Ukufikelela Kwanabangakumbi Ngeendaba Ezilungileyo
NJENGOKO ndandicinga ngabantu abakwilizwe lakowethu, ndaqonda ukuba abaninzi bawazi amaNgqina kaYehova kuphela kumaziko eendaba. Ndacinga, aba bantu kufuneka kuqhagamshelwane nabo, ukuze bafumanise ukuba amaNgqina kaYehova angoobani kwanoko akukholelwa ngokwenene. Kodwa ndinokubanceda njani aba bantu? Umyeni wam ungumdala ongumKristu, yaye wandinika ukhokelo namacebiso obulumko.
Safumana ingcamango engundoqo kwinqaku elithi “Amaphephancwadi Anikela Intuthuzelo Eluncedo,” elipapashwe kwinkupho yephephancwadi uVukani! (wesiNgesi) kaJanuwari 8, 1995. Ngokuphathelele umsebenzi welinye iNgqina, eli nqaku lithi: “Ibisoloko ilusukelo lwalo ukuqokelela imibhalo ethile emidala kaVukani! egcinwe ngamanye amaNgqina ezindlwini zawo. Emva koko lalityelela amagosa elivakalelwa kukuba anokubonakalisa umdla kwamanye amanqaku.”
Ngoncedo lomyeni wam, kungekudala ndaqokelela amakhulukhulu eenkupho zamaphephancwadi. Kuwo ndandikwazi ukukhetha imibandela eyahlukahlukeneyo efanele abantu endiza kuqhagamshelana nabo.
Ndisebenzisa incwadi yemfonomfono kwaneengxelo zikawonke wonke, ndenza uludwe lwezibhedlele, iihostele zolutsha, kwanamakhaya abongikazi. Kwakhona ndenza uludwe lwabangcwabi, abaphathi nabacebisi ezikolweni, abezonyango, kwanamagosa eentolongo neenkundla zomthetho. Uludwe lwam lwaluquka abalathisi bamaziko amakhoboka otywala neziyobisi, imibutho yemibandela yezemekobume, yabakhubazekileyo namaxhoba emfazwe, nophando lwesondlo. Kananjalo andizange ndibashiye abaphathi beeofisi zentlalo-ntle, zeenkonzo zentlalo, kwanemicimbi yentsapho.
Bendiza Kuthini?
Into yokuqala endandiyenza xa ndityelele yayikukuzichaza ngokucacileyo ukuba ndingubani. Ndandule ke ndichaze ukuba utyelelo lwam lwaluza kuthabatha imizuzu embalwa.
Emva kokuba ndidibene ubuso ngobuso naloo mntu uphetheyo, bendisithi: “Ndingomnye wamaNgqina kaYehova. Noko ke, andizanga kuba nengxubusho yonqulo, esenokuba ayifaneleki ebudeni beeyure zomsebenzi.” Ngokuqhelekileyo abantu babekhululeka. Ndandule ke, ndivisisanise amagqabaza am naloo meko, ndize ndiqhubeke ndithi: “Isizathu sokutyelela kwam sintlu-mbini. Okokuqala, ndifuna ukuvakalisa uxabiso ngomsebenzi olungiselelwa yiofisi yakho. Ngapha koko, ayimele ijongelwe phantsi into yokuba umntu othile achithe ixesha lakhe kwanamandla akhe ngenxa yabantu. Oku kuyancomeka kakhulu.” Kwizihlandlo ezininzi umntu ekuthethwe naye ngolu hlobo wayemangaliswa.
Ngoku kusenokwenzeka ukuba lo mntu wayezibuza ngesizathu sesibini sokutyelela kwam. Ndandiqhubeka ndithi: “Isizathu sesibini sokutyelela kwam sesi: Kwiphephancwadi lethu uVukani!, elipapashwa jikelele, ndiye ndakhetha amanqaku athile athetha ngokukhethekileyo ngohlobo lomsebenzi wakho kwaneengxaki ezinxulumene nawo. Ndiqinisekile ukuba ubungathanda ukwazi indlela azijonga ngayo lo lindixesha ukho jikelele ezo ngxaki. Ndingathanda ukukushiyela le mibhalo.” Ngokufuthi bendixelelwa ukuba imigudu yam ibixatyiswa.
