UYehova Uzisa Oonyana Abaninzi Eluzukweni
“Kwakufanelekile [ngoThixo], ekuziseni oonyana abaninzi eluzukweni, ukuba enze uMmeli Oyintloko wosindiso lwabo agqibelele ngazo iimbandezelo.”—HEBHERE 2:10.
1. Kutheni sinokuqiniseka ukuba injongo kaYehova ngoluntu iya kuzaliseka?
UYEHOVA wadala umhlaba ukuba ube likhaya likanaphakade lentsapho yabantu efezekileyo nenandipha ubomi obungenasiphelo. (INtshumayeli 1:4; Isaya 45:12, 18) Liyinyaniso elokuba, ukhokho wethu uAdam wona waza ngaloo ndlela wadlulisela isono nokufa kwimbewu yakhe. Kodwa injongo kaThixo ngoluntu iya kuzalisekiswa ngeMbewu Ethenjisiweyo, uYesu Kristu. (Genesis 3:15; 22:18; Roma 5:12-21; Galati 3:16) Ukuthanda ihlabathi loluntu kwashukumisela uYehova ukuba anikele “ngoNyana wakhe okuphela kwamzeleyo, ukuze wonk’ ubani oqhelisela ukholo kuye angatshabalali kodwa abe nobomi obungunaphakade.” (Yohane 3:16) Kwaye uthando lwashukumisela uYesu ukuba “anikele ngomphefumlo wakhe ube yintlawulelo ngenxa yabaninzi.” (Mateyu 20:28) Le “ntlawulelo elinganayo” ibuyisela amalungelo namathemba awalahlwa nguAdam yaye yenza ubomi obungunaphakade bufumaneke.—1 Timoti 2:5, 6; Yohane 17:3.
2. Ukusebenza kwedini lentlawulelo likaYesu kwafuziselwa njani nguMhla Wocamagushelo owawuqhutywa minyaka le kwaSirayeli?
2 Ukusebenza kwedini lentlawulelo likaYesu kwakufuziselwe nguMhla Wocamagushelo owawuqhutywa minyaka le. Ngaloo mhla, umbingeleli omkhulu wakwaSirayeli wayeqala abingelele ngenkunzi yenkomo njengedini lesono aze athabathe igazi layo alise kwiTyeya engcwele kweYona Ngcwele yomnquba, ibe kamva oko wayekwenza etempileni. Oko wayekwenzela yena, indlu yakhe kunye nesizwe sabaLevi. Ngokufanayo, uYesu Kristu wanikela ixabiso legazi lakhe kuThixo ukuze kuqala ligubungele izono ‘zabazalwana’ bakhe bokomoya. (Hebhere 2:12; 10:19-22; Levitikus 16:6, 11-14) Kwakhona, ngoMhla Wocamagushelo umbingeleli omkhulu wayebingelela ibhokhwe njengedini lesono aze ase igazi layo kweYona Ngcwele, ngaloo ndlela ecamagushela izono zezizwe ezili-12 ezingengobabingeleli zakwaSirayeli. Ngendlela efanayo, uMbingeleli Omkhulu uYesu Kristu uya kusebenzisa igazi lakhe ngenxa yoluntu oluqhelisela ukholo, acime izono zalo.—Levitikus 16:15.
Baziswa Eluzukweni
3. Ngokutsho kwamaHebhere 2:9, 10, yintoni ebisenziwa nguThixo kangangeminyaka eli-1900?
3 UThixo ebesenza into ebaluleke gqitha ngokuphathelele “abazalwana” bakaYesu kangangeminyaka eli-1900. Ethetha ngale nto, umpostile uPawulos wabhala: “Simbona uYesu, ohliswe kancinane kuneengelosi, ethweswe ngozuko nembeko ngenxa yokubandezeleka ekufeni, ukuze ngobubele obungasifanelanga bukaThixo angcamle ukufa ngenxa yabantu bonke. Kuba kwakufanelekile ngalowo [uYehova uThixo] zibekho ngenxa yakhe zonke izinto nezibekho ngaye zonke izinto, ekuziseni oonyana abaninzi eluzukweni, ukuba enze uMmeli Oyintloko wosindiso lwabo agqibelele ngazo iimbandezelo.” (Hebhere 2:9, 10) UMmeli Oyintloko wosindiso nguYesu Kristu, owafunda ukuthobela ngendlela egqibeleleyo ngezinto awabandezeleka zizo xa wayephila njengomntu emhlabeni. (Hebhere 5:7-10) UYesu waba ngowokuqala ukuzalwa njengonyana wokomoya kaThixo.
