UYesu Unoku-buguqula Njani Ubomi Bakho?

UYESU KRISTU wayenguMfundisi Omkhulu owayehlala ePalestina phantse kwiminyaka engama-2 000 eyadlulayo. Akukho nto ingako yaziwayo ngobuntwana bakhe. Noko ke, kukho ubungqina obaneleyo bokuba, xa wayeneminyaka enokuba ngama-30 ubudala, waqalisa ubulungiseleli bakhe ‘bokunikela ubungqina kuyo inyaniso.’ (Yohane 18:​37; Luka 3:​21-23) Abafundi abane ababhala iingxelo zobomi bakhe banikela ingqalelo kwiminyaka emithathu enesiqingatha eyalandelayo.

Ebudeni bobulungiseleli bakhe, uYesu Kristu wanika abafundi bakhe umyalelo owawuya kuzisa isiqabu kwiingxaki eziliqela zehlabathi. Wawusithini loo myalelo? UYesu wathi: “Ndininika umyalelo omtsha, wokuba nithandane; kanye njengoko ndinithandileyo mna, ukuba kwanani nithandane.” (Yohane 13:​34) Ewe, isicombululo kwiingxaki ezininzi zoluntu luthando. Xa ngesinye isihlandlo uYesu wabuzwa ngowona myalelo mkhulu, waphendula wathi: “ ‘Umele umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.’ Lo ngowona myalelo mkhulu nowokuqala. Owesibini, njengawo, ngulo, ‘Umele umthande ummelwane wakho njengawe siqu.’ ”​—⁠Mateyu 22:​37-⁠40.

UYesu wasibonisa ngamazwi nangezenzo indlela yokuthanda uThixo nabantu. Masiqwalasele nje imizekelo embalwa size sibone oko sinokukufunda kuye.

Iimfundiso Zakhe

Kwenye yezona ntshumayelo zidumileyo embalini, uYesu Kristu wabaxelela oku abalandeli bakhe: “Akukho bani unokuba likhoboka leenkosi ezimbini; kuba usenokuba uya kuyithiya enye aze ayithande enye, okanye uya kunamathela kwenye aze ayidele enye. Aninako ukuba ngamakhoboka kaThixo nawobuTyebi.” (Mateyu 6:​24) Ngaba imfundiso kaYesu yokubeka uThixo kuqala ebomini bethu isasebenza namhlanje, ngoxa abantu abaninzi kangaka bekholelwa ukuba imali icombulula zonke iingxaki? Liyinyaniso elokuba, imali iyimfuneko ukuze siqhubeke siphila. (INtshumayeli 7:​12) Ukanti, ukuba sivumela ‘ubuTyebi’ bube yinkosi yethu, “ukuthanda imali” kuya kusilawula, kube yinto ephambili kubo bonke ubomi bethu. (1 Timoti 6:​9, 10) Uninzi lwabo baye bawela kulo mgibe baye balahlekelwa yintsapho, yimpilo, nabubomi babo.

Kwelinye icala, ukuba sikhangela kuThixo njengeNkosi yethu ubomi bethu buba nentsingiselo. NjengoMdali, unguMthombo wobomi, yaye ngaloo ndlela, sifanele sinqule yena yedwa. (INdumiso 36:⁠9; ISityhilelo 4:​11) Abo bafunda ngeempawu zakhe baze bamthande bashukunyiselwa ukuba bayithobele imithetho yakhe. (INtshumayeli 12:​13; 1 Yohane 5:⁠3) Ngokwenjenjalo, siyangenelwa.​—⁠Isaya 48:⁠17.

KwiNtshumayelo yakhe yaseNtabeni, uYesu waphinda wafundisa abafundi bakhe indlela yokubonisa uthando kwabanye abantu. Wathi: “Zonke izinto, ke ngoko, enifuna abantu bazenze kuni, nani nimele nenze ngokunjalo kubo.” (Mateyu 7:​12) Igama elithi “abantu” elasetyenziswa nguYesu apha liquka kwaneentshaba zomntu. Kwakule ntshumayelo, wathi: “Qhubekani nizithanda iintshaba zenu nize nibathandazele abo banitshutshisayo.” (Mateyu 5:​43, 44) Ngaba uthando olunjalo belungayi kucombulula iingxaki ezininzi esijamelene nazo namhlanje? Inkokeli yamaHindu uMohandas Gandhi wayecinga njalo. Wacatshulwa esithi: “Xa ilizwe lakho nelam liya kumanyana kwiimfundiso ezandlalwe nguKristu kule Ntshumayelo yaseNtabeni, siya kuba sizicombulule iingxaki . . . zehlabathi liphela.” Imfundiso kaYesu engothando, ukuba iyasetyenziswa, inokucombulula iingxaki eziliqela zoluntu.

