Incwadi Esebenzisekayo Kubomi Banamhlanje
Namhlanje zingangoboya benja iincwadi ezinikela amacebiso. Kodwa ixesha lazo liyafika lidlule zize zihlaziywe okanye kubhalwe ezinye. Kuthekani ngeBhayibhile? Yagqitywa kwiminyaka ephantse ibe ngama-2 000 eyadlulayo. Ukanti, isigidimi sayo asizange sitshintshwe okanye sihlaziywe. Ngaba incwadi enjalo inganokhokelo olusebenzisekayo nanamhlanje?
BAMBI bathi unotshe. Xa wayezama ukuchaza isizathu sokuba athi iBhayibhile iphelelwe lixesha uGqr. Eli S. Chesen wabhala wathi: “Akukho mntu unokuncomela ukuba kufundiswe iklasi yezamayeza [ngencwadi] yemichiza yowe-1924 kula maxesha ethu.”1 Oko kuvakala kusengqiqweni. Ngapha koko, ukususela ngexesha lokubhalwa kweBhayibhile kuninzi gqitha okufundwe ngabantu ngokusebenza kwengqondo nendlela yokuziphatha kwabantu. Ngoko kungenzeka njani ukuba incwadi endala olo hlobo ibe isasebenza nanamhlanje?
Imigaqo Engaphelelwa Lixesha
Nangona liyinyaniso elokuba amaxesha ngamanye, iintswelo ezisisiseko zoluntu zona azikatshintshi. Kuyo yonke imbali abantu bebenentswelo yokufuna ukuthandwa nomsa. Bebekufuna nasemnyameni ukonwaba nokuphila ubomi obunentsingiselo. Bebewafuna ngokwenene amacebiso anokubanceda bamelane neengxaki zoqoqosho, baphumelele emtshatweni baze bafundise abantwana babo ukuziphatha kakuhle nokuba nesimilo. IBhayibhile inamacebiso ewanikelayo kwezo ntswelo zisisiseko.—INtshumayeli 3:12, 13; Roma 12:10; Kolose 3:18-21; 1 Timoti 6:6-10.
Isiluleko seBhayibhile sibonisa ukuba umbhali wayo ubazi kakuhle abantu. Khawuqwalasele eminye imizekelo yemigaqo yayo engqalileyo nengaphelelwa lixesha esasebenzisekayo nanamhla oku.
Ukhokelo Olusebenzisekayo Lomtshato
Ngokutsho kweUN Chronicle, intsapho “lelona lungiselelo lidala nelisisiseko kwibutho labantu; lelona khonkco libalulekileyo lidibanisa izizukulwana.” Noko ke, eli “khonkco libalulekileyo” liya liqhawuka ngokuqhawuka. IChronicle ithi: “Kweli hlabathi siphila kulo, iintsapho ezininzi zijamelene neengxaki ezoyikekayo ezenza kungabikho themba lokuba zingaqhubeka zize ziphumelele.”2 Liliphi icebiso elinikelwe eBhayibhileni elinokunceda iintsapho ziphumelele?
Okokuqala, iBhayibhile ithetha yophele ngendlela indoda nomfazi abamele baphathane ngayo. Ngokomzekelo xa ithetha ngamadoda, ithi: “Amadoda afanele abathande abafazi bawo njengemizimba yawo. Lowo umthandayo umfazi wakhe uyazithanda, kuba akukho mntu wakha wayithiya inyama yakhe; kodwa uyayondla aze ayiphathe ngononophelo, njengoko noKristu esenjenjalo kulo ibandla.” (Efese 5:28, 29) Umfazi yena kuthiwa “ufanele abe nentlonelo enzulu ngendoda yakhe.”—Efese 5:33.