4. UYesu wazalwa njani yaye nini njengoNyana wokomoya kaThixo?
4 UYehova wasebenzisa umoya wakhe oyingcwele, okanye amandla akhe asebenzayo, ukuze azale uYesu njengoNyana wakhe wokomoya, nokuze aziswe kuzuko lwasezulwini. Xa wayeyedwa kunye noYohane uMbhaptizi, uYesu wantywiliselwa ngokupheleleyo emanzini ukuze afuzisele ukuzinikela kuThixo. Ingxelo yeVangeli kaLuka ithi: “Xa bonke abantu babhaptizwayo, kwanoYesu wabhaptizwa yaye, njengoko wayethandaza, izulu lavuleka waza umoya oyingcwele ngokumila komzimba okunjengehobe wehla phezu kwakhe, kwaza kwaphuma ilizwi ezulwini lisithi: ‘UnguNyana wam, oyintanda; ndikholisiwe nguwe.’” (Luka 3:21, 22) UYohane wawubona umoya oyingcwele usihla phezu koYesu waza weva uYehova ethetha ngokuphandle evakalisa inkoliseko yakhe ngaye njengoNyana Wakhe oyintanda. Ngelo xesha yaye esebenzisa umoya oyingcwele, uYehova wamzala uYesu njengezibulo ‘loonyana abaninzi abamele baziswe eluzukweni.’
5. Ngoobani abaye baba ngabokuqala ukungenelwa kwidini likaYesu, yaye bangaphi?
5 “Abazalwana” bakaYesu baye baba ngabokuqala ukungenelwa kwidini lakhe. (Hebhere 2:12-18) Embonweni, umpostile uYohane wababona sele beseluzukweni lwasezulwini kwiNtaba yeZiyon bekunye neMvana, iNkosi uYesu Kristu ovusiweyo. Kwakhona uYohane walichaza inani labo, esithi: “Ndabona, ibe, khangela! iMvana imi phezu kweNtaba yeZiyon, kwaye kunye nayo ilikhulu elinamashumi amane anesine lamawaka linalo igama layo negama loYise libhaliwe emabunzini alo. . . . Aba bathengwa phakathi koluntu njengeentlahlela kuThixo nakuyo iMvana, yaye akufunyanwanga kuxoka emilonyeni yabo; abanasiphako.” (ISityhilelo 14:1-5) Ngoko ‘oonyana abaninzi abaziswa eluzukweni’ ezulwini bali-144 001 xa bebonke—uYesu kunye nabazalwana bakhe bokomoya.
‘Bazelwe NguThixo’
6, 7. Ngoobani ‘abazelwe nguThixo,’ yaye kuthetha ntoni oko kubo?
6 Abo bazelwe nguYehova ‘bazelwe nguThixo.’ Ethetha nabo, umpostile uYohane wabhala: “Wonk’ ubani oye wazalwa nguThixo akaqhubeki nesono, ngenxa yokuba imbewu Yakhe [kaYehova] enemveliso ihleli kulowo unjalo, yaye akanako ukuqhelisela isono, ngenxa yokuba uzelwe nguThixo.” (1 Yohane 3:9) Le ‘mbewu enemveliso’ ngumoya oyingcwele kaThixo. Ekubeni usebenzisana nelizwi lakhe, uye wenza ngamnye kwabali-144 000 ‘wazalwa ngokutsha’ kwithemba lasezulwini.—1 Petros 1:3-5, 23.
