Ukholo Lwamakristu Luya Kuvavanywa
“Ukholo asinto banayo bonke abantu.”—2 TESALONIKA 3:2.
1. Imbali iye yabonisa njani ukuba ukholo lokwenene asinto banayo bonke abantu?
UKUTYHUBELA yonke imbali, bekukho amadoda, amabhinqa nabantwana abebenokholo lokwenene. Isiphawuli esithi “lokwenene” sifanelekile kuba izigidi zabanye ziye zangoovuma-zonke, zikholelwa kwanto nje nokuba ayinasihlahla. Ngokufuthi ukholo olunjalo luye lwabandakanya oothixo bobuxoki okanye iintlobo zonqulo ezingquzulanayo noSomandla, uYehova, kunye neLizwi lakhe elityhiliweyo. Ngenxa yoko umpostile uPawulos wabhala: “Ukholo asinto banayo bonke abantu.”—2 Tesalonika 3:2.
2. Kutheni kubalulekile ukuba siluhlolisise ukholo lwethu?
2 Kodwa amazwi kaPawulos abonisa ukuba ngelo xesha babekho abanye ababenokholo lokwenene yaye basekho nanamhlanje. Inkoliso yabantu abafunda lo lindixesha inomnqweno wokuba nalo nokulukhulisa ukholo lokwenene olunjalo—ukholo oluvisisana nolwazi oluchanileyo lwenyaniso yobuthixo. (Yohane 18:37; Hebhere 11:6) Ngaba kunjalo nakuwe? Ngoko kufuneka uyiqonde yaye uyilungele into yokuba ukholo lokwenene onalo luya kuvavanywa. Ngoba?
3, 4. Kutheni sifanele sikhangele kuYesu xa kufikwa kwiimvavanyo zokholo?
3 Simele sivume ukuba uYesu Kristu unendima ephambili kukholo lwethu. Eneneni, iBhayibhile ibhekisela kuye njengoMgqibelelisi wokholo lwethu. Oku kungenxa yoko uYesu wakuthetha waza wakwenza, ngokukodwa indlela awazizalisekisa ngayo iziprofeto. Waqinisa isiseko abanokuthi abantu bakhele ukholo lwabo kuso. (Hebhere 12:2; ISityhilelo 1:1, 2) Sekunjalo, sifunda ukuba uYesu “wavavanywa kwiinkalo zonke njengathi, kodwa engenasono.” (Hebhere 4:15) Ewe, ukholo lukaYesu lwavavanywa. Kunokuba kusityhafise okanye kusoyikise, oko kufanele kusithuthuzele.
4 Ngokutyhubela izilingo ezinamandla de waya kubulawa esibondeni sentuthumbo, uYesu “wafunda intobelo.” (Hebhere 5:8) Wabonisa ukuba abantu banako ukuphila ngokholo lokwenene phezu kwazo naziphi na iimvavanyo abanokujamelana nazo. Oku kubaluleke nangakumbi xa sicinga ngoko uYesu wakutshoyo ngabalandeli bakhe: “Likhumbuleni ilizwi endalitsho kuni ndisithi, Ikhoboka alikho likhulu ngakumbi kunenkosi yalo.” (Yohane 15:20) Enyanisweni, ethetha ngabalandeli bakhe bale mihla, uYesu waprofeta esithi: “Niya kuba zizinto zokuthiywa ziintlanga zonke ngenxa yegama lam.”—Mateyu 24:9.
5. IZibhalo zibonisa njani ukuba siza kujamelana neemvavanyo?
5 Ebutsheni bale nkulungwane, umgwebo uye waqala kwindlu kaThixo. IZibhalo zaxela kwangaphambili zisithi: “Lixesha elimisiweyo lokuba umgwebo uqale ngendlu kaThixo. Ukuba ke uqala ngathi kuqala, siya kuba yintoni na isiphelo sabo bangazithobeliyo iindaba ezilungileyo zikaThixo? ‘Yaye ukuba umntu olilungisa usindiswa nzima, wobonakala phi na ke yena umntu ongahloneli Thixo nomoni?’”—1 Petros 4:17, 18.
Ukholo Luyavavanywa—Ngoba?
