Ihlabathi Elinokusesikweni Asilophupha!
“OKUSESIKWENI kuxhalatyelwe ngumntu wonke osemhlabeni,” watsho njalo omnye umphathiswa waseMerika uDaniel Webster. Yaye iBhayibhile ithi: “UYehova uthanda okusesikweni.” (INdumiso 37:28) Ekubeni sasenziwe ngokomfanekiselo kaThixo, isibini sokuqala esingabantu sasineempawu zobuthixo, ezaziquka umdla kokusesikweni.—Genesis 1:26, 27.
IZibhalo ziphinda zithethe ‘ngabantu beentlanga abangenawo umthetho abenza ngemvelo izinto zomthetho.’ Ngaloo ndlela ‘babonakalisa umbandela womthetho obhalwe ezintliziyweni zabo, ngoxa isazela sabo singqinelana nabo yaye, phakathi kwiingcamango zabo, bayamangaleleka okanye bade bangxengxezeleke.’ (Roma 2:14, 15) Ewe, abantu bajizekwe ngesazela—imvo engaphakathi yokulungileyo nokubi. Licacile elokuba, umntu uzalwa enomnqweno wokusesikweni.
Into ehambisana nalo mnqweno wokusesikweni liphulo labantu lokufuna uxolo, kuba INdumiso 106:3 ithi: “Hayi, uyolo lwabakugcinayo okusesikweni, besenza ubulungisa amaxesha onke.” Noko ke, kutheni abantu besoyiswa kukuzisa ihlabathi elinokusesikweni?
Kutheni Abantu Basilele?
Unobangela ophambili wokusilela ukuzisa ihlabathi elinokusesikweni sisiphako esasizuz’ ilifa kubazali bethu bokuqala, uAdam noEva. IBhayibhile isicacisela yenjenje: “Isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” (Roma 5:12) Esi siphako sisono. Ngoxa badalwa begqibelele, uAdam noEva bagqiba kwelokuba bamvukele uThixo baza bazenza aboni. (Genesis 2:16, 17; 3:1-6) Ngenxa yoku, bashiyela abantwana babo ilifa lotyekelo lwesono nolokwenza okubi.
Ngaba imikhwa enjengokubawa nocalucalulo ayizalwa lolo tyekelo lwesono? Ngaba le mikhwa ayisosizekabani sokungekho sikweni okusehlabathini? Ewe, kukubawa okubangela ukonakaliswa ngabom kwemekobume nengcinezelo yezoqoqosho! Sekukho ukruthakruthwano lobuhlanga nolobuzwe nje kungenxa yocalucalulo. Yile mikhwa ke eye iqhube abantu baye kuphanga, baqhathe baze benze izinto ezenzakalisa abanye.
Kwanawona malinge enziwa ngeentshukumisa ezintle okwenza okusesikweni nokulungileyo awa phantsi ngenxa yotyekelo lwethu lwesono. Umpostile uPawulos wazityand’ igila wathi: “Okulungileyo endikunqwenelayo andikwenzi, kodwa okubi endingakunqweneliyo kuko endikuqheliselayo.” Uhlabela mgama echaza umlo awulwayo, uthi: “Ngokwenene ndiyayoliswa ngumthetho kaThixo ngokomntu endinguye ngaphakathi, kodwa ndibona omnye umthetho emalungwini am usilwa ngokunxamnye nomthetho wengqondo yam yaye undikhokelela ndithinjiwe kumthetho wesono osemalungwini am.” (Roma 7:19-23) Nanamhlanje, kusenokwenzeka ukuba silwa umlo ofanayo. Yiloo nto kuxhaphake kangaka okungekho sikweni.
Indlela yabantu yokulawula nayo iye yafak’ isandla kokungekho sikweni okusehlabathini. Kwilizwe ngalinye, kukho imithetho kwanabo bayimiselayo. Kakade ke, kukho abagwebi neenkundla. Ngokuqinisekileyo, oosomaqhuzu abathile baye bazama ukumela amalungelo abantu baze baqinisekise ukuba abantu benzelwa okusesikweni ngokulinganayo. Sekunjalo, inkoliso yamatiletile abo iye yasilela. Ngoba? Eshwankathela iinkalo eziliqela zokusilela kwabo, uYeremiya 10:23 uthi: “Ndiyazi, Yehova, ukuba ayikhona emntwini indlela yakhe; akukhona endodeni ehambayo ukuqinisela ukunyathela kwayo.” Ekubeni eye wamphosa kwelokulibala uThixo, umntu woyiswe kwathi tu kukumisela ihlabathi elinobulungisa nokusesikweni.—IMizekeliso 14:12; INtshumayeli 8:9.