7 UYesu wayenguNyana kaThixo kwasekuzalweni kwakhe engumntu, kanye njengokuba umntu owayefezekile uAdam ‘wayengunyana kaThixo.’ (Luka 1:35; 3:38) Noko ke, emva kokubhaptizwa kukaYesu, kwakufanelekile ukuba uYehova avakalise oku: “UnguNyana wam, oyintanda; ndikholisiwe nguwe.” (Marko 1:11) Ngala mazwi awayelandela ukuthululwa komoya oyingcwele, kwacaca ukuba ngelo xesha uThixo wayezele uYesu njengoNyana Wakhe wokomoya. Ngokungathi kunjalo, uYesu ‘wazalwa ngokutsha’ enikwa ilungelo lokufumana ubomi kwakhona njengoNyana kaThixo wasezulwini ongumoya. Njengaye, abazalwana bakhe abali-144 000 ‘bayazalwa kwakhona.’ (Yohane 3:1-8; bona IMboniselo kaNovemba 15, 1992, iphepha 3-6.) Kwakhona njengoYesu, uThixo uyabathambisa aze abathume ukuba baye kuvakalisa iindaba ezilungileyo.—Isaya 61:1, 2; Luka 4:16-21; 1 Yohane 2:20.
Ubungqina Bokuzalwa
8. Bubuphi ubungqina bokuzalwa ngomoya obabakho kwimeko (a) kaYesu (b) yabafundi bakhe bokuqala?
8 Babukho ubungqina bokuba uYesu wayezelwe ngomoya. UYohane uMbhaptizi wawubona umoya usihla phezu koYesu waza weva uThixo evakalisa ukuba lo Mesiya wayesandul’ ukuthanjiswa wayengunyana wokomoya. Kodwa abafundi bakaYesu babenokwazi njani ukuba babezelwe ngomoya? Kaloku, ngemini awayenyukela ngayo ezulwini, uYesu wathi: “UYohane, eneneni, wabhaptiza ngamanzi, kodwa nina niya kubhaptizelwa kumoya oyingcwele kungekabi ziintsuku ezininzi emva koku.” (IZenzo 1:5) Abafundi bakaYesu ‘babhaptizelwa kumoya oyingcwele’ ngomhla wePentekoste yowama-33 C.E. Oko kuthululwa komoya kwakuhambisana ‘nengxolo evela ezulwini enjengaleyo kanye yempepho ebhudla ngamandla’ kunye ‘neelwimi ezingathi zezomlilo’ phezu komfundi ngamnye. Eyona nto yayibalasele yayikukukwazi kwabafundi “ukuthetha ngeelwimi ezahlukileyo, kanye njengoko umoya wawubanika ukuba bathethe amazwi.” Ngoko kwakukho ubungqina obubonakalayo nobuvakalayo bokuba indlela ekhokelela kuzuko lwasezulwini njengoonyana bakaThixo yayivuliwe kubalandeli bakaKristu.—IZenzo 2:1-4, 14-21; Yoweli 2:28, 29.
9. Bubuphi ubungqina obabukho bokuba amaSamariya, uKorneli kunye nabanye benkulungwane yokuqala babezelwe ngomoya?
9 Ngaxa lithile emva koko, umhambisi wevangeli uFilipu washumayela eSamariya. Nangona amaSamariya ayesamkele isigidimi aza abhaptizwa, babungekho ubungqina bokuba uThixo wayewazele njengoonyana bakhe. Xa umpostile uPetros noYohane bathandaza baza babeka izandla kuloo makholwa, ‘aqalisa ukwamkela umoya oyingcwele’ ngendlela eyathi yabonakala kwabo babebukele. (IZenzo 8:4-25) Obu yayibubungqina bokuba amaSamariya angamakholwa ayezelwe ngomoya njengoonyana bakaThixo. Ngokufanayo, ngowama-36 C.E., uKorneli nabanye abeeNtlanga bayamkela inyaniso kaThixo. UPetros kunye namakholwa angamaYuda awayeze naye “bathi manga, ngenxa yokuba isipho sesisa somoya oyingcwele sasithululwa kwanaphezu kwabantu beentlanga. Kuba babeva bethetha ngeelwimi yaye bemenza mkhulu uThixo.” (IZenzo 10:44-48) Uninzi lwamaKristu enkulungwane yokuqala lwafumana “iziphiwo zomoya,” ezinjengokuthetha ngeelwimi. (1 Korinte 14:12, 32) Ngaloo ndlela aba bafumana ubungqina obucacileyo bokuba babezelwe ngomoya. Kodwa amaKristu asemva koko ayeza kwazi njani ukuba azelwe ngomoya okanye akunjalo?
