Umhlaba—Wawudalelwe Ntoni?
Kukho umbuzo omele uzibuze wona: Ngaba isijikelezi-langa sethu senziwa nguMdaIi onobuchule owayenenjongo ngomhlaba nangabantu abakuwo? Ukucombulula le mbambano ngcndlela eyanelisayo kunokukunceda ubone oko lisifumbathele kona ikamva ngokuphathelele isijikelezi-langa sethu.
IZAZINZULU ezininzi eziye zafunda nzulu ngendalo iphela nomhlaba wethu ziye zabona ubungqina obalatha ukuba ukho uMdali, yaye nguThixo owawudalayo. Khawucinge ngala magqabaza asuka nje kwesinye:
Kwincwadi yakhe ethi The Mind of God uNjingalwazi Paul Davies uthi: “Ukuze kubekho umhlaba olungeleleneyo, nozinzileyo, noneenkqubo ezintsonkothileyo kufanele kubekho imithetho neemeko ezikhetheke kakhulu.”
Emva kokuchaza iqela “lamabonandenzile” aphawulwe zizazinzulu ngemichiza nokwakheka kweenkwenkwezi kwanezinye, uNjingalwazi Davies wongezelela athi: “Xa ehlolisiswa ngendlela ethile, anikela ubungqina obeyisayo bokuba ubomi njengokuba sisazi buxhomekeke ngokusisiseko kwimithetho yendalo nakwezinye iimeko ezikhangeleka njengezinto ezizenzekelayo eye indalo yazikhethela ukuze zibe nobunzima obuthile, njalo njalo. . . . Kwanele ukuthi, ukuba besinokuzenza uThixo, size sikhethe iimpawu zezi zinto ngokujija nje amaqhosha athile, besiya kufumanisa ukuba phantse uninzi lwamaqhosha beluya kubangela ukuba wonke umhlaba ungabi nabemi. Kwezinye iimeko kubonakala ngathi amaqhosha awahlukahlukeneyo afanele ajijwe ngobuchule obukhulu ukuze kuqinisekwe ngokwenene ukuba umhlaba uya kuyibangela indalo iphile. . . . Isibakala sokuba iinguqulelo ezincinane zisenokubangela ukuba umhlaba ungabi yongenelo nakubani ngokuqinisekileyo sibaluleke ngokwenene.”
Imiphumo yolu hlolisiso kwabaninzi yeyokuba umhlaba wethu, kuquka nendalo iphela, wawenziwe nguMdali onenjongo. Ukuba Oko kunjalo, kufuneka sifumanise isizathu sokuba kwasekuqaleni adale umhlaba. Kwakhona kufuneka siqiniseke, ukuba sinako, ngenjongo yakhe ngomhlaba. Kulo mbandela kubonakala kukho into engekho mgaqweni. Phezu kwako nje ukwanda kwabantu abangabukholelwayo ubukho bukaThixo, inani elothusayo labantu isakholelwa ngamandla kuMdali okrelekrele. Inkoliso yeecawa zeNgqobhoko ngokusemthethweni zithetha ngoThixo usomandla nonguMdali wendalo yethu iphela. Sekunjalo, ezi nkonzo azifane zithethe ngentembelo nolweyiseko ngekamva lomhlaba ngokuphathelele injongo kaThixo.
Ithini IBhayibhi1e?
Kusengqiqweni ukukhangela kumthombo wenkcazelo eyamkelwa ngokubanzi njengevela kuMdali. Loo mthombo yiBhayibhile. Enye yezona nkcazelo zilula nezicacileyo kuyo ngokuphathele ikamva lethu ifumaneka kwiNtshumayeli 1:4. Sifunda Oku: “Kumka esinye isizukulwana kulandele esinye isizukulwana; ke lona ihlabathi limi ngonaphakade.“ IBhayibhile isicacisa gca isizathu sokuba uYehova uThixo adale umhlaba. Kwakhona ibonisa ukuba wawubeka endaweni entle kwindalo yonke mayela nelanga lethu ukuze sifumane ubomi kulo. UThixo uSomandla waphefumlela umprofeti wakudala uIsaya ukuba abhale Oku: “Ngokuba utsho uYehova, uMdali wezulu (nguye uThixo), uMenzi wehlabathi, uMseki walo, yena walizinzisayo (akalidalelanga ukuba kube senyanyeni, walibumba ukuba limiwe), ukuthi, ndinguYehova akukho wumbi.”—Isaya 45:18.
Kodwa kuthekani ngokuzama kwabantu iindlela zokutshabalalisa ubomi emhlabeni? Ngobulumko bakhe obungenakulinganiswa, uThixo uthi uya kungenelela ngaphambi kokuba abantu batshabalalise yonke into ephilayo kwesi kwisijikelezi-langa sethu. Phawula esi sithembiso siqinisekileyo kwincwadi yokugqibela yeBhayibhile, ISityhilelo: “lintlanga zaqumba, nengqumbo yakho yeza, nexesha elimisiweyo lokuba abafileyo bagwetywe, nokuwanika umvuzo wawo amakhoboka akho abaprofeti nabo bangcwele nabo baloyikayo igama lakho, abancinane nabakhulu, nokonakalisa abo bawonakalisayo umhlaba.”—ISityhilelo 11:18.