Owona mqobo mkhulu endleleni yokumisela ihlabathi elinokusesikweni nguSathana uMtyholi. IBhayibhile ilikhupha litsole elokuba ingelosi enemvukelo uSathana ‘isisibulala-mntu’ kwakunye ‘nexoki’ lokuqala yaye “ihlabathi liphela lilele emandleni alowo ungendawo.” (Yohane 8:44; 1 Yohane 5:19) Umpostile uPawulos umchaza ngokuthi ‘unguthixo wale nkqubo yezinto.’ (2 Korinte 4:3, 4) Ekubeni engabufuni nokububona ubulungisa, uSathana wenza konke okusemandleni akhe ukuze aphembelele ubungendawo. Lisalawulwa nguye nje eli hlabathi, zonke iintlobo zokungekho sikweni neentlekele ezizidalayo ziya kuhlala ziluphethel’ imbengwana uluntu.
Ngaba oku kuthetha ukuba uluntu alunakuze lwahlukane nokungekho sikweni? Ngaba ihlabathi elinokusesikweni liphupha elingenakuze lizaliseke?
Kuza Kubakho Ihlabathi Elinokusesikweni—Njani?
Ukuze lizaliseke ithemba lehlabathi elinokusesikweni, uluntu kufuneka lukhangele kumthombo onokubatshayela kuthi tu oonobangela bokungekho sikweni. Kodwa ngubani onokusincothula neengcambu isono aze asuse uSathana nolawulo lwakhe? Lizicacele elokuba, akukho mntu kungekho nammeli ongumntu onokwenza loo msebenzi ungako. NguYehova uThixo kuphela onokwenza oko! Ithetha ngaye, iBhayibhile ithi: “NguLiwa; ugqibele umsebenzi wakhe, ngokuba zonke iindlela zakhe zisesikweni; nguThixo wentembeko, tu ubugqwetha; lilungisa, uthe tye yena.” (Duteronomi 32:4) Yaye ekubeni ‘ethanda okusesikweni,’ uYehova ufuna uluntu lunandiphe ubomi kwihlabathi elinobulungisa.—INdumiso 37:28.
Ethetha ngelungiselelo likaThixo lokuzisa ihlabathi elinokusesikweni, umpostile uPetros wabhala: “Kukho amazulu amatsha nomhlaba omtsha esiwulindeleyo ngokwesithembiso sakhe, yaye kwezi kuza kuhlala ubulungisa.” (2 Petros 3:13) La ‘mazulu matsha’ asingomazulu amatsha okoqobo. UThixo wawenza amazulu okoqobo agqibelela, yaye azisa uzuko kuye. (INdumiso 8:3; 19:1, 2) “Amazulu amatsha” lulawulo olutsha phezu komhlaba. “Amazulu” akhoyo abunjwa ngoorhulumente babantu. Kungekudala, kwimfazwe kaThixo yeArmagedon, aza kudedela “amazulu amatsha”—uBukumkani bakhe basezulwini, okanye urhulumente wakhe. (ISityhilelo 16:14-16) UKumkani wobo Bukumkani nguYesu Kristu. Lo rhulumente uya kulawula ngonaphakade, alushenxise ngokupheleleyo ulawulo lwabantu.—Daniyeli 2:44.
Ngoko ke, uyintoni lo ‘mhlaba mtsha’? Awusosijikelezi-langa sitsha, kuba uThixo wenza umhlaba walungela ukumiwa ngabantu, yaye kukuthanda kwakhe ukuba uhlale ngonaphakade. (INdumiso 104:5) ‘Umhlaba omtsha’ ubhekisela kwibutho elitsha labantu. (Genesis 11:1; INdumiso 96:1) ‘Umhlaba’ oza kutshatyalaliswa ngabantu abazenza inxalenye yale nkqubo yezinto ingendawo. (2 Petros 3:7) ‘Umhlaba omtsha’ othabatha indawo yabo ngabakhonzi bakaThixo, abakuthiyileyo okungendawo nababuthandayo ubulungisa nokusesikweni. (INdumiso 37:10, 11) Ngaloo ndlela, ihlabathi likaSathana liya kube lingasekho.
