Unokukubonakalisa Njani Ukuthobeka Kokwenene?
UTHIXO uyakuxabisa ukuthobeka kokwenene. UYakobi wabhala: “UThixo ubachasile abo banekratshi, kodwa ubanika ububele obungasifanelanga abo bathobekileyo.” (Yakobi 4:6) Apha kusenokwenzeka ukuba uYakobi wayebhekisela kwiingcamango eziliqela ezikwiZibhalo zesiHebhere. “Ngokuba noko uYehova aphakamileyo, uyambona othobekileyo; ke yena oziphakamisayo umazi nakude.” “Amehlo aqwayingileyo esintu othotywa, noqhankqalazo lwamadoda lusibekeke; nguYehova yedwa owoba yingxonde.” “Ngokubhekisela kubagxeki, [uThixo] uyabagxeka; ke abalulamileyo uyabababala.”—INdumiso 138:6; Isaya 2:11; IMizekeliso 3:34.
Kwakhona umpostile uPetros wakhuthaza ukuthobeka. Wabhala: “Nonke bhinqani ukuthobeka kwengqondo omnye ngakomnye, ngenxa yokuba uThixo ubachasile abo banekratshi, kodwa ubanika ububele obungasifanelanga abo bathobekileyo.”—1 Petros 5:5.
Umzekelo KaKristu Wokuthobeka
Usenokubuza, Yintoni ebalulekileyo okanye oyifumanayo xa uthobekile? Kumntu ozabalazela ukuba ngumKristu eyona mpendulo yile—ukuthobeka kuthetha ukufana noKristu. UYesu wakubonakalisa ukuthobeka ngokwamkela isabelo esingaqhelekanga sokuza emhlabeni esuka emazulwini kwindawo ephakamileyo waza wangumntu othobekileyo, ongaphantsi kweengelosi. (Hebhere 2:7) Nangona wayenguNyana kaThixo, wanyamezela ukujongelwa phantsi ziintshaba zakhe zonqulo. Wazola xa wayelingwa, kwanaxa wayenako ukucela izigidi zeengelosi ukuba zimncede.—Mateyu 26:53.
Ekugqibeleni, uYesu wahlaziswa ngokuxhonywa kwisibonda sentuthumbo, sekunjalo wahlala ethembekile kuYise. Ngaloo ndlela, uPawulos wakwazi ukubhala ngaye athi: “Hlalani ninesi simo sengqondo wayenaso noKristu Yesu, owathi, nangona wayekubume bukaThixo, akanikela ngqalelo kurhwaphilizo, olulolu, lokuba wayefanele alingane noThixo. Hayi khona, kodwa waziqongqotha waza wathabatha ubume bekhoboka yaye waba ngokwemfano yabantu. Ngokungakumbi kunoko, xa wazifumana ekwimo yomntu, wazithoba waza wathobeka de kwafikelela ekufeni, ewe, ukufa kwisibonda sentuthumbo.”—Filipi 2:5-8.
Ngoko ke sinokukubonakalisa njani ukuthobeka kokwenene? Ngendlela evakalayo, sinokusabela njani ngokuthobeka kunokubonakalisa ikratshi?
Indlela Asabela Ngayo Umntu Othobekileyo
Masicinge ngokuthobeka xa kusetyenzwa, enoba kusemsebenzini okanye kukwinkonzo yamaKristu. Ukuze umsebenzi wenziwe ngendlela ephumelelayo, kusenokufuneka abaveleli, abaphathi neentsumpa. Kumele kubekho oza kwenza izigqibo. Usabela njani? Ngaba uqiqa ngelithi, “Ucinga ukuba ungubani ukuba andixelele into emandiyenze? Ndineminyaka ndisebenza apha ngaphambi kwakhe.” Ewe, ukuba unekratshi, kuya kuba nzima kuwe ukuzithoba phantsi kwakhe. Kwelinye icala, umntu othobekileyo uzama ngandlela zonke ukuba ‘angenzi nanye into ngokusukuzana okanye ngokuzigwagwisa, kodwa ngokuthobeka kwengqondo ubagqala abanye njengabongamileyo kunaye.’—Filipi 2:3.
Usabela njani xa icebiso lisuka kumntu omncinane kunawe okanye kwibhinqa? Ukuba uthobekile, ubuncinane uya kuliphulaphula. Ukuba unekratshi, uya kulicaphukela okanye uligatye ngoko nangoko. Ngaba ubuya kufuna ukunconywa okanye nokukhohliswa okuza kukushiya udandathekile okanye ubuya kufuna isiluleko sokwenene ukuze wakheke?—IMizekeliso 27:9; 29:5.