Imiphumo Emangalisayo Nengumvuzo
Xa ndasebenzisa le ndlela, inkoliso yandiphulaphula ngenyameko; mnye kuphela kwabali-17 owandibhebhethayo. Ndaba namava aliqela amangalisayo nangumvuzo.
Ngokomzekelo, emva kokuzama izihlandlo ezine kwanokulinda ngomonde, ndaphumelela ekudibaneni nomhloli wesikolo wesithili. Wayengumntu oxakeke kakhulu. Sekunjalo, wayenobubele kakhulu yaye wathetha nam kangangethutyana. Njengoko ndandihamba, wathi: “Ndiyawuxabisa ngokwenene umgudu wakho, yaye ngokuqinisekileyo ndiza kulufunda uncwadi lwakho ngokucokisekileyo.”
Kwesinye isihlandlo, ndaya kwinkundla yesithili, ndadibana nejaji ephetheyo, indoda eliqina. Ekungeneni kwam eofisini yayo, yasusa intloko yayo kwiphephandaba eyayilifunda yaza yandijonga icaphukile.
“Iiyure zomsebenzi zingooLwezibini ekuseni kuphela, yaye ndiza kukulungela ukunikela nayiphi na inkcazelo,” yatsho ngokurhabaxa.
Ngokukhawulezileyo ndaphendula ndisithi: “Ndicela uxolo ngokuza ngexesha elingafanelekanga, eneneni, ndingakuvuyela ukuphinda ndize ngelinye ixesha. Kodwa utyelelo lwam belungumbandela wobuqu.”
Ngoku le jaji yaba ngugqada-mbekweni. Yabuza ngendlela enobubele oko ndandikufuna. Ndaphinda ndathi ndiza kuphinda ndize kwakhona ngoLwesibini.
Ndingalindelanga, yandibongoza isithi: “Nceda uhlale phantsi. Ufuna ntoni?”
Kwalandela incoko evusa umdla, yaye yacela uxolo ngokungabonakalisi bubele kwasekuqaleni kuba yayixakeke kakhulu.
Le jaji yabuza oku emva kwexesha: “Ngaba uyazi ukuba yintoni endiyithandayo ngamaNgqina kaYehova? Anemigaqo eqinileyo angaphambukiyo kuyo. UHitler wazama konke anokukwenza, kodwa amaNgqina akazange aye emfazweni.”
Xa sangena eofisini, oonobhala basiqonda ukuba singoobani. Ngoko unobhala ophetheyo wakhwaza ngendlela engenabubele esithi, “Umongameli akasokuze abamkele abantu bombutho.”
Ngokuzolileyo ndaphendula ndathi: “Kodwa uza kusamkela, kuba singamaNgqina kaYehova. Asizanga kucela nto, yaye utyelelo lwethu aluzi kuthabatha imizuzu engaphezu kwemithathu.” Entliziyweni yam ndathandaza ngenzondelelo ndisithi, “Owu Yehova, ndicela ukuba oku kuphumelele!”
Unobhala waphendula ngokungakhathaliyo, “Kulungile ke, ndiza kuzama.” Wahamba. Emva kwemizuzu embalwa, eyayiba ngunyaka onesiqhuma kum, wabuya elandelwa ngumongameli ngenkqu. Engakhange akhuphe nelimdaka, wasikhokelela eofisini yakhe, egqitha eminye iminyango emibini.
Njengokuba sasincokola, waba nobubele ngakumbi. Wakulungela ukwamkela iinkupho ezikhethekileyo zephephancwadi uVukani! xa samnikayo. Sinombulelo kuYehova ngokusinika eli thuba lokunikela ubungqina obufanelekileyo ngenjongo yomsebenzi wethu.
Ndikhangele emva kumava amaninzi amahle, ndiye ndakuqonda ngokupheleleyo oko umpostile uPetros wakuthethayo: “Ngokuqinisekileyo ndiyaqonda ukuba uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZenzo 10:34, 35) Ukuthanda kukaThixo kukuba abantu bazo zonke iimvelaphi, iilwimi, okanye izigxina zentlalo banikwe ithuba lokwazi injongo yakhe ngoluntu nangomhlaba.—Linikelwe.