Ukuxabisa “Izipho Ezikuhlobo Lwabantu”
“Nihlonele abo basebenza nzima phakathi kwenu . . . ninikele ingqalelo engaqhelekanga ngakumbi ngothando ngenxa yomsebenzi wabo.”—1 TESALONIKA 5:12, 13.
1. Ngokutsho kweZenzo 20:35, ukupha kunawaphi amandla? Cacisa.
“KUKHO uyolo olungakumbi ekupheni kunokuba lukho ekwamkeleni.” (IZenzo 20:35) Ngaba usakukhumbula ukugqibela kwakho ukububona ubunyaniso bala mazwi kaYesu? Mhlawumbi wawuphe umntu omthanda ngokwenene isipho. Wawusikhethe ngocoselelo, kuba wawufuna sibe yinto exabisekileyo kuloo mntu umthandayo. Obo buso obuzele uncumo baloo mntu umthandayo—hayi indlela obayivuyisa ngayo intliziyo yakho! Xa intshukumisa ifanelekile, ukupha kuba yimbonakaliso yothando, yaye ukubonakalisa uthando kuba namandla abangela ulonwabo.
2, 3. (a) Kutheni kunokutshiwo nje ukuba akakho umntu owonwabe ngaphezu kukaYehova, yaye ilungiselelo ‘lezipho ezikuhlobo lwabantu’ linokuyivuyisa njani intliziyo yakhe? (b) Yintoni esingafuni kuyenza ngesipho esivela kuThixo?
2 Ngoko ke, ingangubani owonwabe ngaphezu koYehova, uMniki waso “sonke isipho esilungileyo”? (Yakobi 1:17; 1 Timoti 1:11) Ngalo lonke ixesha enikela isipho uqhutywa luthando. (1 Yohane 4:8) Ngokuqinisekileyo kunjalo nangesipho uThixo aye wasipha ibandla esebenzisa uKristu—“izipho ezikuhlobo lwabantu.” (Efese 4:8) Ilungiselelo lokuba abadala banyamekele umhlambi liyimbonakaliso yothando olunzulu uThixo analo ngabantu bakhe. La madoda anyulwa ngenyameko—amele ahlangabezane neemfaneleko ezingokweZibhalo. (1 Timoti 3:1-7; Tito 1:5-9) Ayazi ukuba amele ‘awuphathe ngofefe umhlambi,’ kuba xa esenjenjalo izimvu ziya kuba nesizathu sokuba nombulelo ngabalusi abanothando abanjalo. (IZenzo 20:29; INdumiso 100:3) Xa uYehova ebona izimvu zakhe zizaliswe ngumbulelo, ngokuqinisekileyo naye umele ukuba uyavuya!—IMizekeliso 27:11.
3 Ngokuqinisekileyo asifuni kulijongela phantsi ixabiso lesipho esivela kuThixo; singafuni kananjalo ukungazixabisi izipho zakhe. Loo nto iphakamisa le mibuzo mibini ilandelayo: Abadala bafanele bayijonge njani indima yabo ebandleni? Yaye umhlambi uphela unokubonisa njani ukuba uyazixabisa “izipho ezikuhlobo lwabantu”?
‘Singabasebenzi Abangamadlelane Nani’
4, 5. (a) UPawulos ulifanisa nantoni ibandla, yaye kutheni lo mzekeliso ufanelekile? (b) Yintoni eboniswa ngumzekeliso kaPawulos ngokuphathelele indlela esifanele sijongane size siphathane ngayo?
4 UYehova uye wanika “izipho ezikuhlobo lwabantu” umlinganiselo othile wegunya ebandleni. Kakade ke, abadala abafuni kulisebenzisa kakubi elo gunya, kodwa bayazi ukuba kulula gqitha ukwenjenjalo ekubeni bengafezekanga. Ngoko ke, bafanele bazijonge njani phakathi komhlambi? Khawuqwalasele umzekeliso owasetyenziswa ngumpostile uPawulos. Emva kokuxubusha isizathu sokuba kubekho “izipho ezikuhlobo lwabantu,” uPawulos wabhala: “Masithi ngalo uthando sikhule ezintweni zonke kuye lowo uyintloko, uKristu. Ngokuphuma kuye wonke umzimba, ngokuthi umanyaniswe ndawonye ngemvisiswano uze wenziwe usebenzisane ngelungu lonke elinikela oko kufunekayo, ngokokusebenza kwelungu ngalinye elahlukileyo ngomlinganiselo ofanelekileyo, wenza ukuba umzimba ukhule ukuze wakheke eluthandweni.” (Efese 4:15, 16) Ngoko uPawulos ufanisa ibandla, abadala kunye namanye amalungu, nomzimba womntu. Kutheni ufanelekile nje lo mzekeliso?
