Ukholo Lusenza Sibe Nomonde Yaye Sikhuthalele Ukuthandaza
“Qheliselani umonde; zenzeni ziqine iintliziyo zenu, ngenxa yokuba ubukho beNkosi busondele.”—YAKOBI 5:8.
1. Kutheni sifanele sicinge ngamazwi kaYakobi 5:7, 8?
“UBUKHO” ekukudala bulindelwe bukaYesu Kristu ngoku sele bubonakala. (Mateyu 24:3-14) Ngoku kunanini na ngaphambili, bonke abo bathi banokholo kuThixo nakuKristu banesizathu sokucinga ngamazwi omfundi uYakobi athi: “Qheliselani umonde, . . . bazalwana, de ibe bubukho beNkosi. Khangelani! Umfama uhlala elindele isiqhamo esixabisekileyo somhlaba, eqhelisela umonde ngenxa yaso de afumane imvula yokuqala nemvula yamva. Nani qheliselani umonde; zenzeni ziqine iintliziyo zenu, ngenxa yokuba ubukho beNkosi busondele.”—Yakobi 5:7, 8.
2. Ziziphi ezinye zeengxaki ababejamelene nazo abo babebhalelwa nguYakobi?
2 Abo babebhalelwa nguYakobi incwadi yakhe ephefumlelweyo kwakufuneka baqhelisele umonde yaye bacombulule iingxaki ezahlukeneyo. Abaninzi babesenza izinto ezichaseneyo noko kwakufuneka kwabo babesithi banokholo kuThixo. Ngokomzekelo, kwakufuneka kwenziwe into ngeminqweno ethile eyayikhula ezintliziyweni zabanye. Kwakufuneka aphinde enziwe aphile ngokuzolileyo loo maKristu okuqala. Kwakhona kwakufuneka alulekwe ngokuba nomonde nangokukhuthalela ukuthandaza. Njengoko siqwalasela oko uYakobi wawaxelela kona, masibone indlela esinokuwasebenzisa ngayo amazwi akhe ebomini bethu.
Iminqweno Emibi Iyatshabalalisa
3. Ziziphi izinto ezazibangela usukuzwano ebandleni, ibe sinokufunda ntoni kuzo?
3 Uxolo lwalungekho kwabanye ababesithi bangamaKristu, ibe loo meko yayibangelwa yiminqweno ephosakeleyo. (Yakobi 4:1-3) Usukuzwano lwaluphazamisa, ibe bambi babebagweba ngokungenaluthando abazalwana babo. Oku kwakubangelwa yimbambano eyayidalwa yinkanuko yoyolo lokwenyama eyayikumalungu emizimba yabo. Nathi kusenokufuneka sithandazele uncedo ukuze sixhathise inkanuko yenyama yokuba ngabadumileyo, ukuba negunya neyokuba nezinto ukuze singenzi into eza kuluphazamisa uxolo lwebandla. (Roma 7:21-25; 1 Petros 2:11) Phakathi kwamanye amaKristu enkulungwane yokuqala, ukubawa kwakukhule kwada kwasa kumoya wentiyo obulalayo. Ekubeni uThixo wayengayanelisi iminqweno yabo ephosakeleyo, baqhubeka bezabalazela ukufikelela usukelo lwabo. Ukuba nathi sineminqweno ephosakeleyo enjalo, sisenokucela kodwa asiyi kufumana, ekubeni uThixo wethu ongcwele engayiphenduli imithandazo enjalo.—IZililo 3:44; 3 Yohane 9, 10.
