Incwadi Evela KuThixo
“Isiprofeto asizange nangaliphi na ixesha siziswe ngokuthanda komntu, kodwa abantu bathetha ngokuphuma kuThixo njengoko babeqhutywa ngumoya oyingcwele.”—2 PETROS 1:21.
1, 2. (a) Kutheni abanye benamathandabuzo ngokuphathelele ukuba lulutho kweBhayibhile kubomi bale mihla? (b) Ziziphi iinkalo ezintathu ezibubungqina esinokubusebenzisa ukubonisa ukuba iBhayibhile ivela kuThixo?
NGABA iBhayibhile ilulutho kubantu esekumbovu ukuba baphile kwinkulungwane yama-21? Abanye bathi akunjalo. Echaza isizathu sokuba avakalelwe ukuba iBhayibhile ishiywe lixesha, uGqr. Eli S. Chesen, wabhala: “Akakho umntu obenokukhuthaza ukusetyenziswa kohlelo lowe-1924 lwencwadi [yesikhokelo] yenzululwazi yemichiza kwizifundo zale mihla zenzululwazi yezemichiza—kuninzi gqitha okuye kwafundwa ngezemichiza ukususela ngelo xesha.” Xa ungazikisi ukucinga, eli bango libonakala lisengqiqweni. Ngapha koko, umntu uye wafunda lukhulu ngenzululwazi, ngengqondo nangemikhwa yabantu ukususela kumaxesha okubhalwa kweBhayibhile. Ngoko ke, bambi basenokuzibuza: ‘Kunokwenzeka njani ukuba incwadi endala kangaka ihlale ichanile kwimibandela yenzululwazi? Kunokwenzeka njani ukuba iqulathe isiluleko esiluncedo kule mihla?’
2 IBhayibhile iyaziphendulela. Kweyesi-2 kaPetros 1:21, sixelelwa ukuba abaprofeti beBhayibhile “bathetha ngokuphuma kuThixo njengoko babeqhutywa ngumoya oyingcwele.” Ngaloo ndlela iBhayibhile iyabonisa ukuba iyincwadi evela kuThixo. Noko ke, sinokubenza njani abanye bakukholelwe oku? Makhe siqwalasele iinkalo ezintathu ezibubungqina bokuba iBhayibhile iliLizwi likaThixo: (1) Ichanile ngokwenzululwazi, (2) iqulethe imigaqo engaphelelwa lixesha neluncedo kule mihla, yaye (3) iqulethe iziprofeto ezicacileyo eziye zazaliseka, njengoko kungqinwa zizibakala zembali.
Incwadi Evumelana Nenzululwazi
3. Kutheni iBhayibhile ingakhange isongelwe zizinto ezifunyaniswe zizazinzulu?
3 IBhayibhile asiyoncwadi yenzululwazi. Noko ke, iyincwadi yenyaniso, kwaye inyaniso inokumelana nezanzwili zexesha. (Yohane 17:17) IBhayibhile ayikhange isongelwe zizinto ezifunyaniswe yinzululwazi. Xa ihlomla ngemibandela ephathelele inzululwazi, ayiphenjelelwa nakancinane ziingcamango “zenzululwazi” eziye zangqineka zibubuvuvu nje. Enyanisweni, iqulethe inkcazelo enganelanga kuchana nje kuphela ngokwezenzululwazi kodwa ekwachasene ngokupheleleyo neembono ezazamkelekile ngaloo mihla. Ngokomzekelo, khawuphawule ukuvisisana okuphakathi kweBhayibhile nenzululwazi yezamayeza.
4, 5. (a) Yintoni ababengayazi oogqirha bamandulo ngezifo? (b) Kutheni siqinisekile ukuba uMoses wayeqhelene neendlela zonyango ezazisetyenziswa ngoogqirha baseYiputa?
