Isiphiwo—Ngaba Sizisa Indumiso Kumntu Okanye Uzuko KuThixo?

“UMLAWULI akafanele abe bhetele kunabalawulwa bakhe nje kuphela, ufanele abe nomtsalane kubo,” wabhala esitsho uXenophon, injengele edumileyo yaseGrisi. Namhlanje, abaninzi babiza loo “mtsalane” ngokuthi sisiphiwo.

Kakade ke, asingabo bonke abalawuli babantu abanesiphiwo. Kodwa abo banaso basebenzisa ubuchule babo ekuphembeleleni abantu ukuba babanqule yaye basisebenzise ukufeza iminqweno yabo yobuqu. Mhlawumbi owona mzekelo mbi wakutshanje yayinguAdolf Hitler. UWilliam L. Shirer ubhala esithi kwincwadi yakhe ethi The Rise and Fall of the Third Reich: “[Ngowe-1933] kwinkoliso yamaJamani uHitler ngokwenene wayenomoya—okanye kungekudala wayeza kuba nomoya—wokuba yinkokeli enesiphiwo. Babefanele bamlandele ngokupheleleyo, ngokungathi uneembono zobuthixo, kwiminyaka elishumi elinambini eyayinesiphithiphithi.”

Imbali yonqulo nayo izele ngabalawuli abaneziphiwo abaye baphembelela abantu ukuba bazinikele kubo kodwa abaye babazisela intlekele abalandeli babo. UYesu walumkisa esithi: “Lumkani ningalahlekiswa mntu, kuba baninzi abaya kuza egameni lam besithi ‘ndinguKristu’, yaye baya kulahlekisa abaninzi.” (Mateyu 24:4, 5, Phillips) OoKristu bobubuxoki abaneziphiwo abazange babonakale kwinkulungwane yokuqala kuphela. Ebudeni beminyaka yee-1970, uJim Jones wazivakalisa “engumesiya wePeople’s Temple.” Wachazwa “njengendoda yecawa enesiphiwo” yaye “enamandla angaqhelekanga phezu kwabantu,” yaye ngowe-1978 waphembelela abona bantu baninzi embalini ukuba bazibulale.a

Kuyabonakala ukuba, isiphiwo sisenokuba sisipho esiyingozi. Noko ke, iBhayibhile ithetha ngesipho okanye ngezipho ezahlukahlukeneyo, ezivela kuThixo, ezifumaneka kubo bonke abantu ukuze bangenelwe bonke. Igama lesiGrike elithetha isipho lelithi khaʹri·sma, yaye livela kangangezihlandlo ezili-17 eBhayibhileni. Omnye umphengululi ongumGrike ulichaza eli gama ‘njengesipho sesisa esingasifanelanga, into enikwa umntu engayisebenzelanga nangayifanelanga, into evela kububele bukaThixo yaye engasoze ifunyanwe okanye ibekho ngemizamo yomntu.’

Ngoko ngokweZibhalo, ikhaʹri·sma sisipho esifunyanwa ngenxa yobubele obungasifanelanga bukaThixo. Ziziphi ezinye zezi zipho esiziphiwe ngobubele nguThixo? Yaye sinokuzisebenzisa njani ukuze sizise indumiso kuye? Makhe siqwalasele ezi zipho zobubele zintathu.

Ubomi Obungunaphakade

Ngokungathandabuzekiyo esona sipho sikhulu bubomi obungunaphakade. UPawulos wabhala esithi kwibandla laseRoma: “Umvuzo isono esiwuhlawulayo kukufa, kodwa isipho [khaʹri·sma] uThixo asinikelayo bubomi obungunaphakade ngoKristu Yesu iNkosi yethu.” (Roma 6:23) Kubalulekile ukuphawula ukuba “umvuzo” (ukufa) yinto esiyizuze, nangona singafuni, ngemeko yethu enesono. Kwelinye icala, ubomi obungunaphakade esibunikwa nguThixo yinto engasifanelanga kwaphela engasokuze izuzwe ngemisebenzi esiyenzayo.

