Ukukholisa UYehova Yeyona Nto Ndiyixhalabeleyo
Ngokubaliswa Ngutheodoros Neros
Ucango lwesisele sam lwavulwa lwaza lwagityiselwa phaya, laza igosa labuza: “Ngubani uNeros?” Xa ndazichazayo, landiyalela: “Phakama. Siza kukubulala.” Oko kwenzeka ngowe-1952, kwinkampu yomkhosi yaseKorinte, eGrisi. Kwakutheni ukuze ubomi bam bube semngciphekweni ngolo hlobo? Ngaphambi kokuba ndikucacisele, makhe ndikuthele vandla ngemvelaphi yam.
MALUNGA nowe-1925,utata wadibana naBafundi beBhayibhile (njengoko amaNgqina kaYehova ayesaziwa njalo ngoko). Kungekudala waba ngomnye wabo yaye wadlulisela iinkolelo zakhe kubantakwabo noodade wabo abasibhozo, nabayamkela bonke inyaniso yeBhayibhile. Nabazali bakhe benjenjalo. Emva kwexesha, watshata, ibe ndazalwa ngowe-1929 eAgrinio, eGrisi.
Hayi indlela ekwakukubi ngayo eGrisi ngaloo minyaka! Kuqala kwakulawula uzwilakhe okhohlakeleyo uNjengele Metaxas. Kwandula ke, ngowe-1939, kwaqhambuka IMfazwe Yehlabathi II, ibe kungekudala emva koko ilizwe lathinjwa ngamaNazi. Kwakugquba izifo nenxele likaKhetsekile. Izidumbu zazithuthwa ziye kulahlwa ngeekiriva ezincinane. Ubungendawo ehlabathini babucace gca, njengokuba kwakunjalo nangemfuneko yoBukumkani bukaThixo.
Ubomi Benkonzo Yokuzinikela
Ngomhla ka-Agasti 20, 1942, njengoko sasihlanganisene njengeqela kwintlanganiso eyayingaphandle kweTesalonika, umveleli wethu owongamelayo walatha kwinqwelo-moya yemfazwe yaseBritani eyayilahlela iibhombu esixekweni waza wagxininisa kwindlela esakhuseleka ngayo ngokuthobela umyalelo wokuba ‘singakutyesheli ukuhlanganisana kwethu ndawonye.’ (Hebhere 10:25) Ngeso sihlandlo, sasihlanganisene ngakunxweme lolwandle, yaye ndandiphakathi kwabo babeza kubhaptizwa. Ukuphuma kwethu emanzini, sema emgceni, baza abazalwana noodade bethu abangamaKristu bacula besincoma ngesigqibo esasisenzile. Andisokuze ndiyilibale loo imini!
Kungekudala nje emva koko, ngoxa mna nenye inkwenkwe sasityelela abantu kubulungiseleli bethu bendlu ngendlu, sabanjwa ngamapolisa aza asisa kwisikhululo sawo. Ukusibonisa into yokuba sasigqalwa njengamaKomanisi yaye umsebenzi wethu wokushumayela wawuvaliwe, asibetha aza athi: “UYehova noStalin yintw’ enye leyo, zidengendini!”
Kwakugquba imfazwe yamakhaya ngoko eGrisi, yaye ubuKomanisi babuthiywe bungafunwa nokubonwa. Kusuku olulandelayo saya kudluliswa ngasemakhaya sikhonkxiwe, ngathi sasizizaphuli-mthetho. Kodwa ezo yayingekuphela kweemvavanyo endajamelana nazo.
Ukuvavanywa Kokholo Esikolweni
Ebutsheni bowe-1944, ndandisengumntwana wesikolo, yaye amaNazi aqhubeka ethimba iTesalonika. Ngenye imini esikolweni, umfundisi wobuOthodoki bamaGrike, owayengunjingalwazi wethu kwezonqulo, wandixelela ukuba ndandiza kuvavanywa kwisifundo saloo mini. “Akalolungu lamaKristu obuOthodoki,” batsho abanye abantwana.
“Uyintoni?” wabuza unjingalwazi.
Ndaphendula ndathi: “Ndingomnye wamaNgqina kaYehova.”
“Ingcuka phakathi kweegusha,” wakhwaza watsho, njengoko wayendibamba waza wandiqhwaba ngempama.
Ndizicingela ndathi: ‘Kwenzeka njani oku, ukuba ingcuka ilunywe yigusha?’