Izenzo Zakhe

UYesu akazange afundise nje iinyaniso ezisisiseko ngendlela yokubonisa uthando kodwa wakwenza oko wayekufundisa. Ngokomzekelo, wabeka izilangazelelo zabanye kuqala kunezakhe. Ngenye imini uYesu nabafundi bakhe babexakekile benceda abantu yaye babengenalo nexesha lokutya. UYesu wabona intswelo yokuba abafundi bakhe baphumle kancinane, waza wabasa kwindawo engenabantu. Kodwa ukufika kwabo apho, bafumana isihlwele sibalindile. Ubuya kusabela njani xa ubona isihlwele esifuna usebenze ngoxa uvakalelwa kukuba ufuna ukuphumla kancinane? Kaloku, uYesu “washukunyiswa lusizi ngaso” waza “waqala ukusifundisa izinto ezininzi.” (Marko 6:​34) Le nkxalabo ngabanye yayisoloko ishukumisa uYesu ukuba abancede.

UYesu wabenzela okungakumbi abantu kunokubafundisa. Wabanceda ngokoqobo. Ngokomzekelo, ngesinye isihlandlo wondla abantu abangaphezu kwama-5 000 ababemphulaphule kwada kwangorhatya. Kungekudala emva koko, wondla isihlwele esikhulu​—⁠ngesi sihlandlo esingaphezu kwama-4 000​—⁠esasimphulaphule kangangeentsuku ezintathu yaye kwakungekho nto singayitya. Kwisihlandlo sokuqala, wasebenzisa izonka ezintlanu neentlanzi ezimbini, yaye kamva izonka ezisixhenxe neentlanzi ezimbalwa ezincinane. (Mateyu 14:​14-22; 15:​32-38) Ngaba lowo yayingummangaliso? Ewe, wayengumenzi wemimangaliso.

Kwakhona uYesu waphilisa nabagulayo. Waphilisa iimfama, iziqhwala, abaneqhenqa nezithulu. Kaloku, wada wavusa nabafileyo! (Luka 7:​22; Yohane 11:​30-45) Ngesinye isihlandlo omnye owayeneqhenqa wabongoza esithi: “Ukuba nje uyafuna, unako ukundenza ndihlambuluke.” Wasabela njani uYesu? “Ngako oko washukunyiswa lusizi, yaye wasolula isandla sakhe waza wamchukumisa, ibe wathi kuye: ‘Ndiyafuna. Yenziwa uhlambuluke.’ ” (Marko 1:​40, 41) Ngaloo mimangaliso, uYesu wabonakalisa uthando lwakhe kwabo babebandezelekile.

Ngaba ukufumanisa kunzima ukuyikholelwa imimangaliso kaYesu? Abanye bakufumanisa kunzima. Kwakhona khumbula ukuba, uYesu wayenza ekuhleni imimangaliso yakhe. Kwanabo babemchasile, ababezama ukufumana impazamo kuye ngaso sonke isihlandlo, abazange bakhanyele ukuba wayengumenzi wemimangaliso. (Yohane 9:​1-34) Ukongezelela, imimangaliso yakhe yayinenjongo. Yanceda abantu babona ukuba nguLowo uthunywe nguThixo.​—⁠Yohane 6:⁠14.

Ngokwenza imimangaliso uYesu wayengafuni kunikelwe ingqalelo kuye. Kunoko, wayezukisa uThixo, uMthombo wamandla akhe. EKapernahum wakha wakwelinye ikhaya elalizaliswe ngabantu. Enye indoda eyayife umzimba yayifuna ukuphiliswa kodwa yayingakwazi ukungena. Ngoko abahlobo bayo bayithoba ngembobo eyayiseluphahleni baza bayihlisa ngokhuko eyayilele kulo. Xa wabona indlela ababenokholo ngayo, uYesu wamphilisa owayefe umzimba. Ngenxa yoko, abantu “bamzukisa uThixo” baza bathi: “Asizange siyibone into enjengale.” (Marko 2:​1-4, 11, 12) Imimangaliso kaYesu yazisa indumiso kuYehova, uThixo wakhe, yaza yanceda abo babefuna ukuncedwa.