Isipho sobomi obungunaphakade sifanele sixatyiswe yaye kwabelwane ngaso. Sinokubanceda abantu bamazi uYehova, bamkhonze yaye ngaloo ndlela bababalwe ngesipho sobomi obungunaphakade. ISityhilelo 22:17 sithi: “Umoya nomtshakazi bahlala besithi: ‘Yiza!’ Kwaye nabani na ovayo makathi: ‘Yiza!’ Ibe nabani na onxaniweyo makeze; nabani na onqwenelayo makathabathe amanzi obomi ngesisa.”

Sinokubakhokelela njani abanye kula manzi anika ubomi? Ngokuyintloko ngokusebenzisa iBhayibhile ngendlela ephumelelayo kubulungiseleli bethu. Liyinyaniso elokuba kweminye imimandla yomhlaba, abantu abafane bafunde okanye bacinge ngezinto zokomoya; sekunjalo, asoloko ekho amathuba ‘okuvusa indlebe’ yothile. (Isaya 50:4) Kulo mbandela, sinokuba nentembelo emandleni eBhayibhile aphembelelayo, “kuba ilizwi likaThixo liphilile kwaye linamandla.” (Hebhere 4:12) Enoba bubulumko obusebenzayo beBhayibhile, intuthuzelo kwanethemba elilinikelayo, okanye ukucacisa kwayo ngenjongo yobomi, iLizwi likaThixo lisenokuchukumisa iintliziyo zabantu lize lenze abantu baqalise ukuhamba kwindlela esa ebomini.—2 Timoti 3:16, 17.

Ukongezelela, uncwadi olusekelwe eBhayibhileni lusenokusinceda sithi “Yiza!” Umprofeti uIsaya waxela kwangaphambili ukuba ebudeni beli xesha lobumnyama ngokomoya, ‘uYehova uya kuthi chapha ubuqaqawuli’ kubantu bakhe. (Isaya 60:2) Iimpapasho zeWatch Tower Society ziyayibonakalisa le ntsikelelo evela kuYehova, yaye nyaka ngamnye zikhokelela izigidi zabantu kuYehova, uMthombo wokhanyiselo lokomoya. Kumaphepha azo akudunyiswa abantu. Njengokuba intshayelelo yeMboniselo icacisa, “injongo yeMboniselo kukuphakamisa uYehova uThixo njengeNkosi enguMongami wendalo iphela. . . . Ikhuthaza ukuba nokholo kuKumkani kaThixo olawulayo ngoku, uYesu Kristu, ogazi lakhe laphalalayo livulela indlela uluntu ukuzuza ubomi obungunaphakade.”

UmKristu ongumlungiseleli wexesha elizeleyo, oye kangangeminyaka emininzi waba nempumelelo ephawulekayo kubulungiseleli bakhe, ugqabaza esithi ngokubaluleka kweMboniselo noVukani! ekuncedeni abantu basondele kuThixo: “Xa abo ndifunda nabo iBhayibhile beqalisa ukufunda nokunandipha IMboniselo noVukani!, benza inkqubela ngokukhawuleza. Ndiwabona la maphephancwadi njengento exabisekileyo ekuncedeni abantu bazi uYehova.”

Amalungelo Enkonzo

UTimoti wayengumfundi ongumKristu owanikwa esinye isipho esasifuna ingqalelo ekhethekileyo. Umpostile uPawulos wamxelela oku: “Musa ukungasikhathaleli isiphiwo [khaʹri·sma] esikuwe owasinikwa ngoko kwakuxelwe kwangaphambili naxa iqumrhu lamadoda amakhulu labeka izandla phezu kwakho.” (1 Timoti 4:14) Sasiyintoni esi sipho? Sasibandakanya ukumiselwa kukaTimoti njengomveleli ohambahambayo, ilungelo lenkonzo awayemele alinyamekele kakuhle. Kwisicatshulwa esifanayo, uPawulos wabongoza uTimoti: “Qhubeka uzibhokoxa kufundo lwasesidlangalaleni, ekubongozeni, ekufundiseni. Nikela ingqalelo rhoqo kuwe nakwimfundiso yakho. Hlala kwezi zinto, kuba ngokwenza oku uya kusindisa kokubini wena nabo bakuphulaphulayo.”—1 Timoti 4:13, 16.

