Unokwenza Inkqubela Ngokomoya

KUNOKUBA nzima ukubuqonda ubutyebi bokwenene. Oku kunjalo ngeedayimani. Nangona idayimani emenyezelisiweyo ibengezela, idayimani engekamenyezeliswa ibengezela luzizi. Sekunjalo, phakathi kwidayimani engekamenyezeliswa kukho obona buhle bugqwesileyo belitye elinqabileyo.

AmaKristu ayafana needayimani ezingekamenyezeliswa ngeendlela ezininzi. Nangona sisekude gqitha kwimfezeko, ngokusisiseko sixabisekile kuYehova. Njengeedayimani, sonke sineempawu zethu ezikhethekileyo. Yaye ngamnye wethu unokuyenza inkqubela engakumbi ngokomoya ukuba lowo ngumnqweno wethu osuka entliziyweni. Ubuntu bethu bunokusulungekiswa, ukuze bubengezele ngakumbi kuze kuzukiswe uYehova.—1 Korinte 10:31.

Emva kokuba isikiwe yaza yamenyezeliswa, ifakwa kumsesane ovelisa impawu zayo zokubengezela. Ngokufanayo, uYehova unokusisebenzisa kwiinkalo okanye kwizabelo ezahlukahlukeneyo, ukuba ‘sambatha ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.’—Efese 4:20-24.

Inkqubela enjalo yokomoya isenokungazenzekeli ngokwemvelo, kanye njengokuba idayimani ekwisimo sayo semvelo kunqabile ukuba ibengezele njengelitye elinexabiso. Kusenokufuneka soyise ubuthathaka esinabo obuzingisileyo, silungelelanise isimo sethu sengqondo xa siphumeza imbopheleleko ethile, okanye sizibhokoxe ukuze singabi ngathi sigqithis’ usana kunina kwizinto zokomoya. Kodwa sinokuyenza inkqubela ngokomoya ukuba sikufuna ngokwenene ukwenjenjalo, ekubeni uYehova uThixo enokusinika “amandla angaphaya koko kuqhelekileyo.”—2 Korinte 4:7; Filipi 4:13.

UYehova Uyabomeleza Abakhonzi Bakhe

Ukusika iidayimani kufuna uqiniseke nto leyo ebangelwa lulwazi oluchanileyo, kuba xa isikiwe inxalenye yedayimani engekamenyezeliswa iyasuswa, ize ngokuqhelekileyo ilahlwe. Ilitye elibiza ixabiso elikhulu—maxa wambi ama-50 ekhulwini elitye elingekasikwa—kuye kufuneke lisikwe ukuze libe yiloo nto ifunwayo. Nathi ngokufanayo sifuna ukuqiniseka okubangelwa lulwazi oluchanileyo ukuze sakhe ubuntu bethu sikwazi ukwenza inkqubela ngokomoya. Ngokukodwa xa sinentembelo yokuba uYehova uya kusinika amandla.

Noko ke, sisenokuziva singafaneleki okanye sicinge ukuba asinakho ukwenza okungakumbi. Maxa wambi abakhonzi bakaThixo babevakalelwa ngaloo ndlela. (Eksodus 3:11, 12; 1 Kumkani 19:1-4) Xa uThixo wamnika isabelo sokuba abe “ngumprofeti weentlanga,” uYeremiya wathi: “Yabona, andikwazi ukuthetha, ngokuba ndingumntwana.” (Yeremiya 1:5, 6) Noko ke, phezu kwako nje ukuba neentloni kwakhe, uYeremiya waba ngumprofeti onenkalipho ekuvakaliseni izigidimi ezingafihlisiyo kubantu abakhohlakeleyo. Kwenzeka njani oku? Wafunda ukuthembela kuYehova. Kamva uYeremiya wabhala: “Isikelelekile indoda ekholose ngoYehova, enkoloseko ikuYehova.”—Yeremiya 17:7; 20:11.

