Ngaba Uphilela Unamhlanje Okanye Uphilela Ikamva Elingunaphakade?
“Sasindiselwa kweli themba.”—ROMA 8:24.
1. Ayefundisa ntoni amaEpikure, yaye olo hlobo lwentandabulumko lwawachaphazela njani amanye amaKristu?
UMPOSTILE UPAWULOS wabhalela amaKristu aseKorinte esithi: “Kwenzeka njani na ukuba abathile phakathi kwenu bathi akukho luvuko lwabafileyo?” (1 Korinte 15:12) Kubonakala ukuba, intandabulumko eyayinempembelelo embi yenyange elingumGrike uEpikure yayiwahlasele amaKristu enkulungwane yokuqala. Kungoko uPawulos watsalel’ ingqalelo kwimfundiso yamaEpikure ethi: “Masidle size sisele, kuba ngomso siza kufa.” (1 Korinte 15:32) Belikhaba ngaw’ omane naliphi na ithemba lobomi emva kokufa, abalandeli besi sithandi sobulumko babekholelwa kwelokuba uyolo lokwenyama lomntu luyeyona nto ingundoqo okanye ephambili ebomini. (IZenzo 17:18, 32) Intandabulumko yamaEpikure yayiyeyokuzingca, igxeka yaye ithob’ isidima.
2. (a) Kutheni kwakuyingozi kangaka ukulukhanyela uvuko? (b) UPawulos walomeleza njani ukholo lwamaKristu aseKorinte?
2 Oku kuchaswa kovuko kwakunemiphumo enzulu. UPawulos waqiqa ngelithi: “Ukuba, eneneni, akukho luvuko lwabafileyo, noKristu akavuswanga. Kodwa ukuba uKristu akavuswanga, ngokuqinisekileyo ukushumayela kwethu kulilize, nokholo lwethu lulilize. . . . Ukuba besithembele kuKristu kobu bomi kuphela, singabona bokusizelwa kubantu bonke.” (1 Korinte 15:13-19) Ewe, ngaphandle kwethemba lekamva elingunaphakade, ukuba ngumKristu bekuya kuba “lilize.” Bekungayi kuba nanjongo. Akumangalisi ngoko ukuba, lakuba phantsi kwale mpembelelo yeengcamango zobuhedeni, ibandla laseKorinte laba neengxaki ezininzi. (1 Korinte 1:11; 5:1; 6:1; 11:20-22) Ngoko ke, injongo kaPawulos yayikukomeleza ukholo lwalo eluvukweni. Esebenzisa izibakala ezinamandla, ecaphula iZibhalo yaye esenza imizekeliso, watsho kwacaca gca ukuba ithemba lovuko lalingeyontsomi kodwa laliyinto yokwenene ekuqinisekiweyo ukuba iza kuzaliseka. Ngenxa yoku, wawabongoza amanye amakholwa esithi: “Qinani, ningabi nakushenxiswa, nisoloko ninokuninzi kokwenza emsebenzini weNkosi, nisazi ukuba ukubulaleka kwenu akulolize ngokunxibelelene neNkosi.”—1 Korinte 15:20-58.
“Hlalani Nilindile”
3, 4. (a) Ngokutsho kukaPetros, sisiphi isimo sengqondo esiyingozi ababeza kuba naso abanye ebudeni bemihla yokugqibela? (b) Yintoni ekufuneka sihlale sizikhumbuza ngayo?
3 Namhlanje, abaninzi banesimo sengqondo esinganiki themba sokuphilela unamhlanje. (Efese 2:2) Kunjengokuba umpostile uPetros waxela kwangaphambili. Wathetha ‘ngabagculeli nokugculela kwabo, abathi: “Buphi obu bukho bakhe buthenjisiweyo? Kaloku, ukususela ngomhla ookhokho bethu abalala ngawo ekufeni, zonke izinto zisaqhubeka kanye njengasekuqaleni kwendalo.”’ (2 Petros 3:3, 4) Xa abanquli bokwenyaniso besamkela loo mbono, ‘basenokungasebenzi okanye bangabi nasiqhamo.’ (2 Petros 1:8) Okuvuyisayo kukuba, inkoliso yabantu bakaThixo namhlanje ayiyamkeli loo mbono.