Ubungqina Bomoya
10, 11. Ngokusekelwe kweyabaseRoma 8:15-17, ubunokutsho njani ukuba umoya ungqinelana nabo baziindlalifa kunye noKristu?
10 Onke amaKristu athanjisiweyo ali-144 000 aye anobungqina obuzicaceleyo bokuba anomoya kaThixo. Ngokuphathelele lo mba, uPawulos wabhala: “Nifumene umoya wokwenziwa oonyana, moya lowo esithi ngawo sidanduluke sisithi: ‘Abha, Bawo!’ Umoya lowo ngokwawo ungqinelana nomoya wethu ukuba singabantwana bakaThixo. Ukuba, ngoko, singabantwana, sikwaziindlalifa: eneneni iindlalifa zikaThixo, kodwa iindlalifa ezimanyene noKristu, ukuba nje sibandezeleka ndawonye naye ukuze kanjalo sizukiswe ndawonye naye.” (Roma 8:15-17) AmaKristu athanjisiweyo aziva engoonyana kuYise wasezulwini, akathandabuzi ukuba angoonyana. (Galati 4:6, 7) Aqiniseke ngokupheleleyo ukuba azelwe nguThixo ukuze abe ngoonyana bokomoya abaziindlalifa kunye noKristu kuBukumkani basezulwini. Kulo mbandela, umoya oyingcwele kaYehova unendima ecacileyo.
11 Uphenjelelwa ngumoya oyingcwele kaThixo, umoya, okanye isimo sengqondo esilawula abathanjiswa sibashukumisela ekubeni basabele kakuhle koko iLizwi likaThixo likutshoyo ngethemba lasezulwini. Ngokomzekelo, xa befunda oko kuthethwa ziZibhalo ngabantwana bokomoya bakaYehova, bavuma ngokuzenzekelayo ukuba loo mazwi asebenza kubo. (1 Yohane 3:2) Bayazi ukuba baye ‘babhaptizelwa kuKristu Yesu’ nasekufeni kwakhe. (Roma 6:3) Ulweyiseko lwabo olungenakugungqiswa bani lolokuba bangoonyana bakaThixo bokomoya, abaza kufa baze bavuselwe kuzuko lwasezulwini, njengoYesu.
12. Yintoni eye yaveliswa ngumoya kaThixo kumaKristu athanjisiweyo?
12 Ukuzalwa ukuze ube ngunyana wokomoya akungomnqweno ohlakulelweyo. Abo bazelwe ngomoya abafuni kuya ezulwini ngenxa yokuba bekhathazwa ziingxaki ezikhoyo kulo mhlaba. (Yobhi 14:1) Kunoko, umoya kaYehova uvelisa kwabo bathanjisiweyo ithemba nomnqweno ongaqhelekanga kwabanye abantu. Abo bazelweyo bayazi ukuba ukuphila ubomi obungunaphakade njengabantu abafezekileyo kumhlaba oyiparadesi bengqongwe yintsapho eyonwabileyo nangabahlobo buya kuba mnandi gqitha. Noko ke, obo bomi abungomnqweno uphambili ezintliziyweni zabo. Ithemba lokuphila ezulwini labathanjiswa linamandla kangangokuba bakulungele ukuncama onke amathemba kunye nezinto zasemhlabeni.—2 Petros 1:13, 14.
13. Ngokutsho kweyesi-2 kwabaseKorinte 5:1-5, wawuyintoni ‘umnqweno onyamekileyo’ kaPawulos, ibe oku kubonisa ntoni ngokuphathelele abazelwe ngomoya?