4. Kutheni uYakobi ebiza abanye ngokuthi “bakrexezikazindini,” ibe amazwi akhe afanele asichaphazele njani?
4 Amanye amaKristu okuqala ayenomoya wehlabathi, umona nekratshi. (Yakobi 4:4-6) UYakobi ubiza amanye ngokuthi “bakrexezikazindini” ngenxa yokuba ayengabahlobo nehlabathi yaye ngaloo ndlela enetyala lokukrexeza ngokomoya. (Hezekile 16:15-19, 25-45) Ngokuqinisekileyo, asifuni kubonakalisa umoya wehlabathi ngesimo sengqondo, ngentetho nangezenzo, kuba oko kuya kusenza iintshaba zikaThixo. ILizwi lakhe libonisa ukuba “ukutyekela ekumoneleni” kuyinxalenye yotyekelo olubi, okanye “umoya,” okubantu abanesono. (Genesis 8:21; Numeri 16:1-3; INdumiso 106:16, 17; INtshumayeli 4:4) Ngoko ukuba siyaqonda ukuba simele silwe nxamnye nomona, ikratshi okanye nolunye utyekelo olubi, masifune uncedo lomoya oyingcwele kuThixo. Loo mandla, afumaneka ngobubele obungasifanelanga bukaThixo, angaphezulu ‘kotyekelo lokumonela.’ Yaye ngoxa uYehova ebachasa abanekratshi, uya kusinika ububele obungasifanelanga ukuba silwa notyekelo lwesono.
5. Ukuze sifumane ububele obungasifanelanga bukaThixo, ziziphi iimfuneko esifanele sihlangabezane nazo?
5 Sinokubufumana njani ububele obungasifanelanga bukaThixo? (Yakobi 4:7-10) Ukuze sifumane ububele obungasifanelanga obuvela kuYehova, simele simthobele, samkele amalungiselelo akhe, yaye sizithobe kuyo nayiphi na into ekukuthanda kwakhe. (Roma 8:28) Kwakhona simele ‘sichase,’ okanye ‘sime nxamnye’ noMtyholi. Uya ‘kusaba kuthi’ ukuba sihlala siqinile njengabaxhasi bolongamo lukaYehova kwindalo iphela. UYesu uyasincedisa, ekubeni ebambe abameli beli hlabathi lingendawo ukuze kungabikho nto isenzakalisa ngokupheleleyo. Kwaye ungaze ulibale ukuba: Ngomthandazo, ngokuthobela nangokholo, siya sisondela kuThixo, ibe naye uzingqina esondele kuthi.—2 Kronike 15:2.
6. Kutheni uYakobi ebiza amanye amaKristu ngokuthi “boni”?
6 Kutheni uYakobi esebenzisa igama elithi “boni” kwabanye ababesithi banokholo kuThixo? Kungenxa yokuba babenetyala lokuqhwaya ‘iimfazwe’ nokuba nentiyo ebulalayo—izimo zengqondo ezingamkelekanga kumaKristu. (Tito 3:3) “Izandla” zabo zazifuna ukuhlanjululwa, ekubeni zazizaliswe zizenzo ezibi. Kwakhona kwakufuneka basulungekise “iintliziyo” zabo, ezingumthombo weentshukumisa. (Mateyu 15:18, 19) Abo “bangenazigqibo” babengoombolo-mbini ngokuba nobuhlobo noThixo nokuba nobuhlobo nehlabathi. Ekubeni silunyukiswa ngomzekelo wabo ombi, masihlale siphaphile ukuze izinto ezinjalo zingaluphelisi ukholo lwethu.—Roma 7:18-20.
7. Kutheni uYakobi exelela abanye ukuba ‘bakhedame baze balile’?
7 UYakobi uxelela abo babeza kufunda incwadi yakhe ukuba ‘babe ziindwayi yaye bakhedame baze balile.’ Ukuba babebonakalisa ukudana kokuhlonela uThixo, oko kwakuya kubonisa inguquko. (2 Korinte 7:10, 11) Namhlanje, bambi kwabo bathi banokholo bazakhela ubuhlobo nehlabathi. Ukuba nabani na phakathi kwethu ulandela elo khondo, ngaba asifanele sikhedame ngenxa yokuba buthathaka ngokomoya size sithabathe amanyathelo akhawulezileyo ukuze silungise imicimbi? Ukwenza uhlengahlengiso oluyimfuneko nokuxolelwa nguThixo kuya kusenza sizive sigcoba ngenxa yesazela esicocekileyo nethemba elivuyisayo lobomi obungunaphakade.—INdumiso 51:10-17; 1 Yohane 2:15-17.
Musani Ukugwebana
8, 9. Kutheni singafanele sithethe ngokunxamnye nabanye okanye sigwebane?