Ngokufanayo, namhlanje uYehova uyabomeleza abo bakholose ngaye. UEdward,a uyise wabantwana abane owayethabath’ ixesha ekwenzeni inkqubela ngokomoya, wakufumanisa kuyinyaniso oku. Uchaza esithi: “Bendingomnye wamaNgqina kaYehova iminyaka esithoba, kodwa ndabonakala ndingahambeli phambili ngokomoya. Ingxaki yayikukuba ndandingenantshukumisa ingako yaye ndingazithembanga. Emva kokuba ndifudukele eSpeyin, ndaba kwibandla elincinane elalinomdala nesicaka solungiselelo esinye. Ngenxa yentswelo, loo mdala wandicela ukuba ndisingathe iqela lezabelo. Ndandingcangcazela njengoko ndandinikela iintetho zam zokuqala neenxalenye zentlanganiso. Kanti, ndiye ndafunda ukuthembela kuYehova. Lo mdala wayesoloko endincoma aze anikele amacebiso obuchule ngendlela yokuphucula.

“Kwangaxeshanye, ndawandisa umsebenzi wam wasentsimini ndaza ndayikhokela bhetele intsapho yam ngokomoya. Ngenxa yoko, inyaniso iye yanentsingiselo ngakumbi kuyo yonke intsapho, yaye ndiziva ndaneliseke kakhulu. Ngoku ndisisicaka solungiselelo, yaye ndiyazibhokoxa ukuze ndivelise iimpawu zomveleli ongumKristu.”

‘Hluba Ubuntu Obudala’

Njengokuba uEdward waye waqonda, inkqubela yokomoya ifuna ukholose ngoYehova. Ukuvelisa “ubuntu obutsha” obufana nobukaKristu kubalulekile. Kunokwenziwa njani oku? Inyathelo lokuqala kukuhluba utyekelo olubonakala luyinxalenye yobuntu obudala. (Kolose 3:9, 10) Njengokuba izibhidi, ezifana nezimbiwa ezingeyonxalenye yedayimani, zifanele zisuswe kwidayimani engekamenyezeliswa ukuze ibe lilitye elibengezelayo, ngoko ke izimo zengqondo “zehlabathi” zifuna ukulahlwa ukuze ubuntu bethu obutsha bubengezele.—Galati 4:3.

Esinye isimo sengqondo esinjalo kukonqena ukwamkela imbopheleleko kuba sisoyika ukuba kuya kufunwa okuninzi kuthi. Enyanisweni, imbopheleleko ithetha umsebenzi, kodwa ngumsebenzi owanelisayo. (Thelekisa IZenzo 20:35.) UPawulos wavuma ukuba uzinikelo lobuthixo lufuna ukuba ‘sisebenze nzima kwaye sizibhokoxe.’ Wathi senjenjalo ngovuyo, “ngenxa yokuba sibeke ithemba lethu kuThixo ophilayo,” lowo ongasokuze awulibale umsebenzi esiwenza egameni lamaKristu esikhonza nawo kunye nabanye.—1 Timoti 4:9, 10; Hebhere 6:10.

Zimbi iidayimani ziba “nendawo ezibuthathaka” ezenzeka ekwakhiweni kwazo yaye zifuna ukuphathwa ngenyameko. Noko ke, ngoncedo lwesixhobo esibizwa ngokuba yipolariscope, umtyhidi unokububona ubathathaka aze alityhide ilitye ngokunempumelelo. Mhlawumbi sikhathazwa bubuthathaka, okanye sisiphako sobuntu, ngenxa yemvelaphi okanye amava abuhlungu. Sinokwenza ntoni? Okokuqala, kufuneka siyivume ingxaki size sizimisele ukuyilungisa kangangoko sinako. Ngokuqinisekileyo sifanele siwothule umthwalo ngomthandazo kuYehova, ukuba kunokwenzeka sifune uncedo lokomoya kumdala ongumKristu.—INdumiso 55:22; Yakobi 5:14, 15.