Abadala namhlanje nabo bafanele bawaxabise amalungelo abo enkonzo. Njengokuba uPawulos ebonisa, enye indlela abanokukwenza ngayo oku ‘kungokunikela ingqalelo kwimfundiso yabo.’ Kunokuxelisa iinkokeli zehlabathi ezineziphiwo, banikela ingqalelo kuThixo, kungekhona kwiziqu zabo. UYesu, uMzekelo wabo, wayengumfundisi obalaseleyo ngokungathandabuzekiyo owayenobuntu obunomtsalane, kodwa ngokuthobekileyo wanikela uzuko kuYise. Wathi: “Oko ndikufundisayo asikokwam, kodwa kokwalowo wandithumayo.”—Yohane 5:41; 7:16.

UYesu wazukisa uYise wasemazulwini ngokusebenzisa iLizwi likaThixo njengelinegunya kwimfundiso yakhe. (Mateyu 19:4-6; 22:31, 32, 37-40) Ngokufanayo uPawulos wayegxininisa imfuneko yokuba abaveleli ‘babambelele ngokuqinileyo kwilizwi elithembekileyo ngokuphathelele ubugcisa babo bokufundisa.’ (Tito 1:9) Ngokusekela iintetho zabo ngokuqinileyo eZibhalweni, ngokungathi kunjalo, abadala baya kuthetha amazwi afanayo nakaYesu: “Izinto endizitshoyo kuni andizithethi ngokuphuma kum.”—Yohane 14:10.

Kungayiphi indlela abadala ‘abanokubambelela ngayo ngokuqinileyo kwilizwi elithembekileyo’? Ngokusekela iintetho nezabelo zabo zeentlanganiso kwiLizwi likaThixo, becacisa yaye begxininisa isibhalo abasisebenzisayo. Imizekeliso ebaxiweyo okanye amabali ahlekisayo, ingakumbi xa esenziwa nokugqithiseleyo, asenokubangela abaphulaphuli banganikeli ngqalelo kwiLizwi likaThixo baze banikele ingqalelo kubuchule besithethi. Kwelinye icala, iindinyana zeBhayibhile zizo eziya kufikelela iintliziyo zabaphulaphuli zize zibashukumise. (INdumiso 19:7-9; 119:40; thelekisa uLuka 24:32.) Iintetho ezinjalo azinikeli ngqalelo engako kubantu yaye zizisa uzuko olungakumbi kuThixo.

Enye indlela abadala abanokuba ngabafundisi abanempumelelo ngayo kukufunda kwabanye abadala. Njengokuba uPawulos wanceda uTimoti, ngoko omnye umdala usenokunceda omnye. “Isinyithi silola isinyithi, indoda ilola ubuso bowayo.” (IMizekeliso 27:17; Filipi 2:3) Abadala bayangenelwa ngokwabelana ngeengcamango nangamacebiso. Omnye osandul’ ukumiselwa njengomdala wacacisa esithi: “Umdala onamava wathabatha ixesha endibonisa indlela ayilungiselela ngayo intetho yesidlangalala. Ekulungiseleleni kwakhe, wayequka imibuzo, imizekeliso, imizekelo, okanye amava amafutshane, kwanezicatshulwa zeZibhalo aye waziphanda ngokucokisekileyo. Ndiye ndafunda kuye ngendlela yokuyenza intetho yam inandipheke ukuze ndikuphephe ukunikela intetho enganiki umdla neyindinisa.”

Sonke thina banandipha amalungelo enkonzo, onoba singabadala, izicaka zolungiselelo, okanye oovulindlela, sifanele sisixabise isipho sethu. Kungekudala ngaphambi kokufa kwakhe, uPawulos wakhumbuza uTimoti ‘ukuba axhokonxe njengomlilo isiphiwo [khaʹri·sma] sikaThixo esikuye,’ kwimeko kaTimoti sasiquka isipho esikhethekileyo somoya. (2 Timoti 1:6) Kumakhaya akwaSirayeli, kwakusoloko kuvutha amalahle. Kwakunokwenzeka ukuba ‘axhokonxwe’ ukuze kubangelwe amadangatye okanye ubushushu obungakumbi. Ngoko siyakhuthazwa ukuba sizibhokoxe kwizabelo zethu, sixhokonxe njengomlilo nasiphi na isipho sokomoya esisiphathisiweyo.