6. Kutheni ukholo oluvavanyiweyo lunexabiso elingenakuthelekiswa nanto?
6 Ngandlel’ ithile, ukholo olungekavavanywa akunakuqinisekwa ngalo, yaye alinakwaziwa ixabiso lalo. Usenokulufanisa netsheki engekatshintshwa ibe yimali. Usenokuba uye wayifumana itsheki ngomsebenzi owenzileyo, izinto ozenzileyo okanye kwananjengesipho. Loo tsheki isenokubonakala incumisa, kodwa ngaba injalo ngokwenene? Ngaba ngokwenene inexabiso elilingana nemali ebhalwe kuyo? Ngokufanayo, asimele nje sibonakale okanye sizingomb’ isifuba sisithi sinokholo. Lumele luvavanywe ukuze luzingqine lunentsingiselo yaye luxabiseke ngokwenene. Xa ukholo lwethu luvavanyiwe, sisenokulufumanisa lomelele yaye luxabiseke gqitha. Ukanti uvavanyo lunokutyhila naziphi na iinkalo oluthi ukholo lwethu lufune ukusulungekiswa okanye lomelezwe kuzo.
7, 8. Zivela phi iimvavanyo zokholo lwethu?
7 UThixo uyayivumela intshutshiso nezinye iimvavanyo zokholo ukuba zisifikele. Sifunda oku: “Makungabikho nabani na, xa esesilingweni othi: ‘Ndilingwa nguThixo.’ Kuba uThixo akanakulingwa ngezinto ezimbi yaye naye akalingi namnye.” (Yakobi 1:13) Ngubani okanye yintoni ebangela ezo zilingo? NguSathana, ihlabathi kunye nokungafezeki kwethu.
8 Sisenokuvuma ukuba uSathana unempembelelo enkulu ehlabathini, indlela elicinga nelizenza ngayo izinto. (1 Yohane 5:19) Kwaye mhlawumbi siyazi ukuba nguye ontyontyela intshutshiso nxamnye namaKristu. (ISityhilelo 12:17) Kodwa ngaba kwangaxeshanye siyaqonda ukuba uSathana uzama ukusilahlekisa esebenzisa inyama yethu engafezekanga, ebophelela umnyiki ngasezantsi, enyeke ukuba singene esigwini, singamthobeli uThixo size siphele sesingasamkholisi uYehova? Kakade ke, iindlela zikaSathana azimele zibe ngumnqa kuthi, kuba wasebenzisa amaqhinga afanayo xa wayezama ukuhenda uYesu.—Mateyu 4:1-11.
9. Sinokungenelwa njani kwimizekelo yokholo?
9 Esebenzisa iLizwi lakhe nebandla lamaKristu, uYehova usibekela imizekelo emihle yokholo esinokuyixelisa. UPawulos wabongoza esithi: “Yithini ngokumanyeneyo nibe ngabaxelisa mna, bazalwana, nize niphose iliso kwabo bahamba ngendlela evumelana nomzekelo esinimisele wona.” (Filipi 3:17) Njengomnye wabakhonzi bakaThixo abathanjisiweyo benkulungwane yokuqala, uPawulos wakhokela ekwenzeni imisebenzi yokholo nangona wayetyhubele izilingo ezikhulu. Ukuza kuthi ga ekupheleni kwenkulungwane yama-20, sinenyambalala yemizekelo efanayo yokholo. Amazwi akweyamaHebhere 13:7 asebenza ngakumbi ngoku kunokuba ayenjalo xa uPawulos wawabhalayo esithi: “Bakhumbuleni abo bakhokelayo phakathi kwenu, abaye bathetha ilizwi likaThixo kuni, yaye njengoko nisondela indlela ephumelela ngayo ihambo yabo xelisani ukholo lwabo.”
10. Yiyiphi imizekelo yokholo esinayo kula maxesha?
10 Eso sibongozo sisebenza ngakumbi xa sicinga ngendlela eye yaqhuba ngayo intsalela ethanjisiweyo. Sinokucamngca ngomzekelo wayo size sixelise ukholo lwayo. Inokholo lokwenene oluye lwasulungekiswa zizilingo. Ubuzalwana bamaKristu behlabathi lonke baqalisa ngeqaqobana nje emva phayaa ngeminyaka yee-1870 baza baya bukhula. Ngoku kukho amaNgqina kaYehova angaphezu kwezigidi ezihlanu ezinesiqingatha, ashumayela nafundisa ngoBukumkani bukaThixo nasisiqhamo sokholo nonyamezelo lwabathanjiswa ukususela ngoko. Ibandla elikhoyo labanquli bokwenene abanenzondelelo ehlabathini lonke libubungqina bokholo oluvavanyiweyo.—Tito 2:14.
