Hlalani Nisebenzela Usindiso Lwenu!
“Zintanda, . . . hlalani nisebenzela usindiso lwenu ngoloyiko nangokungcangcazela.”—FILIPI 2:12.
1, 2. Ziziphi iinkolelo ezikhoyo ezibangele abantu abaninzi bacinga ukuba abanakwenza nto ngezinto abaya kuba zizo?
“NGABA wazalwa uyile nt’ uyiyo?” Kutshanje, kukhe kwabhalwa umxholo onjalo ngaphandle kwelinye iphephancwadi elaziwayo. Ezantsi kwaloo mxholo kwakukho la mazwi: “Ubuntu, iimvakalelo nezinto ozikhethayo ebomini. Uphando lwakutshanje ludiza ukuba ubukhulu becala ezi zinto zisegazini kuwe.” Amazwi anjalo asenokwenza abantu abathile basong’ izandla besithi akukho nto banokuyenza ngobomi babo.
2 Abanye bathi bezezi ntsizana bazizo nje ngabazali babo ababakhulisa ngokungakhathali okanye abafundisi-ntsapho babo ababesenza uphela sonwabe. Basenokude bacinge ukuba banyanzelekile baphinde iimpazamo ezenziwa ngabazali babo, bamele babafuze ngento yonke, bangathembeki kuYehova—ngamafutshane, benze ukhetho olutenxileyo. Ngaba iBhayibhile ifundisa loo nto? Ngokuqinisekileyo, bakho abantu benkonzo abanokoza into yokuba iBhayibhile ifundisa loo nto, befundisa into yokuba ikamva lakho ligqitywe kwangaphambili. Ngokwale mfundiso, uzalwa nje kudala uThixo esazi ukuba uza kuphelela phi.
3. Ngawaphi amazwi aseBhayibhileni athetha ngamandla ethu okusingatha imbopheleleko yethu ngekamva?
3 Zizonke ke ezi zinto zinomrhiba ezidibana ngawo: Akukho lukhetho unokuzenzela lona ebomini, kungekho nanto unokuyenza ngento oza kuba yiyo ebomini. Iyatyhafisa ke loo nto, yaye ukutyhafa kuphinda kube yingxaki nako. IMizekeliso 24:10 ithi: “Uthe waphelelwa ngemini yembandezelo, oba ebandezelwe amandla akho.” Noko ke, kuyasikhuthaza ukufunda elokuba, ngokutsho kweBhayibile, sinako ‘ukulusebenzela usindiso lwethu.’ (Filipi 2:12) Sinokuthembela njani ngokupheleleyo kule mfundiso ikhuthazayo yeZibhalo?
Umsebenzi “Wokwakha” Esiwenza Kwiziqu Zethu
4. Nangona eyoku-1 kwabaseKorinte 3:10-15 ithetha ngokwakha ngezinto ezingatshiyo, yintoni engathethwayo koku?
4 Khawubuyele kulaa mzekeliso kampostile uPawulos ukweyoku-1 kwabaseKorinte 3:10-15. Apho, uthetha ngomsebenzi wokwakha wamaKristu, yaye umgaqo okumzekeliso wakhe unokusebenza kubulungiseleli esibenza kuthi ziqu nesibenza kwabanye. Ngaba uzama ukuthi into yokuba umfundi akhethe ukukhonza uYehova aze abambelele kolo khetho ixhomekeke kwabo bebemfundisa baza bamqeqesha? Akanakuyithetha loo nto. Into eyayibethelelwa nguPawulos kukuba umfundisi ufanele azilahlele nofele kumsebenzi wakhe wokwakha. Kodwa njengokuba sele sibonile kwinqaku elandulelayo, wayengazami kuthi umfundi akanakuzenzela ukhetho. Liyinyaniso lona elokuba, umzekelo kaPawulos ugxininisa umsebenzi esiwenza kwabanye, kungekhona ukuzakha thina. Oku ukubona kwinto yokuba uPawulos uthi elo xhobongwana lendlu liyadilizwa aze umakhi walo asinde. Sekunjalo, iBhayibhile ikhe isebenzise intetho elolo hlobo ibhekisela kumsebenzi esiwenza kwiziqu zethu.
