Xelisa Inceba KaYehova
“Qhubekani nisiba nenceba, kanye njengoko uYihlo enenceba.”—LUKA 6:36.
1. AbaFarisi bazibonakalisa njani ukuba abananceba?
NANGONA bedalwe ngokomfanekiselo kaThixo, abantu badla ngokuwa nganeno ekuxeliseni inceba yakhe. (Genesis 1:27) Ngokomzekelo, khawucinge ngabaFarisi. Njengeqela, abazange bayiginye kakuhle into yokuba uYesu abe nenceba aze aphilise indoda ayayinesandla esomileyo ngeSabatha. Kunoko, baqalisa ukumbhunga uYesu “ukuze bamtshabalalise.” (Mateyu 12:9-14) Ngenye imini, uYesu waphilisa indoda eyayizelwe iyimfama. Kwakhona, “bambi kubaFarisi” abazange bayithande loo mfesane yayibonakaliswa nguYesu. Kunoko, bakhalaza besithi: “Lo asingomntu wakwaThixo, ngenxa yokuba akayigcini iSabatha.”—Yohane 9:1-7, 16.
2, 3. UYesu wayethetha ukuthini xa wayesithi, “Niphaphele igwele labaFarisi”?
2 Lo moya wezikhova wabaFarisi wawubenza baphule umthetho wobuntu baze bone kuThixo. (Yohane 9:39-41) Ngesizathu esivakalayo, uYesu walumkisa abafundi bakhe esithi, “Niphaphele igwele” leli qela liziphakamisileyo nelamanye amahlelo onqulo, anjengabaSadusi. (Mateyu 16:6) EBhayibhileni igwele lisetyenziswa ukufuzisela isono okanye ukonakala. Ngoko uYesu wayesithi imfundiso ‘yababhali nabaFarisi’ yayinokulonakalisa unqulo olunyulu. Njani? Kaloku yayifundisa abantu ukuba basebenzise imigaqo nezithethe abazikhe entloko xa besebenzisa uMthetho kaThixo, baze bayiphose kwelokulibala “imibandela enzima ngakumbi,” equka inceba. (Mateyu 23:23) Le ngxubevange yonqulo nezithethe yenza ukunqula uThixo kwaluxanduva olunganyamezelekiyo.
3 Kwindima yesibini yomzekeliso wakhe wonyana wolahleko, uYesu wabhenca indlela ezazijijeke ngayo iingqondo zeenkokeli zonqulo zamaYuda. Kulo mzekeliso ubawo, omela uYehova, wayezimisele ukumxolela unyana wakhe. Kodwa umkhuluwa wakhe, owayefuzisela “abaFarisi nababhali,” wazalel’ endle.—Luka 15:2.
Ingqumbo Yomkhuluwa Wakhe
4, 5. Umkhuluwa wonyana wolahleko ‘wayelahleka’ ngayiphi ingqiqo?
4 “Ke kaloku unyana wakhe omkhulu wayesentsimini; yaye njengoko wayesiza kwaye esondela endlwini weva ikonsathi yomculo nokungqungqa. Ngoko wabizela kuye omnye wabakhonzi waza wambuza oko zazithetha kona ezi zinto. Wathi kuye, ‘Kufike umntakwenu, waza uyihlo waxhela inkonyana eliyinkunzi etyetyisiweyo, ngenxa yokuba emfumene kwakhona esempilweni entle.’ Kodwa waqumba yaye wayengathandi kungena.”—Luka 15:25-28.
5 Kuyabonakala ukuba kulo mzekeliso kaYesu yayingengonyana wolahleko kuphela owayenengxaki. Enye incwadi ithi: “Bobabini aba nyana kuthethwa ngabo balahlekile, omnye ulahlwe kukuswela ubulungisa okuye kwamthob’ isidima, omnye ulahlekiswa kukuzenza uchwenene welungisa okumfamekisileyo.” Phawula ukuba umkhuluwa wakhe akazange angavumi kuvuyisana naye nje kuphela kodwa “waqumba.” Isiqu segama lesiGrike eliguqulelwe ngokuthi “ingqumbo” alibhekiseli ekugqabhukeni komsindo, kodwa libhekisela kwinzondo efana neyemfene. Kuyabonakala ukuba umkhuluwa wakhe wayefukame ingqumbo, waza ke wakubona kungafanelekanga ukuba abhiyozele ukubuya komntu owayengafanelanga kulishiya ikhaya kwasekuqaleni.