Ukuvavanywa Kokholo Ngokuphathelele Owe-1914
11. Owe-1914 wawubaluleke ngantoni kuC. T. Russell nezinxulumani zakhe?
11 Kwiminyaka ethile ngaphambi kokuqhambuka kwemfazwe yehlabathi yokuqala, intsalela yabathanjiswa yayivakalisa ukuba owe-1914 wawuza kuba ngunyaka obalulekileyo kwiziprofeto zeBhayibhile. Noko ke, lalingekafiki ixesha lezinye zezinto eyayizilindele, ibe oko yayicinga ukuba kuza kwenzeka kwakungachananga konke. Ngokomzekelo, uC. T. Russell, umongameli wokuqala weWatch Tower Society, nezinxulumani zakhe babebona ukuba kukho umsebenzi omninzi owawumele wenziwe. Bafunda oku: “Le vangeli yobukumkani iza kushunyayelwa kulo lonke ihlabathi ibe bubungqina kuzo zonke iintlanga; kwandule ke kufike isiphelo.” (Mateyu 24:14, King James Version) Noko ke, elo qaqobana labo lalinokuwuphumeza njani loo msebenzi?
12. Sasabela njani esinye sezinxulumani zikaRussell kwinyaniso yeBhayibhile?
12 Phawula indlela oku okwamchaphazela ngayo uA. H. Macmillan, isinxulumani sikaRussell. Inzalelwane yaseKhanada, uMacmillan wayengekadibanisi nama-20 eminyaka ubudala xa wafumana incwadi kaRussell ethi The Plan of the Ages (1886). (Le ncwadi, ekwabizwa ngokuthi yiThe Divine Plan of the Ages, yaba nguMqulu 1 kwiiStudies in the Scriptures ezasasazwa kakhulu. UMqulu 2, othi The Time Is at Hand [1889], wawusalatha kowe-1914 njengesiphelo ‘samaxesha eeNtlanga.’ [Luka 21:24, KJ]) Kwangobo busuku uMacmillan awaqalisa ngabo ukuyifunda, wacinga: “Ivakala iyinyaniso le nto!” Ngehlobo lowe-1900, wadibana noRussell kwindibano yaBafundi beBhayibhile, njengoko amaNgqina kaYehova ayebizwa ngolo hlobo ngoko. Kungekudala emva koko uMacmillan wabhaptizwa waza waqalisa ukusebenza noMzalwan’ uRussell kwikomkhulu loMbutho eNew York.
13. Yiyiphi ingxaki eyaphawulwa nguMacmillan nabanye ngokuphathelele ukuzaliseka kukaMateyu 24:14?
13 Ngokwendlela awayeyifunda ngayo iBhayibhile, la maKristu athanjisiweyo alatha kowe-1914 njengonyaka oza neenguqu kwinjongo kaThixo. Kodwa uMacmillan nabanye bazibuza ngendlela owawunokuphunyezwa ngayo umsebenzi wokushumayela ezintlangeni owaxelwa kwangaphambili kuMateyu 24:14 ngelo xeshana lishiyekileyo. Kamva wathi: “Ndiyakhumbula ukuba ndandidla ngokuxubusha noMzalwan’ uRussell ngalo mba, ibe wayeye athi, ‘Kaloku, mzalwana, apha eNew York sinamaYuda amaninzi ngaphezulu kunaseJerusalem. Sinabemi baseIreland abaninzi kunabaseDublin. SinamaTaliyane amaninzi kunaseRome. Ngoko ukuba sifikelela bonke aba balapha, siya kube silifikelele ihlabathi ngesigidimi.’ Kodwa ayizange isanelise loo nkcaza. Ngoko kwacetywa ukuveliswa ‘kwePhoto-Drama.’”