4 Akuphosakelanga ukuba nomdla ekufikeni kwesiphelo sale nkqubo ingendawo ikhoyo yezinto. Khumbula umdla owabonakaliswa ngabapostile bakaYesu: “Nkosi, ububuyisela ngeli xesha na ubukumkani kuSirayeli?” UYesu waphendula: “Asikokwenu ukufumana ulwazi ngamaxesha okanye amathuba uBawo awabeke ngegunya lakhe.” (IZenzo 1:6, 7) Loo mazwi aqulethe isigidimi esiyintloko awayesidlulisele kwiNtaba yemiNquma esithi: “Aniwazi umhla eza ngawo iNkosi yenu. . . . UNyana womntu uza ngelixa eningacinganga ukuba lilo.” (Mateyu 24:42, 44) Kufuneka sihlale sizikhumbuza ngesi siluleko! Bambi basenokuhendeka ukuba babe nesi simo sengqondo, ‘Mhlawumbi ndifanele ndithob’ isantya kancinane nje ndikhe ndithi chu ngcembe kuhle.’ Enjani yona impazamo! Cinga ngoYakobi noYohane, “ooNyana beNdudumo.”—Marko 3:17.
5, 6. Sisiphi isifundo esinokusifumana kumzekelo kaYakobi noYohane?
5 Siyazi ukuba uYakobi wayengumpostile onenzondelelo gqitha. (Luka 9:51-55) Lakuba lisekiwe ibandla lamaKristu, umele ukuba waphumeza indima ephambili. Kodwa xa uYakobi wayesengumfana, uHerode Agrippa I wathi makabulawe. (IZenzo 12:1-3) Ngaba ucinga ukuba uYakobi, akubona ubomi bakhe bufikelela esiphelweni ngesiquphe, wazisola ngokuba nenzondelelo kangako, nangokuzibhokoxa kwakhe kubulungiseleli bakhe? Nakanye! Ngokuqinisekileyo yayimvuyisa into yokuba abe wayechithe eyona minyaka ibalulekileyo kubomi bakhe obufutshane enkonzweni kaYehova. Ngoku, akukho namnye kuthi owaziyo enoba ubomi bakhe bunokufikelela esiphelweni ngesiquphe. (INtshumayeli 9:11; thelekisa uLuka 12:20, 21.) Ngoku kuyacaca ukuba kububulumko ukugcina inzondelelo nenkuthalo yethu ikwinqanaba eliphezulu enkonzweni kaYehova. Ngokwenjenjalo siya kukwazi ukuzenzela igama elihle kuye yaye siqhubeke siphila sinombono wekamva elingunaphakade phambi kwethu.—INtshumayeli 7:1.
6 Kukho isifundo esiyeleleyo kweso esibandakanya umpostile uYohane, owayekho xa uYesu wabongoza ngokunzulu esithi, “Hlalani nilindile.” (Mateyu 25:13; Marko 13:37; Luka 21:34-36) UYohane wakugcina entliziyweni oko, wakhonza ngehlombe kangangamashumi eminyaka. Eneneni, kubonakala ukuba ungoyena waphila ixesha elide kunabo bonke abanye abapostile. Xa uYohane wayesele aluphele, ekwazi ukukhangela emva kuloo mashumi eminyaka yokusebenza ngokuthembeka, ngaba wayigqala njengeyimpazamo, ubomi obulilize okanye obungalungelelananga? Eneneni akunjalo! Wayesakhangele ngomdla kwikamva. Xa uYesu ovusiweyo wathi, “Ewe; ndiyeza ngokukhawuleza,” ngoko nangoko uYohane waphendula esithi, “Amen! Yiza, Nkosi Yesu.” (ISityhilelo 22:20) Ngokuqinisekileyo uYohane wayengaphileli elo xesha, elangazelela ‘ukuphila ubomi obuqhelekileyo’ obuthe chu nobuzolileyo. Wayezimisele ukuqhubeka ekhonza ngabo bonke ubomi namandla akhe, nanini na xa iNkosi yayinokuza. Kuthekani ngathi?
Iziseko Zokukholelwa Kubomi Obungunaphakade
7. (a) Ithemba lobomi obungunaphakade ‘lathenjiswa njani ngaphambi kwamaxesha ekudala ekho’? (b) UYesu walenza lacaca njani ithemba lobomi obungunaphakade?
