:13-15.) Ngokomyalelo kaThixo kuAdam noEva wokuvelisa abantwana, le ngelosi yabona ukuba kungekudala wonke umhlaba wawuza kuzala ngabantu abangamalungisa, bonke bekhonza uThixo. (Genesis 1:27, 28) Esi sidalwa singumoya safuna ukuba banqule sona. (Mateyu 4:9, 10) Ukuphethuphethulana nalo mnqweno engqondweni yaso kwasenza sathabatha ikhondo eliphosakeleyo.—Yakobi 1:14, 15.

Xa yayithetha noEva isebenzisa inyoka, le ngelosi inemvukelo yathi uThixo wayembandeza ulwazi awayefanele abe nalo ngokumalela ukutya isiqhamo somthi wokwazi okulungileyo nokubi. (Genesis 3:1-5) Obo yayibubuxoki obuphindaphindeneyo—isenzo sesono. Ngokuthetha obu buxoki, le ngelosi yazenza umoni. Ngenxa yoko yabizwa ngokuba nguMtyholi, umhlebi, noSathana, umchasi kaThixo.—ISityhilelo 12:9.

Intshumayelo kaSathana yaba nomphumo ongemhle kuEva. Ekholelwa kumazwi alo Mlingi, wazivumela ukuba alukuhlwe aze atye esinye seziqhamo zomthi owalelweyo. Indoda yakhe, uAdam, yamthelela ekutyeni esi siqhamo, baza ngokwenjenjalo bobabini baba ngaboni. (Genesis 3:6; 1 Timoti 2:14) Ngokucacileyo, ngokukhetha ukungamthobeli uThixo, abazali bethu bokuqala baphulukana nemfezeko baza baba ngaboni.

Kuthekani ngenzala ka-Adam noEva? IBhayibhile icacisa yenjenje: “Isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” (Roma 5:12) Umthetho wemfuza wawusele usebenza. UAdam wayengenakudlulisela ebantwaneni bakhe oko wayengenako. (Yobhi 14:4) Ekubeni sasingasafezekanga, isibini sokuqala sasisele singaboni ekukhawulweni kwabantwana baso. Ngenxa yoko, sonke—siye sazuza isono njengelifa. (INdumiso 51:5; Roma 3:23) Ngokunjalo ke, isono siye sangunozala wobubi nokubandezeleka. Ngaphezu koko, ngenxa yaso, siyakhula sikhokhobe size sife, “kuba umvuzo isono esiwuhlawulayo kukufa.”—Roma 6:23.

Isazela ‘Siyasimangalela’ Okanye ‘Sisingxengxezele’

Kwakhona khawucinge ngomphumo wesono kwisimo sengqondo sesibini sokuqala esingabantu. Bagquma iindawo ezithile zemizimba yabo baza bazama ukumzimela uThixo. (Genesis 3:7, 8) Ngaloo ndlela isono sabenza baziva benetyala, benexhala yaye beneentloni. Noluntu namhlanje luqhelene gqitha nezi mvakalelo.

Ngubani ongazange akhe akhathazeke ngenxa yokubandeza umntu osweleyo ububele okanye ongazange azive ebuhlungu ngenxa yokuthetha amazwi anga angaphinda awaginye? (Yakobi 4:17) Kutheni sikhathazeka ngolo hlobo nje? Umpostile uPawulos ucacisa athi kungenxa ‘yomthetho obhalwe ezintliziyweni zethu.’ Ukuba izazela zethu azitshanga, nakuphi na ukwaphula loo mthetho kusenza siphehluzeliswe ngumvandedwa. Kungelo xesha ke elithi ilizwi lesazela ‘lisimangalele’ okanye ‘lisingxengxezele.’ (Roma 2:15; 1 Timoti 4:2; Tito 1:15) Enoba siyayiqonda loo nto okanye akunjalo, sinemvakalelo yangaphakathi yoko kubi, okanye yesono!

UPawulos wayeluqonda mhlophe utyekelo awayenalo lwesono. Wavuma wathi: “Xa ndinqwenela ukwenza oko kulungileyo, kusuke kubekho okubi kum. Ngokwenene ndiyayoliswa ngumthetho kaThixo ngokomntu endinguye ngaphakathi, kodwa ndibona omnye umthetho emalungwini am usilwa ngokunxamnye nomthetho wengqondo yam yaye undikhokelela ndithinjiwe kumthetho wesono osemalungwini am.” Wandula ke uPawulos wabuza: “Ngubani na oya kundihlangula kumzimba ova oku kufa?”—Roma 7:21-24.

Ukukhululeka Esonweni—Njani?

“Ukukhululeka kwisithethe samaHindu, kukukhululeka ekuzalweni nasekufeni ngokuphindaphindiweyo,” watsho njalo omnye umphengululi. Njengesicombululo, nobuBhuda balatha kwiNirvana—imeko yokungabikho zingqondweni kubomi bokwenene. Njengoko lungazange luyamkele ingcamango yesono esizuzwe njengelifa, ubuHindu buthembisa nje kuphela ukukhululeka kubomi bobuntu.