4 Oogqirha bamandulo babengayiqondi kakuhle indlela ezisasazeka ngayo izifo, bengakuqondi kananjalo ukubaluleka kococeko ukuze kuthintelwe izigulo. Uninzi lweendlela zokunyanga zamandulo belunokubonakala lungaphucukanga gqitha ngokwemilinganiselo yale mihla. Enye yezona ncwadi zezamayeza zindala ezikhoyo yiEbers Papyrus, equlethe ulwazi lwezamayeza lwaseYiputa, olususela kowe-1550 B.C.E. Iqulethe iindlela ezingama-700 zokunyanga izigulo ezahlukahlukeneyo, “ezithabathela kwinxeba lokulunywa yingwenya ukusa kuzipho lozwane oluqaqambayo.” Inkoliso yezi ndlela zokunyanga yayingancedi nto kwaphela, kodwa ezinye zaziyingozi gqitha. Ukuze kunyangwe inxeba, enye yezinto ezazinconyelwa kukusebenzisa umxube welindle lomntu elidityaniswe nezinye izinto.
5 Le ncwadi yeendlela zokunyanga zaseYiputa yabhalwa malunga nexesha elinye neencwadi zokuqala yeBhayibhile, ezaziquka uMthetho kaMoses. UMoses, owazalwa ngowe-1593 B.C.E., wakhulela eYiputa. (Eksodus 2:1-10) Ekubeni wayekhulele kwindlu kaFaro, uMoses “wayalelwa kubo bonke ubulumko bamaYiputa.” (IZenzo 7:22) Wayewazi “amagqirha [“oogqirha,” NW]” aseYiputa. (Genesis 50:1-3) Ngaba iindlela zabo zokunyanga ezazingeloncedo okanye ezazinobungozi zaziphembelela iincwadi zakhe?
6. Nguwuphi umyalelo wococeko okuMthetho kaMoses ogqalwe njengosengqiqweni ngabenzululwazi yezamayeza yale mihla?
6 Ngokwahlukileyo koko, uMthetho kaMoses wawuquka imiyalelo yococeko eye yagqalwa njengesengqiqweni yinzululwazi yezamayeza yale mihla. Ngokomzekelo, umthetho owawusebenza emkhosini wawusithi ilindle limele ligqunyelelwe ngaphandle kwekampu. (Duteronomi 23:13) Lo yayingumlinganiselo ophucuke gqitha wokuthintela izifo. Wawunceda ekugcineni imithombo yamanzi ingenakungcola yaye ukhusela abantu kwisisu segazi nezinye izifo zorhudo ezithwalwa ziimpukane nezisaqengq’ ugodo nanamhl’ oku kwizigidi zabantu, ngokukodwa abakumazwe asakhasayo.
7. Yiyiphi imiyalelo yococeko yoMthetho kaMoses eyayinceda ekuthinteleni ukusasazeka kwezifo ezosulelayo?
7 UMthetho kaMoses wawunayo neminye imiyalelo eyayinceda ukuthintela ukusasazeka kwezifo ezosulelayo. Umntu owayenesifo okanye erhanelwa ngokuba nesifo esosulelayo wayehlaliswa yedwa. (Levitikus 13:1-5) Iingubo okanye izitya ezazichukunyiswe sisilwanyana esizifeleyo (mhlawumbi sibulawa sisifo esithile) zazimele zihlanjwe ngaphambi kokuba zisetyenziswe okanye zitshatyalaliswe. (Levitikus 11:27, 28, 32, 33) Nabani na owayechukumisa isidumbu wayegqalwa njengoyinqambi ibe kwakufuneka alandele inkqubo ethile yokuhlambulula eyayiquka ukuhlamba iingubo zakhe kunye nesiqu sakhe. Ebudeni beentsuku ezisixhenxe zokuba yinqambi, wayengamele achukumise mntu.—Numeri 19:1-13.
8, 9. Kutheni kunokutshiwo ukuba uludwe lwemiyalelo yococeko ekuMthetho kaMoses lwaluphucuke ngaphezulu lee kunobelo xesha?