Qwalasela indlela esinokusetyenziswa ngayo eso siluleko seBhayibhile. Indoda ethanda umfazi wayo ‘njengomzimba wayo’ ayimthiyi okanye imphathe gadalala. Ayimbethi, yaye ayimthuthumbisi ngamazwi nangokweemvakalelo. Kunoko, iyamhlonela ize ibonise ulwazelelelo elubonakalisayo kwisiqu sayo. (1 Petros 3:7) Ngaloo ndlela umfazi wayo uziva ethandwa yaye ekhuselekile emtshatweni wakhe. Ngokwenza oko ibekela abantwana bayo umzekelo omhle wendlela yokuphatha amabhinqa. Kwelinye icala, umfazi ‘onentlonelo enzulu’ ngendoda yakhe akayithobi sidima ngokusoloko eyihlab’ amadlala okanye eyinyemba. Kuba eyihlonela, itsho izive ithenjwa, yamkelekile, yaye ixatyiswa.
Ngaba amacebiso anjalo ayasebenza kwihlabathi lanamhlanje? Okubangel’ umdla kukuba iingcali ngemibandela yentsapho zanamhlanje ziye zafikelela kwezo zigqibo. Usomaqhuzu kwiziko lokucebisa iintsapho wathi: “Ezona ntsapho ziphumelelayo kwendizaziyo zezo umama notata banolwalamano olomeleleyo nolunothando. . . . Olu lwalamano lubalulekileyo lunceda abantwana bazive bekhuselekile.”3
Njengokuba iminyaka ibihamba, isiluleko seBhayibhile ngomtshato singqineke sithembeke ngaphezu kwamacebiso abacebisi abaneenjongo ezintle. Ngapha koko, izolo oku iingcali ezininzi bezimi ngelokuba ukuqhawula umtshato yeyona ndlela ikhawulezayo yokuzikhulula kumtshato ongakonwabisiyo. Namhlanje, uninzi lwazo zibongoza abantu ukuba balondoloze imitshato yabo ukuba kunokwenzeka. Kodwa ziqabuke sekophulwe.
Kwelinye icala, iBhayibhile inikela isiluleko esithembekileyo nesilungeleleneyo emtshatweni. Iyalivuma elokuba kwiimeko ezithile ezigabadeleyo umtshato ungaqhawulwa. (Mateyu 19:9) Kwangaxeshanye, iyakwalela ukuqhawula umtshato ngezizathu ezingenamsebenzi. (Malaki 2:14-16) Kwakhona iyakwalela ukungathembeki emtshatweni. (Hebhere 13:4) Ithi, umtshato ufuna ukuzibophelela: “Ngenxa yoko indoda yomshiya uyise nonina, inamathele kumkayo, babe nyama-nye ke.”a (Akekeliswe sithi.)—Genesis 2:24; Mateyu 19:5, 6.
Amacebiso eBhayibhile ngomtshato asasebenza ngalaa ndlela ayesebenza ngayo ekubhalweni kweBhayibhile. Xa indoda nomfazi bephathana ngothando nangentlonelo yaye bewujonga umtshato njengolwalamano lwabo bobabini, maninzi amathuba okuba loo mtshato uphumelele—kuphumelele nentsapho.
Ukhokelo Olusebenzayo Kubazali
Kumashumi eminyaka awadlulayo abazali abaninzi—ngenxa “yeengcamango ezintsha” zokuqeqesha abantwana—babecinga ukuba “kwakungavumelekanga ukwalela abantwana into ethile.”8 Babesoyika ukuba ukubekela abantwana imiqathango kusenokubenzakalisa kuze kubanxunguphalise. Abacebisi abaneenjongo ezintle ngokukhulisa abantwana babemi ngelokuba abazali bamele babacenge abantwana babo xa bebalungisa. Kodwa uninzi lwezo ngcali seluthande ukutshintsha uluvo lwazo ngoqeqesho, yaye abazali abanenkxalabo baphatha beyeka befuna uncedo kulo mbandela.