6. Ngoobani abafuziselwa ngumkhuluwa wonyana wolahleko, yaye ngoba?
6 Umkhuluwa wonyana wolahleko ufuzisela abo bayivungamelayo inceba nengqalelo eyanikelwa nguYesu kuboni. Aba bazenza amalungisa ayizange ibachukumise inceba kaYesu; bengazange kananjalo bacinge ngovuyo oluba sezulwini ngenxa yokuxolelwa komoni. Kunoko, inceba kaYesu yabaphath’ emanyeni baza baqalisa ‘ukucinga izinto ezingendawo’ ezintliziyweni zabo. (Mateyu 9:2-4) Ngesinye isihlandlo abanye babaFarisi babeligqabi ngumsindo kangangokuba babiza indoda eyayiphiliswe nguYesu baza ‘bayiphosela ngaphandle’ kwendlu yesikhungu—kucaca ukuba bayinika uphum’ aphele! (Yohane 9:22, 34) Njengomkhuluwa wonyana wolahleko, ‘owayengathandi kungena,’ iinkokeli zonqulo ezingamaYuda zazizalel’ endle xa kuvela ithuba lokuba “nemihlali kunye nabantu abanemihlali.” (Roma 12:15) UYesu wahlabela mgama ebhenca iingqiqo zabo ezingendawo njengoko wayeqhubeka nomzekeliso wakhe.
Ingqiqo Etenxileyo
7, 8. (a) Kungayiphi indlela awathi umkhuluwa wonyana wolahleko akayiqonda ngayo intsingiselo yokuba ngunyana? (b) Inkulu le yayahluke njani kuyise?
7 “Ngoko uyise waphuma waza waqalisa ukumbongoza. Ekuphenduleni wathi kuyise, ‘Naku iyiminyaka emininzi kangaka ndiye ndalikhoboka lakho yaye andizange nakanye ndinxaxhe kumyalelo wakho, ukanti mna akuzange nakanye undinike netakane eli ukuze ndiziyolise nabahlobo bam. Kodwa kamsinya nje akuba efikile lo nyana wakho owazidla wazigqiba izinto zakho zokuphila kunye namahenyukazi, umxhelele inkonyana eliyinkunzi etyetyisiweyo.’”—Luka 15:28-30.
8 Ngokuthetha la mazwi, umkhuluwa wonyana wolahleko wabonisa ngokucacileyo ukuba wayengayiqondi eyona ntsingiselo yokuba ngunyana. Wayekhonza uyise kanye ngendlela umqeshwa amkhonza ngayo umqeshi. Kuba waxelela uyise oku: “Ndiye ndalikhoboka lakho.” Kuyinyaniso ukuba inkulu le ayizange ilishiye ikhaya okanye inxaxhe kumyalelo kayise. Kodwa ngaba intobelo yayo yayiqhutywa luthando? Ngaba kwakuyivuyisa ngokwenene ukukhonza uyise, okanye yaphela sele ingasakhathali, izigobh’ amacala ngokuba ngunyana olungileyo kuba nje iphumeza iimbopheleko zayo “entsimini”? Ukuba ngokwenene yayingunyana ozinikeleyo, kwakutheni ukuze ingafuzi uyise ngengqondo? Kutheni ingazange ifune nokuva xa yanikwa ithuba lokubonakalisa imfesane kumninawa wayo?—Thelekisa INdumiso 50:20-22.
