“UYehova, UThixo Onenceba, Onobabalo”

“UYehova, uYehova, uThixo onenceba, onobabalo, ozeka kade umsindo, omninzi ngobubele obunothando nenyaniso.”—EKSODUS 34:6.

1. (a) Yiyiphi intuthuzelo enikelwa yiBhayibhile kwabo baye babona ababathandayo beshiya unqulo olunyulu? (b) UYehova ubajonga njani abanxaxhayo?

OMNYE ubawo ongumKristu wathi: “Intombi yam yandixelela ukuba ayisafuni kuba lilungu lebandla lamaKristu. Le nto yandikrekretha kangangeentsuku, iiveki kwaneenyanga ezininzi. Kwakubhetele kwaukufa kunayo.” Ngokwenene kuyadandathekisa ukubona umntu omthandayo ewushiya umendo wonqulo olunyulu. Ngaba yakha yenzeka loo nto kuwe? Ukuba kunjalo, kuya kukuthuthuzela ukwazi ukuba uYehova uvelana nawe. (Eksodus 3:7; Isaya 63:9) Kodwa ubajonga njani abo banxaxhayo? IBhayibhile ibonisa ukuba ngenxa yenceba yakhe, uYehova uyabamema ukuba babuyele kwinkoliseko yakhe. Wabongoza amaYuda awayenemvukelo omhla kaMalaki esithi: “Buyelani kum, ndibuyele kuni.”—Malaki 3:7.

2. IBhayibhile ibonisa njani ukuba inceba yinxalenye ephambili yobuntu bukaYehova?

² Inceba kaThixo yabalaseliswa kuMoses kwiNtaba yeSinayi. Kulapho uYehova wazichaza khona ‘njengoThixo onenceba nonobabalo, ozeka kade umsindo, omninzi ngobubele obunothando nenyaniso.’ (Eksodus 34:6, thelekisa iNW.) La mazwi agxininisa isibakala sokuba inceba iluphawu oluphambili kubuntu bukaYehova. Umpostile owayengumKristu uPetros wabhala: “Unqwenela ukuba bonke bafikelele enguqukweni.” (2 Petros 3:9) Kakade ke, inceba kaThixo inemida. UMoses waxelelwa oku: ‘Akakhe amenze msulwa onetyala.’ (Eksodus 34:7; 2 Petros 2:9) Noko ke, “uThixo uluthando,” ibe inceba iyinxalenye enkulu yolo phawu. (1 Yohane 4:8; Yakobi 3:17) UYehova akayi ‘kuwugcina unaphakade umsindo wakhe,’ yaye ‘uthanda ububele obunothando.’—Mika 7:18, 19, thelekisa iNW.

3. Imbono kaYesu ngenceba yahluke njani kweyababhali nabaFarisi?

³ UYesu wayengumfanekiselo ogqibeleleyo kaYise wasezulwini. (Yohane 5:19) Xa wayesenzela abenzi bobubi inceba wayengazibethi ngoyaba izono zabo kodwa wayebathundeza kanye njengokuba wayesenza kwabagula ngokwasemzimbeni. (Thelekisa uMarko 1:40, 41.) Ewe, uYesu wachaza inceba njengomnye ‘wemibandela enzima’ yoMthetho kaThixo. (Mateyu 23:23) Ngokuchaseneyo noko, khawucinge ngababhali nabaFarisi, ababetsho ngemithetho eyayidla ngokungabi nayo nentwana le yenceba. Bathi bakubona uYesu esebenzisana naboni, bakhalaza besithi: “Lo mntu wamkela aboni aze adle kunye nabo.” (Luka 15:1, 2) UYesu wabaphendula abo babemmangalela ngemizekelo emithathu, ngamnye owawubalaselisa inceba kaThixo.

4. Yiyiphi imizekeliso emibini eyabaliswa nguYesu, ibe yiyiphi ingongoma awayeyiphuhlisa kumzekeliso ngamnye?

⁴ Okokuqala, uYesu wabalisa ngendoda eyashiya izimvu ezingama-99 iye kufuna imvu enye elahlekileyo. Yiyiphi ingongoma awayeyiphuhlisa? “Kuya kubakho uvuyo olungakumbi ezulwini ngenxa yomoni omnye oguqukayo kunangenxa yabo bangamashumi asithoba anesithoba abangamalungisa engeyomfuneko kubo inguquko.” Emva koko, uYesu wabalisa ngomfazi owayefuna ingqekembe yedrarhma elahlekileyo waza wavuya akuyifumana. Uthini ke xa ewucacisa? “Kubakho uvuyo phakathi kweengelosi zikaThixo ngenxa yomoni omnye oguqukayo.” UYesu wangena kumzekeliso wesithathu.a Abaninzi baye bathi lelona bali lifutshane nelimnandi kwawakha abaliswa. Ukuwuqwalasela lo mzekeliso kuya kusinceda siqonde yaye sixelise inceba kaThixo.—Luka 15:3-10.