8 Olu ludwe lwemiyalelo yococeko lwalubonisa ubulumko obabuphucuke ngaphezulu lee kunobelo xesha. Abenzululwazi yezamayeza banamhlanje baye bafunda lukhulu ngendlela yokusasazeka neyokuthintela izifo. Ngokomzekelo, uphando lwezamayeza lwenkulungwane ye-19 luye lwakhokelela ekusetyenzisweni kwezibulali-ntsholongwane—ucoceko olunciphisa amathuba okosulelwa zizifo. Umphumo ube kukuncipha kokosulelwa zizifo nokufa ngaphambi kwexesha. Ngonyaka we-1900, ngexesha lokuzalwa abantwana babelindeleke ukuba baphile iminyaka engaphantsi kwama-50 kuninzi lwamazwe aseYurophu nakwelaseUnited States. Ukususela ngoko, liye lantinga gqitha, kungekuphela ngenxa yenkqubela yezamayeza ekulawuleni izifo kodwa nangenxa yococeko neemeko zokuphila ezibhetele.
9 Ukanti, kwiminyaka engamawaka ngaphambi kokuba abenzululwazi yezamayeza bafunde indlela ezisasazeka ngayo izifo, ngokusengqiqweni iBhayibhile yancomela imilinganiselo ethile yokuthintela eyayikhusela abantu kwizifo. Akumangalisi ke ngoko ukuba, uMoses athethe ngamaSirayeli omhla wakhe ngokuqhelekileyo awayephila de aye kufika kwiminyaka engama-70 okanye engama-80 ubudala. (INdumiso 90:10) UMoses wayeyithabatha phi le miyalelo engococeko? IBhayibhile iyachaza: Uludwe lweMithetho ‘lwadluliselwa ngeengelosi.’ (Galati 3:19) Ewe, iBhayibhile asiyoncwadi equlethe ubulumko babantu; yincwadi evela kuThixo.
Incwadi Eluncedo Kubomi Bale Mihla
10. Nangona iBhayibhile yagqitywa malunga nama-2000 eminyaka eyadlulayo, sinjani isiluleko sayo?
10 Iincwadi zamacebiso zidla ngokushiywa lixesha zize kungekudala zihlaziywe okanye zithatyathelw’ indawo zezinye. Kodwa iBhayibhile yahluke ngokwenene. INdumiso 93:5 ithi: “Izingqiniso zakho zinyanise kunene.” Nangona iBhayibhile yagqitywa kwiminyaka emalunga nama-2000 eyadlulayo, amazwi ayo asasebenziseka. Ibe asebenza ngokufanayo kungakhathaliseki ukuba linjani ibala lolusu lwakho okanye uhlala kwiliphi na ilizwe. Khawuqwalasele eminye yemizekelo yesiluleko seBhayibhile esingaphelelwa lixesha, “esinokuthenjwa gqitha.”
11. Kwiminyaka engamashumi aliqela edluleyo, yintoni abazali abaninzi abaphenjelelwa ukuba bayikholelwe ngokuqeqesha abantwana?
11 Kumashumi aliqela eminyaka edluleyo abazali abaninzi—beqhutywa “ziingcamango ezisexesheni” ngokuphathelele indlela yokukhulisa abantwana—babecinga ukuba “akuvumelekanga ukumalela okuthile.” Babenoloyiko lokuba, ukubasikela imida abantwana kwakuya kubenza buhlungu yaye kubanxunguphalise. Abacebisi ababeneenjongo ezintle babesithi abazali mabazikhwebule kuyo nayiphi na into engaphezu kokulungisa abantwana babo ngobulali. Uninzi lwezo ngcali ngoku “lubongoza abazali ukuba babe ngathi bayaqinisa ukuba ngqongqo, balawul’ imicimbi kwakhona,” itsho iThe New York Times.
12. Lithetha ukuthini igama lesiGrike eliguqulelwe ngokuthi “ingqeqesho,” yaye kutheni abantwana beyifuna ingqeqesho enjalo?
12 Noko ke, lonke elo xesha iBhayibhile ibinikela isiluleko esicacileyo nesilungeleleneyo kumbandela wokuqeqesha abantwana. Icebisa ngelithi: “Boyise, musani ukubacaphukisa abantwana benu, kodwa qhubekani nibakhulisela kwingqeqesho nasekweyiselweni kwengqondo kuYehova.” (Efese 6:4) Isibizo sesiGrike esiguqulelwe ngokuthi “ingqeqesho” sithetha “ukukhulisa, ukuqeqesha, ukufundisa.” IBhayibhile ithi ingqeqesho, okanye ukufundisa, bubungqina bothando lwabazali. (IMizekeliso 13:24) Abantwana bakhula kakuhle xa bephantsi kolwalathiso lwemilinganiselo yokuziphatha ecacileyo ebanceda baqonde okungileyo nokuphosakeleyo. Ingqeqesho enikelwa kakuhle ibanceda bazive benqabisekile; iyababonisa ukuba abazali babo babakhathalele yaye banenkxalabo ngohlobo lomntu abaza kuba nguye.—Thelekisa IMizekeliso 4:10-13.