9. Chaza indlela iinkokeli zamaYuda ezazifana ngayo nenkulu.
9 Iinkokeli zonqulo zamaYuda zazingumceph’ ucandiwe nalo nyana mkhulu. Zazicinga ukuba zinyanisekile kuThixo kuba zazinamathela ngokungqongqo kwimithetho yakhe. Kuyinyaniso ukuba kubalulekile ukuthobela. (1 Samuweli 15:22) Kodwa ukuyigxininisa kwazo ngokubaxiweyo kwimisebenzi kwenza ukunqula uThixo kwangumsina-ndozele wento ezenzekelayo, inkwalambisa nje ngoxa ngokwenene umntu engazikhathalele izinto zokomoya. Iingqondo zabo zazithe tii zizithethe. Zazingenalo noluncinane uthando entliziyweni. Kaloku, zazigqala abantu abaqhelekileyo njengoomalahlwa-nofele, ngendelelo bebabiza ngokuthi “ngabantu abaqalekisiweyo.” (Yohane 7:49) Phofu ke, uThixo wayenokuyiqhwabel’ izandla njani imisebenzi yeenkokeli ezinjalo xa kanti iintliziyo zazo zazichasele kuye?—Mateyu 15:7, 8.
10. (a) Kutheni amazwi athi, “Ndifuna inceba, kungekhona umbingelelo” esisiluleko esifanelekileyo? (b) Kunzulu kangakanani ukungabi nanceba?
10 UYesu wabaxelela abaFarisi ukuba ‘bahambe baye kufunda okuthethwa koku, “Ndifuna inceba, kungekhona umbingelelo.”’ (Mateyu 9:13; Hoseya 6:6) Basuke baqala ngezinto zokugqibela, kuba ngaphandle kwenceba yonke imibingelelo yabo yayiya kuba lilize. Eneneni lo ngumbandela onzulu, kuba iBhayibhile ithi ‘abangenanceba’ babalwa phakathi kwabo uThixo abagqala ‘njengabafanelwe kukufa.’ (Roma 1:31, 32) Ngoko ke, akumangalisi ukuba uYesu athi elo qela leenkokeli zonqulo lalilindelwe yintshabalalo kanaphakade. Kuyabonakala ukuba koko kungabi nanceba kwabo okwaba negalelo elikhulu ekugqalweni kwabo njengabafanelwe yintshabalalo. (Mateyu 23:33) Kodwa ke mhlawumbi abathile kweli qela babenokufikelelwa. Xa wayequkumbela umzekeliso wakhe, uYesu wazabalazela ukulungisa iingqondo zaloo maYuda ngamazwi awathethwa ngulo bawo kwinkulu yakhe. Makhe sibone indlela awakwenza ngayo oku.
Inceba Kabawo
11, 12. Ubawo okumzekeliso kaYesu uqiqa njani nenkulu yakhe, yaye yintoni awayeyigxininisa ngokusebenzisa ibinzana elithi “lo mntakwenu”?
11 “Ngoko wathi kuye, ‘Mntwana, ubusoloko ukunye nam, yaye zonke izinto ezizezam zezakho; kodwa besimele nje siziyolise size sibe nemihlali, ngenxa yokuba lo mntakwenu ebefile waza wabuyela ebomini, yaye ebelahlekile waza wafunyanwa.’”—Luka 15:31, 32.
12 Phawula ukuba lo bawo usebenzisa ibinzana elithi “lo mntakwenu.” Kutheni? Kaloku, khumbula ukuba ngaphambilana, xa ibithetha noyise, inkulu le ibize unyana wolahleko ngokuthi “lo nyana wakho”—ayithanga “umntakwethu.” Wayebonakala engakunanze nganto ukuzalana okwakukho phakathi kwakhe nesalamane sakhe. Ngoko, ngokungathi kunjalo, lo bawo ngoku uxelela inkulu yakhe oku: ‘Kaloku lo mfana akangonyana wam nje kuphela. Ukwangumntakwenu, inyama negazi lakho. Ngoko ufanele uvuye ngokubuya kwakhe!’ Imfundiso eyayidluliselwa nguYesu ngala mazwi imele ukuba yavakala kakuhle kwiinkokeli zamaYuda. Aboni ababebacekisa “yayingabantakwabo.” Ngokwenene, “akukho mntu ulilungisa ehlabathini, wenza okulungileyo, angoni.” (INtshumayeli 7:20) Ngoko ke, izikhulu zamaYuda zazifanele zivuye xa aboni beguquka.