Ubuthathaka obunjalo babubhuqa uNicholas. Uchaza esithi: “Utata wayelikhoboka lotywala, kwaye mna nodadewethu sabandezeleka kakhulu. Xa ndagqibayo esikolweni, ndaba lilungu lomkhosi, kodwa ngokukhawuleza utyekelo lwam lokuvukela lwandifaka enkathazweni. Abasemagunyeni emkhosini bandivalela entolongweni ngenxa yokuthengisa iziyobisi, yaye ngaxa lithile ndaqhwesha. Ekugqibeleni, ndawushiya umkhosi, kodwa ndandiseneengxaki. Nangona ubomi bam babusebugxwayibeni ngenxa yokusebenzisa kakubi iziyobisi nokusela ngokugqithiseleyo, ndandinomdla eBhayibhileni yaye ndilangazelela ukuba nenjongo ebomini. Ekugqibeleni ndadibana namaNgqina kaYehova, ayiguqula indlela yam yobomi, ndaza ndayamkela inyaniso.

“Noko ke, kwathabatha iminyaka ngaphambi kokuba ndisiqonde isiphako kubuntu bam. Ndandingalithandi igunya yaye ndivusa umnyele xa ndilulekwa nangantoni na. Nangona ndandikufuna ukusetyenziswa ngokupheleleyo nguYehova, obu buthathaka bandibambezela. Ekugqibeleni, ngoncedo lwabadala ababini abaqondayo, ndayivuma ingxaki yam ndaza ndaqalisa ukusisebenzisa isiluleko sabo sothando esingokweZibhalo. Nangona ngezihlandlo ezithile ndimana ukuba nomsindo ongephi, ngoku ndiyakwazi ukusilawula isimo sam semvukelo. Ndinombulelo kakhulu ngomonde kaYehova ekuqhubaneni nam nangoncedo olunothando lwabadala. Ngenxa yenkqubela yam yokomoya, kutshanje ndiye ndamiselwa njengesicaka solungiselelo.”

Njengokuba uNicholas wazibonelayo, ukutshintsha izimo zengqondo ezendele ngokunzulu akuyondlwan’ iyanetha. Nathi sinokujamelana nocelomngeni olufanayo. Mhlawumbi sinochuku ngokugqithiseleyo. Sisenokuba sinesikhalazo, okanye sithanda ukuzilawula kakhulu. Ngaloo ndlela, inkqubela yethu yobuKristu inokusikelwa umda. Abatyhidi bedayimani baba namava afanayo ngamatye abawabiza ngokuba ziinaats. Enyanisweni la ngamatye amabini anyityilikiswe aba lilitye elinye xa kusenziwa idayimani. Ngokomphumo, iinaats zineendlela ezimbini zokukhula ezahlukahlukeneyo ezibangela ukuba kube nzima ukuzisika. Kwimeko yethu, sifumana “utyekelo” lomoya onentumkelelo olwa nxamnye “notyekelo” lwenyama engafezekanga. (Mateyu 26:41; Galati 5:17) Maxa wambi, sinokuziva sityekele ekunikezeleni ngokupheleleyo kweli dabi, sikuthethelela ukungafezeki kobuntu bethu ngokuthi akubalulekanga kangako. ‘Ngapha koko’ sisenokuthi, ‘intsapho nabahlobo bam basandithanda.’

Noko ke, ukuba siza kukhonza abazalwana bethu size sizukise uBawo wethu wasezulwini, ‘sifanele senziwe batsha kumandla aqhuba ingqondo yethu’ ngokwambatha ubuntu obutsha. Umgudu ufanelekile, njengokuba uNicholas nenkumbula yabanye benokukungqina oku. Umtyhidi wedayimani uyazi ukuba isiphene esinye sinokuyonakalisa yonke loo dayimani. Ngokukwanjalo, ngokutyeshela uphawu olububuthathaka kubuntu bethu, sinokuyonakalisa inkangeleko yethu yokomoya. Okubi nangakumbi kukuba, ubuthathaka obunzulu bunokukhokelela ekuwohlokeni kwethu ngokomoya.—IMizekeliso 8:33.