5. Ziziphi iZibhalo ezibonisa ukuba amaKristu amele enze umsebenzi “wokwakha” kwiziqu zawo?
5 Ngokomzekelo, khawuqwalasele uYude 20, 21: “Nina, zintanda, ngokuzakha kolwenu ukholo olulolona lungcwele, nokuthandaza ninomoya oyingcwele, zigcineni kuthando lukaThixo.” UYude apha usebenzisa igama lesiGrike elithetha “ukwakha” nelasetyenziswa nguPawulos kweyoku-1 kwabaseKorinte isahluko 3, kodwa ke yena ubonakala egudle umba wokuba sizakhele phezu kwesiseko sokholo lwethu. ULuka, xa wayebhala umzekeliso kaYesu wendoda eyamisa indlu yayo elulwalweni, usebenzisa igama lesiGrike elithetha “isiseko” noPawulos alisebenzisayo kumzekeliso wakhe wesakhiwo samaKristu. (Luka 6:48, 49) Ngaphezu koko, uPawulos uzobela amanye amaKristu umfanekiso wento emiliselwe nkqi ‘kwisiseko’ sayo xa wayewakhuthaza ukuba enze inkqubela yokomoya. Ewe, iLizwi likaThixo lifundisa ukuba ‘sizakhe’ thina kuqala.—Efese 3:15-19; Kolose 1:23; 2:7.
6. (a) Yenza umzekelo obonisa indlela ekusetyenziswana ngayo ekwakheni umfundi ongumKristu. (b) Yiyiphi imbopheleleko anayo umfundi ngamnye?
6 Ngaba umKristu angakhiwa ngumntu omnye? Kulungile ke, masithi ufuna ukwakha indlu. Undwendwela umzobi weeplani akwenzele iplani. Nangona uza kuwenza ngokwakho umsebenzi omninzi, uqesha umakhi akuncedise aze akuph’ amacebiso ngeendlela zokwakha eziphucukileyo. Xa ebeka isiseko esiluqilima, ekunceda ulandele iplani yaloo ndlu, acebise izinto ezisemgangathweni onokuzithenga, aze ade akufundise izinto ezininzi ngokwakha, mhlawumbi nawe ungade uwuqhwabel’ izandla umsebenzi wakhe. Kodwa ke bekuya kwenzeka ntoni ukuba ubusuka uval’ iindlebe xa ecebisa, uzithengele izinto zokwakha ezikrwabakrwaba, ude ungakhathaleli naloo plani ubuyizotyelwe? Ngokuqinisekileyo akunakumbeka tyala umakhi okanye umzobi weeplani ukuba loo ndlu inokusuka ithi butyatya ngeny’ imini! Ngokufanayo ke, mfundi ngamnye ongumKristu wakhiwa ngokusebenzisana kwabantu abaliqela. UYehova yingcali ephambili ekuzobeni iiplani. Uxhasa umKristu othembekileyo othi, njengomnye ‘wabasebenzi abangamadlelane kaThixo,’ afundise aze akhe umfundi. (1 Korinte 3:9) Kodwa ke nomfundi akazi kulal’ emqokozweni. Eneneni, ubomi bakhe busezandleni zakhe. (Roma 14:12) Ukuba ufuna ukuba neempawu ezintle zobuKristu, umele azibhokoxe azame ukuzifikelela, azakhe ngokwakhe apha kuye.—2 Petros 1:5-8.
7. Luluphi ucelomngeni amanye amaKristu ajamelene nalo, yaye yintoni anokuzithuthuzela ngayo?
7 Ngoko ngaba oku kuthetha ukuba imfuza, imeko esikuyo nendlela esifundiswa ngayo ayinamsebenzi? Nakanye. ILizwi likaThixo liyibona ibalulekile nganye kwezi zinto yaye inefuthe enalo. Inkoliso, yemikhwa esizelwe sinayo seyamila neengcambu yaye kusenokufuneka siqule siligangathe xa sisilwa nayo. (INdumiso 51:5; Roma 5:12; 7:21-23) Abantwana basuleleka ngeyona ndlela luqeqesho lwabazali nendlela abakhuliswe ngayo ekhaya—enoba kungendlela entle okanye embi. (IMizekeliso 22:6; Kolose 3:21) UYesu wazigxeka iinkokeli zamaYuda ngenxa yento eyenziwa ziimfundiso zazo ezimdaka ebantwini. (Mateyu 23:13, 15) Namhlanje, siphila loo ntlalo xa sisonke. Ngokomzekelo, bambi kubantu bakaThixo baphekwa besophulwa zizishiqi abazifumana besengabantwana. Sifanele sibonakalise ububele novelwano ngabo bantu. Yaye mabazithuthuzele ngoko kuthethwa yiBhayibhile ukuba akunyanzelekanga ukuba baphinde iimpazamo zabazali babo okanye nabo bangathembeki njengabo. Khawujonge umzekelo woku kookumkani bamandulo bakwaYuda.