13 Ithemba labo lobomi basezulwini abalinikwa nguThixo linamandla kangangokuba bavakalelwa ngendlela uPawulos awavakalelwa ngayo, xa wabhala esithi: “Siyazi ukuthi ukuba indlu yethu yasemhlabeni, le ntente, ifanele ichithakale, siza kuba nesakhiwo esivela kuThixo, indlu engenziwanga ngazandla, engunaphakade emazulwini. Kuba kule ndlu yokuhlala eneneni siyagcuma, sinqwenela ngokunyamekileyo ukufaka leyo yethu ivela ezulwini, khon’ ukuze, sakuba ngokwenene siyifakile, singafunyanwa size. Enyanisweni, thina bakule ntente siyagcuma, sisindwa; ngenxa yokuba sifuna, kungekhona ukuyikhulula, kodwa ukufaka enye, ukuze oko kunokufa kuginywe bubomi. Ke kaloku lowo wasivelisela yona kanye le nto nguThixo, owasinika isibonakaliso soko kuza kuthi kuze, oko kukuthi, umoya.” (2 Korinte 5:1-5) ‘Umnqweno onyamekileyo’ kaPawulos wawukukuvuselwa ezulwini njengesidalwa sokomoya esingafiyo. Ebhekisela kumzimba womntu, wasebenzisa umfuziselo wexhobongwana lentente, ibobosi nje lokwexeshana xa ithelekiswa nendlu. Nangona ephila emhlabeni ngemizimba yokwenyama efayo, amaKristu anomoya oyimbonakaliso yobomi basezulwini obuzayo akhangele phambili ‘kwisakhiwo esivela kuThixo,’ umzimba wokomoya ongafiyo nongonakaliyo. (1 Korinte 15:50-53) NjengoPawulos, ngokunyanisekileyo anokuthi: “Kodwa somelele kakhulu yaye kunoko sikholiswe kakuhle kukungabikho emzimbeni [womntu] nokwenza ikhaya lethu [lasezulwini] kunye neNkosi.”—2 Korinte 5:8.
Angeniswa Kwiminqophiso Ekhethekileyo
14. Xa wayesungula ukubhiyozelwa kweSikhumbuzo, nguwuphi umnqophiso uYesu awaqala ukuwukhankanya, ibe yiyiphi indima oyiphumezayo ngokuphathelele uSirayeli wokomoya?
14 AmaKristu azelwe ngomoya aqinisekile ukuba aye angeniswa kwiminqophiso emibini ekhethekileyo. UYesu wakhankanya omnye wayo xa wayesebenzisa isonka esingenagwele kunye newayini ukuze asungule iSikhumbuzo sokufa awayejamelene nako waza wathetha wenjenje ngendebe yewayini: “Le ndebe ithetha umnqophiso omtsha ongegazi lam, eliza kuphalala ngenxa yenu.” (Luka 22:20; 1 Korinte 11:25) Ngoobani abathabath’ inxaxheba kulo mnqophiso mtsha? NguYehova uThixo kunye namalungu oSirayeli wokomoya—abo uYehova anenjongo yokubazisa kuzuko lwasezulwini. (Yeremiya 31:31-34; Galati 6:15, 16; Hebhere 12:22-24) Ekubeni wenziwe wakwazi ukusebenza ngegazi likaYesu eliphaleleyo, lo mnqophiso mtsha ukhupha phakathi kweentlanga abantu begama likaYehova uze wenze la maKristu azelwe ngomoya abe yinxalenye ‘yembewu’ ka-Abraham. (Galati 3:26-29; IZenzo 15:14) Umnqophiso omtsha ulungiselela ukuba onke amaSirayeli okomoya aziswe eluzukweni ngokuvuselwa kubomi bokungafi ezulwini. Ekubeni ‘ungumnqophiso ongunaphakade,’ iingenelo zawo ziya kuhlala ngonaphakade. Siseza kubona enoba lo mnqophiso uza kuphumeza indima ethile nangezinye iindlela kusini na ebudeni beMinyaka Eliwaka nasemva koko.—Hebhere 13:20.
15. Ngokuvisisana noLuka 22:28-30, nguwuphi umnqophiso abaqalisa ukungeniswa kuwo abalandeli abathanjisiweyo bakaYesu, yaye kwenziwa nini oko?
