Uyakhumbula Na?

Ngaba uye wawafumanisa eluncedo gqitha amanqaku akutshanje eMboniselo? Ngoko kutheni ungavavanyi inkumbulo yakho ngale mibuzo ilandelayo?

◻ Iya kuba njani iArmagedon? (ISityhilelo 16:14, 16) Ayisayi kuba yimbubhiso yenyukliya okanye intlekele ebangelwe ngabantu. Kunoko, yimfazwe kaThixo eya kuphelisa zonke iimfazwe zabantu, itshayele kuthi tu bonke abo baphembelela iimfazwe ezinjalo, ize izise uxolo lokwenyaniso kwabo bathanda uxolo. Ayisayi kulibazisa. (Habhakuki 2:3)—4/15, iphepha 17.

◻ Ngumtshato onjani ozukisa uYehova? Umtshato obalaselisa izinto zokomoya kunezinto zehlabathi uya kumzukisa ngokwenene uYehova. AmaKristu aya kuzinandipha ezo zihlandlo ukuba ayaziphepha izithethe neenkolelo ezithob’ isidima zehlabathi nokubaxa kwalo izinto; ukuba akazivumeli ukuba ziphazamisane nemisebenzi eqhelekileyo yobuthixo; nokuba abonakalisa ukuthozama kunokuqhayisa.—4/15, iphepha 26.

◻ Unokubonwa ngantoni umntu ogcina ingqibelelo? Umntu ogcina ingqibelelo unokuthenjwa, kungekhona nje ngomnye umntu kodwa, okubaluleke ngakumbi, nguThixo. Intliziyo ehlambulukileyo yomntu onjalo ibonakaliswa zizenzo zakhe. Akahanahanisi. Akamntu onamaqhinga okanye onganyanisekanga. (2 Korinte 4:2)—5/1, iphepha 6.

◻ Kwakutheni ukuze uYeremiya athi: “Kuyilungele indoda ukuba iyithwale idyokhwe kwasebutsheni bayo”? (IZililo 3:27) Ukufunda ukujamelana nezilingo ngoxa uselula kukuxhobisela iingxaki ezinzima zokukhula. (2 Timoti 3:12) Iingenelo zokuthembeka zingaphezulu lee kunaso nasiphi na isiqabu sokomzuzwana esinokuziswa kukulalanisa.—5/1, iphepha 32.

◻ Yintoni eyayifuziselwa kukuvela kukaMoses noEliya kumbono wokwenziwa kumila kumbi? Ngokwengqiqo yokwenziwa kumila kumbi, uMoses noEliya babebafuzisela ngokufanelekileyo abazalwana abathanjisiweyo bakaYesu. Isibakala sokuba ‘babonakala benozuko’ kunye noYesu sasifuzisela ukuba amaKristu athanjisiweyo athembekileyo ayeza ‘kuzukiswa ndawonye’ noYesu kwilungiselelo loBukumkani basezulwini. (Luka 9:30, 31; Roma 8:17; 2 Tesalonika 1:10)—5/15, iphepha 12, 14.

◻ Yintoni “imfihlelo engcwele” kaThixo? (1 Korinte 2:7) “Imfihlelo engcwele” kaThixo isekelwe kuYesu Kristu. (Efese 1:9, 10) Noko ke, asikokufaniswa nje kukaYesu njengoMesiya othenjisiweyo. Ibandakanya urhulumente wasezulwini, uBukumkani bukaThixo obungoMesiya, yaye iquka indima uYesu abelwe ukuba ayiphumeze kwiinjongo zikaThixo.—6/1, iphepha 13.

◻ UmKristu ufanele akujonge njani ukwaluphala okanye ukugula? Kunokuba ajonge izilingo ezinjalo njengezimsikel’ umda enkonzweni yakhe kuYehova, ufanele azijonge njengethuba lokwandisa intembelo yakhe kuye. Kwakhona ufanele akhumbule ukuba ukuxabiseka kwenkonzo yamaKristu akulinganiswa ngobungakanani benkonzo yakhe kodwa bulinganiswa ngokholo nangobunzulu bothando lwakhe. (Marko 12:41-44)—6/1, iphepha 26.

◻ Ukusebenzisa kukaYehova abantu endaweni yeengelosi ekubhaleni iBhayibhile kwabubonakalisa njani ubulumko bakhe obukhulu? Ukuba ibingathethi ngabantu, bekunokuba nzima ukuba sisiqonde isigidimi seBhayibhile. Kwakhona, iBhayibhile inomtsalane, inezinto ezahlukahlukeneyo, ibangel’ umdla kuba ibhalwe ngabantu.—6/15, iphepha 8.

◻ Yintoni imfihlelo yolonwabo lwentsapho? Imfihlelo yolonwabo lwentsapho iseLizwini likaThixo, iBhayibhile, nasekusetyenzisweni kwemigaqo yayo, enjengokuzeyisa, ukuhlonelwa kobuntloko, ukunxibelelana nothando.—6/15, iphepha 23, 24.

◻ Nguwuphi umahluko omkhulu okhoyo phakathi kokuphilisa okwenziwa nguYesu noko ngokuqhelekileyo kwenziwa ngabo bathi banamandla okuphilisa namhlanje? Izihlwele zazingenahlombe ngokugqithiseleyo yaye noYesu wayengabonakali ngokungathi ushiywe ziingqondo. Ukongezelela, uYesu akazange oyisakale ukuphilisa abagulayo engxengxeza ngelithi abanamnikelo waneleyo okanye abanakholo.—7/1, iphepha 5.

◻ UYehova uye wabanceda njani abantu bakhe ukuba babandakanyeke kwinjongo yakhe yobuThixo ephathelele igama lakhe noBukumkani bakhe? Okokuqala, uYehova uphathise abantu bakhe inyaniso. Okwesibini, ubanike umoya wakhe oyingcwele. Yaye okwesithathu, sinobuzalwana bazwenibanzi nelungiselelo elihle lentlangano kaYehova ukuze sinqule.—7/1, iphepha 19, 20.

◻ Yintoni isidima? Ukuba nesidima kukuziphatha kakuhle, ukulunga, isenzo nengcinga elungileyo. Akulophawu nje olungabonakaliyo kodwa luphawu olunemisebenzi, oluzibonakalisayo. Isidima sithetha okungaphezulu kokuphepha isono; sithetha ukuzabalazela ukwenza okulungileyo. (1 Timoti 6:11)—7/15, iphepha 14.

◻ Liliphi elona lifa lixabiseke kakhulu abazali abanokulishiyela abantwana babo? Elona lifa lixabisekileyo ngumzekelo wabo wokubonakalisa uthando kwabanye. Abantwana bakufuna ngokukhethekileyo ukubona nokuva abazali babo bevakalisa yaye bebonakalisa uthando lwabo olungazenzisiyo ngoThixo kuyo yonke into abayenzayo.—7/15, iphepha 21.

◻ Ziziphi ezinye zezinto ezibalulekileyo ukuze isifundo sentsapho siphumelele? Isifundo sentsapho simele siqhutywe rhoqo. Umele ‘uzithengele ixesha’ lesifundo. (Efese 5:15-17) Amaxesha okufunda wenze abe nganomdla ebantwaneni ngokwenza iBhayibhile iphile. Ukuze abantwana basinandiphe, kufuneka bazive bebandakanyekile.—8/1, iphepha 26, 28.