Ubundlavini Bunokupheliswa
“UBUNDLAVINI obenziwa ngabakwishumi elivisayo buye bagqalwa njengokungabonakalisi ntlonelo nobutshaba kubantu abakhulileyo nemilinganiselo yabo,” ucacisa esitsho umbhali uJane Norman noMyron W. Harris. Ngoxa ulutsha oluninzi lukholelwa ukuba akukho nto inokwenziwa ukuguqula imeko, “umntu omnye kwaba-3 ucinga ukuba ubundlavini babo bakwishumi elivisayo bunokuthintelwa ukuba abazali banikela ingqalelo engakumbi ebantwaneni babo, yaye ukuba abakwishumi elivisayo bebengenasithukuthezi kangaka,” ababhali banikela loo ngxelo. Ngoxa ugcina abaselula bexakekile yaye ubalusa njengomzali kusenokunciphisa ubundlavini, ngaba oko kusenokuphelisa unobangela osisiseko?
Xa bebodwa, abantu abaninzi abaselula ababangeli zingxaki, ukanti xa beliqela okanye bengababini, bafuna ukubekw’ esweni, benza izinto ezibubuyatha nezingathandekiyo. Oko kwaba njalo ngoNelson, owayethi ngokufuthi xa esebenzise iziyobisi okanye utywala abonakalise umsindo wakhe nokunganeliseki kwakhe ngokwenza izenzo zobundlavini. UJosé, ecatshukiswe ziintshumayelo zeCawa yamaKatolika ngolwabiwo lomhlaba namalungelo abasebenzi, wavakalelwa kukuba umele aqhankqalaze aze abhenele kubundlavini ukuze kuviwe isikhalazo sakhe. Noko ke, uNelson noJosé bafumana into ebhetele ngakumbi kunemvukelo okanye ubundlavini.
Abanye Oonobangela Bobundlavini
Makhe siqwalasele isizathu sokuba bambi abaselula babe ziindlavini. Abafikisayo abaliqela badidekile yaye “balichaza ihlabathi njengesiphithiphithi, indawo enempambano ezaliswe ngabantu abaphambeneyo.” Sekunjalo, nangokwahlukileyo kwindlela abanye abantu abayikholelwayo, enye ingxelo yathi: “Abaselula bayakhathazeka ngekhondo abalithabathayo ebomini babo. Bakhathala ngaphezu kokuba abantu abadala becinga.” Eqonda okanye engaqondi, oselula oyindlavini usenokuba ngale ndlela uvakalisa indlela adimazeke ngayo, iingxaki ezingacombululekiyo, okanye iintswelo ezingazalisekiyo. Ngokutsho kohlolisiso olukhankanywe ekuqaleni, “akukho namnye kwabo babebandakanyekile owabuthethelelayo okanye abukhusele ubundlavini, kwanabo babebandakanyeke kubo.”
Kusenokwenzeka ukuba oselula akafane anconywe okanye akhuthazwe. Ekubeni kubalaseliswa imfundo yaye nemisebenzi emininzi ifuna ulwazi oluphakamileyo lobugcisa, oselula usenokuphelelwa lithemba. Ngaphezu koko, usenokuba sisisulu sokugxekwa ngabazali, ngabafundisi-ntsapho okanye ngoontanga bakhe, ngenxa yokungaphumeleli kwakhe, kunokuba bagxininise kuhlobo lomntu anguye. Abaninzi bavukela okanye babe ziindlavini ngenxa yokuba benganelisekanga ziziqu zabo. Ngaba uthando nengqalelo yabazali ayinakuluphelisa unxunguphalo olunjalo?
Usenokuba ubonile ukuba ngoxa abasemagunyeni bebonakala ngathi banikezele ekuzameni ukulawula ukuzotywa kweendonga nezinye iintlobo zobunjubaqa, ngokuqhelekileyo abahlali abanenkxalabo basenethemba lokuba abafundisi-ntsapho nabo basebenza ezikolweni banokubulawula ubundlavini. Ngokuphathelele ukunyanzeliswa komthetho, iThe World Book Encyclopedia ithi: “Iindlavini ziyahlawuliswa okanye zivalelwe entolongweni. Abanye oorhulumente basekuhlaleni banemithetho ebenza abazali babopheleleke ngobundlavini obenziwa ngabantwana babo. Kodwa izenzo eziliqela zobundlavini azinasohlwayo. Ukunyanzeliswa komthetho kunzima kwiimeko ezinjalo, yaye ixabiso lezenzo eziliqela zobundlavini alibi likhulu kangangokude kufaneleke ukuthabatha amanyathelo angokwasemthethweni.” Olunye uhlolisiso lwabonisa ukuba ziindlavini ezi-3 ekhulwini kuphela ezide zibanjwe.