5 Umzimba womntu uyilwe ngamalungu amaninzi ahlukeneyo kodwa inye kuphela intloko. Noko ke, akukho nanye into emzimbeni—isihlunu, umthambo-luvo, umthambo—ongenamsebenzi. Ilungu ngalinye libalulekile yaye liba negalelo kwimpilo nakubuhle bomzimba uphela. Ngokufanayo, ibandla liyilwe ngamalungu amaninzi ahlukeneyo, kodwa ilungu ngalinye—enoba liselula okanye likhulile, lomelele okanye linkenenkene—linokuba negalelo kwimpilo yokomoya nakubuhle bebandla. (1 Korinte 12:14-26) Akukho namnye ofanele azive engabalulekanga. Kwelinye icala, akakho ofanele azive emkhulu kunabanye, kuba sonke—enoba singabalusi okanye sizizimvu—siyinxalenye yomzimba, yaye sinentloko enye, uKristu. Ngaloo ndlela uPawulos usibonisa uthando, inyameko kunye nentlonelo esifanele sibe nayo omnye ngomnye. Ukukuqonda oku kuyabanceda abadala ukuba babe nembono ethobekileyo nelungeleleneyo ngendima yabo ebandleni.
6. Nangona wayenegunya njengompostile, uPawulos wawubonakalisa njani umoya wokuthobeka?
6 Ezi “zipho ezikuhlobo lwabantu” azifuni kulawula ubomi okanye ukholo lwabo zinqula kunye nabo. UPawulos, nangona wayenegunya njengompostile, ngokuzithoba wabaxelela oku abaseKorinte: “Asikuko ukuba siziinkosi phezu kokholo lwenu, kodwa singabasebenzi abangamadlelane ukuze nibe novuyo, kuba nimi ngokholo lwenu.” (2 Korinte 1:24) UPawulos akazange afune ukulawula ukholo kunye nendlela ababephila ngayo abazalwana bakhe. Eneneni, akazange ayibone imfuneko yaloo nto, kuba wavakalisa intembelo yokuba babengamadoda namabhinqa athembekileyo awayekwintlangano kaYehova kuba efuna ukwenza okulungileyo. Ngenxa yoko, xa wayethetha ngesiqu sakhe nangalowo wayehamba naye, uTimoti, eyona nto yayithethwa nguPawulos yayiyile: ‘Umsebenzi wethu kukusebenzisana nani ekukhonzeni uYehova ngovuyo.’ (2 Korinte 1:1) Onjani umoya wokuthobeka!
7. Yintoni abayiqondayo abadala abathobekileyo ngendima yabo ebandleni, yaye yiyiphi intembelo abanayo ngabasebenzi abangamadlelane nabo?
7 “Izipho ezikuhlobo lwabantu” zinaloo msebenzi mnye nanamhlanje. ‘Zingabasebenzi abangamadlelane ukuze sibe novuyo.’ Abadala abathobekileyo bayayiqonda into yokuba asifuni bona isigqibo sabanye sokuba bamkhonza kangakanani uThixo. Bayazi ukuba nangona besenokubakhuthaza abanye ukuba bandise okanye baphucule ubulungiseleli babo, ukukhonza uThixo kufanele kuphume ngokuzithandela entliziyweni. (Thelekisa eyesi-2 kwabaseKorinte 9:7.) Baqinisekile ukuba, ukuba abasebenzi abangamadlelane nabo banovuyo, baya kwenza konke abanokukwenza. Ngoko kungumnqweno wabo osuka entliziyweni ukunceda abazalwana babo ‘bakhonze uYehova bevuya.’—INdumiso 100:2.
