Ngubani Oyena Mntu Ubalulekileyo Ebomini Bakho?
“Nguwe wedwa Oyena Uphakamileyo phezu komhlaba wonke.”—INDU. 83:18.
1, 2. Kutheni singamele sanele nje kukwazi igama likaYehova ukuze sisindiswe?
KUSENOKWENZEKA ukuba wawuqala ukubona igama likaYehova xa waliboniswa kwiNdumiso 83:18. Mhlawumbi wothuka xa ufunda loo mazwi athi: “Ukuze abantu bazi ukuba wena, ogama linguYehova, nguwe wedwa Oyena Uphakamileyo phezu komhlaba wonke.” Alithandabuzeki elokuba ukususela ngoko uye wasebenzisa kanye esi sibhalo ukuze uncede abanye bamazi uThixo onothando, uYehova.—Roma 10:12, 13.
2 Nangona kubalulekile ukuba abantu balazi igama likaYehova, akuphelelanga apho. Phawula indlela umdumisi ayichaza ngayo enye into ebalulekileyo ukuze sisindiswe, xa esithi: “Nguwe wedwa Oyena Uphakamileyo phezu komhlaba wonke.” UYehova ngoyena Mntu ubalulekileyo kwindalo iphela. NjengoMdali wazo zonke izinto, unelungelo lokufuna ukuba zonke izidalwa zakhe zimthobele. (ISityhi. 4:11) Ngenxa yoko, simele sizibuze, ‘Ngubani oyena mntu ubalulekileyo ebomini bam?’ Kubalulekile ukuba sicingisise nzulu ngendlela esiwuphendula ngayo lo mbuzo!
Imbambano Kumyezo Wase-Eden
3, 4. USathana wamkhohlisa njani uEva, yaye waba yintoni umphumo?
3 Indlela obaluleke ngayo lo mbuzo unokubonwa kakuhle kwinto eyenzeka kumyezo wase-Eden. Ingelosi enemvukelo neyathi kamva yaziwa ngokuba nguSathana uMtyholi, yalukuhla ibhinqa lokuqala, uEva, ukuba lanelise iminqweno yalo kunokuba lithobele umthetho kaYehova wokuba lingatyi kumthi othile. (Gen. 2:17; 2 Kor. 11:3) Lawela kweso sihendo laza ngaloo ndlela labonisa ukuba aliluhloneli ulawulo lukaYehova. UEva wayengamgqali uYehova njengoyena Mntu ubalulekileyo ebomini bakhe. Kodwa uSathana wamkhohlisa njani uEva?
4 Xa wayethetha noEva, uSathana wamqhatha. (Funda iGenesis 3:1-5.) Okokuqala, uSathana akazange alisebenzise igama likaYehova. Wasebenzisa isibizo esithi “uThixo.” Ngokwahlukileyo kuSathana, umbhali weGenesis wasebenzisa igama likaYehova kwindinyana yokuqala yeso sahluko. Okwesibini, kunokuba athethe ‘ngomyalelo’ kaThixo, uSathana wabuza oko ‘kuthethwe’ nguThixo. (Gen. 2:16) Esebenzisa le ndlela ichuliweyo, kusenokwenzeka ukuba uSathana wayezama ukubonisa indlela ongabalulekanga ngayo loo myalelo. Okwesithathu, nangona wayethetha noEva kuphela, wasebenzisa isininzi esithi “nize.” Ngoko kusenokwenzeka ukuba wayezama ukumenza azive ebalulekile—ngokungathi unelungelo lokwenzela yena nomyeni wakhe izigqibo. Waba yintoni umphumo? Kuyabonakala ke ngoko ukuba uEva wagqiba kwelokuba athethele nomyeni wakhe xa wathi kwinyoka: “Kwiziqhamo zemithi yomyezo singadla.”
5. (a) USathana wenza uEva ukuba acinge ngantoni? (b) UEva wabonisa ntoni ngokutya kwisiqhamo esalelweyo?