UYehova usityhilela injongo yakhe yantlandlolo ekudaleni umhlaba, le ixabiseke gqitha njengokuba usomajukujuku owayejikeleza umhlaba ekuchaza oko. UThixo wayenenjongo yokuba ube yiparadesi wonke, enabantu abahleli kakuhle—amadoda—namabhinqa bonke behlelisene ngoxolo nangemvisiswano. Walungiselela ukuwenza umhlaba ube nabantu ngokuthe ngcembe ngokuvumela isibini sokuqala esingabantu ukuba sibe nenzala. Ukuze isibini sokuqala sonwabe size sibunandiphe ubomi, uYehova wenza isiqwengana esithile somhlaba ukuba sibe yiparadesi. Njengokuba iintsapho zoluntu zaziza kwanda kwiminyaka neenkulungwane kamva, umyezo wase-Eden ngokuthe ngcembe wawuya kuqhubeka de iGenesis 1:28 izaliseke: “Wathi uThixo kubo, Qhamani nande, niwuzalise umhlaba niweyise.”
Njengokuba ngoku sibona imeko embi umhlaba okuyo nabantu abakuwo, ngaba oku kuthetha ukuba injongo kaThixo yantlandlolo ngomhlaba ayiphumelelanga? Okanye ngaba uyitshintshile injongo yakhe ngenxa yokuphambuka komntu, evumela isijikelezi-langa sonakaliswe kuphele aze ngokungathi kunjalo aqalele? Akunjalo, sinokuqiniseka ukuba akukho nanye kwezi meko eyinyaniso. IBhayibhile isixelela ukuba nantoni na uYehova anenjongo yayo imele ekugqibeleni yenzeke, nokuba nantoni na agqiba ukuyenza ayinakuphazanyiswa nangubani na okanye nazinguqulelo ezingalindelekanga. Usiqinisekisa esithi: “Liya kuba njalo ilizwi lam eliphuma emlonyeni wam; aliyi kubuyela kum lilambatha, lingakwenzanga endikuthandayo, lingakuphumelelisanga oko ndilithumela kuko.”—Isaya 55:11.
Injongo KaThixo Iphazanyisiwe, Ayiguqukanga
Ngenxa yokukreqa kuka-Adam noEva nokugxothwa kwabo emyezweni wase-Eden, kwakucacile ukuba injongo kaThixo yeparadesi emhlabeni yayiya kuphunyezwa ngaphandle kwabo. Noko ke, uYehova wabonisa kwangoko ukuba enye yembewu yabo yayiya kwenza oko wayekugunyazisile kwasekuqaleni. Liyinyaniso elokuba, oku kwakuya kuthabatha ithuba elide, kwaneenkulungwane eziliqela, kodwa akukho nto ibonisayo ukuba laliya kuba ngakanani ixesha elaliya kubandakanyeka ekuzaliseni isigunyaziso sasekuqaleni enoba uAdam noEva babeqhubeke bephila befezekile. Isibakala sesokuba ekupheleni koLawulo Lweminyaka Eliwaka lukaKristu Yesu—ixesha nje elingaphezu kweminyaka eliwaka ukususela ngoku—iimeko zeParadesi yaseEden ziya kunabela emhlabeni ngokubanzi yaye isijikelezi-langa esinguMhlaba siya kuba nabantu abanoxolo nabonwabileyo abayinzala yesibini sokuqala esingabantu. Eneneni, ubuchule bukaYehova njengaLowo uneNjongo engaguqukiyo buya kuthethelelwa ngonaphakade!
Emva koko kuya kuzaliseka iziprofeto ezivuyisayo ezaphefumlelwa nguThixo kwakudala. Izibhalo ezinjengeso sikuIsaya 11:6-9 ziya kuzaliseka ngokuzukileyo: “Ingcuka iya kuhlala nemvana, ingwe ibuthe netakane lebhokhwe; kubuthe ndawonye ithole lenkomo, nengonyama entsha, nenkomo etyetyisiweyo; nomntwana aziqhube ezo zinto. Ithokazi lenkomo nemazi yebhere ziya kudla utyani ndawonye, amankonyana azo abuthe ndaweni-nye; ingonyama idle umququ njengenkomo; adlale umntwana owanyayo emngxunyeni wephimpi, olunyulweyo ase isandla sakhe elukhozweni lweliso lerhamba. Ezo zinto aziyi kwenza bubi, aziyi konakalisa ezintabeni zam zonke ezingcwele, ngokuba ilizwe liya kuzala kukwazi uYehova, njengamanzi egubungele ulwandle.”
Impilo enkenenkene nokugula okungapheliyo ziya kuba zizinto zexesha elidluleyo, njengokuba kuya kuba njalo nangokufa. Ngaba kukho into enokucaca ngaphezu kwala mazwi alula afumaneka kwincwadi yokugqibela yeBhayibhile? “Intente kaThixo iseluntwini, yaye uya kuhlala nalo, ibe lona luya kuba ngamaqela abantu bakhe. NoThixo ngokwakhe uya kuba nalo. Kwaye uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona. Izinto zanga phambili zidlule.”—ISityhilelo 21:3, 4.
Ewe, sinokuqiniseka ukuba—isijikelezi-langa sethu esinguMhlaba sikho ngonaphakade. Ngamana ingaba lilungelo lakho ukusinda ekupheleni kwale nkqubo yezinto ingendawo, nazo zonke izinto ezilawula umhlaba. Ihlabathi elicocekileyo nelitsha elenziwe nguThixo sele lisemnyango. Yaye uninzi lwabo sibathandayo luya kuvuswa ekufeni ngommangaliso wovuko. (Yohane 5:28, 29) Ewe, umhlaba wethu ukho ngonaphakade, yaye sinokuhlala kuwo size siwunandiphe.