Ukunceda Bonke Ukuba Bakhonze Ngovuyo
8. Ziziphi ezinye iindlela abadala abanokunceda ngazo abazalwana babo ukuba bakhonze uYehova bevuya?
8 Badala, ninokubanceda njani abazalwana benu bakhonze ngovuyo? Ninokubakhuthaza ngokumisela umzekelo. (1 Petros 5:3) Mayibonakale inzondelelo novuyo eninalo kubulungiseleli, ibe abanye banokukhuthazwa ukuba baxelise umzekelo wenu. Bancomeni abanye ngemigudu abayenza ngomphefumlo wabo uphela. (Efese 4:29) Ukubancoma ngothando nangokunyaniseka abanye kuyabanceda bazive bebalulekile yaye befunwa. Kuyazikhuthaza izimvu ukuba zifune ukwenza konke okusemandleni azo ukuze zikhonze uThixo. Kuphepheni ukubathelekisa nabanye ngeligxekayo. (Galati 6:4) Ukuthelekisa okunjalo kudla ngokudimaza kunokuba kubashukumisele ekubeni benze inkqubela. Ngaphezu koko, izimvu zikaYehova zingabantu abahlukahlukeneyo—zineemeko nobuchule obungafaniyo. NjengoPawulos, bonakalisani intembelo kubazalwana benu. Uthando “lukholelwa izinto zonke,” ngoko siya kuba senza kakuhle xa sikholelwa ukuba abazalwana bethu bayamthanda uThixo yaye bafuna ukumkholisa. (1 Korinte 13:7) Xa ‘nibonisa imbeko kwabanye,’ nibenza bavelise ezona mpawu zabo zilungileyo. (Roma 12:10) Qinisekiswani kukuba xa izimvu zikhuthazwa, yaye zihlaziywa, inkoliso yazo iya kwenza konke enokukwenza ekukhonzeni uThixo, yaye iya kuvuya enkonzweni.—Mateyu 11:28-30.
9. Yiyiphi imbono ngabanye abadala eya kunceda umdala ngamnye akhonze evuya?
9 Ukuzigqala kwakho ngeliso elithobekileyo ‘njengomsebenzi olidlelane’ kuya kunceda wena ukhonze ngovuyo yaye uzixabise iziphiwo ezahlukeneyo zabanye abadala. Umdala ngamnye uneziphiwo kunye nobuchule anokubusebenzisa ukuze kungenelwe ibandla. (1 Petros 4:10) Omnye unokuba nesiphiwo sokufundisa. Omnye usenokuba lichule ekwenzeni amalungiselelo. Ukanti omnye usenokuba ungeneka lula ngenxa yobubele nemfesane anayo. Enyanisweni, akakho umdala onazo zonke iziphiwo ngomlinganiselo ofanayo. Ngaba ukuba nesiphiwo esithile—masithi mhlawumbi, isiphiwo sokufundisa—kumenza umdala abe mkhulu kunomnye? Akunjalo konke konke! (1 Korinte 4:7) Kwelinye icala, akuyomfuneko ukuba sibe nomona ngenxa yesiphiwo somnye okanye ukuziva ungento xa abanye bencoma umdala othile ngenxa yobuchule bakhe. Khumbula ukuba, nawe uneziphiwo uYehova azibonayo kuwe. Yaye unokukunceda ukuba uzihlakulele ezo ziphiwo yaye uzisebenzise ukuze kungenelwe abazalwana bakho.—Filipi 4:13.
‘Bathobele Uze Ubalulamele’
10. Kutheni kufanelekile ukuba sibonakalise uxabiso ‘ngezipho ezikuhlobo lwabantu’?
10 Xa sifumana isipho, kuyinto efanelekileyo ukubonakalisa uxabiso. EyabaseKolose 3:15 ithi: “Zibonakaliseni ninombulelo.” Ngoko ke, kuthekani ‘ngezipho ezikuhlobo lwabantu,’ isipho esixabisekileyo uYehova aye wasinika sona? Kakade ke, ubukhulu becala umbulelo siwusa kuYehova, uMphi onesisa. Kodwa kuthekani ‘ngezipho ezikuhlobo lwabantu’ ngokwazo? Sinokubonakalisa njani ukuba siyazixabisa?