‘Njengomlilo’ Ongaphakathi Kuthi

Umtyhidi wedayimani uzabalazela ukugcina ukubengezela okungaphakathi kwidayimani. Oku kwenziwa ngokulungelelanisa amacala ukuze avelise imbonakalo ebukhazikhazi. Ngaphakathi kwidayimani ukukhanya okumibalabala kubonakala macal’ onke, kuvelisa ukukhanya okuyenza idayimani ibengezele. Ngokufanayo, umoya kaThixo unokuba ‘njengomlilo’ kuthi.—1 Tesalonika 5:19; IZenzo 18:25; Roma 12:11.

Kodwa kuthekani ukuba siziva sifuna ukukhuthazwa ngokomoya? Kunokwenziwa njani oku? Sifanele ‘siziqwalasele iindlela zethu.’ (INdumiso 119:59, 60, NW) Oku bekuya kuquka ukwazi ezo zinto zisiwohlozayo ngokomoya size sibone ukuba yiyiphi imisebenzi yobuthixo ekufuneka sizibhokoxe ngakumbi kuyo. Sinokulwenza nzulu uxabiso ngezinto zokomoya ngofundisiso lobuqu oluthe rhoqo nangokuthandaza ngokunyanisekileyo. (INdumiso 119:18, 32; 143:1, 5, 8, 10) Ukongezelela, ngokunxulumana nabo bazibhokoxayo elukholweni, luya komelela ngakumbi uzimiselo lwethu lokukhonza uYehova ngenzondelelo.—Tito 2:14.

ULouise, ibhinqa eliselula elingumKristu, lavuma: “Ndacingisisa iminyaka emibini ngobuvulindlela obuthe ngxi ngaphambi kokuba ndide ndibhalise njengovulindlela, okanye njengomvakalisi wexesha elizeleyo woBukumkani. Kwakungekho nto indithintelayo, kodwa ndandiphila ngendlela elula, kwaye andizange ndenze mgudu wokuyeka. Wandula ke utata wafa ngequbuliso. Ndayiqonda indlela obuphela lula ngayo ubomi nokuba ndandingazibhokoxi ngokwaneleyo. Ngoko ke, ndazijonga ngelinye iliso izinto zokomoya, ndayandisa inkonzo yam, ndaza ndaba nguvulindlela othe ngxi. Uncedo olukhethekileyo kulo mba yaba lolwabazalwana noodade ababesoloko bewaxhasa amalungiselelo enkonzo yasentsimini nababesoloko bephuma kunye nam kubulungiseleli. Ndiye ndafunda ukuba enokuba kuhle okanye kubi, siyabelana ngosukelo nangezinto ezixabisekileyo nezinxulumani zethu.”

Ukulolwa Ngokungathi Kungesinyithi

Iidayimani zezona zinto ziqinileyo ezizenzekela ngokwemvelo emhlabeni. Ngenxa yoko, kusetyenziswa enye idayimani ukusika enye. Oku kunokukhumbuza abafundi beBhayibhile umzekeliso othi: “Isinyithi silola isinyithi, indoda ilola ubuso bowayo.” (IMizekeliso 27:17) ‘Bulolwa’ njani ubuso bomntu? Omnye umntu usenokuphumelela ekuloleni ingqondo nemeko engokomoya yomnye, kanye njengokuba isinyithi sinokusetyenziselwa ukulola incakuba eyenziwe ngesinyithi esifanayo. Ngokomzekelo, ukuba sidandathekile ngenxa yokuphoxeka okuthile, ukhuthazo lomnye umntu lunokusivuselela kakhulu. Ubuso bethu obuthe khunubembe bunokuguquka bube buhle, yaye sinokuhlaziyelwa ekubeni nenzondelelo engakumbi emsebenzini. (IMizekeliso 13:12) Ngokukhethekileyo abadala bebandla banokunceda ekusiloleni ngokunikela ukhuthazo olungokweZibhalo nesiluleko ukuze siphucule. Balandela umgaqo ochazwe nguSolomon othi: “Siluleke isilumko, solumka okunye; lazise ilungisa, lokongeza ukufunda.”—IMizekeliso 9:9.