13. (a) Ngokuphathelele uqeqesho, sisiphi isilumkiso iBhayibhile esinika abazali? (b) Hlobo luni loqeqesho olunconyelwa yiBhayibhile?
13 Kodwa iBhayibhile iyabalumkisa abazali kulo mba wokuqeqesha. Abazali abafanele baxhaphaze ngenxa yegunya abanalo. (IMizekeliso 22:15) Akakho umntwana ofanele ohlwaywe ngenkohlakalo. Ugonyamelo olungokwasemzimbeni alunayo nencinane indawo kwintsapho ephila ngokuvisisana neBhayibhile. (INdumiso 11:5) Kunjalo ke nakugonyamelo olungokweemvakalelo—amazwi arhabaxa, ukunyemba okuzingisileyo, nezikweko ezihlabayo, zinto ezo ezinokumenza umntwana anxube. (Thelekisa IMizekeliso 12:18.) Ngobulumko, iBhayibhile ilumkisa abazali isithi: “Musani ukubacaphukisa abantwana benu, khon’ ukuze bangafi intliziyo [okanye, “niya kubahlutha intliziyo,” Phillips].” (Kolose 3:21) IBhayibhile ikhuthaza ukuyithintela into ingekenzeki. KwiDuteronomi 11:19, abazali babongozwa ukuba basebenzise amathuba olonwabo ukuze babethelele imilinganiselo yokuziphatha neyokomoya kubantwana babo. Esi siluleko sicacileyo, nesisengqiqweni esiphathelele ukukhulisa abantwana siluncedo namhlanje njengoko sasinjalo kumaxesha okubhalwa kweBhayibhile.
14, 15. (a) Kungayiphi indlela ethi iBhayibhile inikele isiluleko esingaphezulu kunobulumko nje? (b) Ziziphi iimfundiso zeBhayibhile ezinokunceda amadoda namabhinqa eentlanga nezizwe ezahlukeneyo agqalane njengalinganayo?
14 IBhayibhile inikela isiluleko esingaphezulu kunobulumko nje obuqhelekileyo. Isigidimi sayo siyayitsala intliziyo. EyamaHebhere 4:12 ithi: “Ilizwi likaThixo liphilile kwaye linamandla yaye libukhali ngakumbi kunalo naliphi na ikrele elintlangothi-mbini ibe lihlaba de kuse ekwahlulweni komphefumlo nomoya, nokwamalungu nomongo wawo, yaye liyakwazi ukuqonda iingcamango nozimiselo lwentliziyo.” Khawubone umzekelo wamandla ashukumisayo eBhayibhile.
15 Namhlanje abantu bahlulwe yimiqobo yobuhlanga neyobuzwe. Le miqobo yakhiwe ngabantu iye yanegalelo ekubulaweni kwabantu okweempukane kwiimfazwe ezigquba ehlabathini lonke. Kwelinye icala, iBhayibhile iqulethe iimfundiso ezinceda amadoda namabhinqa eentlanga ezahlukeneyo ukuba azigqale njengalinganayo. Ngokomzekelo, IZenzo 17:26 zithi uThixo “wazenza ngokuphuma kumntu omnye zonke iintlanga zabantu.” Oku kubonisa ukuba eneneni lunye kuphela uhlanga olukhoyo—luhlanga lwabantu! Xa ihlabela mgama iBhayibhile isikhuthaza ukuba ‘sibe ngabaxelisa uThixo,’ ethi ngaye: “[Yena] akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (Efese 5:1; IZenzo 10:34, 35) Kwabo bakufuna ngokwenene ukuphila ngokuvisisana neemfundiso zeBhayibhile, olu lwazi luyamanyanisa. Luhla luye kweyona nzulu—entliziyweni—lushenxise le miqobo eyenziwe ngabantu nebenza babe yimihlambi eyalanayo. Ngaba ngokwenene luyasebenza kwihlabathi lanamhlanje?