Izipho Zomoya Esinokwabelana Ngazo

Uthando lukaPawulos ngabazalwana bakhe eRoma lwamshukumisela ukuba abhale: “Ndilangazelela ukunibona, ndize ndinikele isiphiwo [khaʹri·sma] esithile sokomoya kuni ukuze nenziwe niqine; okanye, kunoko, ukuze kubekho ukwabelana ngokhuthazo phakathi kwenu, nguye ngamnye ngokholo lomnye, kokubini olwenu nolwam.” (Roma 1:11, 12) UPawulos wayebujonga ubuchule bokomeleza ukholo lwabanye ngokuthetha kwethu nabo njengesipho sokomoya. Ukwabelana ngokwezipho zokomoya ezinjalo kuya kuphumela ekomelezeni ukholo kwanokhuthazo.

Yaye ngokuqinisekileyo oku kuyafuneka. Kule nkqubo ingendawo siphila kuyo, ngandlel’ ithile sonke sijamelana noxinezeleko. Noko ke, ukwabelana ngokhuthazo ngokuthe rhoqo, kusenokusinceda sinyamezele. Ingcinga yokwabelana—ukupha nokwamkela—ibalulekile ukuze sizigcine somelele ngokomoya. Enyanisweni, sonke siyalufuna ukhuthazo ngamanye amaxesha, kodwa sisonke sinokwakhana.

Ukuba sikuphaphele ukuphawula kwabo sikhonza nabo abo bafuna ukhuthazo, mhlawumbi ‘singakwazi ukuthuthuzela abo bakulo naluphi na uhlobo lwembandezelo ngayo intuthuzelo nathi ngokwethu esithuthuzelwa ngayo nguThixo.’ (2 Korinte 1:3-5) Igama lesiGrike elithi ukuthuthuzela (pa·raʹkle·sis) ngokoqobo lithetha “ukusondela ecaleni kukabani.” Ukuba, xa kuyimfuneko, sisecaleni komzalwana okanye kodade wethu ukuze sinikele uncedo, alithandabuzeki elokuba nathi siya kufumana inkxaso yothando efanayo xa siyifuna.—INtshumayeli 4:9, 10; thelekisa IZenzo 9:36-41.

Kwakhona utyelelo lokwalusa olwenziwa ngabadala luyingenelo gqitha. Nangona kukho amathuba xa utyelelo lwenziwa ukuze kunikelwe isiluleko esingokweZibhalo kwiimeko ezifuna ingqalelo, inkoliso yamatyelelo okwalusa zizihlandlo zokukhuthaza, ‘ukuthuthuzela iintliziyo.’ (Kolose 2:2) Xa abaveleli benza amatyelelo okomeleza ukholo anjalo, ngokwenene banikela isipho sokomoya. NjengoPawulos, baya kufumanisa ukuba olu hlobo lokupha lulodwa luyavuza, yaye baya kuvelisa ‘ulangazelelo’ ngabazalwana babo.—Roma 1:11.

Oku kwakunjalo ngemeko yomnye umdala waseSpeyin, onikela la mava alandelayo: “URicardo, inkwenkwe eneminyaka eli-11 ubudala, ngokuqhelekileyo wayengabonakalisi mdla ongako kwiintlanganiso nasebandleni. Ngoko ndacela imvume kubazali bakaRicardo ukuba ndityelele unyana wabo, yaye bandivumela ngokukhululekileyo. Babehlala kwiintaba ezimalunga nomgama weyure ukusuka ekhaya ngenqwelo-mafutha. Kuyabonakala ukuba uRicardo wayekholiswa ngumdla endawubonakalisayo kuye, yaye wasabela ngoko nangoko. Kungekudala waba ngumvakalisi ongabhaptizwanga kwanelungu elidlamkileyo lebandla. Ubuntu bakhe bokuba neentloni bathatyathelw’ indawo bubuntu obonwabileyo nobudlamke ngakumbi. Abaninzi ebandleni babuza: ‘Kwenzeke ntoni kuRicardo?’ Babebonakala bemphawula okwesihlandlo sokuqala. Ndijonge kolo tyelelo lokwalusa olubalulekileyo, ndivakalelwa kukuba ndiye ndazuza ngaphezu kukaRicardo. Xa engena eHolweni yoBukumkani, uyancuma, yaye uza kum ebaleka ukuza kundibulisa. Kuye kwandivuyisa ukubona inkqubela yakhe yokomoya.”