15 “Oonyana abaninzi” uYehova anenjongo ‘yokubazisa eluzukweni’ kwakhona baye bangeniswa kumnqophiso woBukumkani basezulwini njengabantu ngabanye. Ngokuphathelele lo mnqophiso ophakathi kwakhe kunye nabo balandela emanyathelweni akhe, uYesu wathi: “Ningabo baye banamathela kum ezilingweni zam; yaye ndenza umnqophiso kunye nani, kanye njengoko uBawo enze umnqophiso kunye nam, wobukumkani, ukuze nidle nize nisele etafileni yam ebukumkanini bam, nize nihlale ezitroneni ukuze nigwebe izizwe ezilishumi elinesibini zakwaSirayeli.” (Luka 22:28-30) Umnqophiso woBukumkani wasekwa xa abafundi bakaYesu bathanjiswa ngomoya oyingcwele ngePentekoste yowama-33 C.E. Loo mnqophiso uza kusebenza ngonaphakade phakathi kukaKristu nezinxulumani zakhe. (ISityhilelo 22:5) Ngoko ke, amaKristu azelwe ngomoya aqinisekile ukuba akumnqophiso omtsha nakumnqophiso woBukumkani. Ngaloo ndlela, xa kubhiyozelwe iSidlo SeNkosi Sangokuhlwa, iba lelo qaqobana lentsalela yabathanjiswa esesemhlabeni elithabathayo kwisonka, esimela umzimba womntu kaYesu ongenasono, newayini, efuzisela igazi lakhe elifezekileyo elaphalazwa ekufeni kwakhe laza lawenza wasebenza umnqophiso omtsha.—1 Korinte 11:23-26; bona IMboniselo kaFebruwari 1, 1989, iphepha 17-20.
Babiziwe, Banyuliwe Yaye Bathembekile
16, 17. (a) Ukuze baziswe eluzukweni, yintoni abamele beyenze bebonke abali-144 000? (b) Ngoobani ‘ookumkani abalishumi,’ yaye bayiphatha njani intsalela esemhlabeni ‘yabazalwana’ bakaKristu?
16 Ukusebenza kokuqala kwedini lentlawulelo likaYesu kwenza abali-144 000 bakwazi ukubizelwa kubomi basezulwini yaye banyulwe ngokuzalwa ngomoya nguThixo. Kakade ke, ukuze baziswe eluzukweni, kufuneka ‘benze unako-nako ukwenza ukubizwa nokunyulwa kwabo kuqiniseke,’ kwaye bamele bazingqine bethembekile de kuse ekufeni. (2 Petros 1:10; Efese 1:3-7; ISityhilelo 2:10) Intsalela encinane yabathanjiswa esesemhlabeni igcine ingqibelelo yayo nangona ichaswa ‘ngookumkani abalishumi’ abamela onke amagunya ezobupolitika. Ingelosi yathi: “Aba baya kulwa neMvana, kodwa, ngenxa yokuba iyiNkosi yeenkosi noKumkani wookumkani, iMvana iya kuboyisa. Kanjalo, abo babiziweyo nabanyuliweyo nabathembekileyo abakunye nayo baya kwenjenjalo.”—ISityhilelo 17:12-14.
17 Abalawuli abangabantu abanakumenza nto uYesu, ‘uKumkani wookumkani,’ kuba usezulwini. Kodwa babonakalisa intiyo kwintsalela ‘yabazalwana’ bakhe esesemhlabeni. (ISityhilelo 12:17) Loo ntiyo iya kufikelela esiphelweni ngemfazwe kaThixo yeArmagedon, ekuqinisekiweyo ukuba ‘uKumkani wookumkani’ kunye ‘nabazalwana’ bakhe—‘abo babiziweyo nabanyuliweyo nabathembekileyo’ baya koyisa. (ISityhilelo 16:14, 16) Okwangoku, amaKristu azelwe ngomoya azizinxadanxada. Yintoni ayenzayo ngoku, ngaphambi kokuba aziswe eluzukweni nguYehova?
Ithini Impendulo Yakho?
◻ Ngoobani uThixo ‘abazisa eluzukweni lwasezulwini’?
◻ Kuthetha ntoni ‘ukuzalwa nguThixo’?
◻ ‘Umoya ungqinelana’ njani namanye amaKristu?
◻ Abo bazelwe ngomoya baye benza yiphi iminqophiso?
[Umfanekiso okwiphepha 15]
NgePentekoste yowama-33 C.E., kwanikelwa ubungqina bokuba indlela esa kuzuko lwasezulwini yayivuliwe