Noko ke, iBhayibhile yona kudala yanikela isiluleko esicacileyo nesisengqiqweni ngokukhulisa abantwana. Kwiminyaka ephantse ibe ngama-2 000 eyadlulayo, yathi: “Boyise, musani ukubacaphukisa abantwana benu, kodwa qhubekani nibakhulisela kwingqeqesho nasekweyiselweni kwengqondo kuYehova.” (Efese 6:4) Isibizo sesiGrike esiguqulelwe ngokuthi “ingqeqesho” sithetha “ukukhulisa, ukululeka, ukufundisa.”9 IBhayibhile ithi loo ngqeqesho, okanye loo mfundiso, ibubungqina bothando lwabazali. (IMizekeliso 13:24) Abantwana bakhula kakuhle xa befundiswe kakuhle ngokuziphatha naxa bencedwe bakwazi kakuhle okuhle nokubi. Ingqeqesho ibenza bazi ukuba abazali babo babakhathalele kwaye balukhathalele nohlobo lwabantu abalulo.
Kodwa igunya labazali—“intonga yokuqeqesha”—alifanele nanini na lisetyenziswe kakubi.b (IMizekeliso 22:15; 29:15) IBhayibhile ilumkisa abazali isithi: “Musani ukubalungisa ngokubaxekileyo abantwana benu, okanye baya kuphelelwa yintliziyo.” (Kolose 3:21, Phillips) Kwakhona iyalivuma elokuba ukubetha akusoloko kuyeyona ndlela iphumelelayo yokufundisa. IMizekeliso 17:10 ithi: “Ukukhalinyelwa kuyangena konengqondo ngaphezu kwemivumbo elikhulu kosisinyabi.” Kwakhona, iBhayibhile incomela ingqeqesho ethintela unongekehli. KwiDuteronomi 11:19 abazali babongozwa ukuba basebenzise amathuba okuphola bafundise abantwana babo ihambo entle.—Kwakhona bona iDuteronomi 6:6, 7.
Icebiso leBhayibhile kubazali nelingaphelelwa lixesha licacile. Abantwana bafanele baqeqeshwe ngendlela engatshintshatshintshiyo. Amava abonisa ukuba eso siluleko sisebenza ngokwenene.c
Ukoyisa Imiqobo Eyahlula Abantu
Namhlanje abantu baziintlaba-zahlukane ngenxa yobuhlanga, nobuzwe. Loo miqobo ibe ngunozala wokubulawa kwabantu abamsulwa ezimfazweni ehlabathini lonke. Ngokusuka kwimbali, lincinane gqitha ithemba lokuba amadoda nabafazi bezizwe neentlanga ezahlukeneyo bangajongana baze baphathane ngokulinganayo. Omnye umphathiswa waseAfrika wathi: “Isicombululo silele ezintliziyweni zethu.”11 Kodwa ukutshintsha intliziyo yomntu akulula. Noko ke, qwalasela indlela isiluleko seBhayibhile esiyifikelela ngayo intliziyo nesikukhuthaza ngayo ukulingana.
Imfundiso yeBhayibhie yokuba uThixo “wazenza ngokuphuma kumntu omnye zonke iintlanga zabantu” yenza kucace ukuba akukho mntu wongamileyo kunomnye. (IZenzo 17:26) Oku kubonisa ukuba siluhlanga olunye—uhlanga lwabantu. IBhayibhile ihlabela mgama isikhuthaza ukuba sibe “ngabaxelisa uThixo,” ethi xa ithetha ngaye: “Akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (Efese 5:1; IZenzo 10:34, 35) Abo bayixabisileyo iBhayibhile nabafuna ngokwenene ukuphila ngeemfundiso zayo, olu lwazi lubancedile bamanyana. Ingena nzulu ebantwini, ezintliziyweni zabo, idiliza yonke imiqobo eyenziwe ngumntu yokwahlula abantu. Qwalasela lo mzekelo.
Xa uHitler waqhwaya imfazwe kulo lonke elaseYurophu, kwakukho iqela elinye lamaKristu—amaNgqina kaYehova—elalwa kwema ngalo kunokuba lithelele ekubulaleni abantu abamsulwa. Lalingafuni ‘kuphakamisa ikrele’ libulale abanye abantu. Lalikwenza oko kuba linqwenela ukukholisa uThixo. (Isaya 2:3, 4; Mika 4:3, 5) Lalikukholelwa ngokwenene okufundiswa yiBhayibhile—xa isithi alukho uhlanga okanye isizwe esibhetele kunesinye. (Galati 3:28) Ngenxa yokuthanda kwawo uxolo, amaNgqina kaYehova aba ngabantu bokuqala ukuphoswa kwiinkampu zoxinaniso.—Roma 12:18.
