Abavakalisi Bobukumkani Bayabalisa
“Kwindawo Yemarike Yonke Imihla”
UMPOSTILE UPAWULOS wasebenzisa naliphi na ithuba ukusasaza isigidimi soBukumkani. Ukuze afumane abo bafanelekayo, wayeqiqa “kwindlu yesikhungu kunye namaYuda . . . nakwindawo yemarike yonke imihla kunye nabo kwakusenzeka ukuba babekho.”—IZenzo 17:17.
Inzondelelo enjalo iye yaba luphawu olwahlula abanquli bakaYehova bokwenyaniso ukususela kwinkulungwane yokuqala yeXesha Eliqhelekileyo. (Mateyu 28:19, 20) Ngokufanayo namhlanje, amaNgqina kaYehova asebenzisa iindlela ezahlukahlukeneyo njengoko ngenzondelelo enceda abo bantliziyo zinyanisekileyo ukuze bazuze ulwazi oluchanileyo lwenyaniso. (1 Timoti 2:3, 4) Umzekelo woko ngala mava alandelayo aseOstreliya.
Iintsuku ezintlanu veki nganye, uSid noHarold batshintshana ngokunyamekela indawo ababonisa kuyo uncwadi lweBhayibhile kwisikhululo sikaloliwe eSydney. Bebesabelana nabanye ngeendaba ezilungileyo zoBukumkani bukaThixo ngale ndlela ithuba elinokuba yiminyaka emihlanu ngoku. USid, oneminyaka engama-95 ubudala, ucacisa esithi: “Ndathi ndakufikelela kwiminyaka engama-87 ubudala, andakwazi ukuqhuba inqwelo-mafutha kwakhona. Oko kwandityhafisa kuba ndandiwunandipha umsebenzi wokunikela ubungqina esidlangalaleni. Ngenye imini xa ndandikwindawo ethandwa gqitha ngabakhenkethi ebizwa ngokuba yiEcho Point eKatoomba, ndabona umzobi ethengisa imizobo yokuma komhlaba. Ndayiqwalasela loo mizobo ndaza ndacinga, ‘Ndinemifanekiso emihle ngakumbi kunale engxoweni yam yokunikela ubungqina—yaye ibiza kancinane gqitha kunale!’ Ngoko ke, ndagqiba ekubeni ndimise indawo yokubonisa uncwadi kule ndawo ithandwa ngabakhenkethi, ukuze ndinikele uncwadi lweBhayibhile olunemifanekiso emihle olusasazwa ngamaNgqina kaYehova kwabadlulayo.
“Kwiminyaka emine eyadlulayo, ndafuduka kule ndawo ndaya kumisa eSydney, yaye uHarold wahamba nam. Siyatshintshana ngokunyamekela le ndawo yaye sisebenza namabandla asekuhlaleni.” UHarold, oneminyaka engama-83 ubudala ngoku uthi: “Ukususela ngoMvulo ukuya kutsho ngoLwesihlanu bambalwa gqitha abantu ababa sekhaya. Ngoko ke, ukuba nesabelo ngesigidimi soBukumkani ngale ndlela kusisa apho abantu bakhoyo. Ngokuqhelekileyo, sifumana imiphumo emihle. Sihambisa uncwadi oluninzi gqitha kweli lizwe.”
“Nangona siye sasebenza kwiindawo ezine okanye ezintlanu ezahlukahlukeneyo kangangeminyaka,” utsho uSid, “akuthathi xesha lide ukuze saziwe. Bambi abantu bayazizela befuna uncwadi. Abanye banemibuzo abafuna ukuba iphendulwe. Yaye abanye bafuna nje ukuncokola imizuzu embalwa. Kungeli xesha kuphela apho amabuyelo am azizelayo,” utsho ehleka.
“Abantu abaninzi banomdla ngokwenene eBhayibhileni,” wongezelela esitsho uHarold. “Ngenyanga enye abantu abane baqalisa ukufunda iBhayibhile namaNgqina ngenxa yoncwadi abalufumana kuthi nemibuzo esayiphendula ngokusuka eBhayibhileni. Amava afana nalawo asikhuthaza gqitha.”
NjengoSid noHarold—nanjengompostile uPawulos—amaNgqina kaYehova kuzo zonke iindawo asebenzisa naliphi na ithuba elifumanekayo ukuze asasaze isigidimi sawo esibalulekileyo. Ngaloo ndlela, ‘iindaba ezilungileyo’ ziyaqhubeka zishunyayelwa “kuwo wonke umhlaba omiweyo.”—Mateyu 24:14.