Ubundlavini​—Bubangelwa Yintoni?

“AKUKHO nto ndiza kuyithetha.” La mazwi ayebhalwe ngoonobumba abakhulu kudonga oluhle olwalusandul’ ukupeyintwa kufuphi naseSão Paulo. Usenokuba ucinga ukuba obu bubundlavini nje obungenamsebenzi. Yaye ukuzoba eludongeni yenye nje indlela yokonakaliswa kwempahla yabantu ngabom.

Yiba nomfanekiso-ngqondweni weendlavini zisonakalisa inqwelo-mafutha yakho entsha. Okanye usenokuphawula ukuba isakhiwo esithile sikawonke wonke​—⁠esiluncedo kubantu abaninzi​—⁠siye sawa okanye satshatyalaliswa ziindlavini. Ngoba? Ewe, ngoba? Ngaba wakha wazibuza isizathu sokuba ubundlavini bande kangaka? Kwiindawo ezininzi, iindlavini ziyavuya xa zisonakalisa indlwana yomnxeba. Izithuthi zikawonke wonke ezinjengoololiwe okanye iibhasi, zezona ziba ngamaxhoba. Kuyabonakala ukuba ezi ndlavini azikhathali. Kodwa uyintoni unobangela wobu bundlavini bungaka?

UMarcoa oselula waseRio de Janeiro, wakhathazeka gqitha emva kokuba iqela lakhe loyisiwe kumdlalo webhola ekhatywayo​—⁠ecaphukile waqalisa ukugibisela amatye kwibhasi eyayizele abantu beqela elaliboyisile. Okanye cinga ngoClaus. Xa wayengazange aqhube kakuhle esikolweni, waba nomsindo gqitha kangangokuba wagibisela amatye esikolweni waza wasaphula iifestile. Noko ke, “ubumnandi” baphela xa uyise wacelwa ukuba ahlawulele loo monakalo. Omnye oselula, uErwin, wayefunda yaye esebenza. Yena noontanga bakhe babegqalwa njengabanesimilo. Ukanti ngaphambili babedla ngokonakalisa impahla yabamelwane. Abazali bakaErwin babengazi nto ngale nto. UValter wayeyinkedama eyayingenandlela yimbi ngaphandle kokuhlala kwizitrato zaseSão Paulo. Abahlobo bakhe bokwenene babeliqela leendlavini, yaye wayesenza izinto abazenzayo waza wafunda nekarati. Imizekelo enjalo ibonisa ukuba abantu babangelwa ngabanye ukuze babe ziindlavini, yaye abantu baba zizo ngenxa yezizathu, okanye iimvakalelo ezahlukahlukeneyo.

“Ubundlavini busenokuba yindlela yokuziphindezela okanye yokuvakalisa imbono ethile yezobupolitika. Maxa wambi abantu abaselula nabakhulileyo baphula umthetho nje kuba ‘bedlala,’ ” itsho iThe World Book Encyclopedia. Noko ke, kunokuba bube ngumdlalo nje wolutsha, ubundlavini busenokubangela umonakalo omkhulu nobulalayo. Iqela labaselula “lalizonwabisa nje,” yaye xa labona enye indoda ilele, layigalela into etsha msinya laza layitshisa. Le ndoda yomIndiya eyaba lixhoba loku, yafa kamva esibhedlele. Ngokutsho kwenye ingxelo, “eli qela labaselula lathi lalingazi ukuba kukho umntu owayeza kuzikhathaza ngaloo nto kuba babebaninzi abantu abangqibayo abaye batshiselwa ezitratweni, yaye kwakungekho nyathelo lisemthethweni lithatyathwayo.” Enoba ubundlavini buchaphazela abantu abathile okanye akunjalo, ixabiso, leendleko neleemvakalelo, alinakubaleka. Ngoko, yintoni enokudambisa okanye iphelise ubundlavini?

Ngubani Onokuphelisa Ubundlavini?

Ngaba amapolisa nezikolo zingabuthintela ubundlavini? Enye ingxaki ikukuba abasemagunyeni basenokuba baxakeke zezinye izenzo zolwaphulo-mthetho oluqatha, ezinjengokurhweba ngeziyobisi ngokungekho mthethweni okanye amatyala okubulala, kunezenzo zolwaphulo-mthetho “ezingachaphazeli mntu.” Ngokutsho kwelinye ipolisa, xa oselula eba sengxakini, ngokufuthi abazali “bagxeka abahlobo anxulumana nabo, okanye isikolo, okanye amapolisa ngokumbamba.” Imfundo nokunyanzelwa komthetho kusenokubunciphisa ubundlavini; ukanti, kuthekani ukuba izimo zengqondo zabazali aziguquki? Elinye igosa elijongene nabantwana abaziinjubaqa lithi: “Konke oku kubangelwa sisithukuthezi namathuba avelayo. [Abantwana] baba ngaphandle kwekhaya kude kube sebusuku, yaye abananto yokwenza. Yaye kusenokwenzeka ukuba akukho mntu ubabek’ esweni​—⁠kungenjalo ngebengekho ngaphandle kwekhaya.”

Nangona ubundlavini buyingxaki enzulu kwiindawo ezininzi, khawuqwalasele indlela ezinokuguqulwa ngayo izinto. Iindlavini eziselula ezikhankanywe ekuqaleni zaguquka; ngoku zisichasa ngokupheleleyo isimo sengqondo esingavumelaniyo nabasekuhlaleni. Yintoni eyabangela ukuba abo babeziinjubaqa bayitshintshe indlela ababephila ngayo? Kwakhona, ngaba ubuya kumangaliswa ukuba ubundlavini bebungayi kuncitshiswa nje kuphela kodwa bebuya kupheliswa kuthi tu? Siyakumema ukuba ufunde inqaku elilandelayo.

[Imibhalo esemazantsi]