7 Qinisekiswa kukuba ithemba lobomi obungunaphakade alilophupha nje lomntu. Njengoko uTito 1:2 esitsho, ukuzinikela kwethu kuThixo kusekelwe “kwithemba lobomi obungunaphakade awathi uThixo, ongenakuxoka, wabuthembisa ngaphambi kwamaxesha ekudala ekho.” Kwakuyinjongo yantlandlolo kaThixo ukuba bonke abantu abathobelayo baphile ngonaphakade. (Genesis 1:28) Akukho nto, kwanemvukelo ka-Adam noEva, enokuyibhangisa loo njongo. Njengoko kubhaliwe kwiGenesis 3:15, kamsinya nje uThixo wathembisa ‘ngembewu’ eyayiza kuphelisa yonke intlungu ethwaxa uluntu. Xa le “mbewu” okanye uMesiya, uYesu, wafikayo, wenza ithemba lobomi obungunaphakade laba yimfundiso yakhe esisiseko. (Yohane 3:16; 6:47, 51; 10:28; 17:3) Ngokunikela ngobomi bakhe obufezekileyo njengentlawulelo, uKristu wafumana ilungelo elingokwasemthethweni lokunika uluntu ubomi obungunaphakade. (Mateyu 20:28) Bambi kubafundi bakhe, abali-144 000 xa bebonke, baya kuphila ngonaphakade emazulwini. (ISityhilelo 14:1-4) Ngaloo ndlela abantu ababekhe bafa baza ‘kwambatha ukungafi’!—1 Korinte 15:53.
8. (a) Kukuthini “ukungafi,” yaye kutheni uYehova ejizeka abali-144 000 ngako nje? (b) Liliphi ithemba uYesu awalinika “ezinye izimvu”?
8 “Ukungafi” kuthetha okungaphezulu kokuphila ubomi obungapheliyo. Kubandakanya “amandla obomi obungenakutshatyalaliswa.” (Hebhere 7:16; thelekisa ISityhilelo 20:6.) Noko ke, yintoni ephunyezwa nguThixo ngokunikela ngesi sipho sibalaseleyo? Khumbula ibango likaSathana lokuba akukho nasinye kwizidalwa zikaThixo esinokuthenjwa. (Yobhi 1:9-11; 2:4, 5) Ngokunika abali-144 000 ukungafi, uThixo ubonakalisa intembelo epheleleyo kweli qela eliye lajamelana ngendlela ebalaseleyo nocelomngeni lukaSathana. Kodwa kuthekani ngabo bonke abanye abantu? UYesu waxelela amalungu okuqala alo “mhlambi mncinane” weendlalifa zoBukumkani ukuba ayeya ‘kuhlala ezitroneni ukuze agwebe izizwe ezilishumi elinesibini zakwaSirayeli.’ (Luka 12:32; 22:30) Oku kuthetha ukuba abanye baza kufumana ubomi obungunaphakade emhlabeni njengabalawulwa boBukumkani bakhe. Ngoxa “ezinye izimvu” zinganikwa ukungafi, zifumana ‘ubomi obungunaphakade.’ (Yohane 10:16; Mateyu 25:46) Ngaloo ndlela onke amaKristu anethemba lobomi obungunaphakade. Abulophupha kodwa bulidinga eliqinisekileyo elenziwe ‘nguThixo ongenakuxoka,’ waza walihlawulela ngegazi elixabisekileyo likaYesu.—Tito 1:2.
Ngaba Inzaliseko Yalo Isekude?
9, 10. Ziziphi izinto ezibonisa ngokucacileyo ukuba sikufutshane nesiphelo?
9 Umpostile uPawulos waxela kwangaphambili ukuba “amaxesha amanqam ekunzima ukuqhubana nawo” ayeya kubonisa ukuba ngokuqinisekileyo singene ‘kwimihla yokugqibela.’ Njengoko ibutho labantu elisingqongileyo liwela kwimeko yokungabi naluthando, ukubawa, ukuzifica nokungahloneli uThixo, ngaba asiboni na ukuba imini kaYehova yokugweba le nkqubo yezinto yehlabathi ingendawo isondela ngokukhawuleza? Njengoko ugonyamelo nentiyo zisanda, ngaba asiyiboni na kwindawo esikuyo inzaliseko yamazwi kaPawulos ahlabela mgama esithi: “Abantu abangendawo namabhedengu baya kuhambela phambili ukususela kokubi ukusa kokubi ngakumbi”? (2 Timoti 3:1-5, 13) Bambi basenokuthi benethemba lokuba izinto zolunga bakhwaze “Uxolo nonqabiseko,” kodwa onke amathemba oxolo aya kuthi shwaka, kuba ‘intshabalalo yequbuliso iza kubafikela ngephanyazo kanye njengenimba yenkxwaleko kumfazi omithiyo; yaye abasayi kuze nangayiphi na indlela babaleke.’ Asishiywanga mnyameni ngokuphathelele eli xesha siphila kulo. Ngoko, “masihlale sivukile size sigcine iingqiqo zethu.”—1 Tesalonika 5:1-6.