8 Kusisono ukuthetha ngokunxamnye nelinye ikholwa. (Yakobi 4:11, 12) Kodwa abanye bayawagxeka amanye amaKristu, mhlawumbi oko kubangelwa sisimo sengqondo sabo sokuzenza amalungisa okanye ngenxa yokuba befuna ukuzenza bavelele ngokunyathelela abanye phantsi. (INdumiso 50:20; IMizekeliso 3:29) Ibinzana lesiGrike eliguqulelwe ngokuthi ‘ukuthetha ngokunxamnye’ lithetha ubutshaba yaye lisingisele ekwenzeni isityholo esibaxiweyo okanye sobuxoki. Oku kuthetha ukumgweba ngokuqatha umzalwana. Ukwenza oku ‘kukuthetha ngokunxamnye nomthetho kaThixo’ ngayiphi ingqiqo? Kaloku, ababhali nabaFarisi ‘ngobuchule bawuyeka umthetho kaThixo’ baza bagweba ngeyabo imilinganiselo. (Marko 7:1-13) Ngokufanayo, ukuba besinokugweba umzalwana obengayi kugwetywa nguYehova, ngaba besingayi kuba ‘siyawugweba umthetho kaThixo’ size sithi sisona sibonise ukuba awugqibelelanga? Kwaye ngokumgxeka ngokungekho sikweni umzalwana wethu, besingayi kuwuzalisekisa umthetho wothando.—Roma 13:8-10.
9 Masikhumbule oku: “Kukho mnye ongumniki-mthetho nomgwebi”—uYehova. ‘Umyalelo wakhe ugqibelele,’ awuswele lutho. (INdumiso 19:7; Isaya 33:22) NguThixo kuphela ofanelekela ukumisela imilinganiselo nemithetho yokusinda. (Luka 12:5) Ngoko uYakobi uyabuza: “Ungubani na ukuba ugwebe ummelwane wakho?” Asinalo igunya lokugweba abanye. (Mateyu 7:1-5; Roma 14:4, 10) Ukucinga ngolongamo nokungakhethi buso kukaThixo kunye nokuba nesono kwethu kufanele kusincede siphephe ukugweba abanye sizenza amalungisa.
Phepha Ukuqhayisa Ngokuzithemba
10. Kutheni sifanele sicinge ngoYehova kubomi bethu bemihla ngemihla?
10 Ngaloo lonke ixesha sifanele sicinge ngoYehova nangomthetho wakhe. (Yakobi 4:13-17) Bemtyeshela uThixo, abo bazithembileyo bathi: ‘Namhlanje okanye ngomso siza kuhambela kwesinye isixeko, sichithe unyaka apho, sishishine size senze ingeniso.’ Ukuba ‘siziqwebela ubuncwane kodwa singezozityebi kuThixo,’ ubomi bethu busenokuphela ngomso yaye sisenokungalifumani ithuba lokukhonza uYehova. (Luka 12:16-21) Njengoko uYakobi esitsho, sifana nenkungu yakusasa “ebonakala ithuba elincinane ize yandule ke ithi shwaka.” (1 Kronike 29:15) Kungokuqhelisela ukholo kuYehova kuphela esinokuthi sibe nethemba lovuyo oluhlala luhleli nobomi obungunaphakade.
11. Kuthetha ntoni ukuthi, “Ukuba uYehova uyathanda”?
11 Kunokuba simtyeshele uThixo sizele yinkqayiso, sifanele siqiqe ngolu hlobo: “Ukuba uYehova uyathanda, siya kuphila size kanjalo senze oku okanye okuya.” Ukuthi, “Ukuba uYehova uyathanda” kubonisa ukuba sizama ukwenza ngokuvisisana nokuthanda kwakhe. Kusenokuba yimfuneko ukushishina ukuze sixhase intsapho yethu, ukuze ikwazi ukuhambahamba ngenxa yomsebenzi woBukumkani, njalo njalo. Kodwa masingazigwagwisi. “Ukuqhayisa okunjalo kungendawo” kuba kusenza singaxhomekeki kuThixo.—INdumiso 37:5; IMizekeliso 21:4; Yeremiya 9:23, 24.