Kodwa kuza kwenzeka ntoni kuSathana? Umpostile uYohane waxela kwangaphambili wathi: ‘[UKristu Yesu] wayixhakamfula inamba, loo nyoka yantlandlolo, enguMtyholi noSathana, waza wayibopha kangangeminyaka eliwaka. Yaye wayiphosa enzonzobileni ibe wayivala waza wayitywina phezu kwayo, ukuze ingabi nakuzilahlekisa iintlanga kwakhona.’ (ISityhilelo 20:1-3) Impembelelo kaSathana okhonkxiweyo kuluntu iya kufana nje neyebanjwa eliphoswe kwesimnyama isisele. Esinjani sona isiqabu kuluntu, esiya kubakho sisandulela ihlabathi elinokusesikweni! Yaye ekupheleni kwewaka leminyaka, uSathana uya kutyunyuzwa kungasali nomtshithi wakhe.—ISityhilelo 20:7-10.
Noko ke, kuthekani ngesono esisizuz’ ilifa? UYehova sele elenzile ilungiselelo lokusincothula neengcambu isono. “UNyana womntu [uYesu Kristu] weza . . . ukuze anikele ngomphefumlo wakhe ube yintlawulelo ngenxa yabaninzi.” (Mateyu 20:28) Ibinzana elithi ‘intlawulelo’ lisingisele kwixabiso elifunekayo ukuze kuhlawulelwe abathinjwa. UYesu wahlawula ngexabiso lobomi bakhe obufezekileyo ukuze akhulule uluntu.—2 Korinte 5:14; 1 Petros 1:18, 19.
Sinokungenelwa kwidini lentlawulelo likaYesu kwanangoku. Ngokuqhelisela ukholo kulo, sinokunandipha ukuma okucocekileyo phambi koThixo. (IZenzo 10:43; 1 Korinte 6:11) Phantsi kolawulo loBukumkani bukaThixo, intlawulelo iya kwenza uluntu lukwazi ukukhululeka ngokupheleleyo kwisono. Incwadi yokugqibela eBhayibhileni ichaza “umlambo wamanzi obomi” wokomfuziselo ophuma kwitrone kaThixo, yaye emacaleni awo kukho imithi yeziqhamo yokomfuziselo enamagqabi ‘angawokunyanga iintlanga.’ (ISityhilelo 22:1, 2) Le nkcazelo yeBhayibhile isibonisa ilungiselelo loMdali elimangalisayo lokukhulula uluntu kwisono ngoncedo lwedini lentlawulelo likaYesu. Ukusetyenziswa ngokupheleleyo kweli lungiselelo kuya kwenza uluntu oluthobelayo lukhululeke ngokupheleleyo kwisono nokufa.
Ubomi Kwihlabathi Elinokusesikweni
Khawube nomfanekiso-ngqondweni wendlela ubomi obuya kuba yiyo phantsi kolawulo loBukumkani. Ulwaphulo-mthetho nogonyamelo luya kube lungasekho. (IMizekeliso 2:21, 22) Okungekho sikweni kwezoqoqosho kuya kube kungasekho. (INdumiso 37:6; 72:12, 13; Isaya 65:21-23) Ucalucalulo lwezentlalo, lobuhlanga nolobuzwe luya kutshayelwa kungasali nempunde. (IZenzo 10:34, 35) Iimfazwe nezixhobo zemfazwe ziya kube zingasabonakali nangetshengele. (INdumiso 46:9) Izigidi zabafileyo ziya kubuyiselwa ebomini kwihlabathi elinokusesikweni. (IZenzo 24:15) Wonk’ ubani uya kube esempilweni efezekileyo yaye engumqabaqaba. (Yobhi 33:25; ISityhilelo 21:3, 4) IBhayibhile isiqinisekisa isithi: “[UYesu Kristu] uya kukuphumelelisa okusesikweni ngokwenyaniso.”—Isaya 42:3.
Okwangoku, sisenokuthwaxwa kokungekho sikweni, kodwa singaze senze okungekho sikweni kwabanye. (Mika 6:8) Kwanaxa simele sinyamezele okungekho sikweni, ngamana singahlala sinesimo sengqondo esihle. Ihlabathi elinokusesikweni lesithembiso lisemnyango. (2 Timoti 3:1-5; 2 Petros 3:11-13) UThixo uSomandla ethethile nje, ‘liya kuba njalo ilizwi lakhe.’ (Isaya 55:10, 11) Ngoku lixesha lokuba silungiselele ukuphila kwihlabathi elinokusesikweni ngokufunda oko uThixo akufunayo kuthi.—Yohane 17:3; 2 Timoti 3:16, 17.
[Umfanekiso okwiphepha 7]
Okungekho sikweni kuya kutshayelwa kungasali nempunde kwihlabathi elitsha likaThixo elithenjisiweyo