Abavakalisi Bobukumkani Bayabalisa
Iphulo Lokufuna UThixo Oyinyaniso Liyavuzwa
KWINKULUNGWANE yeshumi ngaphambi kweXesha lethu Eliqhelekileyo, ubukumkani bezizwe ezibini zakwaYuda babuzaliswe lunqulo lobuxoki. Noko ke, phakathi kolo nqulo lwezithixo olwalugqugqisile, kukho indoda eyayinentliziyo elungileyo phambi koThixo. Igama layo yayinguYehoshafati. Umprofeti uYehu wathi ngokuphathelele yona: “Kukho izinto ezintle ezifumanekileyo kuwe; ngokuba . . . [wayilungisa intliziyo yakho ukuba ufune uThixo oyinyaniso, NW].” (2 Kronike 19:3) Ngokufanayo namhlanje, kula “maxesha amanqam ekunzima ukuqhubana nawo,” izigidi zabantu ziye ‘zazilungisa iintliziyo zazo’ ukuze zifune uThixo oyinyaniso, uYehova. (2 Timoti 3:1-5) Oku kuboniswa ngala mava alandelayo aseTogo, eNtshona Afrika.
UCasimir wayehamba isikolo samaKatolika yaye wadla uMthendeleko okokuqala xa wayeneminyaka esithoba ubudala. Noko ke, akuba neminyaka eli-14, uCasimir wayeka ukuya ecaweni. Oku kwabangela ukuba ahlale esoyika kuba wayecinga ukuba ukuphoswa lidini leMisa kwakuya kuphumela ekubeni aye esihogweni esivuthayo, okanye ubuncinane kwintlambululo-miphefumlo.
Esikolweni uCasimir wazibandakanya neqela lolutsha elalihlanganisana kanye ngeveki ukuze lifundisise iBhayibhile. Waqalisa nokuzifundela iBhayibhile eyedwa. Ngesinye isihlandlo uCasimir wafunda kwincwadi yeSityhilelo ngerhamncwa lasendle eloyikekayo elaliphuma elwandle. (ISityhilelo 13:1, 2) Xa wabuza inkokeli yelo qela lalifundisisa iBhayibhile ngalo, waxelelwa ukuba elo rhamncwa lelokoqobo yaye liya kuphuma ngokwenene elwandle. Le nkcazelo yamoyikisa uCasimir kuba wayengahlali kude noNxweme lweAtlantiki. Wayeqinisekile ukuba wayeya kuba phakathi kwamaxhoba okuqala elo rhamncwa lasendle.
UCasimir waqalisa ukugcina imali yakhe khon’ ukuze asabele kwintlango esemantla ukuze asinde kwelo rhamncwa lasendle. Waxelela omnye afunda naye eklasini ngoko akucebayo. Ekubeni wayeliNgqina likaYehova, lowo afunda naye wamqinisekisa ukuba kwakungayi kubakho rhamncwa lokoqobo linjalo liza kuphuma elwandle. Kungekudala nje emva koko, uCasimir wamenyelwa kwiintlanganiso kwiHolo YoBukumkani. Wazinandipha iintlanganiso waza waqalisa ukubakho rhoqo. Wasamkela nesifundo seBhayibhile sasekhaya.
Njengoko uCasimir wayesenza inkqubela kwisifundo sakhe, inkcaso yentsapho yema ngeenyawo. Intsapho yakowabo yayinqula izinyanya yaye isidla inyama engophiswanga esele emadinini. Xa uCasimir ngobuchule walayo ukudla loo nyama, watyityimbiselwa umnwe waza wagxothwa. UCasimir wahlala ezolile, yaye wayesongelwa rhoqo. Noko ke, kangangeenyanga ezintathu, leyo yayikuphela kwenyama eyayiphekwa kwizidlo zentsapho. Kwakunzima kuCasimir ukufumana into eyaneleyo yokutya, kodwa wakunyamezela oko kwanezinye iinzingo.
UCasimir waqhubeka esenza inkqubela yokomoya ukusa kwinqanaba lokuba azahlulele waza wabhaptizwa. Kamva, wanconyelwa njengesicaka solungiselelo waza waya kwiklasi yesine yeSikolo Sokuqeqesha Abalungiseleli eTogo. Ngoku, unandipha ukusebenza njengetsha-ntliziyo kwisebe lalapho.
Ewe, hayi indlela angqineke eyinyaniso ngayo kwiinkalo ezininzi amazwi kaKumkani uDavide athi: “Ukuba uthe wamfuna [uYehova], wofunyanwa nguwe.”—1 Kronike 28:9.
[Imifanekiso ekwiphepha 8]
UCasimir (ngasekunene) unandipha ukusebenza njengetsha- ntliziyo kwisebe lalapho