14. Ngaphambi kowe-1914, nguwuphi umsebenzi obalaseleyo owaqaliswayo?
14 Hayi indlela eyabangel’ umdla ngayo “iPhoto-Drama of Creation”! Yayinemifanekiso eshukumayo neeslides ezinemibalabala, ezazihambisana neentetho zeBhayibhile kunye nomculo owawudlala kumacwecwe egramafoni. Ngowe-1913, IMboniselo (yesiNgesi) yathetha yenjenje ngendibano eyayiseArkansas, eUnited States: “Sonke siye safikelela kwisigqibo sokuba ngoku lixesha lokusetyenziswa kwemifanekiso eshukumayo ekushumayeleni iinyaniso zeBhayibhile. . . . [URussell] wasichazela ukuba ebequlunqa eli cebo kangangeminyaka emithathu ibe ngoku kukho imifanekiso ethi ndijonge emalunga nekhulu esele iza kugqitywa, ngokuqinisekileyo eza kuba nomtsalane kubantu abaninzi neza kuvakalisa iVangeli, ize incede abantu babuyele ekukholweni kuThixo.”
15. Yaba nayiphi imiphumo “iPhoto-Drama”?
15 Le “Photo-Drama” yenjenjalo kanye emva kokuba iboniswe okokuqala ngoJanuwari 1914. Ezi ngxelo zilandelayo zavela kwiiMboniselo (zesiNgesi) zowe-1914:
Aprili 1: “Omnye umfundisi, emva kokubukela iinxalenye ezimbini, wathi, ‘Ndisabukele nje isiqingatha sale PHOTO-DRAMA OF CREATION, kodwa kuninzi endikufunde kuyo ngeBhayibhile kunoko ndikufunde kwizifundo zeminyaka emithathu zesikolo sabefundisi.’ Emva kokuyibukela, omnye umYuda wathi, ‘Ndiphuma apha ndingumYuda ophucukileyo kunokuba bendinjalo xa bendifika.’ Iqela labefundisi noonongendi bamaKatolika likhe laya kuyibukela le DRAMA laza lavakalisa uxabiso olukhulu. . . . Ziziqendu ezilishumi elinesibini kuphela esele zigqityiwe zale DRAMA . . . Ukanti sele sifikelele yaye siyibonisa kwizixeko ezingamashumi amathathu ananye . . . Bangaphezu kwamawaka angamashumi amathathu anesihlanu ngosuku abantu abayibonayo, beve, babuke, bacinge yaye basikelelwe.”
Juni 15: “Le mifanekiso iye yandenza ndanenzondelelo engakumbi yokusasaza iNyaniso, yaza yakhulisa uthando lwam ngoBawo oseZulwini kunye noMkhuluwa wethu othandekayo uYesu. Mihla le ndithandazela iintsikelelo ezityebileyo zikaThixo kwiPHOTO-DRAMA OF CREATION nakubo bonke ababandakanyeke ekuyiboniseni . . . ndingumkhonzi wenu Kuye, F. W. KNOCHE.—Iowa.”
Julayi 15: “Sivuyiswa kukunazisa ngomphumo omhle oye waba nayo le mifanekiso kwesi sixeko, ibe siqinisekile ukuba obu bungqina buya ehlabathini bukwasetyenziselwa ukuhlanganisa abaninzi abazingqina bezizacholo ezikhethwe yiNkosi. Sineqela labafundi beBhayibhile abanenzondelelo ngoku elinxulumene neKlasi apha ngenxa yalo msebenzi wePhoto-Drama. . . . Udade wenu eNkosini, EMMA L. BRICKER.”
Novemba 15: “Siqinisekile ukuba niya kukuvuyela ukuva ngobungqina obuhle obunikelwa yiPHOTO-DRAMA OF CREATION kwiThe London Opera House, eKingsway. Ulwalathiso lweNkosi luye lwabonakala kakuhle kuzo zonke iinkalo zalo mboniso kangangokuba imilomo yabazalwana ayihlangani . . . Abaphulaphuli bethu ibingabantu abakwimigangatho neendidi zonke zokuphila; siye saphawula ukuba bekukho nabefundisi abaninzi. Omnye umfundisi . . . uye wacela amatikiti ukuze yena nomkakhe babuye baze kuyibukela kwakhona. Omnye uMphathi waseTshetshi ubukele le DRAMA kangangezihlandlo eziliqela, ibe . . . uye weza nabahlobo bakhe abaninzi ukuze baze kuzibonela. Kwakhona kuye kwakho noobhishopu ababini, kunye nezinye izidwangube.”
