Ngaba Uzibonakalisa Unombulelo?
Kwikhaya labavangeli basemazweni kwiNtshona Afrika, kwakukho inja egama linguTeddy. Xa umntu othile waphosela uTeddy iqatha lenyama, waliginya ngokukhawuleza, engakhange alingcamle okanye alihlafune. Ekhefuzela kwelo langa ligqats’ ubhobhoyi, walindela ukuba aphinde aphoselwe okunye ukudla. Xa yaphelayo inyama, waguquka waza wahamba indlela yakhe.
UTeddy akazange abonise nomcinane umbulelo ngoko wakufumanayo. Akakho umntu owayelindele ukuba enjenjalo. Ngapha koko, wayeyinja nje kuphela.
NGOKUPHATHELELE umbulelo, silindela okungakumbi ebantwini kunokuba kunjalo ngezilwanyana. Ngokuqhelekileyo siyadana. Abantu abaninzi bayakuxhakamfula nje oko banokukufumana ebomini baze bafune okungakumbi. Noku ke akumangalisi. IBhayibhile yaxela kwangaphambili ukuba ngemihla yokugqibela, abantu babeya kuba ngabangenambulelo.—2 Timoti 3:1, 2.
Noko ke, abakhonzi bakaThixo bahlukile. Bayasithobela isiluleko sompostile uPawulos, owabongoza abo akhonza nabo esithi: “Zibonakaliseni ninombulelo.”—Kolose 3:15.
UYehova Uzibonakalisa Enombulelo
UYehova uThixo wasimisela umzekelo obalaseleyo ngokubonisa uxabiso. Qwalasela indlela abagqala ngayo abakhonzi bakhe abathembekileyo. Ephefumlelwe, uPawulos wawabhalela oku amaKristu angamaHebhere: “UThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe, ngokuthi nibalungiselele abangcwele nize niqhubeke nibalungiselela.”—Hebhere 6:10.
Kukho imizekelo eliqela ebonakalisa ukuba uYehova unoxabiso ngabakhonzi bakhe abathembekileyo. Wamsikelela uAbraham ngokwandisa imbewu yakhe, ukuze ‘ibe njengeenkwenkwezi zezulu, nanjengentlabathi eselunxwemeni lolwandle.’ (Genesis 22:17) Ebonakalisa uxabiso ngokuthembeka kukaYobhi xa wayelingwa, uYehova akazange abuyisele nje kuphela ubutyebi obuninzi bukaYobhi kodwa ‘baphindaphindwa kabini.’ (Yobhi 42:10) Ukuqhubana kukaYehova nabantu ebudeni beenkulungwane kuye kwangqina ubunyaniso bamazwi athi: “Ngokuba uYehova, amehlo akhe asingasinga ehlabathini lonke, ukuba azomelezele abantliziyo ziphelele kuye.”—2 Kronike 16:9.
Uxabiso notyekelo analo uThixo lokubavuza abo bazabalazela ukwenza ukuthanda kwakhe ziimpawu ezingundoqo zobuntu bakhe. Ukukuqonda oku kusisiseko sokholo lobuKristu. UPawulos wabhala: “Ngaphandle kokholo akunakwenzeka ukumkholisa kakuhle, kuba lowo uzayo kuThixo umele akholwe ukuba . . . uba ngumvuzi wabo bamfuna ngokunyamekileyo.”—Hebhere 11:6.
Ngokwahlukileyo koko, ukuba uYehova wayengqongqo kuthi waza wasigxeka, sonke ngesasigwetyiwe. Mandulo umdumisi wavakalisa oku: “Ukuba uthe wabugqala ubugwenxa Yehova, ngubani na ongaba nokuma, Nkosi?” (INdumiso 130:3) UYehova unoxabiso yaye akasigxeki. Uyabalondoloza abo bamkhonzayo. Uzibonakalisa enombulelo.
UYesu—Umntu Owayenoxabiso Olunzulu
Ebonisa ngokugqibeleleyo iimpawu zikaYise osemazulwini, uYesu Kristu wabonakalisa umbulelo ngezinto abazenzayo abanye elukholweni. Khawucinge ngoko kwakhe kwenzeka etempileni eYerusalem: “Ke kaloku njengoko [uYesu] wayekhangela wabona izityebi ziphosa izipho zazo kwizikhongozelo zobuncwane. Wandula ke wabona umhlolokazi othile osisisweli ephosa iingqekembe ezincinane ezimbini zexabiso elincinane kakhulu, yaye wathi: ‘Ngokwenyaniso ndiyanixelela ukuba, Lo mhlolokazi, nangona elihlwempu, uphose ngaphezu kokuba bonke benjenjalo. Kuba bonke aba baphose izipho ngokuphuma kwintsalela yabo, kodwa lo mfazi ekusweleni kwakhe uphose zonke izinto zokuphila abenazo.’ ”—Luka 21:1-4.