Unyana Onemvukelo Ushiya Ikhaya

5, 6. Unyana omncinane ekuthethwa ngaye kumzekeliso wesithathu kaYesu wakubonisa njani ukungabi naluxabiso ngendlela eyothusayo?

⁵ “Umntu othile wayenoonyana ababini. Yaye omncinane kubo wathi kuyise, ‘Bawo, ndinike inxalenye yempahla ewela kwisabelo sam.’ Ngoko wabahlulela izinto zakhe zokuphila. Kamva, emva kweentsuku ezingeninzi, unyana omncinane wahlanganisela ndawonye zonke izinto waza wahambela kwenye indawo kwilizwe elikude, waza apho wayisafaza impahla yakhe ngokuphila ubomi bokurheletya.”—Luka 15:11-13.b

⁶ Apha lo uligqibelo wabonakalisa ukungabi naluxabiso ngendlela eyothusayo. Okokuqala, waphum’ izithuba ebanga ilifa lakhe, waza walidla walosulel’ entloko “ngokuphila ubomi bokurheletya.” Ibinzana elithi “ubomi bokurheletya” liguqulelwe ngokusuka kwigama lesiGrike elithetha “ubundlavini.” Omnye umphengululi uthi eli gama “lichaza umntu onguncanyelweni.” Ngesizathu esiqondakalayo, ngokufuthi lo nyana umncinane womzekeliso kaYesu kuthiwa ngunyana wolahleko, igama elibonisa ukuba wayelisafa-safa lesitatavu esasidyakraza ngeento zaso.

7. Ngoobani namhlanje abafana nonyana wolahleko, ibe kutheni uninzi lwabo lufuna ukuzilawula “kwilizwe elikude”?

⁷ Ngaba bakho phofu namhlanje abantu abafana nalo nyana wolahleko? Ewe bakho. Okulusizi kukuba, kukho iqaqobana eliye layishiya ‘indlu’ ekhuselekileyo kaBawo wethu wasezulwini, uYehova. (1 Timoti 3:15) Abanye bavakalelwa kukuba noko isitropu siqine gqitha kule ndlu kaThixo, bathi iliso elibukhali likaYehova ubukhulu becala lixaba endleleni yabo kunokuba libakhusele. (Thelekisa INdumiso 32:8.) Ngokomzekelo kukho elinye ibhinqa elingumKristu elalikhuliswe ngemigaqo yeBhayibhile laza kamva labandakanyeka ekusebenziseni kakubi utywala neziyobisi. Xa likhumbula elo xesha lobumnyama obabugubungele ubomi balo, lithi: “Ndandifuna abantu babone ukuba nam ndinako ukuziphilela ubomi obubhetele. Ndandifuna ukuhamba ngendiyibonayo, yaye ndingafuni kunqandwa.” Le ntwazana yayifuna ukuzilawula kanye njengonyana wolahleko. Okubuhlungu kukuba, ngenxa yemikhwa yayo engquzulana neZibhalo kwafuneka igxothiwe kwibandla lamaKristu.—1 Korinte 5:11-13.

8. (a) Luluphi uncedo olunokunikelwa kwabo banqwenela ukuphila ngokuchasene nemilinganiselo kaThixo? (b) Kutheni ubani efanele abe sezingqondweni xa ekhetha unqulo?

⁸ Iintliziyo ziba buhlungu ngokwenene xa elinye ikholwa libonakalisa umnqweno wokuphila ngokuchasene nemilinganiselo kaThixo. (Filipi 3:18) Kuthi kwakuhla esi sihelegu, abadala kunye nabanye abafanelekayo ngokomoya benze unako nako wokulungisa lowo unxaxhayo. (Galati 6:1) Noko ke, akakho umntu ofakwa ngenkani kwidyokhwe yokuba ngumfundi ongumKristu. (Mateyu 11:28-30; 16:24) Kwanolutsha olu lwembala, xa sele lukhulile lumele luzenzele isigqibo kumbandela wonqulo. Phofu ke, ngamnye ukhululekile ukuba angahamba ngayibonayo kodwa ke uza kuziphendulela kuThixo. (Roma 14:12) Kakade ke, enye into kukuba siza ‘kuvuna loo nto siyihlwayelayo’—nto leyo awayesele eza kuyifumanisa unyana wolahleko womzekeliso kaYesu.—Galati 6:7, 8.