13. Ukuphela ngesiquphe komzekeliso kaYesu kusishiya nawuphi umbuzo oxhokonx’ iingcinga?
13 Emva kwesibongozo salo bawo, lo mzekeliso uphela ngesiquphe. Yaba ngathi uYesu wayesithi abaphulaphuli mabasele bezicingela ke ukuba laphela njani elo bali. Enoba yasabela njani na loo nkulu, umphulaphuli ngamnye wayejamelene nombuzo othi, ‘Ngaba nawe uza kuba nemihlali ebakho ezulwini xa umoni eguquka?’ NamaKristu namhlanje analo ithuba lokuwuphendula ngezenzo zawo lo mbuzo. Njani?
Ukuxelisa Inceba KaThixo Namhlanje
14. (a) Sinokusisebenzisa njani isiluleko sikaPawulos esifumaneka kweyabase-Efese 5:1 kumbandela wenceba? (b) Yintoni esimele singayiqondi phosakeleyo ngokuphathelele inceba kaThixo?
14 UPawulos wabongoza abase-Efese esithi: “Yibani ngabaxelisa uThixo, njengabantwana abaziintanda.” (Efese 5:1) Ngenxa yoko, njengamaKristu sifanele siyixabise inceba kaThixo, siyimilisele ezintliziyweni zethu, size silubonakalise olu phawu xa siqhubana nabanye. Noko ke, sifanele silumke. Inceba kaThixo ayifanele kubhidaniswa nokuqwabazel’ iliso isono. Ngokomzekelo, bepholelwe ngamalanga, abanye basenokuqiqa ngelithi, ‘Ukuba ndiye ndona, ndinokusuka ndithandaze kuThixo ndicela uxolo, ibe uya kuba nenceba.’ Isimo sengqondo esinjalo sifana twatse noko umbhali weBhayibhile uYude wakubiza ngokuthi ‘kukujika ububele obungasifanelanga boThixo wethu bube sisingxengxezo sehambo evakalala.’ (Yude 4) Nangona uYehova enenceba, ‘akakhe amenze msulwa onetyala’ xa eqhubana nabenzi bobubi abangaguqukiyo.—Eksodus 34:7; thelekisa uYoshuwa 24:19; 1 Yohane 5:16.
15. (a) Kutheni kufuneka abadala ngokukhethekileyo babe nembono elungeleleneyo ngenceba? (b) Ngoxa bengakunyamezeli ukwenza ububi ngabom, yintoni abafanele bayenze abadala, yaye ngoba?
15 Ukanti, kukwafuneka sikuphephe nokugabadela—sityekele ekubeni singabi nalusini yaye sibadlel’ indlala abo babonakalisa inguquko esuka entliziyweni nabazisolayo phambi koThixo ngenxa yezono zabo. (2 Korinte 7:11) Ekubeni abadala bephathiswe umsebenzi wokunyamekela izimvu zikaYehova, kubalulekile ukugcina imbono elungeleleneyo kulo mba, ngokukodwa xa besingatha imibandela ephathelele ukugweba. Ibandla lamaKristu limele ligcinwe licocekile, kwaye kufanelekile ngokweZibhalo ‘ukumshenxisa umntu ongendawo’ ngokumsusa kubudlelane. (1 Korinte 5:11-13) Kwangaxeshanye, kuhle ukubonakalisa inceba xa kukho isizathu esicacileyo sokwenjenjalo. Ngoko ngoxa abadala bengamelani nomntu owona ngabom, baye bazabalazele ukubonakalisa uthando nenceba, xa ikukubonakalisa okusesikweni ukwenjenjalo. Usoloko unkenteza ezindlebeni zabo umgaqo weBhayibhile othi: “Lowo ungayiqheliseliyo inceba uya kuwufumana umgwebo wakhe ngokungenanceba. Inceba iwuvuyelela ngoloyiso umgwebo.”—Yakobi 2:13; IMizekeliso 19:17; Mateyu 5:7.
16. (a) Usebenzisa iBhayibhile, khawutyebise ngendlela uYehova akunqwenela ngokwenene ngayo ukuba abanxaxhayo babuyele kuye. (b) Sinokubonisa njani ukuba nathi siyabamkela aboni abaguqukileyo xa bebuya?