Kodwa asingabo bonke abo babesithi balandela iBhayibhile abenza oko. Kanye emva kweMfazwe Yehlabathi II, uMartin Niemöller, umfundisi wamaProtestanti aseJamani, wabhala wathi: “Nabani obek’ ityala kuThixo [ngeemfazwe] akalazi, okanye akafuni kulazi, iLizwi likaThixo. . . . Iicawa zamaKristu, kuyo yonke imbali, ziye zazibhakaxa ngokuphindaphindiweyo ekusikeleleni iimfazwe, imikhosi nezixhobo yaye . . . ngendlela engeyoyabukristu ziye zathandazela ukubulawa kweentshaba zazo emfazweni. Abantu abanetyala koku sithi nookhokho bethu, kodwa asingoThixo obekek’ ityala. Yaye thina maKristu namhlanje siziintloni xa sithelekiswa nehlelo elibizwa ngokuba ngaBafundi BeBhayibhile Abanenyameko [amaNgqina kaYehova], abaye bengamakhulukhulu namawakawaka baphoswa kwiinkampu zoxinaniso [nabade] bafela apho kuba bengafuni kungenela imfazwe yaye bengavumi ukudubula abantu.”12
Unanamhla oku, amaNgqina kaYehova aziwa naphina ngobuzalwana bawo, obumanyanisa ama-Arabhu namaYuda, abantu baseCroatia namaSerbs, amaHutu namaTutsi. Noko ke, amaNgqina ayavuma ukuba akamanyaniswanga kukuba ebhetele kunabanye abantu, kodwa kukuba eshukunyiswa ngamandla esigidimi seBhayibhile.—1 Tesalonika 2:13.
Ukhokelo Olusebenzisekayo Olukhuthaza Ukuphila Engqondweni
Impilo yomntu iyachatshazelwa yimpilo yakhe yasengqondweni nengokweemvakalelo. Ngokomzekelo, kuphando lwezenzululwazi kufunyaniswe iingozi ezibangelwa ngumsindo. UGqr. Redford Williams, uMalathisi weBehavioral Research kwiDuke University Medical Center, nenkosikazi yakhe, uVirginia Williams, kwincwadi yabo ethi Anger Kills bathi: “Ubungqina obuninzi obufumanekayo budiza ukuba abantu abangoomayitshe ngabona basengozini yesifo sentliziyo (nezinye izifo) ngenxa yezizathu ezahlukeneyo, eziquka ukungaginywa kakuhle ngabantu, nezinto ekunyanzeleka umzimba uzenze xa benomsindo, nangokuzingxala kakhulu ngezinto ezisenokubenzakalisa empilweni.”13
Kumawaka eminyaka ngaphambi kolo phando lwenzululwazi, iBhayibhile, ngamazwi alula nangqalileyo isichazela indlela iimvakalelo zethu eziyichaphazela ngayo impilo yethu isithi: “Bubomi benyama intliziyo epholileyo; ke lona ikhwele yimpehla emathanjeni.” (IMizekeliso 14:30; 17:22) Ngobulumko iBhayibhile yaluleka ngelithi: “Lahla umsindo, ushiye ubushushu,” yaye “Musa ukukungxamela ukuqumba ngomoya wakho [okanye ukuba “nomsindo,” King James Version].”—INdumiso 37:8; INtshumayeli 7:9.
Kwakhona iBhayibhile inecebiso elisengqiqweni lokulawula umsindo. Ngokomzekelo, IMizekeliso 19:11 ithi: “Ingqiqo yomntu imenza azeke kade umsindo; sisihombo sakhe ukulugqitha ukreqo.” Igama lesiHebhere eliguqulelwe ngokuthi “ingqiqo” lisuka kwisenzi esinento yokwenza “nokwazi isizathu” sento ethile.14 Nali icebiso lobulumko: “Cinga phambi kokuba wenze.” Ukuzabalazela ukuqonda izizathu zokuba abanye bathethe okanye benze izinto ngendlela ethile kunokumnceda umntu akwazi ukubanyamezela ngakumbi abanye—yaye angacaphuki msinya.—IMizekeliso 14:29.