12. Athetha ukuthini amazwi kaYakobi 4:17?
12 Kuyabonakala ukuba xa equkumbela amazwi akhe aphathelele ukuzimisela nokuqhayisa, uYakobi uthi: “Ukuba ubani uyakwazi ukwenza oko kulungileyo ukanti akakwenzi, kusisono kuye.” UmKristu ngamnye ufanele avume ngokuthobeka ukuba uxhomekeke kuThixo. Ukuba akenjinjalo, “kusisono kuye.” Kakade ke, kusebenza umgaqo ofanayo kuko nakuphi na ukusilela ukwenza oko sifanele sikwenze ukubonakalisa ukuba sinokholo kuThixo.—Luka 12:47, 48.
Isilumkiso Esiphathelele Izityebi
13. Uthini uYakobi ngabo babusebenzisa kakubi ubutyebi babo?
13 Ngenxa yokuba amanye kumaKristu okuqala ayethanda izinto eziphathekayo okanye encoma abo bazizigwili, uYakobi uthetha amazwi abukhali ngokuphathelele izityebi ezithile. (Yakobi 5:1-6) Abantu behlabathi ababesebenzisa ubutyebi babo ngendlela ephosakeleyo babeza ‘kulila, babhomboloze ngenxa yobudwayi obubafikelayo’ xa uThixo ebabuyekeza ngokwezenzo zabo. Ngaloo mihla, ubuncwane babantu abaninzi ngokuyintloko babuquka iingubo, ukutya okuziinkozo newayini. (Yoweli 2:19; Mateyu 11:8) Ezinye zezi zinto zinokubola okanye ‘zidliwe ngamanundu,’ kodwa uYakobi ugxininisa ekungabalulekini kobuncwane, kungekhona ekonakaleni kwabo. Nangona igolide nesilivere zingabi nomhlwa, ukuba siyazifumba, ziya kuphelelwa lixabiso njengezinto ezinomhlwa. “Umhlwa” ubonisa ukuba ubutyebi bezinto eziphathekayo abusetyenziswanga kakuhle. Ngoko ke, sonke sifanele sikhumbule ukuba “okunjengomlilo” koko abo bakholose ngezinto zabo eziphathekayo ‘baye baziqwebela kona ngeemini zokugqibela’ xa umsindo kaThixo ubafikela. Ekubeni siphila ‘kwixesha lokuphela,’ la mazwi anentsingiselo ekhethekileyo kuthi.—Daniyeli 12:4; Roma 2:5.
14. Badla ngokwenza ntoni abo bazizityebi, yaye sifanele senze ntoni ngaloo nto?
14 Ngokufuthi izigwili ziyabaqhatha abavuni bazo, abamivuzo yabo igodliweyo ‘ikhalela’ impindezelo. (Thelekisa iGenesis 4:9, 10.) Izityebi zehlabathi ‘ziphila kubunewunewu.’ Ekubeni zizifica ngeziyolo, iintliziyo zazo zithi fithi kukutyeba yaye azisabeli, kwaye ziza kube zisenjalo “ngomhla” obekelwe ukuxhelwa kwazo. ‘Ziyamgweba zize zimgebenge lowo ulilungisa.’ UYakobi uyabuza: “Yena akanichasanga na?” Okanye enye inguqulelo ithi, “lowo ulilungisa; yena akanichasanga.” Enoba zinjani na iimeko, asifanele sibe nomkhethe kwabazizityebi. Simele sigcine izilangazelelo zokomoya ziphambili ebomini.—Mateyu 6:25-33.
Ukholo Luyasinceda Siqhelisele Umonde
15, 16. Kutheni kubaluleke kangaka ukuqhelisela umonde?
15 Akugqiba ukugqabaza ngezityebi ezicinezelayo zehlabathi, uYakobi ngokulandelayo ukhuthaza amaKristu acinezelweyo ukuba aqhelisele umonde. (Yakobi 5:7, 8) Ukuba amakholwa ebenokubuthwala ngomonde ubunzima bawo, ebeya kuvuzwa ngenxa yokuthembeka ebudeni bobukho bukaKristu, xa kugwetywa abo bawacinezelayo. (Mateyu 24:37-41) Loo maKristu okuqala kwakufuneka abe njengomfama olinda imvula yokwindla, ukuze atyale, nemvula yamva yasentwasahlobo evelisa isiqhamo. (Yoweli 2:23) Nathi kufuneka sibe nomonde yaye siziqinise iintliziyo zethu, ngokukodwa ekubeni “ubukho beNkosi” uYesu Kristu bufikile!