Ukuthwangazeka Kwilizwe Lasemzini

9, 10. (a) Izinto zamjikela njani unyana wolahleko, ibe wasabela njani? (b) Chaza into eyenzeka kwabanye abashiya unqulo lokwenyaniso namhlanje nefana naleyo yenzeka kunyana wolahleko.

⁹ “Xa wayechithe yonk’ into, kwabakho indlala eqatha kulo lonke elo lizwe, yaye waqala ukuswela. Wade wahamba waza wazinamathelisa komnye wabemi belo lizwe, yaye yena wamthumela emasimini akhe ukuya kwalusa iihagu. Yaye wayedla ngokunqwenela ukuhluthiswa ziingxam zekarobhi ezo zazidliwa ziihagu, ibe kwakungekho bani wayemnika nantoni na.”—Luka 15:14-16.

¹⁰ Engumpha ochutywe walahlwa, unyana wolahleko akazange ayicinge eyokujongis’ umbombo ekhaya. Kunoko, wadibana nommi othile owamnika umsebenzi wokwalusa iihagu. Ekubeni uMthetho kaMoses wawusithi iihagu zizilwanyana eziziinqambi, umsebenzi onjalo wawungayi kwamkeleka kumYuda. (Levitikus 11:7, 8) Kodwa ukuba lo nyana wolahleko wayesenaso phofu isazela, umele ukuba wasifuthanisela sathi tu. Ngapha koko, wayengenakulindela ukuba umqeshi wakhe, ummi wasekuhlaleni, akhathalele iimvakalelo zembacu engumalahlwa-nofele. Into eyenzeka kunyana wolahleko iyafana naleyo eyenzeka kwabaninzi namhlanje abashiya umendo othe tye wonqulo olunyulu. Ngokufuthi, abanjalo babandakanyeka kwizinto ngaphambili abebezigqala njengezithob’ isidima. Ngokomzekelo, xa lalineminyaka eli-17 ubudala, elinye ityendyana layivukela indlela elalikhuliswe ngayo yobuKristu. Liyavuma lisithi: “Ukuziphatha okubi nokusebenzisa kakubi iziyobisi kwazikhucula iimfundiso zeBhayibhile endandizifundiswe kangangeminyaka.” Kungekudala, lo mfana wazifumana sele eqamele ngenqindi entolongweni ngenxa yokuphanga nokubulala. Nangona kamva labuya lachacha ngokomoya, lalizikhande ngenyhek’ etyeni ‘ngokuziyolisa ngesono okwexeshana’!—Thelekisa eyamaHebhere 11:24-26.

11. Yintoni eyayenza yanzima ngakumbi ingxaki yonyana wolahleko, ibe abaninzi namhlanje baye bafumanisa njani ukuba imigibe yeli hlabathi ‘iyinkohliso elambathayo’?

¹¹ Into eyayenza yanzima nangakumbi imeko yonyana wolahleko kukuba “kwakungekho bani wayemnika nantoni na.” Babeye phi abahlobo bakhe babumini? Ngoku ekubeni wayeyimpula kalujaca, wayengathi yinto nje ‘yokuthiywa.’ (IMizekeliso 14:20) Ngokufanayo, abaninzi namhlanje abalushiyayo ukholo bafumanisa ukuba imigibe neembono zeli hlabathi ‘ziyinkohliso elambathayo.’ (Kolose 2:8) Enye intwazana eyakha okwexeshana yayishiya intlangano kaThixo yathi: “Ndaxhwaleka gqitha ndakuphulukana nolwalathiso lukaYehova. Ndazama ukuzifaka ehlabathini, kuba ndandingujobela phakathi kweentakazana, basuka bandibukula. Ndandiziva ngathi ndiyinkedama le eswele ulwalathiso lukabawo. Kulapho ke ndaqonda khona ukuba ndandimfuna uYehova. Andizange ndiphinde ndifune ukuzimela geqe kuye.” Nonyana wolahleko okumzekeliso kaYesu wafikelela kwisigqibo esifanayo.