Kakade ke, uqeqesho olungokomoya luthabatha ixesha. Ngaphezu kweminyaka elishumi, umpostile uPawulos wabelana noTimoti ngamava nangeendlela zokufundisa. (1 Korinte 4:17; 1 Timoti 4:6, 16) Uqeqesho olusemagqabini uMoses awalunikela kuYoshuwa ngaphezu kweminyaka engama-40 lwalunceda uhlanga lwakwaSirayeli ixesha elide. (Yoshuwa 1:1, 2; 24:29, 31) UElisha wayehamba nomprofeti uEliya mhlawumbi kangangeminyaka enokuba mi-6, efumana isiseko esihle sobulungiseleli bakhe obabuza kuthabatha iminyaka enokuba ngama-60. (1 Kumkani 19:21; 2 Kumkani 3:11) Ngokuqeqesha ngomonde ngokuqhubekayo, abadala balandela umzekelo kaPawulos, uMoses noEliya.

Ukuncoma yinxalenye ebalulekileyo yoqeqesho. Amazwi anyanisekileyo okuncoma isabelo esisingathwe kakuhle okanye isenzo esincomekayo sinokubashukumisela abanye ekubeni bafune ukukhonza uThixo ngokuzele ngakumbi. Ukuncoma kwakha intembelo ethi, kamva, ibangele uzimiselo lokuphucula ubuthathaka obuthile. (Thelekisa eyoku-1 kwabaseKorinte 11:2.) Ukhuthazo lokwenza inkqubela enyanisweni lukwabangelwa kukubandakanyeka ngokupheleleyo kumsebenzi wokushumayela ngoBukumkani nakweminye imisebenzi yebandla. (IZenzo 18:5) Xa abadala besabela abazalwana ebandleni imbopheleleko ngokuvisisana nenkqubela yabo engokomoya, oku kuxhobisa la madoda ngamava axabisekileyo yaye komeleza umnqweno wawo wokuqhubeka esenza inkqubela ngokomoya.—Filipi 1:8, 9.

Isizathu Esilungileyo Sokwenza Inkqubela Ngokomoya

Kangangeenkulungwane, iidayimani bezigqalwa njengezixabisekileyo. Oku kunjalo nangabo banxulumana nentsapho yehlabathi lonke yabanquli bakaYehova. Enyanisweni, uThixo ngokwakhe ubabiza ngokuba ‘bazizinto ezinqwenelekayo’ okanye ‘ezixabisekileyo,’ zeentlanga zonke. (Hagayi 2:7, umbhalo osemazantsi we-NW) Kunyaka ophelileyo, ama-375 923 aba ngamaNgqina kaYehova abhaptiziweyo. Ukuze kuhlangatyezwane nolu lwando, kufanele ‘kwenziwe banzi intente.’ Ngokwenza inkqubela ngokomoya—nangokuzabalazela amalungelo enkonzo yobuKristu—ungafak’ isandla ekunyamekeleni olu lwando.—Isaya 54:2; 60:22.

Ngokungafaniyo needayimani ezininzi ezixabisekileyo ezigcinwa kumagumbi eebhanki anqatyisiweyo nezingafane zibonwe, ubutyebi bethu bokomoya bunokukhanya ngokuqaqambileyo. Kwaye njengoko siziphucula size sizibonakalise rhoqo iimpawu zethu zobuKristu, sizukisa uYehova uThixo. UYesu wabongoza abalandeli bakhe wathi: “Ngokunjalo makukhanye ukukhanya kwenu phambi kwabantu, ukuze babone imisebenzi yenu emihle base uzuko kuYihlo osemazulwini.” (Mateyu 5:16) Ngokuqinisekileyo, oko kusinika isizathu esivakalayo sokwenza inkqubela ngokomoya.

[Imibhalo esemazantsi]