Ukushumayela Kwindawo Yentengiso
XA EKHO kwisixeko saseAthene, yonk’ imihla umpostile uPawulos wayesiya kwindawo yentengiso ukuze ashumayele iindaba ezilungileyo ngoYesu. (IZe. 17:17) UPawulos wakhetha indawo yentengiso kuba abantu baseAthene babekuthanda gqitha ukuya kuyo.
Nakuba sekudlule phantse iminyaka engama-2 000 ukususela ngoko, abantu bakaYehova basasisasaza kwindawo yentengiso isigidimi soBukumkani bukaThixo. Ngoba? Ngenxa yokuba abantu abaninzi bafumaneka apho. Namhlanje indawo yentengiso inokuba sisakhiwo seevenkile. Emva kokuba efumene imvume kumphathi okanye umnini wenye yezo venkile, amanye amaNgqina aye abeke itafile enoncwadi lweBhayibhile.
Ngokomzekelo, kwesinye isakhiwo seevenkile eNew Jersey, eUnited States, kwabekwa iincwadi kwaza kwabhalwa umxholo othi “Ukulondoloza Imilinganiselo Yentsapho—Njani?” Waba yintoni umphumo woko? Ngemini nje enye kwahanjiswa iincwadi ezili-153 ngeelwimi ezintandathu.
Elinye ibhinqa eleza kuloo ndawo inezo ncwadi laphulaphula ngenyameko njengoko elinye iNgqina likaYehova lalicacisa. Eli bhinqa lavuma ukuba kubalulekile ukuba umntu abandakanye uThixo kubomi bakhe nobentsapho yakhe. Lathabatha ezi mpapasho zilandelayo: Funda KuMfundisi Omkhulu, Imfihlelo Yolonwabo Lwentsapho, nethi Imibuzo Yabantu Abaselula—Iimpendulo Eziluncedo.
Kwangaloo mva kwemini, kwadlula enye indoda iza kungena kwenye ivenkile. Yatsalwa yincwadi ethi Imibuzo Yabantu Abaselula. Udade owayelapho waphawula ukuba le ndoda iyayithanda le ncwadi. Wayibuza: “Ngaba ikho incwadi ekutsalayo?” Yanqwala yaza yalatha incwadi ethi Imibuzo Yabantu Abaselula. Wayinika le ncwadi njengoko yayisele isolula isandla iza kuyithabatha. Yamxelela ukuba inabantwana abathathu. Njengoko babencokola, yachaza ukuba idla ngokuxubusha nabo kanye ngeveki. Abokuqala ababini kubantwana bayo bakwishumi elivisayo. Ngoxa yayihlola le ncwadi, yatsho ukuba iza kuyisebenzisa kwiingxubusho zentsapho yayo. Lo mvakalisi wayibonisa nencwadi ethi Imfihlelo Yolonwabo Lwentsapho, eyiqinisekisa ukuba yona nomfazi wayo banokufumana amacebiso aluncedo ngendlela yokwenza izigqibo njengentsapho. Le ndoda yalibulela kakhulu icebiso, yenza umnikelo yaza yayivuyela into yokuba kubekho umntu oza kubatyelela.
La maNgqina aziva njani ngosuku lokushumayela kwawo kwisakhiwo seevenkile? Omnye udade wathi: “Mna ndiyinandiphe gqitha le ndlela yokushumayela. Indihlaziye ngokwenene! Omnye udade wathi: “UYehova uthi iindaba ezilungileyo ziya kushunyayelwa nakwezona nxalenye zikude zomhlaba. Namhlanje, eParamus, eNew Jersey, ezi ndaba zilungileyo ziye zachukumisa abantu beelwimi ezahlukeneyo. Ndivuyiswe kakhulu kukuba nenxaxheba kweli phulo. Wonke umntu obe yinxalenye yalo wonwabe gqitha. Sonke besingafuni kutshayisa ekupheleni kosuku.”
Ngaba unokusebenzisa ezinye iindlela zokushumayela iindaba ezilungileyo? Eyona ndlela siyisebenzisayo kukushumayela kwindlu ngendlu. (IZe. 20:20) Noko ke, ngaba akunakukhe uzame ukushumayela kwindawo yentengiso okanye kwizakhiwo zeevenkile?