16 Umzekeliso wonyana wolahleko uyenza icace into yokuba uYehova unqwenela ukuba abo banxaxhayo babuyele kuye. Eneneni, usoloko ebamema de bazingqine bengenakuguquka kwaphela. (Hezekile 33:11; Malaki 3:7; Roma 2:4, 5; 2 Petros 3:9) Njengoyise wonyana wolahleko, uYehova ubaphatha kakuhle abo babuyayo, ebamkela ngokupheleleyo njengamalungu entsapho. Ngaba uxelisa uYehova kuloo mba? Xa elinye ikholwa, ebelikhe lasuswa kangangexesha elithile, libuyiselwa, usabela njani? Sele sisazi ukuba kuyavuywa “ezulwini.” (Luka 15:7) Kodwa ngaba lukho uvuyo emhlabeni, ebandleni okhonza kulo, kwanasentliziyweni yakho? Okanye ngaba, njengonyana omkhulu womzekeliso, uqumba ube sisifu, ngokungathi uthi lo mntu akafanele kwamkelwa kuba ibingekho into emkhupha kumhlambi kaThixo kwasekuqaleni?
17. (a) Yiyiphi ingxaki eyabakho kwiKorinte yenkulungwane yokuqala, ibe uPawulos wabacebisa ukuba bayisingathe njani le meko abo babekwelo bandla? (b) Kutheni isibongozo sikaPawulos sasiluncedo nje, yaye sinokusisebenzisa njani namhlanje? (Bona nebhokisi esekunene.)
17 Ukuze sizicikide kulo mba, makhe siqwalasele okwenzeka eKorinte malunga nowama-55 C.E. Kwakukho indoda eyayigxothwe ebandleni yaza ekugqibeleni yabucoca ubomi bayo. Babefanele benze ntoni abazalwana? Ngaba babefanele bayithandabuze inguquko yayo baze baqhubeke bezinxwema kuyo? Akunjalo, kunoko uPawulos wabongoza loo maKorinte esithi: “Nifanele nimxolele ngobubele nize nimthuthuzele, ukuze angathi ngandlel’ ithile umntu onjalo aginywe kukuba buhlungu kwakhe ngokugqithiseleyo. Ngoko ke ndiyanibongoza ukuba niluqinisekise uthando lwenu ngaye.” (2 Korinte 2:7, 8) Ngokufuthi, abenzi bobubi abaguqukileyo baba ngamaxhoba okuziva behlazekile baze baphelelwe lithemba. Kungoko aba bantu befuna ukuqinisekiswa ukuba bayathandwa ngamanye amakholwa nanguYehova. (Yeremiya 31:3; Roma 1:12) Oku kubalulekile. Ngoba?
18, 19. (a) AbaseKorinte babezibonakalise njani ngaphambilana ukuba babe ngoovula-zibhuqe? (b) Kwakunokwenzeka njani ukuba isimo sengqondo sokungabi nanceba sibangele abaseKorinte babe “zizisulu zikaSathana”?
18 Xa wayebongoza abaseKorinte ukuba baxolele, esinye sezizathu ezabekwa nguPawulos yayikukuze “singabi zizisulu zikaSathana, kuba asingabo abangenalwazi ngamacebo akhe.” (2 Korinte 2:11) Wayethetha ukuthini? Kaloku, ngaphambilana uPawulos wayekhalimele ibandla laseKorinte ngokuba nguvula-zibhuqe. Lalivumele kwale ndoda inye ukuba iqhubeke isona ize ingohlwaywa. Ngokwenjenjalo, eli bandla—ngokukodwa abadala balo—lalizenza izisulu zikaSathana, kuba wayenokukuvuyela ukulenzela igama elibi.—1 Korinte 5:1-5.