16 Kutheni sifanele sibe nomonde? (Yakobi 5:9-12) Umonde uyasinceda singagcumi okanye sincwine xa amanye amakholwa esicaphukisa. Ukuba ‘siyakhalazelana’ sinomoya ombi, siya kugwetywa nguMgwebi uYesu Kristu. (Yohane 5:22) Ngoku ekubeni “ubukho” bakhe sele buqalisile yaye “umi phambi kweminyango,” masikhuthaze uxolo ngokuba nomonde kubazalwana bethu, abajamelana neemvavanyo ezininzi zokholo. Ukholo lwethu luyomelela xa sikhumbula ukuba uThixo wamvuza uYobhi ngenxa yokuzinyamezela ngomonde izilingo awayejamelene nazo. (Yobhi 42:10-17) Ukuba siqhelisela ukholo nomonde, siya kubona ukuba “uYehova unomsa wofefe olukhulu nenceba.”—Mika 7:18, 19.
17. Kutheni uYakobi esithi, “Yekani ukufunga”?
17 Ukuba asinamonde, sisenokulusebenzisa kakubi ulwimi xa siphantsi kweemeko ezicinezelayo. Ngokomzekelo, sisenokungxama ngokwenza izifungo. “Yekani ukufunga,” utsho uYakobi, elumkisa ngokwenziwa kwezifungo ezingagcinwayo. Ukusoloko uqinisekisa amazwi owathethayo ngezifungo kukwabonakala ikukuhanahanisa. Ngoko, sifanele sithethe inyaniso nje kuphela, uewe wethu athethe uewe, nohayi abe nguhayi. (Mateyu 5:33-37) Kakade ke, uYakobi akathi kuphosakele ukwenza isifungo sokuthetha inyaniso enkundleni.
Ukholo Nemithandazo Yethu
18. Kuphantsi kwaziphi iimeko esifanele ‘siqhubeke sithandaza’ size ‘sivume iindumiso’?
18 Umthandazo umele ube yinto ephambili ebomini bethu ukuba sifuna ukulawula intetho yethu, sibe nomonde yaye sihlale sinokholo oluqinileyo kuThixo. (Yakobi 5:13-20) Sifanele ‘siqhubeke sithandaza’ ngokukodwa xa sijamelana nesilingo. Xa sinemincili, ‘masivume iindumiso,’ njengoko uYesu nabapostile bakhe benzayo xa wayeseka iSikhumbuzo sokufa kwakhe. (Marko 14:26, umbhalo osemazantsi weNW) Maxa wambi, sisenokuzaliswa ngumbulelo kuThixo kangangokuba sivume iindumiso kwanasezintliziyweni. (1 Korinte 14:15; Efese 5:19) Ibe hayi indlela ekuvuyisa ngayo ukuzukisa uYehova ngengoma ezintlanganisweni zamaKristu!
19. Sifanele senze ntoni xa sigula ngokomoya, yaye kutheni sifanele sithabathe elo nyathelo?
19 Sisenokungaziva sifuna ukucula xa sigula ngokomoya, mhlawumbi ngenxa yehambo ephosakeleyo okanye ukusilela ukuzondla ngokuthe rhoqo kwitafile kaYehova. Xa sikuloo meko, ngokuthobeka masibize abadala ukuze ‘basithandazele.’ (IMizekeliso 15:29) Kwakhona baya ‘kusithambisa ngeoli egameni likaYehova.’ Njengeoli edambisa iintlungu enxebeni, amazwi abo athuthuzelayo nesiluleko esisekelwe kwiZibhalo aya kunceda ekunciphiseni udandatheko, ukuthandabuza noloyiko. ‘Umthandazo wokholo uya kusenza siphile’ ukuba uxhaswa lukholo lwethu. Ukuba abadala bafumanisa ukuba ukugula kwethu ngokomoya kubangelwa sisono esinzulu, ngobubele baya kusicacisela impazamo yethu baze bazame ukusinceda. (INdumiso 141:5) Kwaye ukuba siyaguquka, sinokuba nokholo lokuba uThixo uya kuyiva imithandazo yabo aze asixolele.