10 Ukongezelela koko, iBhayibhile ibonisa ukuba imihla yokugqibela ‘isisihlandlo esifutshane sexesha.’ (ISityhilelo 12:12; thelekisa 17:10.) Kubonakala ngathi inkoliso yeso “sihlandlo esifutshane sexesha” sele idlule. Ngokomzekelo, isiprofeto sikaDaniyeli siyichaza ngokuchanileyo imfazwe ephakathi ‘kokumkani wasentla nokumkani wasezantsi’ eye yaqhubeka ukuza kuthi ga kule nkulungwane. (Daniyeli 11:5, 6) Ekuphela kwento emele izaliseke luhlaselo lokugqibela ‘lokumkani wasentla,’ oluchazwe kuDaniyeli 11:44, 45.—Ukuze ufumane ingxubusho ephathelele esi siprofeto bona IMboniselo kaJulayi 1, 1987, nekaNovemba 1, 1993.
11. (a) UMateyu 24:14 uzaliseke ukusa kuwuphi umlinganiselo? (b) Abonisa ntoni amazwi kaYesu abhalwe kuMateyu 10:23?
11 Kwakhona kukho nesiprofeto sikaYesu esithi “ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Namhlanje, amaNgqina kaYehova aqhubeka nomsebenzi wawo kumazwe, kwiziqithi nakwimihlaba engama-233. Kuyinyaniso ukuba isekho imihlaba ekungekashunyayelwa kuyo, yaye mhlawumbi ngexesha elifanelekileyo likaYehova, liya kuvela ithuba lokushumayela kuyo. (1 Korinte 16:9) Sekunjalo, amazwi kaYesu akuMateyu 10:23 enza ubani acingisise nzulu: “Anisayi kuze nangayiphi na indlela nisigqibe isiphaluka sezixeko zakwaSirayeli de uNyana womntu afike.” Ngoxa ngokuqinisekileyo iindaba ezilungileyo ziza kuvakaliswa kuwo wonke umhlaba, asiyi kuzifikelela ngokobuqu zonke iindawo zomhlaba ngesigidimi soBukumkani ngaphambi kokuba uYesu “afike” njengoMgwebi.
12. (a) Kukuphi ‘ukutywina’ ekubhekiselwa kuko kwiSityhilelo 7:3? (b) Kuthetha ntoni ukuncipha kwenani labathanjiswa emhlabeni?
12 Khawuqwalasele umbhalo weSityhilelo 7:1, 3, othi ‘imimoya emine’ yentshabalalo ibanjiwe “de kube semva kokuba siwatywinile amakhoboka oThixo wethu kumabunzi awo.” Oku akubhekiseli ekutywinweni kokuqala, okwenzeka xa abo be-144 000 befumana ubizo lwabo lwasezulwini. (Efese 1:13) Kubhekisela ekutywinweni kokugqibela, xa ngokuqinisekileyo befaniswa ‘njengamakhoboka oThixo wethu’ avavanyiweyo nathembekileyo. Inani loonyana bokwenene bakaThixo abasesemhlabeni linciphe kakhulu. Ngaphezu koko, iBhayibhile iyacacisa ukuba “ngenxa yabo banyuliweyo” inqanaba lokuqala lembandezelo liza ‘kunqunyulwa libe lifutshane.’ (Mateyu 24:21, 22) Inkoliso yabo bathi bathanjisiwe sele yaluphele kakhulu. Kwakhona, ngaba oku bekungayi kuthetha ukuba isiphelo sele sisemnyango?
Umboniseli Othembekileyo
13, 14. Yiyiphi imbopheleleko olunayo udidi lomboniseli?