Unyana Wolahleko Ubuyela Ezingqondweni

12, 13. Ziziphi izinto eziye zanceda abanye namhlanje babuyela ezingqondweni zabo? (Bona ibhokisi.)

¹² “Xa wabuyela ezingqondweni zakhe, wathi, ‘Hayi indlela abaninzi ngayo abantu abaqeshwe ngubawo abadikwa zizonka, ngoxa mna nditshabalala apha yindlala! Ndiza kusuka ndize ndihambe ndiye kubawo yaye ndithi kuye: “Bawo, ndonile nxamnye nezulu nanxamnye nawe. Andisafanele kubizwa ngokuba ndingunyana wakho. Ndenze ndibe njengomnye wabantu bakho abaqeshiweyo.”’ Ngoko wasukuma waza waya kuyise.”—Luka 15:17-20.

¹³ Unyana wolahleko “wabuyela ezingqondweni.” Lo nyana wolahleko wayezifice kwiziyunguma kangangethuba elithile, engathi uphila kwaMnwebese. Kodwa ngoku yakhanya kuye into yokuba uyagula ngokomoya. Ewe, nangona eli tyendyana lalilutywantsi, lalisekho ithemba ngalo. Noko lalisengumdlung’ odlekayo. (IMizekeliso 24:16; thelekisa eyesi-2 yeziKronike 19:2, 3.) Kuthekani ngabo bawushiyayo umhlambi kaThixo namhlanje? Ngaba bekuya kuba sengqiqweni ukubancama, sisithi ikhondo labo lemvukelo libonisa ukuba bone umoya oyingcwele kaThixo? (Mateyu 12:31, 32) Akusoloko kunjalo. Uninzi lwabo alulali buhlayo ngenxa yekhondo lalo elitenxileyo, yaye ethubeni inkoliso iye ibuyele ezingqondweni. “Andizange, nangosuku olunye, ndimlibale uYehova,” utsho omnye udade, ekhumbula ixesha awayekhe wayinikel’ umva ngalo intlangano kaThixo. “Ndandisoloko ndithandazela ukuba ngandlel’ ithile, ngeny’ imini andamkele kwakhona enyanisweni.”—INdumiso 119:176.

14. Sisiphi isigqibo awafikelela kuso unyana wolahleko, ibe wabonakalisa njani ukuba uthobekile ngokwenjenjalo?

¹⁴ Kodwa ke yintoni abanokuyenza abo baye banxaxha ngemeko yabo? Kumzekeliso kaYesu unyana wolahleko wagqiba kwelokuba ajongis’ umbombo ekhaya aye kuzama uxolo kuyise. “Ndenze ndibe njengomnye wabantu bakho abaqeshiweyo,” wayeza kufika atsho. Umkhonzi oqeshiweyo wayengumsebenzi owayenokugxothwa nanini na. Wayesiba ngaphantsi nakwikhoboka eli lembala, elalisithi ngangqiqo ithile, libe njengelungu lentsapho. Ngoko unyana wolahleko akazange acinge ngokubuyiselwa kwisikhundla sakhe sangaphambili njengonyana. Wayekulungele ngokwenene ukunikwa esona sikhundla siphantsi ukuze suku ngalunye azingqine ukuba ngoku unyanisekile kuyise. Noko ke, kwathi kanti izinto aziyi kuhamba ngale ndlela acinga ngayo unyana wolahleko.

Wamkelwa Ngezandl’ Ezishushu

15-17. (a) Wasabela njani uyise akubona unyana wakhe? (b) Wawufuzisela ntoni umwunduzo, umsesane kunye neembadada lo bawo awazinika unyana wakhe? (c) Yintoni eboniswa kukulungiselela kwalo bawo isidlo?

¹⁵ “Ngoxa wayesekude lee, uyise wambona yaye washukunyiswa lusizi, kwaye wabaleka ibe wawela entanyeni yakhe waza wamanga ngofefe. Ngoko unyana wathi kuye, ‘Bawo, ndonile nxamnye nezulu nanxamnye nawe. Andisafanele kubizwa ngokuba ndingunyana wakho. Ndenze ndibe njengomnye wabantu bakho abaqeshiweyo.’ Kodwa uyise wathi kumakhoboka akhe, ‘Khawulezani! zisani umwunduzo, owona mhle, nize nimambese ngawo, yaye fakani umsesane esandleni sakhe neembadada ezinyaweni zakhe. Yaye zisani inkonyana eliyinkunzi etyetyisiweyo, nilixhele size sitye kwaye siziyolise, ngenxa yokuba lo nyana wam ebefile waza wabuyela ebomini kwakhona; ebelahlekile waza wafunyanwa.’ Kwaye baqala ukuziyolisa.”—Luka 15:20-24.