11. (a) Sinokulubonakalisa njani uxabiso lwethu ‘ngezipho ezikuhlobo lwabantu’? (b) Iyintoni intsingiselo yebinzana elithi “bathobeleni” nelithi “nibalulamele”?
11 Sinokubonakalisa ukuba siyazixabisa ezi “zipho ezikuhlobo lwabantu” ngokukhawuleza sisithobele isiluleko kunye nezigqibo zazo ezisekelwe eBhayibhileni. IBhayibhile iyacebisa: “Bathobeleni abo bakhokelayo phakathi kwenu nize nibalulamele, kuba bahlala beyilindile imiphefumlo yenu njengabo baya kunikela ingxelo; ukuze bakwenze oku ngovuyo kungekhona ngokuncwina, kuba oku bekuya kwenza umonakalo kuni.” (Hebhere 13:17) Phawula ukuba asimele sanele nje ‘ukubathobela,’ kodwa sikwamele ‘sibalulamele’ abo banikela ukhokelo. Igama lesiGrike eliguqulelwe ngokuthi “ukululama” ngokoqobo lithetha “ukuyekelela kwinto ethile.” Xa egqabaza ngegama elithi “bathobeleni” nelithi “balulameleni,” umphengululi weBhayibhile uR. C. H. Lenski uthi: “Umntu uthobela xa evumelana noko axelelwa ukuba akwenze, weyiselwa ukuba akwenze ngokubona ukulunga nokuba yingenelo kwaloo nto; umntu uyekelela . . . xa enembono eyahlukileyo.” Xa siluqonda size sivumelane nolwalathiso lwabo banikela ukhokelo, kunokuba lula ukuthobela. Kodwa kuthekani ukuba asisiqondi isizathu sokuba kuthatyathwe isigqibo esithile?
12. Kutheni sifanele sibalulamele, okanye siyekelele, kwanaxa singasazi ngokupheleleyo isizathu sokwenziwa kwesigqibo esithile?
12 Nantsi ke inkalo ekusenokufuneka silulame okanye siyekelele kuyo. Ngoba? Phakathi kwezinye izinto, kufuneka siwathembe la madoda afanelekayo ngokomoya ukuba acinga ngokulungelwa kwethu. Ngapha koko, azi kakuhle ukuba amele aphendule kuYehova ngezimvu athunywe ukuba azinyamekele. (Yakobi 3:1) Ukongezelela, siya kuba senza kakuhle xa sikhumbula ukuba sisenokungazazi zonke iinkcukacha eziziimfihlelo eziye zawenza afikelele kwisigqibo esiqinisekileyo.—IMizekeliso 18:13.
13. Yintoni enokusinceda silulame xa kufikwa kumba wezigwebo zekomiti egwebayo yabadala?
13 Kuthekani ngokululama xa kufikelelwa kwizigqibo zekomiti egwebayo? Kuyavunywa ukuba, oku kusenokungabi lula, ngokukodwa ukuba eso sisigqibo sokususa kubudlelane umntu omthandayo—isalamane okanye umhlobo osenyongweni. Nakulo mba, kuhle ukuyekelela kwisigwebo esinikelwa ‘zizipho ezikuhlobo lwabantu.’ Zazi bhetele kunathi, yaye zisenokwazi izibakala ezingakumbi. Aba bazalwana badla ngokuba buhlungu xa besenza izigqibo ezinjalo; kuyimbopheleleko enzulu ‘ukugweba ngenxa kaYehova.’ (2 Kronike 19:6) Bazama ngandlela zonke ukubonakalisa inceba, kuba bayazi ukuba uThixo ‘uyaxolela.’ (INdumiso 86:5) Kodwa ke bakwamele bagcine ibandla licocekile, yaye ngaloo ndlela iBhayibhile iyalela ukuba babasuse kubudlelane abenzi bobubi abangaguqukiyo. (1 Korinte 5:11-13) Kwiimeko ezininzi kwanomenzi wobubi lowo uyasamkela eso sigqibo. Usenokuba ebefuna nje olo qeqesho ukuze abuyele ezingqondweni. Ukuba thina, abo bamthandayo, siyasilulamela eso sigqibo, sisenokumnceda angenelwe kolo qeqesho.—Hebhere 12:11.