13 Okwangoku, senza kakuhle xa silandela ulwalathiso olunikelwa “likhoboka elithembekileyo.” (Mateyu 24:45) Kangangeminyaka engaphezu kwekhulu, “ikhoboka” lale mihla liye lakhonza ngokuthembeka ‘njengomboniseli.’ (Hezekile 3:17-21) IMboniselo kaMeyi 15, 1984, yachaza: “Lo mboniseli uqwalasela indlela iziganeko ezenzeka ngayo emhlabeni ukuzalisekisa isiprofeto seBhayibhile, uvakalisa isilumkiso ‘sembandezelo enkulu ezayo, ekungazanga kubekho injalo kwasekuqalekeni kwehlabathi,’ yaye uvakalisa ‘iindaba ezilungileyo.’”—Mateyu 24:21; Isaya 52:7.
14 Khumbula: Ngumsebenzi womboniseli ukuthi “akubona into” ayixele. (Isaya 21:6-8) Ngamaxesha okubhalwa kweBhayibhile umboniseli wayehlab’ umkhosi kwanaxa loo nto yayinokuba sisisongelo ikude gqitha ukuba ibonwe kakuhle. (2 Kumkani 9:17, 18) Ngokuqinisekileyo kwakusenzeka ukuba kuhlatyw’ umkhosi nangento engesosisongelo. Kodwa umboniseli olungileyo wayengayekeleli ngenxa yokoyika ukuphoxeka. Ukuba indlu yakho ibisitsha, ubunokuvakalelwa njani ukuba abacimi-mlilo bebengezi kuba becinga ukuba akukho nto? Ewe, silindele ukuba loo madoda atsibe ngokukhawuleza xa kukho nawuphi na umqondiso wengozi! Ngendlela efanayo, udidi lomboniseli luye lwahlab’ umkhosi xa iimeko zifuna kwenziwe njalo.
15, 16. (a) Kutheni kusenziwa uhlengahlengiso kwindlela esiziqonda ngayo iziprofeto? (b) Yintoni esinokuyifunda kubakhonzi bakaThixo abathembekileyo abaye benza iimpazamo kwindlela abebeziqonda ngayo iziprofeto ezithile?
15 Noko ke, njengoko iziganeko zihambela phambili, indlela esiziqonda ngayo ezi ziprofeto iye yacaca nangakumbi. Imbali ibonisa ukuba kunqabile, ukuba kukhe kwenzeke, ukuba iziprofeto zikaThixo ziqondwe ngokupheleleyo ngaphambi kokuba zizaliseke. UThixo wamxelela ngokuchanileyo uAbram ixesha elaliya kuhlalwa yimbewu yakhe ‘ingumphambukeli ezweni elingelayo,’ iminyaka engama-400. (Genesis 15:13) Noko ke, uMoses wathembisa ukuyihlangula ngaphambi kokuba lifike elo xesha.—IZenzo 7:23-30.
16 Kwakhona khawucinge ngeziprofeto ezingoMesiya. Eneneni kucace gca ukuba ukufa nokuvuswa kukaMesiya kwaxelwa kwangaphambili. (Isaya 53:8-10) Sekunjalo, abafundi bakaYesu basilela ukusiqonda esi sibakala. (Mateyu 16:21-23) Babengaqondi ukuba uDaniyeli 7:13, 14 wayeza kuzaliseka ebudeni bepa·rou·siʹa, okanye “ubukho” bukaKristu bexesha elizayo. (Mateyu 24:3) Ngoko babesemva ngeminyaka emalunga nama-2000 xa babuza uYesu besithi: “Nkosi, ububuyisela ngeli xesha na ubukumkani kuSirayeli?” (IZenzo 1:6) Kwanasemva kokumiselwa kwebandla lamaKristu, iingcamango ezitenxileyo kunye nolindelo olungachananga lwaqhubeka luvela. (2 Tesalonika 2:1, 2) Nangona maxa wambi abanye babesiba neembono ezingachananga, alithandabuzeki elokuba uYehova wawusikelela umsebenzi wala makholwa enkulungwane yokuqala!
17. Sifanele silujonge njani uhlengahlengiso kwindlela esiziqonda ngayo iZibhalo?
17 Umboniseli wanamhlanje ngokufanayo kuye kwafuneka acacise iimbono zakhe ngamanye amaxesha. Noko ke, ngaba ukho umntu othandabuzayo ukuba uYehova uye walisikelela ‘ikhoboka elithembekileyo’? Ngapha koko, ngaba ngokwentelekiso uhlengahlengiso oluye lwenziwa aluluncinananga xa lujongwa lulonke? Indlela esisiseko esiyiqonda ngayo iBhayibhile ayiguqukanga. Inkolelo yokuba siphila kwimihla yokugqibela iqine ngaphezulu kunanini na ngaphambili!