¹⁶ Nawuphi na umzali onothando ebeya kukulangazelela ukuchacha ngokomoya komntwana wakhe. Ngenxa yoko, sinokuba nombono woyise wonyana wolahleko suku ngalunye eman’ ukuphosa amehlo kwindlela eza endlwini yakhe, enethemba lokuba unyana wakhe uza kubuya. Nanku ngoku unyana wakhe esiza ngendlela! Alithandabuzeki elokuba nenkangeleko le yakhe yayisele itshintshile. Ukanti, uyise umbona ngoxa “esekude lee.” Akasawakhathalele naloo madlavu awanxibileyo kunye nomphefumlo wakhe oxhelekileyo; ubona unyana wakhe, ibe uyabaleka aye kumkhawulela!

¹⁷ Xa lo bawo wafika kunyana wakhe, wawela entanyeni yakhe waza wamanga ngofefe. Emva koko wayalela amakhoboka akhe ukuba anxibise unyana wakhe umwunduzo, umsesane kunye neembadada. Lo mwunduzo wawungeyonto nje yakufihla ubuze, kodwa ‘wawungowona mhle’—mhlawumbi yayiyingubo yokwaleka embejembeje ngokuqhelekileyo ekwakuvavwa ngayo undwendwe olubekekileyo. Ekubeni kwakungumnqa ukubona ikhoboka linxibe umsesane neembadada, lo bawo wayenza yacaca into yokuba unyana wakhe wayesamkelwa njengelungu lentsapho ngokupheleleyo. Kodwa lo bawo wenza okungakumbi. Wayalela ukuba kwenziwe isihikahika setheko kuvuyiswana nokubuya konyana wakhe. Kuyacaca ukuba le ndoda yayingagogotye nto ekuxoleleni unyana wayo okanye imxolela kuba ingenandlela yimbi; yayifuna ukumxolela. Yayimvuyisa loo nto.

18, 19. (a) Lo mzekeliso wonyana wolahleko ukufundisa ntoni ngoYehova? (b) Njengoko kuboniswa yindlela awaqhubana ngayo nelakwaYuda neYerusalem, uYehova ‘ukulindela’ njani ukubuya komoni?

¹⁸ Ukuza kuthi ga ngoku, yintoni esiyifundiswa ngumzekeliso wonyana wolahleko ngoThixo esijizekwe ngelungelo lokumnqula? Okokuqala, sifunda ukuba uYehova ‘unenceba, unobabalo, uzeka kade umsindo, mninzi ngobubele obunothando nenyaniso.’ (Eksodus 34:6, thelekisa iNW.) Ngokwenene, inceba luphawu oluphambili lukaThixo. Yindlela eqhelekileyo asabela ngayo kwabo bahlelelekileyo. Kwakhona, umzekeliso kaYesu usifundisa ukuba uYehova ‘uyaxolela.’ (INdumiso 86:5) Ngokungathi kunjalo, usoloko elindele ukubona enoba ikho kusini na inguquko entliziyweni yabantu abonayo enokumnika isizinzi sokubenzela inceba.—2 Kronike 12:12; 16:9.

¹⁹ Ngokomzekelo, khawucinge nje ngendlela uThixo awaqhubana ngayo namaSirayeli. Umprofeti uIsaya waphefumlelwa nguYehova ukuba achaze elakwaYuda neYerusalem ‘njengezigula ukusuka enkwalini yonyawo, kuse entloko.’ Ukanti, wakwathi: “UYehova uya kukha alinde, ukuze anibabale; ngako oko uya kukha akhwelele phezulu, ukuze abe nenceba kuni.” (Isaya 1:5, 6; 30:18; 55:7; Hezekile 33:11) Njengobawo okumzekeliso kaYesu, ngokungathi kunjalo, uYehova ‘uphosa amehlo endleleni.’ Ukulindele ngolangazelelo ukubuya kwakhe nabani oye washiya indlu yakhe. Ngaba leyo asinto siyilindeleyo kubawo onothando?—INdumiso 103:13.

20, 21. (a) Yintoni namhlanje etsalela abaninzi kwinceba kaThixo? (b) Yintoni eza kuxutyushwa kwinqaku elilandelayo?