OoKumkani BakwaYuda—Bazenzela Ukhetho Lwabo
8. Nguwuphi umzekelo ombi uYotam awawubekelwa nguyise, ukanti wenza luphi ukhetho?
8 U-Uziya waba ngukumkani kwaYuda esemncinane kakhulu eneminyaka eli-16 ubudala yaye walawula kangangeminyaka engama-52. Ngalo lonke eli xesha, “wenza okuthe tye emehlweni kaYehova, njengako konke awakwenzayo uAmatsiya uyise.” (2 Kumkani 15:3) UYehova wamsikelela woyis’ imikhosi emva kweminye. Noko ke, okulusizi kukuba u-Uziya wathi akuphumelela rhoqo wamil’ iimpiko. Waba sisigcodololo sesicagogo esinekratshi nesaye savukela uYehova senza isiqhumiso esibingelelweni, nto leyo eyayingumsebenzi wababingeleli. U-Uziya wakhalinyelwa ngale nto kodwa wasuka wabhabhazela ngumsindo. Ngoko ke zancothulw’ ezo mpiko—wathiwa tyabe ngeqhenqa kwaza kwafuneka achwethelw’ ecaleni ebantwini ubomi bakhe bonke. (2 Kronike 26:16-23) Wenza ntoni unyana wakhe uYotam akubona le nto? Eli tyendyana lalinokuwurhogola ngokulula wonke loo moya kayise lize limqumbele uYehova ngokumohlwaya. Abantu ngokubanzi basenokuba nabo babenomoy’ omdaka kuba babengene bhakada kunqulo lobuxoki. (2 Kumkani 15:4) Kodwa uYotam wazenzela olwakhe ukhetho. “Wenza okuthe tye emehlweni kaYehova.”—2 Kronike 27:2.
9. Nguwuphi umoya omhle owawukho ngexesha lika-Ahazi, kodwa waphela eyintoni ebomini?
9 UYotam walawula iminyaka eli-16, wahlala ethembekile kuYehova kwada kwasekugqibeleni. Ngenxa yoko, unyana wakhe uAhazi wayenomzekelo omhle anokuwulandela. Kwakhona uAhazi wayenabo nabanye abantu ababenokumfak’ umoy’ omhle. Wafumana inyhweba yokuphila ngexesha lokuprofeta kwabaprofeti abathembekileyo abanjengoIsaya, uHoseya noMika kwelo lizwe. Sekunjalo, wenza ukhetho olutenxileyo. ‘Akazange akwenze okuthe tye emehlweni kaYehova njengoDavide uyise.’ Wenza imifanekiso kaBhahali akugqiba waqubuda kuyo wada watshisa noonyana bakhe esenza amadini koothixo bobuhedeni. Nangona wayefumene loo moya mhle ngolo hlobo, woyiswa kwathi tu bubukumkani nakukukhonza uYehova.—2 Kronike 28:1-4.