5 USathana wagqwetha nezibakala. Ngendlela engangqalanga wayesithi uThixo umdlel’ indlala uAdam noEva ngokufuna ukuba ‘bangatyi kuyo yonke imithi yomyezo.’ Emva koko, uSathana wenza uEva ukuba acinge ngesiqu sakhe nendlela angabuphucula ngayo ubomi bakhe, abe “njengoThixo.” Ekugqibeleni, wamenza wacinga ngalo mthi nesiqhamo sawo kunokucinga ngolwalamano lwakhe naLowo wamnika zonke izinto. (Funda iGenesis 3:6.) Okubuhlungu kukuba, ngokutya eso siqhamo, uEva wabonisa ukuba uYehova akanguye oyena Mntu ubalulekileyo ebomini bakhe.
Imbambano Ngomhla KaYobhi
6. USathana wayithandabuza njani ingqibelelo kaYobhi, yaye uYobhi wafumana ithuba lokwenza ntoni?
6 Kwiinkulungwane kamva, indoda ethembekileyo uYobhi yafumana ithuba lokubonisa oyena Mntu ubalulekileyo ebomini bayo. Xa uYehova wathetha noSathana ngokugcina kukaYobhi ingqibelelo, uSathana waphendula ngelithi: “UYobhi umoyikela ilize na uThixo?” (Funda uYobhi 1:7-10.) USathana akazange ayiphikise into yokuba uYobhi wayemthobela uThixo. Kunoko, wathandabuza iinjongo zakhe. Ngobuqhetseba watyhola uYobhi esithi ukhonza uYehova ngenxa yokuzingca kungekhona ngenxa yothando. NguYobhi kuphela owayenokuphendula eso sityholo, yaye wanikwa ithuba lokwenjenjalo.
7, 8. Ziziphi izilingo awajamelana nazo uYobhi, yaye wabonisa ntoni ngokunyamezela kwakhe ngokuthembeka?
7 UYehova wavumela uSathana ukuba ahlasele uYobhi ngeentlekele, enye emva kwenye. (Yobhi 1:12-19) Wenza ntoni uYobhi xa iimeko zakhe zitshintsha? Sixelelwa ukuba akazange ‘one okanye abalele nantoni na engafanelekanga kuThixo.’ (Yobhi 1:22) Kodwa uSathana akazange anikezele. Wathi: “Ulusu ngenxa yolusu, yaye yonke into anayo umntu uya kuyinikela ngenxa yomphefumlo wakhe.” (Yobhi 2:4) USathana wayesithi ukuba uYobhi angeva kuye esiqwini, wayenokugqiba kwelokuba asingoYehova oyena Mntu ubalulekileyo ebomini bakhe.
8 UYobhi wayegogekile ngenxa yesifo esibi waza waphenjelelwa nangumfazi wakhe ukuba amqalekise uThixo aze afe. Kamva, abathuthuzeli bakhe abathathu bobuxoki bamtyhola ngehambo embi. (Yobhi 2:11-13; 8:2-6; 22:2, 3) Noko ke, phezu kwako nje ukubandezeleka kwakhe, uYobhi akazange ayilahle ingqibelelo yakhe. (Funda uYobhi 2:9, 10.) Wanyamezela ngokuthembeka ebonisa ukuba uYehova ngoyena Mntu ubalulekileyo ebomini bakhe. Kwakhona uYobhi wabonisa ukuba umntu ongafezekanga angakwazi ukuzingqina zibubuxoki izityholo zikaMtyholi.—Thelekisa iMizekeliso 27:11.
Impendulo KaYesu Egqibeleleyo
9. (a) USathana wazama njani ukulinga uYesu ngeminqweno yenyama? (b) Wenza ntoni uYesu xa wayelingwa?