Kwelinye icala, indlela iBhayibhile eyinikela ngayo inkululeko iphumela ekushenxisweni kwemeko yesono ngokoqobo. Emva kokubuza indlela anokuhlangulwa ngayo esonweni, umpostile uPawulos wahlabela mgama ngokuphendula athi: “Ndiyambulela uThixo ngaye uYesu Kristu iNkosi yethu!” (Roma 7:25) Ewe, intlangulo ivela kuThixo ngoYesu Kristu.

Ngokutsho kwencwadi yeVangeli kaMateyu, “uNyana womntu,” uYesu Kristu, weza ukuze “anikele ngomphefumlo wakhe ube yintlawulelo ngenxa yabaninzi.” (Mateyu 20:28) Njengokuba kubhalwe kweyoku-1 kuTimoti 2:6, uPawulos wabhala wathi uYesu ‘wazinikela waba yintlawulelo elinganayo yabo bonke.’ Igama elithi “intlawulelo” libonisa ukuhlawulwa kwexabiso lokukhululwa kwabathinjwa. Isibakala sokuba iyintlawulelo elinganayo sibalaselisa umlinganiselo weli xabiso ukuze izikali zokusesikweni zilingane. Kodwa ukufa komntu omnye kunokugqalwa njani ‘kuyintlawulelo elinganayo yabo bonke’?

UAdam wathengisa ngalo lonke uluntu esonweni nasekufeni, kuquka nathi. Ixabiso, okanye isohlwayo, awanikela ngalo yayibubomi bakhe obufezekileyo bobuntu. Ukuze kubuyiselwe oku, obunye ubomi obufezekileyo bobuntu—intlawulelo elinganayo—yayimele ihlawulwe. (Eksodus 21:23; Duteronomi 19:21; Roma 5:18, 19) Ekubeni kungekho namnye umntu ongafezekanga owayenokunikela ngale ntlawulelo, uThixo, ngobulumko bakhe obungenasiphelo, wasivulela indlela yokuphuma kobu bugxwayiba. (INdumiso 49:6, 7) Wafudusa ubomi obufezekileyo bokuphela koNyana wakhe amzeleyo ezulwini ukuya kwisibeleko sentombi enyulu emhlabeni, esenza ukuba azalwe njengomntu ofezekileyo.—Luka 1:30-38; Yohane 3:16-18.

Ukuze aphumeze umsebenzi wokukhulula uluntu, uYesu kwafuneka ahlale ecocekile ngalo lonke ixesha awayephila ngalo emhlabeni. Wenjenjalo kanye. Wandula ke wafa ukufa okulidini. Ngale ndlela uYesu waqinisekisa ukuba ixabiso lobomi bakhe obufezekileyo bobuntu—obakhe ngenkqu—lalifumaneka ukuze abuhlawule njengentlawulelo yokukhulula uluntu.—2 Korinte 5:14; 1 Petros 1:18, 19.

Oko Sinokukwenzelwa Yintlawulelo KaKristu

Idini lentlawulelo likaYesu linokusinceda nangawo lo mzuzu. Ngokuba nokholo kulo, sinokuba nokuma okucocekileyo phambi koThixo size sifumane inyameko kaYehova enothando nothantamiso. (IZenzo 10:43; Roma 3:21-24) Kunokuba sidliwe sisazela ngenxa yezono esisenokuba sizenzile, ngokukhululekileyo sinokufuna ukuxolelwa nguThixo ngenxa yale ntlawulelo.—Isaya 1:18; Efese 1:7; 1 Yohane 2:1, 2.

Kwimihla ezayo, intlawulelo iya kulwenza lunyangwe ngokupheleleyo uluntu kwimeko yokugula eyabangelwa sisono. Incwadi yokugqibela yeBhayibhile ithetha ‘ngomlambo wamanzi obomi’ oqukuqela uphuma kwitrone kaThixo. Emacaleni alo mlambo kukho imithi emihle yeziqhamo enamagqabi ‘okunyanga iintlanga.’ (ISityhilelo 22:1, 2) Ngokufuziselayo, apha iBhayibhile ithetha ngelungiselelo loMdali elimangalisayo lokukhulula uluntu ngonaphakade kwisono nokufa ngenxa yentlawulelo yedini likaYesu.

Akusekudala ukuba uzaliseke lo mbono wesiprofeto wencwadi yeSityhilelo. (ISityhilelo 22:6, 7) Ngelo xesha ke bonke abantu abantliziyo zilungileyo baya kufezeka, njengoko beya kube ‘bekhululwe ekukhotyokisweni kukonakala.’ (Roma 8:20, 21) Ngaba oku akufanele kusishukumisele ekubeni sifunde okungakumbi ngoYehova uThixo nangoNyana wakhe onyanisekileyo, uYesu Kristu, owaba yintlawulelo?—Yohane 17:3.

[Imibhalo esemazantsi]

[Umfanekiso okwiphepha 6]

UAdam wangenisa isono nokufa kuluntu

[Umfanekiso okwiphepha 7]

Idini likaYesu lentlawulelo liyasikhulula kwisono nokufa