Elinye icebiso elisebenzisekayo likweyabaseKolose 3:13, ethi: “Qhubekani ninyamezelana yaye nixolelana ngesisa.” Ukucatshukiswa zizinto ezincinane kuqhelekile ebomini. Ibinzana elithi “qhubekani ninyamezelana” libonisa ukuba simele sinyamezele izinto esingazithandiyo kwabanye. Ibinzana elithi “nixolelana” lithetha ukuba singafukami ingqumbo. Maxa wambi kububulumko ukuwukhupha umsindo kunokuba siwukokose; ukuhlala sinomsindo kusithwalisa uxanduva olungakumbi.—Bona ibhokisi ethi “Ukhokelo Olusebenzisekayo Kulwalamano Lwabantu.”
Namhlanje, kukho amaziko amacebiso nokhokelo. Kodwa iBhayibhile yahluke mpela kuwo. Isiluleko sayo asiyonto nje ecingelwayo, yaye isiluleko sayo asinakuze sisenzakalise. Kunoko, ubulumko bayo bungqineke ‘bunyanise kunene.’ (INdumiso 93:5) Ngaphezu koko, isiluleko seBhayibhile asiphelelwa lixesha. Nangona yagqitywa kwiminyaka engaphezu kwama-2 000 eyadlulayo, amazwi ayo asasebenza nangoku. Yaye asebenza ngokufanayo kungakhathaliseki ukuba siloluphi uhlanga okanye sihlala kweliphi na ilizwe. Kwakhona amazwi eBhayibhile anamandla—amandla okuphucula abantu. (Hebhere 4:12) Ukufunda loo ncwadi nokusebenzisa imigaqo yayo kunokuphucula umgangatho wobomi bakho.
[Imibhalo esemazantsi]
a Igama lesiHebhere elithi da·vaqʹ, apha eliguqulelwe ngokuthi “inamathele,” “linengcamango yokuthi nca kumntu othile ngenxa yomsa nokunyaniseka.”4 NgesiGrike, igama eliguqulelwe ngokuthi “ize inamathele” elikuMateyu 19:5 linento yokwenza ‘nokuncamathisela,’ ‘ukubambelela ngokuqinileyo,’ ‘ukubopha ngokuthe nkqi.’5
b Ngamaxesha okubhalwa kweBhayibhile, igama elithi “intonga” (ngesiHebhere, sheʹvet) lalithetha “intonga” okanye “umsimelelo,” njengalowo wawusetyenziswa ngumalusi.10 Ngokwalo mongo intonga yegunya ibhekisela kukhokelo olunothando, kungekhona ukuxhaphaza ngenkohlakalo.—Thelekisa INdumiso 23:4.
c Bona isahluko esithi “Qeqesha Umntwana Wakho Eselusana,” “Nceda Okwishumi Elivisayo Aphumelele,” “Ngaba Kukho Umvukeli Endlwini Yakho?”, nesithi “Khusela Intsapho Yakho Kwiimpembelelo Ezitshabalalisayo” kwincwadi ethi Imfihlelo Yolonwabo Lwentsapho, epapashwe yiWatchtower Bible and Tract Society of New York, Inc.
[Amagama acatshulweyo akwiphepha 24]
IBhayibhile inikela icebiso elicacileyo nelisengqiqweni kubomi bentsapho
[Ibhokisi ekwiphepha 23]
IIMPAWU ZEENTSAPHO EZIPHUMELELAYO
Kwiminyaka emininzi eyadlulayo omnye umhlohli nengcali kwimicimbi yeentsapho wakha wenza uhlolisiso olubhekele phaya apho wacela iingcali ezingaphezu kwama-500 ezisebenza ngeentsapho ukuba zigqabaze ngeempawu zeentsapho “eziphumelelayo.” Okubangel’ umdla kukuba uninzi lweempawu ezazichaphazelayo zizinto ekukudala zikho eBhayibhileni.