Xa ucinga ngemali, loo mnikelo wawumncinane, ingakumbi xa uthelekiswa nalowo wezityebi. Inkoliso yabo babekho kusenokwenzeka ukuba ayizange imbone nokumbona. Ukanti, uYesu wambona loo mhlolokazi. Wayeyazi imeko yakhe. UYesu wambona waza wanoxabiso.
Esinye isiganeko sibandakanya omnye umama owayesisityebi, uMariya. Njengokuba uYesu wayengqendevile esidlweni, wagalela ioli eqholiweyo exabiso likhulu ezinyaweni nasentlokweni kaYesu. Abanye basigxeka isenzo sakhe, beqiqa ngelithi le oli ngeyayithengisiwe ize imali incede abangamahlwempu. Wasabela njani uYesu? Wathi: “Myekeni. Kutheni nizama ukumenzela inkathazo nje? Wenze isenzo esihle kum. Enyanisweni ndithi kuni, Naphi na apho iindaba ezilungileyo zishunyayelwa khona kulo lonke ihlabathi, oko lo mfazi akwenzileyo kuza kuxelwa njengokukhunjulwa kwakhe.”—Marko 14:3-6, 9; Yohane 12:3.
UYesu akazange ngokugxekayo akhalazele ukuba ioli exabisekileyo ingazange isetyenziselwe enye injongo. Wasixabisa isenzo sikaMariya sokuba nothando nokholo. Esi siganeko sibhaliwe eBhayibhileni njengesikhumbuzo sesenzo sakhe esihle. Ezi ngxelo nezinye zibonisa ukuba uYesu wayeyindoda enoxabiso olunzulu.
Ukuba ungumkhonzi kaThixo, unokuqiniseka ukuba uYehova uThixo noYesu Kristu bayixabisa ngokwenene imizamo yakho yokukhuthaza unqulo olunyulu. Ulwazi olunjalo lusisondeza kubo luze lusikhuthaze ukuba sibaxelise ngokuzingqina sinombulelo.
Umoya KaSathana Wokugxeka
Ngoku masiqwalasele omnye umzekelo womntu ongabonakalisi mbulelo—uSathana uMtyholi. Ukungabi naluxabiso kukaSathana kwaba negalelo ekuvukeleni kwakhe uThixo okwaphumela kwintlekele.
Ekubeni wayekhulise kuye umoya wokugxeka nowokungoneliseki, uSathana waqalisa ukuphembelela nabanye. Cinga ngeziganeko ezenzeka kumyezo wase-Eden. UYehova wayedale indoda nomfazi bokuqala, wababeka kumyezo ofana neparadesi, waza wabaxelela oku: “Yonke imithi yomyezo ungayidla uyidle.” Kodwa kwakukho umqathango nje omnye. UThixo wathi: “Ke wona umthi wokwazi okulungileyo nokubi uze ungawudli; kuba mhlana uthe wawudla uya kufa.”—Genesis 2:16, 17.
Noko ke, kungekudala, uSathana wacel’ umngeni ukunyaniseka kukaYehova. Ngokuyinxenye, wayefuna ukumenza uEva angabi nambulelo kuYehova kangangokuba ashukumiseleke ukuba amvukele, kanye njengokuba uSathana wamvukelayo. USathana wabuza: “Utshilo na okunene uThixo ukuthi ze ningadli kuyo yonke imithi yomyezo?” (Genesis 3:1) Eyona nto wayeyithetha kukuba uThixo wayebandeza uEva into ethile exabisekileyo, into eyayiza kuvula amehlo akhe aze afane noThixo. Kunokuba abonakalise umbulelo ngazo zonke iintsikelelo uYehova amthululele zona, uEva wanqwenela ukufumana oko kwakwalelwe.—Genesis 3:5, 6.
Imiphumo eyintlekele yoku yaziwa ngokubanzi. Nangona wanikwa igama lokuba nguEva “ngokuba engunina wabaphilileyo bonke,” ngenye indlela waba ngunina wabo bonke abafayo. KuAdam bonke abantu baye bazuz’ ilifa isono esibulalayo.—Genesis 3:20; Roma 5:12.
Xelisa UThixo NoKristu
Cinga ngomahluko ophakathi koSathana noYesu. USathana uchazwa ‘njengommangaleli wabazalwana bethu, obamangalela imini nobusuku phambi koThixo wethu.’ (ISityhilelo 12:10) UYesu “uyakwazi kwanokubasindisa ngokupheleleyo abo basondela kuThixo ngaye, ngenxa yokuba usoloko ephila ukuze ababongozele.”—Hebhere 7:25.
USathana umangalela abakhonzi bakaThixo. UYesu uyakuqonda oko yaye uyabathandazela. Njengabo baxelisa uKristu, amaKristu amele azabalazele ukubona okuhle kwamanye, aze abonakalise uxabiso omnye ngomnye. Ngokwenjenjalo, azibonakalisa enombulelo kulowo obalaseleyo ngoxabiso, uYehova uThixo.—1 Korinte 11:1.
[Umfanekiso okwiphepha 17]
UYesu wavakalisa uxabiso ngesenzo esihle sikaMariya