10. UAhazi wayeluhlobo olunjani lotata, kodwa unyana wakhe uHezekiya wenza luphi ukhetho?
10 Ngokuphathelele unqulo olunyulu, akakho utata owayeyityhefu ngathi nguAhazi. Noko ke, unyana wakhe uHezekiya wayengenakuzikhethela utata! Ezo ntsana zingoonyana baka-Ahazi awaphisa ngazo kuBhahali zimele ukuba zazingabantakwabo Hezekiya. Ngaba obo bugxwayiba wakhulela kubo uHezekiya bamshiya enyanzelekile ukuba angathembeki kuYehova? Unotshe, uHezekiya waba ngomnye kwigcudwana lookumkani bakwaYuda abangenazigigaba—wayethembekile, elumkile yaye ethandeka. “UYehova waba naye.” (2 Kumkani 18:3-7) Enyanisweni, kuyarhaneleka nokuba ngoxa uHezekiya wayeseyinkosana wayengumbhali ophefumlelweyo weNdumiso ye-119. Ukuba kunjalo, asingomnqa into yokuba wabhala la mazwi: “Umphefumlo uvuza iinyembezi sisingqala.” (INdumiso 119:28) Nangona wayenezo ngxaki zazimenza isingqala, uHezekiya wavumela iLizwi likaYehova lamkhokela ebomini. INdumiso 119:105 ithi: “Lisisibane seenyawo zam ilizwi lakho, likukukhanya emendweni wam.” Ewe, uHezekiya wakhetha le nto ifunwa nguye—wakhetha indlela elungileyo.
11. (a) Nangona uyise wayenempembelelo entle, uManase wamvukela kangangakanani uYehova? (b) Luluphi ukhetho olwenziwa nguManase kanye ngasekufeni kwakhe, yaye sinokufunda ntoni koku?
11 Noko ke, kwenzek’ umhlol’ obomvu, omnye wookumkani bakwaYuda ababengenazigigaba wazal’ isibhovubhovu sesaphuselana sento. Unyana kaHezekiya uManase wayethe phatsh’ ingqondo lunqulo zithixo, kukusebenzelana nemimoya nokuqhway’ udushe olwalaphul’ izikeyi. Ingxelo ithi “uYehova wathetha kuManase nakubantu bakhe,” mhlawumbi ethumela abaprofeti. (2 Kronike 33:10) Ngokwembali yamaYuda uManase wasuka waqubul’ isarha wamnqunq’ uIsaya waziziqwenga. (Thelekisa amaHebhere 11:37.) Enoba yinyani loo nto okanye bubuxoki, uManase akazange aphulaphule xa wayelunyukiswa nguThixo. Eneneni, naye watshisa abanye oonyana bakhe bephila ebenza amadini, nqwa noyisemkhulu uAhazi. Sekunjalo, eli tshijolo, lathi lakubon’ ukuba umkhomb’ ubhembesile ekwaluphaleni kwalo, laguquka labuyis’ unyawo kuloo mikhuba. (2 Kronike 33:1-6, 11-20) Lo mzekelo usifundisa ukuba umntu okhethe iindlela ezitenxileyo akangoncanyelweni. Usenokuguquka.
12. Lwalahluke njani ukhetho luka-Amon nolonyana wakhe uYosiya ngokuphathelele ukukhonza uYehova?
12 Unyana kaManase uAmon ngewayevune lukhulu apha ekuguqukeni kukayise. Kodwa naye wasuka wakekelel’ ecaleni. Yena uAmon “walikhulisa ityala” de ekugqibeleni wawela ezandleni zezigwinta. Unyana wakhe uYosiya wazisa isiqabu sokwenene. Kuyabonakala ukuba uYosiya wakhetha ukufunda okuthile koko kwenzeka kooyisemkhulu. Waqalisa ukulawula esemncinane eneminyaka esibhozo kuphela ubudala. Xa wayelityendyana eliminyaka ili-16 ubudala, waqalisa ukufuna uYehova waza waba ngukumkani ongumzekelo nothembekileyo. (2 Kronike 33:20–34:5) Wazenzela ukhetho—ukhetho olulungileyo.
13. (a) Yintoni esinokuyifunda kookumkani bakwaYuda esiye saxubusha ngabo? (b) Ibaluleke kangakanani ingqeqesho yabazali?