16. Khawusibalisele amava abonisa ukuba amaNgqina kaYehova abubuzalwana bokwenene bezizwe ngezizwe.
16 Ngokuqinisekileyo luyasebenza! AmaNgqina kaYehova aziwa ngobuzalwana bawo bezizwe ngezizwe, obumanyanisa abantu abaneemvelaphi ezahlukeneyo ngokuqhelekileyo abebenokuba yinyoka nesele. Ngokomzekelo, ebudeni beemfazwe zobuzwe zaseRwanda, amaNgqina kaYehova akwezi zizwe zibini ayebakhusela abazalwana noodade wabo abangamaKristu bolunye uhlanga, ebeka ubomi bawo esichengeni ngokwenjenjalo. Ngaxa lithile, elinye iNgqina eliliHutu lafihla ekhayeni lalo intsapho yamaTutsi eyayinamalungu amathandathu eyayisebandleni lalo. Okulusizi kukuba, ekugqibeleni le ntsapho yamaTutsi yabhaqwa yaza yabulawa. Ngoku lo mzalwana uliHutu kunye nentsapho yakhe bajamelana nengqumbo yabo babulali ibe kwafuneka isabele kwelaseTanzania. Ikho neminye imizekelo efanayo eye yabaliswa. AmaNgqina kaYehova azi kakuhle ukuba olo manyano lubekho ngenxa yokuba iintliziyo zawo ziye zachukunyiswa ngamandla ashukumisayo esigidimi seBhayibhile. Isibakala sokuba iBhayibhile inako ukumanyanisa abantu kweli hlabathi lizaliswe yintiyo sibubungqina obunamandla bokuba ivela kuThixo.
Incwadi Yesiprofeto Esiyinyaniso
17. Iziprofeto zeBhayibhile zahluke njani kuthelekelelo olwenziwa ngabantu?
17 Eyesi-2 kaPetros 1:20 ithi: “Akukho siprofeto seSibhalo siphuma nakuluphi na utoliko lobuqu.” Abaprofeti beBhayibhile abazange bahlalutye utyekelo olwalukho kwimicimbi yehlabathi ngelo xesha baze benze uthelekelelo olusekelwe kwindlela yabo yokutolika izinto ngokuphathelele imiphumo yolo tyekelo. Bengazange kananjalo baprofete iziprofeto ezingacacanga ezinokungena zithi gingci kuso nasiphi na isiganeko sexesha elizayo. Ngokomzekelo, makhe siqwalasele isiprofeto seBhayibhile esasingqale ngeyona ndlela nesisenokuba sasiprofeta into echaseneyo noko kwakulindelwe ngabantu belo xesha.
18. Kutheni ngokuqinisekileyo abemi beBhabhiloni yamandulo babeziva benqabiseke gqitha, ukanti yintoni uIsaya awayixela kusengaphambili ngeBhabhiloni?
18 Ngenkulungwane yesixhenxe ngaphambi kweXesha Eliqhelekileyo, kwakubonakala ngathi iBhabhiloni yayilikomkhulu elingenakoyiswa mntu loBukhosi baseBhabhiloni. Esi sixeko sasixananaze phezu koMlambo umEfrati, ibe amanzi alo mlambo asetyenziswa ukuze kwenziwe umsele obanzi nonzulu kunye nemijelo emininzi. Kwakhona esi sixeko sasinqatyiswe ngeendonga ezaziphindwe kabini, ezazixhaswa ziinqaba zomkhosi. Alithandabuzeki elokuba abemi baseBhabhiloni babeziva benqabiseke gqitha. Ukanti ke, ngenkulungwane yesibhozo ngaphambi kweXesha Eliqhelekileyo, lungekafikeleli nakwincopho yalo uzuko lweBhabhiloni, umprofeti uIsaya waxela kwangaphambili esithi: “IBhabheli . . . iya kuba njengokubhukuqa kukaThixo iSodom neGomora. Ayiyi kumiwa naphakade, ayiyi kuza ihlalwe ezizukulwaneni ngezizukulwana, angagxumeki ntente khona nomArabhi, nabalusi bangakhi khona buhlanti.” (Isaya 13:19, 20) Phawula ukuba esi siprofeto sasixela kusengaphambili ukuba iBhabhiloni yayingayi kwanela ukutshatyalaliswa kuphela kodwa yayiya kuba yinkangala naphakade. Esinjani ukukhalipha isiprofeto! Ngaba uIsaya wasibhala esi siprofeto emva kokubona iBhabhiloni iyinkangala? Imbali ithi akunjalo!