²⁰ Minyaka le, inceba kaYehova yenza abaninzi babuyele ezingqondweni baze basondele kunqulo lokwenyaniso kwakhona. Hayi indlela ezivuya ngayo izihlobo zabo! Masenze umzekelo ngalaa bawo ongumKristu okhankanywe ekuqaleni. Okuvuyisayo kukuba, intwazana yakhe yachacha ngokomoya ibe ngoku ikhonza njengomlungiseleli wexesha elizeleyo. Uthi: “Andikholwa ukuba ukho umntu onokuvuya ngaphezu kokuba ndivuya kule nkqubo indala yezinto. Iinyembezi zam zosizi zijike zaba zezemincili.” Ngokuqinisekileyo noYehova uyavuya!— IMizekeliso 27:11.

²¹ Kodwa kukho okungakumbi esinokukufunda kumzekeliso wonyana wolahleko. UYesu wabalisa eli bali ukuze abonise umahluko ophakathi kwenceba kaYehova nobungqongqo obukhatshwa kukuthand’ ukugweba ababesaziwa ngabo ababhali nabaFarisi. Indlela awawubonisa ngayo—nentsingiselo yoko kuthi—iza kuxutyushwa kwinqaku elilandelayo.

[Imibhalo esemazantsi]

Impinda

◻ Isimo sengqondo sikaYesu ngenceba sahluka njani kwesabaFarisi?

◻ Ngoobani namhlanje abafana nonyana wolahleko, yaye bafana ngayiphi indlela?

◻ Ziziphi izinto ezenza unyana wolahleko wabuyela ezingqondweni?

◻ Lo bawo wayibonakalisa njani inceba kunyana wakhe oguqukileyo?

[Box on page 11]

BABUYELA EZINGQONDWENI

Yintoni eye yanceda abo bebegxothiwe ebandleni lamaKristu ukuba babuyele ezingqondweni? La magqabaza alandelayo ayasityebisela ngalo mba.

“Ndandisawazi apho ukhoyo umthombo wenyaniso. Yonke loo minyaka endandifundisisa iBhayibhile yaye ndisiya ezintlanganisweni zamaKristu yandinceda gqitha. Ndandinokuthini ke ukuqhubeka ndicezela kude kuYehova? Yayingenguye ondishiye enyanyeni; ndim owayemlahle kwesinomhlwa. Ekugqibeleni, ndasivuma isiphoso endandisenzile nendlela endandiqaqadeke ngayo nokuba iLizwi likaYehova lalisoloko lichanile—‘uvuna oko ukuhlwayeleyo.’”—C.W.

“Usana lwam oluyintombazana lwafunda ukuthetha, ibe loo nto yayichukumisa intliziyo yam kuba ndandifuna ukulufundisa izinto ezinjengokuthi ngubani uYehova nendlela yokuthandaza kuye. Ubuthongo babungehli, ibe ngobunye ubusuku ndaya epakini ndaza ndalila kanobom. Ndalila, ndaza ndathandaza kuYehova okokuqala emva kwexesha elide. Inye nje into endandiqiniseke ngayo yayikukuba ndandifuna uYehova abuyele ebomini bam, ibe ndandinethemba lokuba uya kundixolela.”—G.H.

“Xa kwakuthethwa ngonqulo, ndandidla ngokuxelela abantu ndithi, ukuba kwakunokufuneka ndikhethe unqulo olufundisa inyaniso, ndandiya kukhetha ukuba liNgqina likaYehova. Ndandule ke ndibaxelele ukuba ndandikhe ndalilo, kodwa andizange ndiyifikelele imilinganiselo yawo, ndaza ke ndayeka. Ngokufuthi ndandisithi ndakuyicingisisa loo nto ndizive ndinetyala luze luphele nolo lonwabo. Ekugqibeleni ndavuma ndisithi, ‘Imeko yam ilusizi. Kuza kufuneka ndenze iinguqulelo ezibonakalayo.’”—C.N.

“Kwiminyaka engama-35 eyadlulayo mna nomyeni wam sasuswa kubudlelane. Kwandula ke ngowe-1991 sababalwa ngotyelelo esasingalulindelanga lwabadala ababini abasixelela Oko sasinokukwenza ukuze sibuyele kuYehova. Kwiinyanga ezintandathu kamva, savuya okweentsana xa sabuyiselwa. Umyeni wam uneminyaka engama-79 ubudala, eyam ingama-63.”—C.A.