Kwiintsuku ezimbalwa kamva, phantse abangama-350 kuthi sasihleli ezitafileni zethu kwisidlo sasemini. Umphathi wathi: “UNeros uza kusithandazela.” Ndaphindaphinda oko kubizwa ngokuba ‘nguBawo Wethu Osezulwini,’ umthandazo uYesu awawufundisa abalandeli bakhe, njengoko uchazwe kuMateyu 6:9-13. Oku akazange akuthande umphathi, ngoko evath’ iqaqa wandibuza ekwisihlalo sakhe apho etafileni: “Kutheni uthandaza ngale ndlela?”
Ndathi: “Kungenxa yokuba ndingomnye wamaNgqina kaYehova.” Kwakhona wandithi nqaku waza wandiqhwaba ngempama. Kamva ngaloo mini omnye umfundisi-ntsapho wandibizela eofisini yakhe waza wathi: “Wenze kakuhle, Neros, uze ubambelele nkqi koko ukukholelwayo, kwaye unganikezeli.” Ngobo busuku, utata wandikhuthaza ngamazwi ompostile uPawulos athi: “Bonke abo banqwenela ukuphila ngozinikelo lobuthixo ngokunxulumene noKristu Yesu nabo baya kutshutshiswa.”—2 Timoti 3:12.
Xa ndagqibayo esikolweni semfundo ephakamileyo, kwafuneka ndikhethe umsebenzi endandiza kuwufundela. Ngenxa yokruthakruthwano lwamakhaya olwalukho eGrisi, kwakhona kwafuneka ndijamelane nembambano yobundilele bamaKristu. (Isaya 2:4; Mateyu 26:52) Ekugqibeleni, ebutsheni bowe-1952, ndagwetywa iminyaka engama-20 entolongweni ngokungavumi ukulwa ngelo xesha lalinzima kwimbali yamaGrike.
Ukuvavanywa Ngenxa Yobundilele BamaKristu
Ngoxa ndandivalelwe kwiinkampu zomkhosi zaseMesolóngion naseKorinte, ndaba nethuba lokucacisela abaphathi-mkhosi ukuba isazela sam esiqeqeshwe ngeBhayibhile asiyi kundivumela ukuba ndibe lijoni ndize ndixhase umzabalazo wezobupolitika. Ndisalatha kweye-2 kuTimoti 2:3 ndathi: “Sele ndilijoni likaYesu.” Xa ndacelwa ukuba ndiphinde ndicingisise, ndathi isigqibo sam asizange senziwe ngokungxama kodwa senziwa emva kokucingisisa nzulu nangenxa yokuzahlulela kwam kuThixo ukuze ndenze ukuthanda kwakhe.
Ngenxa yoko, kwafuneka ndenze umsebenzi wesinyanzelo, kuqakathwa usuku ngaphambi kokuba ndifumane ukutya kangangeentsuku ezingama-20, yaye ndilala kumgangatho wesamente kwisisele esincinane esiphantse sibe yimitha ububanzi neemitha ezimbini ubude. Yaye kwesi sisele ndandinamanye amaNgqina amabini! Kwakungeli xesha, ndikwinkampu yaseKorinte, endabizwa ngalo esiseleni sam ukuze ndiye kubulawa.
Njengoko sasisiya kwindawo ekubulawelwa kuyo, igosa landibuza, “Ngaba akukho nto uza kuyithetha?”
Ndaphendula ndathi: “Hayi.”
“Ngaba akuzukuyibhalela intsapho yakowenu?”
Kwakhona ndaphendula ndathi: “Hayi. Sele besazi ukuba ndisenokubulawa apha.”
Saya kufika entendelezweni yaloo ndawo, yaye ndayalelwa ukuba ndayame ngodonga. Kunokuba liyalele ukuba amajoni andidubule, elo gosa lawayalela lisithi, “Mngeniseni ngaphakathi.” Le yayiyindlela nje yokundoyikisa ngokubulawa, kuvavanywa isigqibo endisenzileyo.
Kamva, ndathunyelwa kwisiqithi saseMakrónisos, apho ndandingavumelekanga ukuba ndibe nazo naziphi na iincwadi ngaphandle kweBhayibhile. AmaNgqina ali-13 ayevalelwe kwindlwana encinane ohluliwe kwizaphuli-mthetho zamabanjwa ayephantse abangama-500. Sekunjalo ngandlel’ ithile iincwadi zazithutyeleziswa de zize kufikelela kuthi. Ngokomzekelo, ngenye imini ndathunyelelwa ibhokisi yeeloukoúmia (ilekese ethandwayo). Abahloli baberhalela nje ukuva loo loukoúmia kangangokuba abazange balise so iphephancwadi IMboniselo elalifihlwe ngaphantsi kwayo. “Amajoni adla loo loukoúmia, kodwa thina ‘sadla’ IMboniselo!” latsho elinye iNgqina.