Usenokuba uyavuma ukuba ukuba ngumzali wokwenene kusenokuba yeyona ndlela yokuhlangabezana neyona ntsusa yobunjubaqa. Kodwa xa ubomi bentsapho budodobala, kuba nzima nakwibutho lasekuhlaleni. UNjingalwazi Ana Luisa Vieira de Mattos, weSão Paulo University, eBrazil, uthi ezinye zezizathu zeengxaki zabantu abaselula “kukungakhathalelwa ngabazali, ukungabikho kwemithetho, ukungabikho konxibelelwano, ukutyeshelwa, ukungevani okanye ukungakhathali.”
Ngokuqinisekileyo ngexesha lethu siye sakubona ukuzaliseka kwamazwi kaYesu athi: “Ngenxa yokwanda kokuchas’ umthetho uthando lwenani elikhulu ngakumbi luya kuphola.” (Mateyu 24:12) Yaye ngubani onokukhanyela ukuba amazwi akweyesi-2 kuTimoti 3:1-4 angqineke eyinyaniso? Umpostile uPawulos wabhala: “Yazi oku, ukuba ngemihla yokugqibela kuya kubakho amaxesha amanqam ekunzima ukuqhubana nawo. Kuba abantu baya kuba ngabazithandayo, abathandi bemali, abazidlayo, abanekratshi, abanyelisi, abangabathobeliyo abazali, abangenambulelo, abanganyanisekanga, bengenawo umsa wemvelo, abangayifuni kwaphela imvisiswano, abajindi, abangenakuzeyisa, iindlobongela, abangenakuthanda kulunga, abangcatshi, abaneentloko ezilukhuni, abakhukhumele yinkqayiso, abathandi beziyolo kunokuba ngabathandi bakaThixo.” Inyaniso yona yeyokuba, ukuphila nje phakathi kwabantu abanjalo kunegalelo elikhulu kubunjubaqa. Nangona kunjalo kufuneka singanikezeli. Eminye imimandla iye yoyiswa kukuphelisa ubundlavini, kodwa sisenokufumana abantu abaye baphumelela ekuguquleni indlela yabo yokuphila, bengasengabo abantu abangenambeko okanye abangakhathaliyo. Kwimeko yabo baye babuyeka ubundlavini.
Ukhokelo Lokwenene Kubantu Abaselula
Yintoni eye yanceda iindlavini nabanye ukuba ziguqule ubuntu bazo? Nangona kusenokubonakala kumangalisa kwabanye abafundisi-ntsapho nabazali, iBhayibhile inikela olona khokelo lusexesheni. Ngokululandela, abo babesakuba ziindlavini baye bashukunyiselwa ukuba bathobele umthetho ocacileyo kaThixo othi: “Uze ungalandeli isininzi ukuya kwenza izinto ezimbi.” (Eksodus 23:2) Abaninzi baye batsaleleka enyanisweni evela kwiLizwi likaThixo engeenkolelo neemfundiso ababengazange baziqonde ngaphambili, yaye oko bakufundileyo kuye kwabanceda bangabantu abalunge ngakumbi. Cinga ngoko kwenzeka kuJosé, oselula waseSão Paulo. Wakhuliswa ekholelwa ekusebenziseni imifanekiso ekunquleni. Xa wafumanisa ukuba uThixo unegama, elinguYehova, nokuba Yena akakholiswa kukunqulwa kwemifanekiso, uJosé wenza iinguqulelo efuna ukwenza okukholekileyo phambi kwamehlo kaYehova.—Eksodus 20:4, 5; INdumiso 83:18; 1 Yohane 5:21; ISityhilelo 4:11.
UNelson, kunokuba akhathazeke xa amaqela anobundlobongela eqhankqalaza, wafumana ithemba lokwenene lekamva, yaye oko kuye kwamkhulula ngokwenene. Uthi: “Kunokugxothwa yintsapho yakowethu ngenxa yonxulumano olubi nokuphila njengekhoboka leziyobisi, ngoku ndihlonelwa gqitha ekhaya. Ngokufuthi utata uye andicele ukuba ndiluleke abantakwethu. Kususela kwixesha endaqalisa ngalo ukufundisisa iBhayibhile namaNgqina kaYehova, ndiye ndazuza ulonwabo ngenxa yokuba ngoku ndinenjongo ebomini.” Yaye koselula wasezidolophini onguMarco—oqhelileyo ukuphila kummandla onogonyamelo—ukwazi ukuba uBukumkani bukaThixo buya kuwenza lo mhlaba iparadesi kuye kwamomeleza ngokwenene.—ISityhilelo 21:3, 4.