13 La mavandlakanya aba kumkani basixhenxe bakwaYuda asifundisa lukhulu. Kwiimeko ezithile, izibhovubhovu zookumkani zazizal’ oonyana abalungileyo, baze ookumkani abalungileyo bazale oonyana abazizirhalarhume. (Thelekisa INtshumayeli 2:18-21.) Oku akuthethi kuthi ingqeqesho yabazali ayibalulekanga. Abazali abaqeqesha abantwana babo ngendlela kaYehova ngokuqinisekileyo bavulela abantwana babo ithuba lokuba ngabakhonzi abathembekileyo bakaYehova. (Duteronomi 6:6, 7) Sekunjalo, bambi abantwana, nangona abazali babo abathembekileyo besiwa bevuka, bakheth’ ukulandel’ indlel’ etenxileyo. Abanye abantwana nangona berhogol’ umoy’ omdaka kubazali babo, bakhetha ukuthanda nokukhonza uYehova. Ngenxa yentsikelelo yakhe, bayaphumelela ebomini. Ngaba maxa wambi ukhe uzibuze ukuba uza kuphelela phi? Ngoko ke, cinga ngala mazwi kaYehova ngenkqu akuqinisekisayo ukuba unako ukulandela indlela elungileyo!
UYehova Ukuthembile!
14. Sazi njani ukuba uYehova uyaziqonda iintsilelo zethu?
14 Akukho nto angayiboniyo uYehova. IMizekeliso 15:3 ithi: “Asezindaweni zonke amehlo kaYehova, ebonisela abanobubi nabalungileyo.” UKumkani uDavide wathi ngoYehova: “Amehlo akho andibona ndiseyimbumba, zazibhalwe encwadini yakho iimini zonke ziphela; ziyiliwe ngenxa engaphambili, kungekabikho ke nanye kuzo.” (INdumiso 139:16) Ngoko uYehova uyazi kakuhle imikhwa engalunganga ozama ukulwa nayo—enoba ufuzile ngayo okanye waba nayo ngenxa yomoya owawurhogolayo kungekho nto unokuyenza ngawo. Uyazi mhlophe into eyenzayo kuwe. Uzazi kakuhle iintsilelo zakho ude odlule nawe lo. Enjalo nje unenceba. Akaze alindele ukuba senze into engaphezu kwamandla ethu.—INdumiso 103:13, 14.
15. (a) Yintoni enokuthuthuzela abo baye benzakaliswa ngabom ngabanye? (b) Yiyiphi imbopheleleko uYehova aye wayithi jize ngamnye wethu?
15 Kwelinye icala, uYehova akathi xa esijonga abone iintsizana ezibanjwe minxi ziimeko ezikuzo. Ukuba saba namava abuhlungu ekukhuleni kwethu, kusenokusithuthuzela ukuqiniseka ukuba uYehova uyithiyile loo mikhuba yangabom yasenzakalisayo. (INdumiso 11:5; Roma 12:19) Kodwa ke ngaba uya kusaphulela ukuba siyajika size ngabom sikhethe iindlela ezingatshongo khona? Nakanye. Lithi iLizwi lakhe: “Ngamnye uya kuthwala umthwalo wakhe.” (Galati 6:5) UYehova uthe jize ngasinye kwizidalwa zakhe ezikrelekrele ngendili yembopheleleko yokwenza okulungileyo zize zimkhonze. Kunjengokuba uMoses waxelela uhlanga lwakwaSirayeli esithi: “Ndingqinisisa amazulu nehlabathi namhla ngani; ndibeke phambi kwenu ubomi nokufa, intsikelelo nesiqalekiso. Nyula ke ubomi, ukuze uphile, wena nembewu yakho.” (Duteronomi 30:19) UYehova usithembile ukuba nathi siya kukhetha indlela elungileyo. Sazi njani?
16. Singaphumelela njani ‘ekusebenzeleni usindiso lwethu’?
16 Funda oko kwabhalwa ngumpostile uPawulos: “Ngenxa yoko, zintanda zam, . . . hlalani nisebenzela usindiso lwenu ngoloyiko nangokungcangcazela; kuba uThixo nguye osebenzayo kuni ngaphakathi, ngenxa yenkoleko yakhe, ukuze nithi kokubini nithande nize nenze.” (Filipi 2:12, 13) Igama lantlandlolo lesiGrike eliguqulelwe ngokuthi ‘sebenzela’ apha linentsingiselo yokuqabelisa umcimbi othile. Ngoko akukho namnye kuthi osengxingongweni yokufela kuloo nto ayiyo. UYehova uThixo umele ukuba usithembile ukuba siza kuwuqoshelisa umsebenzi asinike wona—umsebenzi okhokelela kusindiso lwethu—kungenjalo ngewayengawaphefumlelanga loo mazwi. Kodwa siza kuphumelela njani? Akungamandla ethu. Ukuba besomelele gqibi, bekungasayi kubakho mfuneko yokuba ‘soyike size singcangcazele.’ Kunoko, uYehova ‘usebenza ngaphakathi kuthi,’ umoya wakhe oyingcwele osebenza ezingqondweni nasezintliziyweni zethu, usinceda ukuba ‘sithande size senze.’ Ngenxa yolo ncedo lwakhe lukhatshwa luthando, ngaba sikho isizathu sokuba singakhethi indlela efanelekileyo ebomini size siphile ngayo? Asikho!—Luka 11:13.