9 Kungekudala emva kokubhaptizwa kukaYesu, uSathana wazama ukumlukuhla ukuba anelise iminqweno yokuzingca kunokuba acinge ngoYehova njengoyena Mntu ubalulekileyo ebomini bakhe. UMtyholi walinga uYesu ngeendlela ezintathu. Okokuqala, wamlinga ngeminqweno yenyama, esithi makajike amatye abe zizonka. (Mat. 4:2, 3) UYesu wayesele eneentsuku ezingama-40 engatyi yaye wayesifa yindlala. Ngoko uMtyholi wathi makasebenzise kakubi amandla akhe okwenza imimangaliso ukuze agxoth’ iphango. Wenza ntoni uYesu? Ngokungafaniyo noEva, uYesu wacinga ngeLizwi likaYehova waza wasikhaba ngawo omane eso silingo.—Funda uMateyu 4:4.
10. Kwakutheni ukuze uSathana athi kuYesu makaziphose kuqoqo lwetempile?
10 Kwakhona uSathana waphembelela uYesu ukuba abe nomoya wokuzingca. Wathi kuYesu makaziphose kuqoqo lwetempile. (Mat. 4:5, 6) Yayiyintoni injongo kaSathana? USathana wathi ukuba uYesu akenzakali, oko kwakuya kubonisa ukuba “ungunyana kaThixo.” Kuyabonakala ukuba, uMtyholi wayefuna uYesu axhalabele kakhulu igama lakhe, ade acel’ injezu. USathana wayesazi ukuba umntu unokude abeke ubomi bakhe esichengeni ngenxa yekratshi nangenxa yokungafuni ukuhlazeka. USathana wasisebenzisa ngendlela ephosakeleyo isibhalo, kodwa yena uYesu wabonisa ukuba wayeliqonda ngokupheleleyo iLizwi likaYehova. (Funda uMateyu 4:7.) Ngokuxhathisa eso silingo, uYesu waphinda wabonisa ukuba uYehova ngoyena Mntu ubalulekileyo ebomini bakhe.
11. Kwakutheni ukuze uYesu agatye isithembiso sikaMtyholi sokumnika zonke izikumkani zehlabathi?
11 Kwilinge lakhe lokugqibela, uSathana wathembisa uYesu ngokumnika zonke izikumkani zeli hlabathi. (Mat. 4:8, 9) UYesu wasibhebhetha kwangoko eso sithembiso. Waqonda ukuba ukusamkela kwakhe kuya kuthetha ukuba uyalugatya ulawulo lukaYehova—ilungelo likaThixo lokuba ngOyena Uphakamileyo. (Funda uMateyu 4:10.) Kwimeko nganye, uYesu wayephendula uSathana ecaphula kwizibhalo ezinegama likaYehova.
12. Sisiphi isigqibo esinzima ekwakufuneka senziwe nguYesu ngasekupheleni kobomi bakhe emhlabeni, yaye yintoni esiyifundayo kwindlela awasenza ngayo eso sigqibo?
12 Ngasekupheleni kobomi bakhe emhlabeni, uYesu kwafuneka enze isigqibo esinzima. Kubulungiseleli bakhe, wabonisa ukuba ukulungele ukunikela ngobomi bakhe njengedini. (Mat. 20:17-19, 28; Luka 12:50; Yoh. 16:28) Noko ke, uYesu wayeqonda ukuba uza kutyatyekwa izityholo zobuxoki, abekw’ ityala kwinkundla yamaYuda aze abulawe njengomnyelisi. Ukwazi indlela awayeza kufa ngayo kwakumkhathaza gqitha. Wathandaza esithi: “Bawo, ukuba kunokwenzeka, mayidlule le ndebe kum.” Kodwa waqhubeka esithi: “Kanti, kungekhona ngokuthanda kwam, kodwa ngokuthanda kwakho.” (Mat. 26:39) Ukuthembeka kukaYesu de kwasekufeni kwabonisa nakuthathatha ukuba ngubani oyena Mntu ubalulekileyo ebomini bakhe!