19 Ukuba ngoku lalinokuphinda libaxe izinto lize lingavumi ukuxolela umntu oguqukileyo, uSathana wayeya kuba ulenza izisulu zakhe ngenye indlela. Njani? Ngokusebenzisa ubungqwabalala nokungabi nanceba kwabo. Ukuba umoni oguqukileyo ‘wayenokuginywa kukuba buhlungu kwakhe ngokugqithiseleyo’—okanye njengoko iToday’s English Version isitsho, “abe buhlungu kangangokuba anikezele ngokupheleleyo”—enjani ukuba nzima imbopheleleko abaya kuba nayo abadala phambi kukaYehova! (Thelekisa uHezekile 34:6; Yakobi 3:1.) Ngesizathu esiqondakalayo, emva kokuba elumkise abalandeli bakhe ngokukhubekisa “omnye waba bancinane,” uYesu wathi: “Nikelani ingqalelo kuni. Ukuba umzalwana wakho wenza isono mkhalimele, yaye ukuba uyaguquka mxolele.” a—Luka 17:1-4.
20. Ibakho njani imihlali ezulwini nasemhlabeni xa umoni eguquka?
20 La mawaka abuyela kunqulo olunyulu minyaka le anombulelo ngenceba uYehova ayibonakalise kuwo. Omnye udade ongumKristu uthetha enjenje ngokubuyiselwa kwakhe: “Andikhumbuli ndivuya kangako ebomini bam.” Kakade ke, ziba njalo ke ukuvuya neengelosi. Ngamana nathi singathelela kolo ‘vuyo lwasezulwini’ olubakho xa aboni beguquka. (Luka 15:7) Ngokwenjenjalo, siya kuba sixelisa inceba kaYehova.
[Imibhalo esemazantsi]
a Nangona kubonakala ngathi umenzi wobubi waseKorinte wabuyiselwa ngexeshana nje elingephi, oku akufanele kugqalwe njengomgaqo olandelwayo kubo bonke abasusiweyo. Iimeko azifani. Abanye abenzi bobubi baye babonakalise inguquko esuka entliziyweni kamsinya emva kokuba begxothiwe. Ukanti kwabanye, kuye kuthabathe ixesha ngaphambi kokuba babonakalise isimo sengqondo esinjalo. Noko ke, kuzo zonke iimeko abo babuyiselweyo bamele kuqala babonakalise ukuzisola phambi kukaThixo yaye, ukuba kuyenzeka, babonakalise imisebenzi efanele inguquko.—IZenzo 26:20; 2 Korinte 7:11.
Impinda
◻ Umkhuluwa wonyana wolahleko wayefana njani neenkokeli zonqulo ezingamaYuda?
◻ Kungayiphi indlela awathi umkhuluwa wonyana wolahleko wasithelwa yintsingiselo yokuba ngunyana?
◻ Xa sicinga ngenceba kaThixo, ziziphi izinto ezimbini esifanele sikuphephe ukugabadela kuzo?
◻ Sinokuyixelisa njani inceba kaThixo namhlanje?
[Box on page 17]
“NILUQINISEKISE UTHANDO LWENU NGAYE”
Ethetha ngomenzi wobubi owayegxothiwe waza wabonakalisa inguquko, uPawulos waxelela ibandla laseKorinte esithi: “Ndiyanibongoza ukuba niluqinisekise uthando lwenu ngaye.” (2 Corinthians 2:8) The Greek word translated “confirm” is a legal term meaning to “validate.” Yes, repentant ones who are reinstated need to sense that they are loved and that they are once again welcome as members of the congregation.
We must remember, however, that most in the congregation are not aware of the particular circumstances that led to a person’s expulsion or to his reinstatement. In addition, there may be some who have been personally affected or hurt—perhaps even on a long-term basis—by the wrongdoing of the repentant one. Being sensitive to such matters, therefore, when an announcement of reinstatement is made, we would understandably withhold expressions of welcome until such can be made on a personal basis.
How faith-strengthening it is for those who have been reinstated to know that they are welcomed back as members of the Christian congregation! We can encourage such repentant ones by conversing with them and enjoying their fellowship at the Kingdom Hall, in the ministry, and on other appropriate occasions. By thus confirming, or validating, our love for these dear ones, we do not in any way minimize the seriousness of the sins that they committed. Rather, along with the heavenly hosts, we rejoice in the fact that they have rejected the sinful course and have returned to Jehovah.—Luke 15:7.
[Umfanekiso okwiphepha 15]
Inkulu ayizange ifune ukuvuyisana nokubuya komninawa wayo