Ukuphilela Ikamva Elingunaphakade
18. Kutheni sifanele sikuphephe ukuphilela unamhlanje kuphela?
18 Ihlabathi lisenokuthi, ‘Masidle size sisele, kuba ngomso siza kufa,’ kodwa asimele sibe nesimo sengqondo esinjalo. Kutheni usenza umgudu olilize wokufumana uyolo kubomi bangoku kunokusebenzela ikamva elingunaphakade? Elo themba, enoba lelobomi bokungafi ezulwini okanye lelobomi obungunaphakade emhlabeni, alilophupha. Liyinto yokwenene ethenjiswe nguThixo “ongenakuxoka.” (Tito 1:2) Kukho ubungqina obuninzi bokuba inzaliseko yethemba lethu isemnyango! “Ixesha eliseleyo lifinyele.”—1 Korinte 7:29.
19, 20. (a) UYehova uzijonga njani izinto esizincamileyo ngenxa yoBukumkani? (b) Kutheni sifanele siphile sicinga ngobomi obungunaphakade?
19 Kuyinyaniso ukuba le nkqubo sele ithabathe ixesha elide kunokuba abanye bebecinga. Abanye basenokuba ngoku bavakalelwa kukuba ukuba babeyiqonde kusengaphambili loo nto, ngebabengazange bancame izinto ezithile. Kodwa ubani akafanele azisole kuba eye wenjenjalo. Ngapha koko, ukuncama izinto ezithile kuyinkalo ebalulekileyo yokuba ngumKristu. AmaKristu ‘ayazincama.’ (Mateyu 16:24) Singaze sivakalelwe kukuba imigudu yethu yokukholisa uThixo ililize. UYesu wathembisa: “Akukho bani ushiye indlu okanye abantakwabo okanye oodade wabo okanye unina okanye uyise okanye abantwana okanye amasimi ngenxa yam nangenxa yeendaba ezilungileyo ongayi kufumana ngokuphindwe kalikhulu ngoku . . . nakwinkqubo yezinto ezayo ubomi obungunaphakade.” (Marko 10:29, 30) Kwiminyaka eliwaka ukususela ngoku, uya kuba ubaluleke kangakanani umsebenzi, indlu okanye imali yakho esebhankini? Kodwa, izinto ozincamileyo ngenxa kaYehova ziya kuba zinentsingiselo kwiminyaka esisigidi ezayo—kwiminyaka engamawaka ezigidi ezayo! “Kuba uThixo akanantswela-bulungisa ukuba angawulibala umsebenzi wenu.”—Hebhere 6:10.
20 Ngoko ke, masiphile sicinga ngobomi obungunaphakade, sigcine amehlo ethu, “kungekhona kwizinto ezibonwayo, kodwa kwizinto ezingabonwayo. Kuba izinto ezibonwayo zezokwexeshana, kodwa izinto ezingabonwayo zingunaphakade.” (2 Korinte 4:18) Umprofeti uHabhakuki wabhala: “Umbono usaya kuba ngowexesha elimisiweyo, ukhawulezela ekupheleni, angathethi wona amanga; ukuba uthe wazilazila, wulinde, kuba uya kuza, awuyi kubuya umva.” (Habhakuki 2:3) ‘Ukulinda’ isiphelo kuyichaphazela njani indlela esiziphumeza ngayo iimbopheleleko zethu zobuqu nezentsapho? Inqaku lethu elilandelayo liza kuxubusha ngaloo mibandela.
Iingongoma Zempinda
◻ Isiphelo sale nkqubo yezinto esibonakala ngathi siyalibazisa siye sabachaphazela njani abanye namhlanje?
◻ Lisekelwe entwenini ithemba lethu lobomi obungunaphakade?
◻ Sifanele sizigqale njani izinto esiye sazincama ngenxa yezilangazelelo zoBukumkani?
[Umfanekiso okwiphepha 15]
Umsebenzi wokushumayela owenziwa ehlabathini lonke umele ugqitywe ngaphambi kokuba isiphelo sifike