Umbhalo wencwadi entsha eyayisandul’ ukukhululwa ngoko ethi What Has Religion Done for Mankind? sawufumana, laza ibanjwa eliliNgqina elalisazi isiNgesi layiguqulela. Sasifundisisa kunye IMboniselo, siqhuba iintlanganiso zethu ngokufihlakeleyo. Intolongo sasiyijonga njengesikolo, njengethuba lokusomeleza ngokomoya. Ngaphezu koko, sasivuya kuba sasisazi ukuba ukugcina kwethu ingqibelelo kwakumvuyisa uYehova.
Intolongo yokugqibela endandivalelwe kuyo yayiseTýrintha empuma Pelopónnisos. Apho ndaphawula ukuba kukho umlindi owayendiqwalasele ngenyameko njengoko ndandiqhuba isifundo seBhayibhile nelinye ibanjwa. Hayi indlela endothuka ngayo kukudibana nalo mlindi emva kweminyaka eTesalonika! Wayesele eliNgqina. Kamva, omnye wabantwana bakhe wathunyelwa entolongweni, engayi kusebenza njengomlindi kodwa njengebanjwa. Wayebanjelwe kanye oko ndandikubanjelwe.
Ukuhlaziywa Komsebenzi Emva Kokukhululwa
Ndathothoza iminyaka emithathu kuphela yeso sigwebo sasiyiminyaka engama-20. Emva kokukhululwa kwam ndaya kuhlala eAthens. Noko ke, kungekudala ndahlaselwa sisifo sokukrala kwemiphunga yaye kwanyanzeleka ukuba ndibuyele eTesalonika. Ndalala ngandletyana nye kangangeenyanga ezimbini. Kamva ndadibana nenenekazi elihle eligama linguKoula, saza satshata ngoDisemba wowe-1959. Ngowe-1962 waqalisa ukukhonza njengovulindlela, njengoko bebizwa njalo abalungiseleli bexesha elizeleyo bamaNgqina kaYehova. Kwiminyaka emithathu kamva ndamthelela kumsebenzi wobuvulindlela.
NgoJanuwari wowe-1965, sabelwa kumsebenzi wesiphaluka, sityelela amabandla ukuze siwomeleze ngokomoya. Kwakwelo hlobo saba nelungelo lokubakho okokuqala kwindibano enkulu, eyayiseVienna, eOstriya. Yayingafani nezo sasiba nazo eGrisi nalapho kwakufuneka sihlanganisane ngokufihlakeleyo emahlathini ngenxa yokuvalwa komsebenzi wethu. Ngasekupheleni kowe-1965, samenyelwa ukuya kusebenza kwiofisi yesebe lamaNgqina kaYehova eAthens. Noko ke, ngenxa yempilo enkenenkene yezinye zezizalwane zam, kwafuneka sibuyele eTesalonika ngowe-1967.
Ngoxa sasithwele iimbopheleleko zentsapho, sahlala sixakekile kumsebenzi wokushumayela iindaba ezilungileyo. Xa ndandithetha nomzala wam uKostas, ndamchazela ngobuhle bentlangano kaThixo kwanothando, umanyano nendlela emthobela ngayo uThixo. Wathi, “Ezi zinto beziya kuba ntle gqitha kuphela nje ukuba uThixo ebekho.” Wavuma ukuba sihlolisise enoba uThixo ukho kusini na. Ndakhankanya nokuba sasiza kuya kwindibano yezizwe ngezizwe yamaNgqina kaYehova eNuremberg, eJamani, ngoAgasti 1969. Wacela ukuhamba nathi, yaye umhlobo wakhe uAlekos, owayefunda nathi iBhayibhile, naye wafuna ukuhamba.
Hayi indlela eyayibalasele ngayo loo ndibano yaseNuremberg! Indibano yayiqhutyelwe kubhazabhaza webala apho uHitler wayebhiyozela khona uloyiso lwemikhosi yakhe. Inani lababekho laya kufikelela incopho yabangaphezu kwe-150 000, yaye sasibonakalisa umoya kaYehova kwiinkqubano zethu zonke. Kungekudala emva koko bobabini uKostas noAlekos babhaptizwa. Bobabini ngoku bakhonza njengamaKristu angabadala, yaye neentsapho zabo zingamaNgqina.