Kwakhona cinga ngomnye owayesakuba lilungu leqela lemiguvela, umntu owayethand’ ukulwa, nendlavini. Ekubeni wayeyinkedama yaye ekhule kabuhlungu, uValter wachukumiseka gqitha kukuva ukuba phakathi kwale nkqubo yezinto yonakeleyo, uThixo unabantu bakhe. Ngokunyanisekileyo bazama ukusebenzisa imigaqo yeBhayibhile kubomi babo, bebonisa uvelwano, ulwazelelelo nobubele. UValter ucacisa esithi: “Ngokuvumelana nesithembiso sikaYesu, ngoku ndinentsapho enkulu, ‘abantakwethu, oodade wethu, oomama nootata.’ Ngokuphathelele ikamva, ndikhangele phambili kwixesha laxa abantu beya kuhlala ngoxolo nomanyano phantsi korhulumente kaThixo wobulungisa.”—Marko 10:29, 30; INdumiso 37:10, 11, 29.
Into Ebhetele Kunokuqhankqalaza
Ukongezelela ekubonakaliseni ulwazelelelo nothando ngabazalwana babo, aba babesakuba ziindlavini baye bafunda ‘ukukuthiya okubi.’ (INdumiso 97:10; Mateyu 7:12) Kuthekani ngawe? Nokuba ungumntu obandezeleka ngenxa yobundlavini, ukufundisisa iLizwi likaThixo kuya kumenza uYehova abe ngumntu wokwenene kuwe njengoBawo onothando wasezulwini okukhathalelayo. (1 Petros 5:6, 7) UThixo unokukunceda ukhule ngokomoya, phezu kwako nje ukuba buthathaka okanye ubuhlwempu. Loo nto nje iyodwa iyavuyisa!
UYehova noNyana wakhe, uYesu Kristu ngokwenene bafuna ukuba zonke iintlobo zabantu zifumane ithuba lokufundisisa inyaniso yeBhayibhile. ILizwi likaThixo linokwenza okungakumbi kunokuyekisa abantu ukuba babe ziindlavini kanye ngoku. Linokubakhuthaza ukuba benze inkqubela engakumbi ekusebenziseni imigaqo yobuthixo. Ngenxa yoko, baba ngamalungu obuzalwana bothando bazwenibanzi abaziwa ngokucoceka nangesimilo esihle, ibandla lehlabathi lonke lamaNgqina kaYehova. Ngokuvisisana neyabase-Efese 4:24, la maKristu anyanisekileyo aye ‘ambatha ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.’ Kungekudala ihlabathi liya kuzaliswa ngabantu abanjalo ngenxa yokuba ngabo bodwa abaya kusinda baze baphile ngonaphakade.—Thelekisa uLuka 23:43.
Linokubakho Ihlabathi Elingenazindlavini
Ngaba uyakholelwa ukuba ubundlavini bunokutshayelwa kuthi tu? Ukuba kunjalo, iinguqulelo ezinkulu ngolo hlobo ziya kwenzeka njani? Kungekudala uBukumkani bukaThixo buya kuyishenxisa le nkqubo ingendawo. Abo bahlala emhlabeni baya kuphendula ngako nakuphi na ukwaphulwa ngabom kwemithetho kaThixo yobulungisa. (Thelekisa uIsaya 24:5, 6) Ngoxa ‘abangendawo betshatyalaliswa kuphele,’ abo bathanda ubulungisa baya kuhlangulwa. ‘UYehova uyabanceda, abasindise kongendawo, abasindise, ngokuba bazimela ngaye.’—INdumiso 37:38-40.
Ngokwenene, unobangela wobundlavini uya kupheliswa kuthi tu. Kukwanjalo nangalo lonke ulwaphulo-mthetho, ingcinezelo, ukubandezeleka nobungendawo. Kunoko, kwihlabathi elitsha kuya kuphilwa ubomi boxolo, bobulungisa bokwenene, obuzolileyo nobunqabisekileyo. UIsaya 32:18 uchaza oko kuya kungqineka kuyinyaniso ngokoqobo esithi: “Abantu bakowethu baya kuhlala esithilini esinoxolo, eminqubeni yenkoloseko, ezindaweni zokuphumla ezinokonwaba.” Ewe, iparadesi entle yomhlaba wonke iya kuhlalwa ngabantu ababonisa uthando nolwazelelelo kwabanye.
Kwanangoku kukho izigidi zabantu, kuquka nababesakuba ziindlavini abasele benandipha ubuhlobo obusondeleyo noYehova uThixo. Abasabandakanyekanga kwizenzo zobundlavini. Ngaba nawe uya kuvumela iLizwi likaThixo ukuba likukhokelele ebomini kwihlabathi lakhe elitsha? Kutheni ungaxelisi umdumisi wakudala owabhala oko kwakuthethwe nguYehova esithi: “Ndiya kukuqiqisa ndikuyalele indlela owohamba ngayo. Ndiya kukucebisa, iliso lam likuwe.”—INdumiso 32:8.
[Umfanekiso okwiphepha 7]
Ingqalelo yabazali nothando iyabakhusela abaselula