Indlela Esiwuphendula Ngayo Lo Mbuzo
13. Ukuza kuthi ga ngoku, sifunde ntoni kumzekelo kaEva, kaYobhi nokaYesu Kristu?
13 Yintoni esiyifundileyo ukuza kuthi ga ngoku? Kwimeko kaEva, sifunde ukuba abo banikezela kwiminqweno yokuzingca okanye abo bafuna ukuziva bebalulekile babonisa ukuba asingoYehova oyena Mntu ubalulekileyo ebomini babo. Ngokwahlukileyo koko, xa sicinga ngokugcina kukaYobhi ingqibelelo, sifunda ukuba kwanabantu abangafezekanga banokubonisa ukuba uYehova uza kuqala ebomini babo ngokuthi banyamezele izilingo ngokuthembeka—nakuba bengasiqondi ngokupheleleyo isizathu sokubandezeleka kwabo. (Yak. 5:11) Okokugqibela, umzekelo kaYesu usifundisa ukuba sikulungele ukuhlaziswa nokuba singaxhalabeli kakhulu igama lethu. (Heb. 12:2) Kodwa sinokuzisebenzisa njani ezi zifundo?
14, 15. Indlela uYesu awasabela ngayo xa elingwa yayahluke njani kwekaEva, yaye sinokumxelisa njani uYesu? (Gqabaza ngomfanekiso okwiphepha 18.)
14 Ungaze uvumele izilingo zikwenze ulibale ngoYehova. UEva wanikel’ ingqalelo kwisilingo esasiphambi kwakhe. Wabona ukuba umthi “wawulungele ukudliwa kwanokuba wawulangazeleleka emehlweni, ewe, kwakunqweneleka ukuwujonga umthi lowo.” (Gen. 3:6) Le nto yayahluke ngokupheleleyo kwindlela uYesu awasabela ngayo kuzo zontathu izihlandlo awalingwa ngazo! Kwisihlandlo ngasinye, akazange avumele isilingo simenze alibale ngemiphumo yezenzo zakhe. Wathembela kwiLizwi likaThixo waza wasebenzisa negama likaYehova.
15 Xa silingwa ukuba senze izinto ezingamkholisiyo uYehova, siye sicinge ngantoni? Okukhona sicinga kakhulu ngesilingo, kokukhona umnqweno wethu ophosakeleyo uya kukhula. (Yak. 1:14, 15) Sifanele senze okuthile ngokukhawuleza ukuze siphelise umqweno ophosakeleyo, nokuba oko siza kukwenza kuthetha ukuthabatha inyathelo elikhulu, njengokususa ilungu lomzimba wethu. (Mat. 5:29, 30) NjengoYesu, sifanele sicinge ngemiphumo yezenzo zethu—indlela eya kuluchaphazela ngayo ulwalamano lwethu noYehova. Simele sikhumbule oko kuthethwa liLizwi lakhe, iBhayibhile. Kungale ndlela kuphela ekuya kubonakala ngayo ukuba nguYehova oyena Mntu ubalulekileyo ebomini bethu.
16-18. (a) Yintoni enokusibangela sidimazeke? (b) Yintoni enokusinceda ukuze sihlangabezane neemeko ezicinezelayo?
16 Ungaze uvumele iintlekele ezikwehlelayo zikwenze umqumbele uYehova. (IMize. 19:3) Njengoko sisondela ngasekupheleni kwale nkqubo yeli hlabathi ingendawo, baya besanda abantu bakaYehova abachatshazelwa ziintlekele. Asinakulindela ukuba kweli xesha siphila kulo sisindiswe ngokungummangaliso. Nakuba kunjalo, njengoYobhi, sinokudimazeka xa sifelwa ngabantu esibathandayo okanye sivelelwa ziingxaki.
17 UYobhi wayengasiqondi isizathu sokuba uYehova avumele izinto ezithile ukuba zenzeke, yaye maxa wambi nathi sisenokungasiqondi isizathu sokuba izinto ezimbi zisehlele. Mhlawumbi sikhe seva ngabazalwana abathembekileyo abaye babulawa yinyikima, njengabaseHaiti, okanye abo baye behlelwa yintlekele yemvelo. Okanye sinokuva ngomntu othile oye wakwazi ukugcina ingqibelelo noye wahlaselwa ngogonyamelo okanye oye wafa kwingozi emanyumnyezi. Okanye sisenokuba phantsi kweemeko ezicinezelayo okanye siphathwe ngokungekho sikweni. Ngenxa yokuba sentlungwini, sisenokuzibuza: ‘Kutheni ndisehlelwa zezi zinto, Yehova? Ndenze ntoni?’ (Hab. 1:2, 3) Yintoni enokusinceda xa sijamelene neemeko ezinjalo?