19. Kutheni isiprofeto sikaIsaya singazange sizaliseke ngokupheleleyo ngo-Oktobha 5, 539 B.C.E.?
19 Ngobusuku bukaOktobha 5, 539 B.C.E., iBhabhiloni yagob’ uphondo kwimikhosi yamaMedi namaPersi eyayibhexeshwa nguKoreshi Omkhulu. Noko ke, isiprofeto sikaIsaya asizange sizaliseke ngokupheleleyo ngelo xesha. Emva kokuthatyathwa nguKoreshi, iBhabhiloni eyayisenabemi—nangona yayingasenamandla—yaqhubeka ikho kangangeenkulungwane. Ngenkulungwane yesibini ngaphambi kweXesha Eliqhelekileyo, malunga nexesha lokukhutshelwa koMsongo woLwandle Olufileyo kaIsaya, amaParti ayithabathela kuwo iBhabhiloni, ngelo xesha eyayigqalwa njengebhaso ezazixhwithana ngalo iintlanga ezaziyingqongile. Umbhali-mbali ongumYuda uJosephus uthi kwakukho “inkumbula” yamaYuda eyayihlala apho ngenkulungwane yokuqala ngaphambi kweXesha Eliqhelekileyo. Ngokutsho kweThe Cambridge Ancient History, abarhwebi basePalmyra benza iBhabhiloni yalithanga lorhwebo elinenkqubela ngowama-24 C.E. Ngoko, kwada kwayinkulungwane yokuqala yeXesha lethu Eliqhelekileyo, iBhabhiloni ingekabi yinkangala ngokupheleleyo; ukanti, kwakusele kukudala incwadi kaIsaya igqityiwe.—1 Petros 5:13.
20. Bubuphi ubungqina obukhoyo bokuba ekugqibeleni iBhabhiloni yaba “ngumwewe” nje?
20 UIsaya wada waya kulala kobandayo ingekabi yinkangala iBhabhiloni. Kodwa sazaliseka eso siprofeto, ekugqibeleni iBhabhiloni yaba “ngumwewe.” (Yeremiya 51:37) Ngokutsho komphengululi ongumHebhere uJerome (owazalwa ngenkulungwane yokuqala yeXesha lethu Eliqhelekileyo), ngomhla wakhe iBhabhiloni yayiyindawo yokuzingela ekwakudakasa “zonke iintlobo zamarhamncwa” kuyo, ibe ayikamiwa nanamhlanje. Nakuphi na ukuhlaziywa kweBhabhiloni njengendawo yabakhenkethi kusenokuzitsala iindwendwe, kodwa soz’ uphinde ubabone ‘oonyana nenzalo’ yaseBhabhiloni, njengoko uIsaya waxela kwangaphambili.—Isaya 14:22.
21. Yintoni eyenza abaprofeti abathembekileyo bakwazi ukuxela kusengaphambili ngekamva kuze oko kwenzeke kanye ngaloo ndlela bakuchaze ngayo?
21 Umprofeti uIsaya akazange enze uthelekelelo esebenzisa ubukrelekrele bakhe. Engazange kananjalo aguqule imbali ngenjongo yokuyenza ibe ngathi sisiprofeto. UIsaya wayengumprofeti wokwenene. Babenjalo ke nabo bonke abanye abaprofeti beBhayibhile abathembekileyo. Yintoni eyayisenza aba bantu bakwazi ukwenza into eyinqambuzane kwabanye abantu—ukuxela kusengaphambili ngekamva kuze kungawi nalinye kumazwi abo? Impendulo izicacele. Ezo ziprofeto zazivela kuThixo weziprofeto, uYehova, Lowo “ukuxelayo kwasekuqaleni okungasemva.”—Isaya 46:10.