Ndaqalisa ukufunda nenenekazi elalinomdla. Umyeni walo wasichazela ukuba ufuna ukuphanda ngeenkolelo zethu, yaye kungekudala emva koko wandazisa ukuba umeme uMnu. Sakkos othile, umfundi wezakwalizwi wobuOthodoki bamaGrike, ukuze sibe nengxoxo. Umyeni wakhe wayefuna ukubuza imibuzo ethile kuthi sobabini. UMnu. Sakkos weza, ehamba nomfundisi. Le ndoda sasiyityelela yaqalisa ngokuthi, “Kuqala, ndingathanda ukuba uMnu. Sakkos andiphendule imibuzo emithathu.”
Ithe qhiwu inguqulelo yeBhayibhile esasiyisebenzisa kwiingxubusho zethu, le ndoda yabuza, “Umbuzo wokuqala uthi: Ngaba le yiBhayibhile yokwenene, okanye yiBhayibhile yamaNgqina?” UMnu. Sakkos waphendula echaza ukuba yayiyinguqulelo ethembekileyo, yaye wawachaza amaNgqina kaYehova ‘njengabathandi beBhayibhile.’
Ihlabela mgama, le ndoda yabuza, “Umbuzo wesibini uthi: Ngaba amaNgqina kaYehova ngabantu abaziphethe kakuhle?” Enyanisweni, wayefuna ukwazi ukuba luhlobo olunjani lwabantu umfazi wakhe awayeqalise ukunxulumana nalo. Lo mfundi wezakwalizwi waphendula emchazela ukuba ngokuqinisekileyo ngabantu abaziphethe kakuhle.
Le ndoda iqhubeka yathi, “Umbuzo wesithathu uthi: Ngaba amaNgqina kaYehova ayahlawulwa?” “Hayi,” waphendula watsho lo mfundi wezakwalizwi.
“Ndizifumene iimpendulo kwimibuzo yam, yaye ndenze isigqibo,” yaqukumbela yatsho le ndoda. Emva koko yaqhubeka nesifundo sayo seBhayibhile ibe kungekudala yabhaptizwa njengomnye wamaNgqina kaYehova.
Ubomi Obuvuza Ngokungathethekiyo
Ndaqalisa ukukhonza kumsebenzi wesiphaluka kwakhona ngoJanuwari 1976. Kwiminyaka enokuba mithandathu kamva, ndafumana ilungelo lokukhokela kuhlobo olutsha lokushumayela eGrisi—ukunikela ubungqina esitratweni. Ngo-Oktobha 1991, mna nomfazi wam saqalisa ukukhonza njengoovulindlela abakhethekileyo. Kwiinyanga ezimbalwa kamva, kwafuneka ndenziwe utyando lwentliziyo kuxokonyezelelwa imithambo emine, nendivuyiswa yinto yokuba lwaphumelela. Ngoku ndibuyele empilweni, yaye ndiye ndakwazi ukubuyela kumsebenzi wokushumayela ixesha elizeleyo. Kwakhona ndikhonza njengomdala kwelinye lamabandla aseTesalonika, ndisebenza neKomiti Yokunxibelelana Nezibhedlele yasekuhlaleni ukuze kuncedwe abo bagulayo.
Njengoko ndikhangele ngasemva kubomi bam, ndiyayiqonda indlela okwanelisa ngayo ukwenza oko kuvuyisa uBawo wethu osezulwini. Ndiyoliswa kukuba ndasamkela isimemo sakhe esithi: “Yiba nobulumko, nyana wam, uyivuyise intliziyo yam; ukuze ndimphendule ngezwi ondingcikivayo.” (IMizekeliso 27:11) Kundivuyisa ngokwenene ukubona ulwando lwabantu abanyanisekileyo besiza kwintlangano kaYehova ehlabathini lonke. Ukuba nesabelo ekukhululeni abantu ngenyaniso yeBhayibhile yaye ubabonise ithemba lobomi obungunaphakade kwihlabathi elitsha lobulungisa lilungelo lokwenene!—Yohane 8:32; 2 Petros 3:13.
Sisoloko sikhuthaza abakhonzi bakaYehova abaselula ukuba inkonzo yexesha elizeleyo bayenze usukelo lwabo. Ngokwenene, ukuthembela kuYehova nokufumana uvuyo lokwenene ngokuvuyisa intliziyo yakhe bobona bomi banelisayo ubani anokubufumana!—IMizekeliso 3:5; INtshumayeli 12:1.
[Umfanekiso okwiphepha 21]
(Ukusuka ekhohlo ukusa ekunene)
Ukusebenza kwikhitshi laseBheteli ngowe-1965
Ndinikela intetho ngowe-1970 ngoxa umsebenzi wethu wokushumayela wawuvaliwe
Mna nomfazi wam ngowe-1959
[Umfanekiso okwiphepha 23]
Mna nomfazi wam, uKoula