18 Sifanele silumke, singagqibi kwelokuba izinto ezinjalo zibonisa ukuba uYehova akakholiswa sithi. UYesu wayephuhlisa le ngongoma xa wayethetha ngentlekele eyenzeka ngomhla wakhe. (Funda uLuka 13:1-5.) Iintlekele ezininzi zibangelwa “lixesha nasisihlo esingenakubonwa kwangaphambili.” (INtshu. 9:11) Kodwa enoba yintoni ebangela ukuba sibandezeleke, sinokukwazi ukunyamezela xa sinikel’ ingqalelo ‘kuThixo wentuthuzelo yonke.’ Uya kusinika amandla esiwafunayo ukuze sikwazi ukuhlala sithembekile.—2 Kor. 1:3-6.
19, 20. Yintoni eyanceda uYesu ukuba anyamezele iimeko ezihlazisayo, yaye yintoni enokusinceda ukuba senze okufanayo?
19 Ungaze uvumele ikratshi okanye ukoyika ukuhlazeka kukulawule. Ngenxa yokuthobeka, uYesu wakwazi ‘ukuziqongqotha waza wathabatha ubume bekhoboka.’ (Fil. 2:5-8) Wakwazi ukunyamezela iimeko ezininzi ezihlazisayo kuba wayethembele kuYehova. (1 Pet. 2:23, 24) Ngokwenjenjalo, uYesu wabeka ukuthanda kukaYehova kuqala, yaye oku kwambangela ukuba aphakanyiselwe kwisigxina esongamileyo. (Fil. 2:9) UYesu wacebisa abalandeli bakhe ukuba nabo balandele ikhondo elifanayo.—Mat. 23:11, 12; Luka 9:26.
20 Maxa wambi, sisenokuvavanywa ukholo ngendlela eyenz’ iintloni. Sekunjalo, sifanele sibe nentembelo efanayo neyompostile uPawulos, owathi: “Kungenxa yoko kanye le nto ndibandezeleka nje, kodwa andinazintloni. Kaloku ndiyakholwa, kwaye ndinentembelo yokuba uya kukulondoloza oko andibekele kona de kube yiloo mini.”—2 Tim. 1:12.
21. Nangona ihlabathi linesimo sengqondo sokuzingca, yintoni ozimisele ukuyenza?
21 IBhayibhile yaprofeta isithi ngexesha lethu abantu baya kuba “ngabazithandayo.” (2 Tim. 3:2) Akumangalisi ke ngoko ukubona abantu abasingqongileyo besoloko becinga ngeziqu zabo kuphela. Kuya kufuneka ukuba silumke, singadyobheki ngumoya onjalo! Kunoko, enoba sijamelene nesilingo, sehlelwa ziintlekele, okanye siyahlaziswa, ngamana ngamnye kuthi angazimisela ukubonisa ukuba nguYehova oyena Mntu ubalulekileyo ebomini bethu!
Sinokufunda Ntoni . . .
• kwindlela uSathana awamkhohlisa ngayo uEva?
• kwindlela uYobhi awasabela ngayo kwiintlekele?
• kwizinto uYesu awayezigqala njengezibalulekileyo?
[Umfanekiso okwiphepha 17]
UEva akazange abeke ulwalamano lwakhe noYehova kwindawo yokuqala
[Umfanekiso okwiphepha 18]
UYesu akazange anikezele kwizilingo zikaSathana yaye wanikel’ ingqalelo ekwenzeni ukuthanda kukaYehova
[Imifanekiso ekwiphepha 20]
Ukushumayela ezintenteni emva kwenyikima eHaiti
Xa sibandezelekile, sinokunikel’ ingqalelo ‘kuThixo wentuthuzelo yonke’