Ngaba unokujamelana nocelomngeni lokubandezeleka? Ukuthobeka kuya kukunceda ujamelane nobunzima uze unyamezele, kwananjengokuba uYobhi wenzayo. Ukuba unekratshi, uya kukhathazeka yaye usenokuvukela nakwiimeko ezinzima nocingela ukuba zizinyeliso.—Yobhi 1:22; 2:10; 27:2-5.
Ukuthobeka Kunothando Yaye Kuyaxolela
Kwabanye abantu kunzima ukuthi, “Ndicela uxolo. Ndenze impazamo. Ubunyanisile.” Ngoba? Banekratshi gqitha! Ukanti, amaxesha amaninzi ukuzithoba ucele uxolo kusenokuphelisa ingxwabangxwaba ngokukhawuleza.
Ngaba ukulungele ukuxolela xa umntu othile ekonile? Okanye, ngaba ngenxa yekratshi, uba nenzondo, mhlawumbi kangangeentsuku okanye iinyanga, ungafuni ukuthetha nalowo ukholelwa kukuba ukonile? Ngaba ude uzimisele uqhubeke nalo mlo ngenxa yokuzama ukuziphindezela? Abanye abantu baye bafa kule milo. Abanye baye bakhetha ukuthetha kakubi ngaloo mntu. Ngokwahlukileyo koko, umntu othobekileyo unothando yaye uyaxolela. Ngoba? Ngokuba uthando alugcini ingxelo yobubi. UYehova wayekulungele ukuwaxolela amaSirayeli ukuba ayeza kuphelisa ikratshi awayenalo. Umlandeli othobekileyo kaYesu ukulungele ukuxolela, ngokuphindaphindiweyo!—Yoweli 2:12-14; Mateyu 18:21, 22; 1 Korinte 13:5.
Umntu othobekileyo ‘uyakhokela ekuboniseni imbeko omnye komnye.’ (Roma 12:10) INew International Version ifundeka ngolu hlobo: “Hlonelani abanye ngaphezu kweziqu zenu.” Ngaba uyabancoma abanye ngobuchule neziphiwo abanazo? Okanye ngaba usoloko ufumana isiphene esigqwalisa indlela abaziwa ngayo? Ewe, ngaba uyakwazi ukubancoma ngokunyanisekileyo abanye abantu? Ukuba unengxaki kulo mbandela, mhlawumbi ukuzixhalela nekratshi yingxaki onayo.
Umntu onekratshi akanamonde. Umntu othobekileyo unomonde yaye uzeka kade umsindo. Kuthekani ngawe? Ngaba uyafutheka nanini na ucinga ukuba uye waphathwa ngendlela engafanelekanga? Ukusabela njalo kuchasene nokuzeka kade umsindo. Ukuba uthobekile, akuyi kuzicingela kakhulu. Khumbula oko kwenzekayo xa abafundi bakaYesu bazicingela gqitha—kwabakho ingxwabangxwaba yokuba ngubani oza kuba ngobalulekileyo. Balibala ukuba bonke ‘babengamakhoboka angancedi nganto’!—Luka 17:10; 22:24; Marko 10:35-37, 41.
Umbhali ongumFrentshi uVoltaire wakuchaza ukuthobeka ngokuthi “kukuthobeka komphefumlo . . . iyeza lokuphelisa ikratshi.” Ewe, ukuthobeka kukuthobeka kwengqondo. Umntu othobekileyo unomoya ophantsi, akanakratshi. Unentlonelo enzulu yaye unembeko.
Ngoko ke kutheni umele uzabalazele ukuthobeka? Kungenxa yokuba uThixo uyakuthanda ukuthobeka yaye kusinceda sifumane ukhokelo lobuthixo. Ngokuyinxenye ngenxa yokuthobeka kukaDaniyeli, uYehova wamgqala lo mprofeti njengomntu ‘ongonqwenelekayo’ waza wathumela ingelosi kuye ngombono! (Daniyeli 9:23; 10:11, 19) Ukuthobeka kuzisa iingenelo ezininzi. Kukwenzela abahlobo bokwenene abakuthandayo. Okona kubaluleke ngakumbi, kuzisa iintsikelelo zikaYehova. “Umvuzo wolulamo [ukuthobeka, NW] kukoyika uThixo, bubutyebi, nozuko, nobomi.”—IMizekeliso 22:4.
[Umfanekiso okwiphepha 7]
Ilizwi nje elilula lokucela uxolo linokwenza izinto zibe lula ebomini