Disemba 1: “Mna nomkam simbulela ngokwenene uBawo oseZulwini ngale ntsikelelo inkulu ingenakuthelekiswa nanto eye yeza kuthi ngawe. Yile PHOTO-DRAMA yakho intle eye yasenza sayibona saza sayamkela iNyaniso . . . Sinemiqulu yakho emithandathu yeSTUDIES IN THE SCRIPTURES. Iluncedo gqitha.”
Indlela Awasabela Ngayo Kwiimvavanyo Zelo Xesha
16. Kwakutheni ukuze owe-1914 uzise uvavanyo lokholo?
16 Kwenzeka ntoni ke xa loo maKristu anyanisekileyo nazinikeleyo afumanisa ukuba ulindelo lwawo lokuba kunye neNkosi ngowe-1914 aluphumeleli? Abo bathanjiswa bajamelana nelona xesha lizaliswe zizilingo. IMboniselo (yesiNgesi) kaNovemba 1, 1914, yathi: “Masikhumbule ukuba sikwixesha lokuvavanywa.” Ithetha ngalo mbandela, incwadi ethi AmaNgqina KaYehova—Abavakalisi BoBukumkani BukaThixo (yowe-1993) ithi: “Ngokwenene, iminyaka esusela kowe-1914 ukusa kowe-1918, yangqineka ‘ilixesha lokuvavanywa’ kuBafundi beBhayibhile.” Ngaba babeza kuvumela ukholo lwabo lusulungekiswe neengcamango zabo zilungiswe ukuze bakwazi ukusingatha umsebenzi omkhulu ababejongene nawo?
17. Basabela njani abathanjiswa abathembekileyo kumbandela wokuqhubeka bephila emhlabeni emva kowe-1914?
17 IMboniselo (yesiNgesi) kaSeptemba 1, 1916, yathi: “Besicinga ukuba umsebenzi Wokuvuna kuhlanganiswa iCawa [abathanjiswa] uza kugqitywa ngaphambi kokuphela kwamaXesha Eentlanga; kodwa akukho nto itshoyo eBhayibhileni. . . . Ngaba iyasikhathaza into yokuba umsebenzi Wokuvuna usaqhubeka? . . . Isimo sethu sengqondo ngoku, bazalwana abathandekayo, sifanele sibe sesokumbulela kakhulu uThixo, sikhulise uxabiso ngeNyaniso ebalaseleyo aye Yena wasinika ilungelo lokuyibona nokunxulumana nayo, yaye sikhulise nenzondelelo ekwaziseni abanye ngaloo Nyaniso.” Ukholo lwabo lwaluvavanyiwe, kodwa bajamelana nolo vavanyo baza bahlangabezana nalo ngempumelelo. Kodwa nathi njengamaKristu sifanele sazi ukuba iimvavanyo zokholo zisenokuza ziyimvula yaye zingafani.
18, 19. Ziziphi ezinye iimvavanyo zokholo ezalandelayo kubantu bakaThixo emva nje kokufa kukaMzalwan’ uRussell?
18 Ngokomzekelo, intsalela yajamelana nolunye uvavanyo lokholo kamsinya emva kokufa kukaMzalwan’ uCharles T. Russell. Olo yayiluvavanyo lokunyaniseka nokholo lwayo. Yayingubani “ikhoboka elithembekileyo” ekuthethwa ngalo kuMateyu 24:45? Bambi babevakalelwa kukuba yayinguMzalwan’ uRussell ngokwakhe, ibe bazalel’ endle xa kwafuneka basebenzisane namalungiselelo amatsha entlangano. Ukuba yayingulo mzalwana ikhoboka, abazalwana babeza kuthini ke akufa? Ngaba babefanele balandele loo mntu mtsha umiselweyo, okanye ngaba ngoku yayilixesha lokuphawula ukuba uYehova wayesebenzisa, kungekhona umntu omnye kuphela, kodwa lonke iqela lamaKristu njengesixhobo, okanye udidi lwekhoboka?