17. Ziziphi iinguqulelo esinokuzenza, ibe uYehova usinceda njani sizenze?
17 Ikho imiqobo ekuya kufuneka siyoyise—mhlawumbi imikhwa eya kuba sisaname kuthi ubomi bethu bonke neempembelelo ezinokuyijij’ ijong’ ecaleni ingqondo yethu. Sekunjalo, ngoncedo lomoya kaYehova, singaqabela ngaphaya kwale miqobo! Kunjengokuba uPawulos wabhalela amaKristu aseKorinte, iLizwi likaThixo linamandla okubhukuqa “izinto ezinqatyiswe ngamandla.” (2 Korinte 10:4) Enyanisweni, uYehova angasinceda senze iinguqulelo ezinkulu. ILizwi lakhe lisibongoza ukuba ‘sambathe ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.’ (Efese 4:22-24) Ngaba ngokwenene umoya kaYehova ungasinceda senze ezo nguqulelo? Ngaphandle kwamathandabuzo! Umoya kaThixo uvelisa isiqhamo kuthi—iimpawu ezintle, ezixabisekileyo sonke esingathanda ukuzihlakulela. Olokuqala kuzo luthando.—Galati 5:22, 23.
18. Luluphi ukhetho olunokwenziwa nguye wonk’ umntu oqiqayo, yaye oku kufanele kusincede siqonde ntoni?
18 Kulapho ikhoyo ke inyaniso ebalaseleyo nekhululayo. UYehova uThixo unothando olungenamlinganiselo, yaye senziwe ngokomfanekiselo wakhe. (Genesis 1:26; 1 Yohane 4:8) Ngoko sinokuzikhethela ukuthanda uYehova. Yaye olo thando—kungekhona izinto esakhula sizizo, kungekhona izinto ezimbi esizifunde bumini, kungekhona utyekelo lwethu lokwenza okubi oluyimfuza—lulo oluya kulawula ikamva lethu. Kwakufuneka uAdam noEva babe nolo thando ngoYehova uThixo ukuze bahlale bethembekile e-Eden. Ngamnye wethu ufanele abe nolo thando ukuze asinde eArmagedon aze aluphumelele uvavanyo lokugqibela ekupheleni koLawulo lukaKristu lweWaka Leminyaka. (ISityhilelo 7:14; 20:5, 7-10) Mntu ngamnye kuthi, kungakhathaliseki ukuba ukweziphi na iimeko, unokuluhlakulela olo thando. (Mateyu 22:37; 1 Korinte 13:13) Masizimisele ukuthanda uYehova size sakhe phezu kolo thando kude kube ngunaphakade.
Ucinga Ntoni?
◻ Ziziphi iinkolelo ezithandwayo eziphikisanayo nemfundiso ekhuthazayo yeBhayibhile ngokuphathelele imbopheleleko anayo umntu ngamnye?
◻ Nguwuphi umsebenzi wokwakha mKristu ngamnye amele awenze kwisiqu sakhe?
◻ Umzekelo wookumkani bakwaYuda ubonisa njani ukuba mntu ngamnye uzenzela ukhetho lwakhe?
◻ UYehova usiqinisekisa njani ukuba sinokwenza ukhetho olufanelekileyo, kungakhathaliseki enoba sirhogola umoya ombi?
[Umfanekiso okwiphepha 15]
Ngaba ikamva lakho lixhomekeke kwimfuza?
[Umfanekiso okwiphepha 17]
Nangona uyise wayeyityhefu, uKumkani uYosiya wakhetha ukukhonza uThixo