22. Kutheni sifanele senze konke okusemandleni ethu ukuze sibongoze abantliziyo zinyanisekileyo bazihlolisisele iBhayibhile?
22 Ngoko ngaba iBhayibhile ifanelwe kukuhlolisiswa? Siyazi ukuba iyakufanelekela! Kodwa abantu abaninzi abayiginyi kakuhle le nto. Baye baneembono ezithile ngeBhayibhile nangona besenokuba abazange bayifunde. Khumbula unjingalwazi okhankanywe ekuqaleni kwenqaku elandulela eli. Wavuma ukuqhutyelwa isifundo seBhayibhile, ibe emva kokuyihlolisisa ngenyameko iBhayibhile, wafikelela kwisigqibo sokuba iyincwadi evela kuThixo. Ekugqibeleni wabhaptizwa njengomnye wamaNgqina kaYehova, ibe sithetha nje ukhonza njengomdala! Masenze konke okusemandleni ethu ukuze sibongoze abantliziyo zinyanisekileyo ukuba bayihlolisise iBhayibhile ngokwabo bandule ke ukuvakalisa iimbono zabo ngayo. Siqinisekile ukuba, ukuba kwazisuka nje baye bayihlolisisa ngokunyaniseka, baya kufumanisa ukuba le ncwadi yahlukileyo, iBhayibhile, ngokwenene iyincwadi yabantu bonke!
Ngaba Unokuchaza?
◻ Unokuwusebenzisa njani uMthetho kaMoses ukubonisa ukuba iBhayibhile ayiveli mntwini?
◻ Yiyiphi imigaqo yeBhayibhile engaphelelwa lixesha eluncedo kubomi bale mihla?
◻ Kutheni isiprofeto esikuIsaya 13:19, 20 singenakuba sabhalwa sesizalisekile?
◻ Yintoni esifanele sikhuthaze abantliziyo zinyanisekileyo ukuba bayenze, yaye ngoba?
[Ibhokisi ekwiphepha 19]
Kuthekani Ngezinto Ezingenabungqina?
IBhayibhile iqulethe imibandela eyahlukeneyo engenabo ubungqina obusecaleni. Ngokomzekelo, oko ikutshoyo ngommandla ongabonakaliyo omiwe zizidalwa zomoya akunakungqinwa—okanye kuphikiswe—yinzululwazi. Ngaba ezo mbekiselo zingangqinekiyo ziyenza iBhayibhile ingquzulane nenzululwazi?
Lo ngumbuzo esajamelana nawo isazinzulu sezijikelezi-langa esaqalisa ukufundisisa iBhayibhile namaNgqina kaYehova kwiminyaka ethile edluleyo. Sikhumbula oku: “Ndimele ndivume ukuba ekuqaleni kwakungeyondlwan’ iyanetha kum ukwamkela iBhayibhile kuba ndandingakwazi ukufumana ubungqina obungokwenzululwazi kwizinto ezithile ezithethwa yiBhayibhile.” Le ndoda inyanisekileyo yaqhubeka ifundisisa iBhayibhile yaza ekugqibeleni yayamkela into yokuba obo bungqina bukhoyo bubonisa ukuba iliLizwi likaThixo. Iyachaza: “Oku kwandenza andayixhalabela kangako into yokuba isibakala ngasinye seBhayibhile sixhaswe bubungqina obusecaleni. Umntu othanda inzululwazi umele akulungele ukuhlolisisa iBhayibhile ngeliso lokomoya, okanye akanakuze ayamkele inyaniso. Akunakulindelwa ukuba inzululwazi ixhase into nganye ethethwa yiBhayibhile. Kodwa isibakala sokuba ezinye zezinto ezithethayo zingenakungqinwa, asithethi kuthi aziyonyaniso. Eyona nto ingundoqo kukuba kwimibandela eye yanabo ubungqina ukuchana kweBhayibhile kuye kwadandalaziswa.”
[Umfanekiso okwiphepha 17]
UMoses wabhala imiyalelo yococeko eyayiphucuke ngaphezulu lee kuneyexesha layo