19 Uvavanyo oluthe chatha lwawafikela amaKristu okwenyaniso ngowe-1918 xa amagunya ehlabathi, entyontyelwa ngabefundisi beNgqobhoko, ‘aqulunqa intlondi ngomthetho’ nxamnye nentlangano kaYehova. (INdumiso 94:20, KJ) Kwaqalisa intshutshiso enogonyamelo kuBafundi beBhayibhile kuMntla Merika naseYurophu. Inkcaso eyayiphenjelelwa ngabefundisi yafikelela incopho ngoMeyi 7, 1918, xa urhulumente waseUnited States wayalela ukuba kubanjwe uJ. F. Rutherford kunye neqela lezinxulumani zakhe ezisondeleyo, kuquka uA. H. Macmillan. Batyholwa ngobuxoki kusithiwa baqhwaya imfazwe, ibe abasemagunyeni babengafuni nokuva xa babezithethelela besithi bamsulwa.
20, 21. Njengoko kwakuxelwe kwangaphambili kuMalaki 3:1-3, nguwuphi umsebenzi owenziwa kubathanjiswa?
20 Nangona oko kwakungagqalwa njalo ngoko, kwaqalisa umsebenzi wokucoca, ochazwe kuMalaki 3:1-3: “Ngubani na ke onokuyinyamezela imini yokuza kwakhe? Ngubani na ke onokuma ekubonakaleni kwakhe? Ngokuba [umthunywa womnqophiso] unjengomlilo womnyibilikisi, unjengesoda yabaxovuli beengubo. Uya kuhlala ke engumnyibilikisi, engumcoci wesilivere, abacoce oonyana bakaLevi, abahluze njengegolide, nanjengesilivere; babe ngabazisa umnikelo kaYehova benobulungisa.”
21 Njengoko iMfazwe Yehlabathi I yayisondela esiphelweni, bambi kuBafundi beBhayibhile bajamelana nolunye uvavanyo lokholo—enoba babeya kuhlala bengoondilele ngokungqongqo kwizinto zehlabathi eziphathelele imfazwe kusini na. (Yohane 17:16; 18:36) Abanye boyisakala. Ngoko ngowe-1918, uYehova wathumela “umthunywa womnqophiso,” uKristu Yesu, kwilungiselelo letempile Yakhe yokomoya ukuze ahlambulule elo qaqobana labanquli Bakhe kwizisihla zehlabathi. Abo babezimisele ukubonakalisa ukholo lokwenene bafunda ngokusuka kumava baza bafunza phambili, baqhubeka beshumayela ngenzondelelo.
22. Yintoni eseza kuxutyushwa ngokuphathelele iimvavanyo zokholo?
22 Ezi zinto siye sazixubusha azingomabali nje amnandi abaliswayo. Zinento yokwenza nemeko elikuyo ngoku ibandla likaYehova ehlabathini lonke. Kodwa makhe siqwalasele ezinye zeemvavanyo zokholo abajamelana nazo abantu bakaThixo namhlanje size sibone indlela esinokuzoyisa ngayo ngempumelelo kwinqaku elilandelayo.
Ngaba Usakhumbula?
◻ Kutheni abantu bakaYehova befanele balindele ukuba ukholo lwabo luvavanywe?
◻ Yiyiphi imigudu yokusasaza isigidimi sikaThixo eyaqalisa ngaphambi kowe-1914?
◻ Yayiyintoni “iPhoto-Drama,” ibe yaba nayiphi imiphumo?
◻ Iziganeko ezenzeka ngexesha eliphakathi kowe-1914 ukusa kowe-1918 zabavavanya njani abathanjiswa?
[Umfanekiso okwiphepha 12]
Ngasekupheleni kwenkulungwane, abantu ababekumazwe amaninzi babefundisisa iBhayibhile bencedwa lungcelele lweencwadi ezithi “Millennial Dawn,” kamva ezabizwa ngokuthi “Studies in the Scriptures”
[Umfanekiso okwiphepha 13]
Ileta eyayivela kuC. T. Russell eyayinamazwi entshayelelo arekhodiweyo awathi kuyo: “I-‘The Photo-Drama of Creation’ iveliswe yi-IBSA—i-International Bible Students Association [Abafundi BeBhayibhile Bezizwe Ngezizwe]. Injongo yayo kukufundisa uwonke wonke ngokuphathelele imibandela edibanisa unqulo nenzululwazi, yaye ithethelela iBhayibhile”
[Umfanekiso okwiphepha 15]
UDemetrius Papageorge wayehambahamba ebonisa i-“Photo-Drama of Creation.” Kamva, wavalelwa entolongweni ngenxa yobundilele bamaKristu