“Ninikele Ingqalelo Engaqhelekanga Ngakumbi”
14, 15. (a) Ngokutsho kweyoku-1 kwabaseTesalonika 5:12, 13, kutheni abadala befanelwe yingqalelo yethu? (b) Kutheni kunokuthiwa abadala ‘basebenza nzima phakathi kwethu’?
14 Kwakhona sinokubonisa uxabiso lwethu ‘ngezipho ezikuhlobo lwabantu’ ngokuzinika ingqalelo. Xa wayebhalela ibandla laseTesalonika, uPawulos wabongoza amalungu alo esithi: “Nihlonele abo basebenza nzima phakathi kwenu nabanongamelayo eNkosini nabanilulekayo; nokuba ninikele ingqalelo engaqhelekanga ngakumbi ngothando ngenxa yomsebenzi wabo.” (1 Tesalonika 5:12, 13) “Basebenza nzima”—ngaba elo binzana alichazi abadala abazinikeleyo abazincama ngokungazingciyo ngenxa yethu? Okomzuzwana nje, khawucinge ngomthwalo onzima othwelwe ngaba bazalwana bathandekayo.
15 Kwiimeko ezininzi iba ngamadoda aneentsapho namele aphangele ukuze ondle iintsapho zawo. (1 Timoti 5:8) Ukuba umdala unabantwana, abo bantwana bafuna ixesha kunye nengqalelo kayise. Kusenokufuneka abancede kumsebenzi wabo wesikolo, aze alungiselele ixesha lokuba bachithe amandla abo obutsha ngokuzihlaziya okufanelekileyo. (INtshumayeli 3:1, 4) Okona kubalulekileyo kukuba, uyazinyamekela iintswelo zokomoya zentsapho yakhe, uqhuba isifundo sentsapho seBhayibhile rhoqo, usebenza nabo kubulungiseleli basentsimini, yaye uya nabo kwiintlanganiso zamaKristu. (Duteronomi 6:4-7; Efese 6:4) Singalibali ke ukuba, ukongezelela kwezi mbopheleleko eziqhelekileyo kuninzi lwethu, abadala baneembopheleleko ezongezelelekileyo: ukulungiselela iintlanganiso, ukwenza amatyelelo okwalusa, ukunyamekela impilontle yokomoya yebandla, yaye xa kuyimfuneko, ukusingatha amatyala okugweba. Bambi baba neembopheleleko ezongezelelekileyo ezinxibelelene neendibano zesiphaluka, ezesithili, ukwakhiwa kweeHolo zoBukumkani, neeKomiti Zokunxibelelana Nezibhedlele. Kuyinyaniso ukuba aba bazalwana “basebenza nzima”!
16. Chaza iindlela esinokubanika ingqalelo ngazo abadala.
16 Sinokubanika njani ingqalelo? Isaci seBhayibhile sithi: “Ilizwi elithethwe ngexa elililo, azi lihle!” (IMizekeliso 15:23; 25:11) Ngoko amazwi abonakalisa uxabiso navakalisa ukhuthazo lokwenene anokubabonisa ukuba asiwuthabathi lula umsebenzi wabo. Enye into kukuba, sifanele silindele okusengqiqweni kubo. Kwelinye icala, sifanele sizive sikhululekile ukuba siye kubo xa sifuna uncedo. Kusenokubakho amaxesha okuba ‘intliziyo yethu izibhijabhije’ size sifune ukhuthazo, ulwalathiso, okanye isiluleko esisekelwe kwiZibhalo esivela kwabo ‘bafanelekela ukufundisa’ iLizwi likaThixo. (INdumiso 55:4; 1 Timoti 3:2) Kwangaxeshanye, sifanele sikhumbule ukuba lincinane ixesha umdala anokunikela ingqalelo ngalo kuthi, kuba kaloku akanakuzityeshela iimfuno zentsapho yakhe okanye ezabanye abasebandleni. Ekubeni ‘sinemvakalelo yobudlelane’ ngaba bazalwana basebenza nzima, asiyi kufuna izinto ezingekho ngqiqweni kubo. (1 Petros 3:8) Kunoko, masilixabise naliphi na ixesha kunye nengqalelo abanokuyinikela kuthi.—Filipi 4:5.