Alithandabuzeki elokuba, amatyelelo okwalusa, anjengala, asikelelwa ngokutyebileyo. Amatyelelo anjalo ayavisisana nesicelo sikaYesu esithi: “Yalusa amatakane am ezimvu.” (Yohane 21:16) Kakade ke, abadala asingabo bodwa abanikela ngezipho ezinjalo zokomoya. Wonk’ ubani ebandleni unokuvuselela abanye eluthandweni nasemisebenzini emihle. (Hebhere 10:23, 24) Njengokuba abakhweli bentaba bebotshelelwa kunye, ngoko nathi sidityaniswe kunye ngamaqhina okomoya. Ngokungaphephekiyo, oko sikwenzayo noko sikuthethayo kuyabachaphazela abanye. Intetho ekwekwayo okanye ukuba hlaba amadlala kakubi abanye kusenokuwenza buthathaka amaqhina asimanyanisayo. (Efese 4:29; Yakobi 3:8) Kwelinye icala, amagama akhethwe kakuhle okukhuthaza noncedo lothando asenokunceda abazalwana bethu ekoyiseni ubunzima babo. Ngale ndlela siza kube sabelana ngezipho zokomoya ezexabiso elihlala lihleli.—IMizekeliso 12:25.

Ukubonakalisa Uzuko LukaThixo Ngokomlinganiselo Ozeleyo

Kucacile ukuba mKristu ngamnye unomlinganiselo wesiphiwo. Sinikwe idinga elingathethekiyo lobomi obungunaphakade. Sikwanezipho zokomoya esinokwabelana ngazo. Yaye sinokukulwela ukukhuthaza okanye ukuphembelela abanye ekwenzeni okulungileyo. Bambi banezipho ezongezelelekileyo ngendlela yamalungelo enkonzo. Zonke ezi zipho zibubungqina bobubele bukaThixo obungasifanelanga. Yaye ekubeni nasiphi na isipho esinokuba naso siyinto esamkeliswe nguThixo, ngokuqinisekileyo asinasizathu sakuqhayisa.—1 Korinte 4:7.

NjengamaKristu, senza kakuhle xa sizibuza, ‘Ngaba ndiza kusebenzisa nawuphi na umkhamo wesiphiwo sam ukuze ndizise uzuko kuYehova, uMniki waso “sonke isipho esilungileyo naso sonke isipho esigqibeleleyo”? (Yakobi 1:17) Ngaba ndiya kuxelisa uYesu ndize ndifundise abanye ngokobuchule endinabo nangokweemeko zam?’

Umpostile uPetros ngokufutshane usixelela imbopheleleko yethu kulo mbandela: “Ngokomlinganiselo ngamnye afumene ngawo isiphiwo [khaʹri·sma], sisebenziseni ekulungiseleleni omnye komnye njengamagosa amahle obubele obungasifanelanga bukaThixo obubonakaliswa ngeendlela ezahlukahlukeneyo. Ukuba nabani na uyathetha, makathethe ngokungathi kunjalo izibhengezo ezingcwele zikaThixo; ukuba nabani na uyalungiselela, makalungiselele exhomekeke emandleni awanikwa nguThixo; khon’ ukuze kuzo zonke izinto uThixo azukiswe ngoYesu Kristu.”—1 Petros 4:10, 11.

[Imibhalo esemazantsi]

[Umfanekiso okwiphepha 23]

Corbis-Bettmann

UPI/Corbis-Bettmann