Eyona nto zaziyikhankanya kakhulu lunxibelelwano oluhle, kunye nendlela yokucombulula ukungavisisani. Umququzeleli wolo hlolisiso wachaza enye into exhaphakileyo kwiintsapho eziphumelelayo ngokuthi “akukho mntu ulala esenomntu amqumbeleyo.”6 Ukanti, kwiminyaka engaphezu kwe-1 900 eyadlulayo, iBhayibhile yacebisa yathi: “Qumbani, ukanti ningoni; malingatshoni ilanga nikwimo yokucaphuka.” (Efese 4:26) Ngamaxesha okubhalwa kweBhayibhile imini yayiqala ekutshoneni kwelanga iye kuphela ekutshoneni kwelanga. Ngoko, ngaphambili lee kokuba iingcali zifunde ngemicimbi yeentsapho, iBhayibhile ngobulumko yanikela eli cebiso: Kucombululeni ukungavisisani ngokukhawuleza—ingekapheli imini kude kufike imini elandelayo.
Iintsapho eziphumelelayo “azithi xa ziza kuphuma okanye ziza kulala kube kukhona ziqalisa ukuxoxa ngezinto ezisenokudala uqhushululu,” watsho njalo lo mququzeleli. “Ndandiliva kaninzi ibinzana elithi ‘ngexesha elifanelekileyo.’”7 Ezi ntsapho zona zingaqondi zilandela umzekeliso weBhayibhile owabhalwa kwiminyaka engaphezu kwama-2 700 eyadlulayo othi: “Ziiapile zegolide kwizitya zesilivere ezimakhazikhazi ilizwi elithethwe ngexesha elifanelekileyo.” (IMizekeliso 15:23; 25:11, NW) Esi saci sisenokuba sasibhekisela kwizinto zokuhombisa ezifana neeapile ezazibekwa kwiitreyi zegolide—zinto ezo ezazixabisekile ngamaxesha okubhalwa kweBhayibhile. Sibonisa indlela amahle naxabiseke ngayo amazwi athethwe ngexesha elifanelekileyo. Xa ubani esengxakini, amazwi athethwe ngexesha elifanelekileyo axabiseke gqitha.—IMizekeliso 10:19.
[Ibhokisi ekwiphepha 26]
UKHOKELO OLUSEBENZISEKAYO KULWALAMANO LWABANTU
“Qumbani, ningoni. Thethani neentliziyo zenu ezinkukweni zenu, nithi cwaka.” (INdumiso 4:4) Kwiimeko ezininzi ezibandakanya ukukhathazana ngezinto ezincinane, kusenokuba bubulumko ukuwabamba amazwi akho, ngaloo ndlela siphepha ukukhathazana ngokweemvakalelo.
“Kukho ophololoza njengokuhlaba kwekrele; ke lona ulwimi lwezilumko luyaphilisa.” (IMizekeliso 12:18) Cinga ngaphambi kokuba uthethe. Amazwi angacingwanga anokungxwelerha aze aphelise ubuhlobo.
“Impendulo ethambileyo ibuyisa ubushushu; ilizwi elidubulayo linyusa umsindo.” (IMizekeliso 15:1) Kufuneka ukuzeyisa ukuze uphendule upholile, kodwa ukwenza oko kuphelisa iingxaki yaye kukhuthaza uxolo.
“Kukuvulela amanzi ukuqala kwengxabano; yiyeke imbambano kungekavunganyelwana.” (IMizekeliso 17:14) Kububulumko ukukhawuleza urhoxe xa ukwimeko enokukwenza ugqajukelwe ngumsindo.
“Musa ukukungxamela ukuqumba ngomoya wakho; kuba zizidenge eziyikokosayo ingqumbo.” (INtshumayeli 7:9, The New English Bible) Iimvakalelo ziza kuqala kunesenzo. Umntu okhubeka msinya sisidenge, kuba oko kusenokumenza athethe okanye enze izinto engacinganga.
[Umfanekiso okwiphepha 25]
AmaNgqina kaYehova ayephakathi kwabantu bokuqala kwiinkampu zoxinaniso