17, 18. Kukuphi ukuzincama okubonakaliswa ngabafazi abaninzi abanabayeni abangabadala, yaye sinokubonakalisa njani ukuba asibajongeli phantsi aba dade bathembekileyo?
17 Kuthekani ngabafazi babadala? Ngaba bona abafanelwanga yingqalelo yethu? Ngapha koko, bahlulelana nebandla ngengqalelo yabayeni babo. Ngokufuthi oku kuthetha ukuzincama kubo. Maxa wambi, abadala bamele bachithe iingokuhlwa benyamekela imicimbi yebandla ngexesha abebenokulichitha neentsapho zabo. Kumabandla amaninzi abafazi abathembekileyo abangamaKristu bakulungele ukuncama abayeni babo ukuze banyamekele izimvu zikaYehova.—Thelekisa eyesi-2 kwabaseKorinte 12:15.
18 Sinokubonisa njani ukuba asibajongeli phantsi aba dade bathembekileyo abangamaKristu? Ngokuqinisekileyo asiyi kuba senjenjalo xa sifuna okungekho ngqiqweni kubayeni babo. Kodwa kwakhona masingakulibali ukuba namandla kwamazwi ambalwa okubonakalisa uxabiso. IMizekeliso 16:24 ithi: “Linqatha lobusi amazwi amnandi, ayincasa emphefumlweni, ayimpiliso emathanjeni.” Khawuqwalasele la mava alandelayo. Emva kwentlanganiso yamaKristu, esinye isibini esitshatileyo saya kumdala saza sacela ukuthetha naye ngonyana waso okwishumi elivisayo. Ngoxa lo mdala wayesathetha neso sibini, umkakhe wayelinde ngomonde. Emva koko, lo mama waya kumfazi waloo mdala waza wathi kuye: “Enkosi ngexesha umyeni wakho aye walichitha enceda intsapho yam.” Loo mazwana amnandi abonakalisa uxabiso ayichukumisa ngokwenene intliziyo yomfazi waloo mdala.
19. (a) Ziziphi iimbopheleleko abadala abaziphumeza ngokuthembeka njengeqela? (b) Yintoni esifanele sizimisele ukuyenza sonke?
19 Ilungiselelo lokuba abadala banyamekele izimvu lisesinye ‘sezipho ezilungileyo’ zikaYehova. (Yakobi 1:17) Ewe, la madoda akafezekanga; ayazenza iimpazamo njengathi sonke. (1 Kumkani 8:46) Ukanti, njengeqela, abadala abakumabandla asehlabathini lonke baziphumeza ngokuthembeka iimbopheleleko uYehova abanike zona—ukulungisa, ukwakha, ukumanyanisa nokukhusela umhlambi. Ngamana umdala ngamnye angaqhubeka ezinyamekela ngothantamiso izimvu zikaYehova, ngaloo ndlela ezingqina esisipho, okanye intsikelelo, kubazalwana bakhe. Yaye sonke masizimisele ukubonakalisa uxabiso ‘ngezipho ezikuhlobo lwabantu’ ngokuzithobela nangokuzilulamela nangokuzinika ingqalelo ngenxa yomsebenzi onzima eziwenzayo. Hayi indlela esinombulelo ngayo kuba uYehova eye walungiselela amadoda, ngokungathi kunjalo, athi kwizimvu zakhe: ‘Kungumsebenzi wethu ukuninceda nikhonze uThixo ngovuyo’!
Ubunokuphendula Njani?
◻ Kutheni kufanelekile ukufanisa ibandla nomzimba?
◻ Abadala banokubanceda njani abazalwana babo bakhonze uYehova bevuya?
◻ Kutheni singafanelanga sibathobele nje kuphela kodwa sikwafanele sibalulamele abo banikela ukhokelo?
◻ Sinokubanika ingqalelo njani abadala?
[Umfanekiso okwiphepha 16]
Badala, bancomeni abanye ngemigudu abayenza ngomphefumlo uphela
[Umfanekiso okwiphepha 17]
Abadala banako ukunceda amalungu entsapho nabanye bakhonze ngovuyo ngokumisela umzekelo wokuba nenzondelelo kubulungiseleli
[Imifanekiso ekwiphepha 18]
Siyabaxabisa abadala bethu abasebenza nzima!