20. Kutheni sifanele sizivume izono zethu size sithandazelane?
20 ‘Ukuzivuma ekuhleni izono zethu omnye komnye’ kufanele kusithintele ukuba singaqhubeki sisona. Kufanele kukhuthaze imfesane yomnye komnye, isiqhamo esiya kusishukumisela ekubeni ‘sithandazelane.’ Sinokuba nokholo lokuba oku kuya kuba yingenelo kuba umthandazo ‘womntu olilungisa’—umntu oqhelisela ukholo nogqalwa nguThixo njengogqibeleleyo—uphumeza lukhulu kuYehova. (1 Petros 3:12) Umprofeti uEliya wayenobuthathaka obufanayo nobethu, kodwa imithandazo yakhe yeviwa. Wathandaza, yaye akuzange kune mvula kangangeminyaka emithathu enesiqingatha. Xa waphinda wathandaza, imvula yana.—1 Kumkani 17:1; 18:1, 42-45; Luka 4:25.
21. Yintoni esisenokukwazi ukuyenza ukuba omnye umKristu ‘ulahlekisiwe enyanisweni’?
21 Kuthekani ukuba ilungu lebandla ‘lilahlekisiwe enyanisweni,’ layishiya imfundiso nehambo elungileyo? Sisenokukwazi ukulibuyisa kwisiphoso salo ngokusebenzisa isiluleko seBhayibhile, umthandazo nangolunye uncedo. Ukuba siyaphumelela, oko kumenza angenelwe kwintlawulelo kaKristu yaye kuyamsindisa ekufeni kokomoya nasekugwetyelweni intshabalalo. Ngokunceda umoni, sigubungela intaphane yezono zakhe. Xa umoni owohlwayiweyo elishiya ikhondo lakhe eliphosakeleyo, aguquke, aze acele ukuxolelwa, siya kuvuya kuba siye safak’ isandla ekugubungeleni izono zakhe.—INdumiso 32:1, 2; Yude 22, 23.
Iyingenelo Kuthi Sonke
22, 23. Amazwi kaYakobi afanele asichaphazele njani?
22 Kuyacaca ukuba, incwadi kaYakobi iqulethe okuyingenelo kuthi sonke. Isibonisa indlela yokuhlangabezana nezilingo, iyasiluleka ukuba singabi nomkhethe, yaye isibongoza ukuba senze imisebenzi egqibeleleyo. UYakobi usibongoza ukuba silulawule ulwimi, sixhathise impembelelo yehlabathi, yaye sikhuthaze uxolo. Amazwi akhe afanele asenze sibe nomonde yaye sikukhuthalele ukuthandaza.
23 Kuyinyaniso ukuba, incwadi kaYakobi kuqala yayithunyelwe kumaKristu okuqala athanjisiweyo. Ukanti, sonke sifanele sivumele isiluleko sayo sisincede sibambelele kukholo lwethu. Amazwi kaYakobi anokwakha ukholo olusishukumisela ekubeni singaxengaxengi enkonzweni kaThixo. Kwaye le ncwadi iphefumlelwe nguThixo yakha ukholo oluhlala luhleli olusenza sibe nomonde, sibe ngamaNgqina kaYehova ale mihla akukhuthaleleyo ukuthandaza, ebudeni ‘bobukho beNkosi’ uYesu Kristu.
Ubuya Kuphendula Uthini?
◻ Kutheni kwakufuneka amanye amaKristu okuqala aguqule isimo sawo sengqondo nehambo yawo?
◻ UYakobi unikela siphi isilumkiso kwizityebi?
◻ Kutheni sifanele siqhelisele umonde?
◻ Kutheni sifanele sithandaze ngokuthe rhoqo?
[Umfanekiso okwiphepha 19]
Pictorial Archive (Near Eastern History) Est.
[Umfanekiso okwiphepha 23]
Amanye amaKristu okuqala kwakufuneka abe nomonde ngakumbi kwamanye amakholwa
[Umfanekiso okwiphepha 24]
Kufuneka amaKristu abe nomonde, abe nothando yaye akukhuthalele ukuthandaza