Uyakhumbula Na?

Ngaba uye wawafumanisa eluncedo gqitha amanqaku akutshanje eMboniselo? Ngoko kutheni ungavavanyi inkumbulo yakho ngale mibuzo ilandelayo?

◻ Yintoni umahluko phakathi ‘kwemini yeNkosi’ ‘nemini kaYehova’? (ISityhilelo 1:10; Yoweli 2:11) “Imini yeNkosi” iquka ukuzalisekiswa kwemibono eli-16 echazwe kwiSityhilelo isahluko 1 ukusa kwesama-22 kwaneziganeko eziyintloko ezaxelwa kwangaphambili nguYesu xa wayephendula umbuzo wabafundi bakhe owawuphathelele umqondiso wobukho bakhe. Njengencopho yemini yeNkosi, kuya kuqhambuka imini eyoyikekayo kaYehova aya kuwisa ngayo isigwebo kwihlabathi likaSathana elonakeleyo. (Mateyu 24:3-14; Luka 21:11)—12/15, iphepha 11.

◻ Ziziphi ezinye zeempawu ezibalaseleyo kwiBhayibhile kaMakarios? Igama elithi Yehova livela kangangezihlandlo ezingaphezu kwama-3500 kwiBhayibhile kaMakarios. Omnye umphengululi woncwadi lonqulo lwaseRashiya wathi: “[Le] nguqulelo iyanamathela kumbhalo wesiHebhere, yaye nolwimi lwale nguqulelo alungxengwanga yaye luyawufanela umbandela.”—12/15, iphepha 27.

◻ Yintoni “inyaniso” awathi uYesu yayiya kusikhulula? (Yohane 8:32) Ngokukhankanya “inyaniso,” uYesu wayethetha ngenkcazelo ephefumlelwe nguThixo—ngokungakumbi inkcazelo ephathelele ukuthanda kukaThixo—esiyigcinelwe eBhayibhileni.—1/1, iphepha 3.

◻ Ngubani uYehu noYehonadabhi wale mihla? UYehu ufuzisela uYesu Kristu, emhlabeni omelwa ‘nguSirayeli kaThixo,’ amaKristu athanjisiweyo. (Galati 6:16; ISityhilelo 12:17) Kanye njengokuba uYehonadabhi wamkhawulelayo uYehu, “isihlwele esikhulu” esivela ezintlangeni siye saphuma size kuxhasa abameli bakaYesu basemhlabeni. (ISityhilelo 7:9, 10; 2 Kumkani 10:15)—1/1, iphepha 13.

◻ Kuthetha ukuthini ‘ukuhamba noThixo’? (Genesis 5:24; 6:9) Oku kuthetha ukuba abo benjenjalo, abanjengoEnoki noNowa, baziphatha ngendlela eyayibonisa ukuba nokholo olomeleleyo kuThixo. Benza oko uYehova wayebayalele kona baza bavisisanisa ubomi babo noko babekwazi ngaye kwiinkqubano zakhe nabantu.—1/15, iphepha 13.

◻ Kutheni ubani emele akulungiselele kusengaphambili ukufa kwakhe? Ngangqiqo ithile, ukwenza amalungiselelo anjalo kusisipho kwintsapho kabani. Kubonisa uthando. Kubonisa ukuba ubani ufuna ‘ukubalungiselela abo bangamalungu endlu yakhe’ kwanaxa engasekho kunye nabo. (1 Timoti 5:8)—1/15, iphepha 22.

◻ Yintoni eyaphunyezwa ‘ngumnqophiso omdala’? (2 Korinte 3:14) Wawuqulethe iinkalo ezazifuzisela umnqophiso omtsha yaye, ngamadini awo awayephindaphindwa, wawubonisa ukukufuna komntu ngamandla ukukhululwa esonweni nasekufeni. ‘Wawungumkhapheli okhokelela kuKristu.’ (Galati 3:24)—2/1, iphepha 14.

◻ Umnqophiso omtsha ungongunaphakade ngaziphi iindlela? (Hebhere 13:20) Okokuqala, ngokungafaniyo nomnqophiso woMthetho, awuyi kuthatyathelw’ indawo ngomnye. Okwesibini, imiphumo yokusebenza kwawo iya kuhlala ihleli. Yaye okwesithathu, abalawulwa abasemhlabeni boBukumkani bukaThixo baya kuqhubeka bengenelwa kwilungiselelo lomnqophiso omtsha ukutyhubela iWaka Leminyaka.—2/1, iphepha 22.

◻ Ziziphi iingenelo ezibangelwa kukuba nombulelo? Ukufudumala ubani akufumanayo ngenxa yokuba nombulelo osuk’ entliziyweni kuzisa ulonwabo noxolo. (Thelekisa IMizekeliso 15:13, 15.) Ekubeni uluphawu oluhle, umbulelo uyamkhusela ubani kwiimvakalelo ezingalunganga ezinjengomsindo, umona nokuba nengqumbo.—2/15, iphepha 4.

◻ Yiyiphi iminqophiso eyenziwe nabo bazelwe ngomoya? Ngumnqophiso omtsha, owenziwa nguYehova namalungu oSirayeli wokomoya, kunye nomnqophiso woBukumkani, owenziwa nguYesu nabalandeli bamanyathelo akhe abathanjisiweyo. (Luka 22:20, 28-30)—2/15, iphepha 16.

◻ Yiyiphi imithendeleko emithathu emikhulu amaSirayeli awayalelwa ukuba aye kuyo? NguMthendeleko Wezonka Ezingenagwele, owawubakho emva kwePasika kaNisan 14; uMthendeleko Weeveki, owawuqhutywa ngosuku lwama-50 ukususela kuNisan 16; noMthendeleko Wokuhlanganisa, okanye uMthendeleko Weminquba, owawusenziwa ngenyanga yesixhenxe. (Duteronomi 16:1-15)—3/1, iphepha 8, 9.

◻ Kutheni kulilungelo ukuya kwiintlanganiso zamaKristu? UYesu wathi: “Apho kukho ababini okanye abathathu abahlanganisene ndawonye egameni lam, ndilapho phakathi kwabo.” (Mateyu 18:20; 28:20) Kwakhona, indlela eyintloko esidluliselwa ngayo isondlo sokomoya iphunyezwa ziintlanganiso zebandla neentlanganiso ezinkudlwana. (Mateyu 24:45)—3/1, iphepha 14.

◻ Lalivela phi igama elithi Nimrodi? Abaphengululi abaliqela bangqinelana ngengcamango yokuba igama elithi Nimrodi asilogama awalithiywa xa wayezalwa. Kunoko bacinga ukuba ligama awalinikwa ukuze livumelane nemvukelo yakhe emva kokubonakala kwayo.—3/15, iphepha 25.

◻ Ibaluleke kangakanani intsapho kwibutho labantu? Intsapho yinto eyimfuneko kuluntu. Imbali ibonisa ukuba njengoko ilungiselelo lentsapho lisiya liwohloka, amabutho abantu kunye neentlanga ziba buthathaka. Ngoko intsapho inempembelelo ethe ngqo ekomeleleni kwebutho loluntu nakwintlalo-ntle yabantwana nezizukulwana ezizayo.—4/1, iphepha 6.

◻ Ziziphi iinkalo ezintathu ezibubungqina bokuba iBhayibhile iliLizwi likaThixo? (1) Ichanile ngokwenzululwazi; (2) iqulethe imigaqo engaphelelwa lixesha neluncedo kule mihla; (3) iqulethe iziprofeto ezicacileyo eziye zazaliseka, njengoko kungqinwa yimbali.—4/1, iphepha 15.