Noko ke, ukuphilisa abantu ngemimangaliso yayingengondoqo kubulungiseleli bukaYesu. Omnye owabhala ingxelo ngobomi bukaYesu wathi: “Le iye yabhalwa phantsi ukuze nikholwe ukuba uYesu unguye uKristu uNyana kaThixo, nokuze, ngenxa yokukholwa, nibe nobomi ngegama lakhe.” (Yohane 20:​31) Ewe, uYesu weza emhlabeni ukuze abantu abanokholo bafumane ubomi.

Idini Lakhe

Usenokubuza, ‘Ngaba uYesu weza emhlabeni? Wayevela phi?’ UYesu wathi: “Ezulwini ndihlele ukuza kwenza, kungekhona ukuthanda kwam, kodwa ukuthanda kwalowo wandithumayo.” (Yohane 6:​38) Wayekhe waphila phambi kokuba abe ngumntu njengokuphela koNyana wakhe amzeleyo kaThixo. Ngoko kwakuyintoni ukuthanda kwaLowo wamthumela emhlabeni? “Kuba uThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani oqhelisela ukholo kuye angatshabalali kodwa abe nobomi obungunaphakade.” (Yohane 3:​16) Kwakuza kwenzeka njani oku?

IBhayibhile ityhila indlela ukufa okwalutyhutyha ngayo uluntu. Isibini sokuqala esingabantu safumana ubomi kuThixo sinethemba lokuphila ngonaphakade. Noko ke, bakhetha ukuvukela uMenzi wabo. (Genesis 3:​1-19) Ngenxa yesi senzo, esi sono sokuqala sabantu, inzala ka-Adam noEva yazuza ilifa elingelihle elikukufa. (Roma 5:​12) Ukuze abantu bafumane ubomi bokwenene, kumele kupheliswe isono nokufa.

Asikho isazinzulu esinokukwazi ukuphelisa ukufa ngokuthi senze inguqulelo ethile kwimizila yemfuza. Ukanti, uMdali woluntu unayo indlela yokwenza abantu abathobelayo bafezeke ukuze bakwazi ukuphila ngonaphakade. EBhayibhileni eli lungiselelo libizwa ngokuba yintlawulelo. Isibini sokuqala esingabantu sazithengisa sona nembewu yaso kubukhoboka besono nokufa. Bananisa ubomi babo njengabantu abafezekileyo nabathobela uThixo ngobomi bokuzimela geqe kuThixo, bazenzela ezabo izigqibo koko kuhle nakoko kubi. Ukuze kuthengwe kwakhona ubomi bomntu ofezekileyo, kwakufuneka ixabiso elilingana ncam nobomi obufezekileyo abalahlekana nabo abazali bethu bokuqala. Ekubeni bezuze ukungafezeki njengelifa, abantu babengenakukwazi ukuhlawula elo xabiso.​—⁠INdumiso 49:⁠7.

Ngoko uYehova uThixo wangenelela ukuze ancede. Wadlulisela ubomi obufezekileyo bokuphela koNyana wakhe amzeleyo esibelekweni sentombi enyulu, eyazala uYesu. Kumashumi eminyaka adlulayo, usenokuba wawuyikhaba ngawo omane ingcamango yokuzala kwentombi enyulu. Noko ke, namhlanje, izazinzulu zithi ziyakwazi ukudlulisela imbewu yezilwanyana ezanyisayo kwezinye zize zidlulisele imizila yemfuza ziyithabatha kwesinye isilwanyana ziyise kwesinye. Ngoko ke, ngubani onokuwathandabuza ngokufanelekileyo amandla oMdali okusebenzisa enye indlela ngaphandle kweqhelekileyo yokuzala?

Ngenxa yobukho bobomi bomntu ofezekileyo, ixabiso lokukhulula uluntu esonweni nasekufeni labakho. Sekunjalo, umntwana owazalwa emhlabeni njengoYesu kwafuneka akhule aze abe ‘ngugqirha’ okwaziyo ‘ukuphilisa’ izigulo zabantu. Wakwenza oku ngokuphila ubomi obugqibeleleyo, nobungenasono. UYesu akazange abone nje intlungu olwalujamelene nayo uluntu olunesono kodwa weva neentsilelo zasemzimbeni zokuba ngumntu. Oku kwamenza wangugqirha onemfesane ngakumbi. (Hebhere 4:​15) Ukuphilisa kwakhe ngommangaliso ngoxa wayesemhlabeni kwabonisa ukuba uyafuna yaye unawo amandla okuphilisa abagulayo.​—⁠Mateyu 4:⁠23.

Emva kobulungiseleli bakhe basemhlabeni kangangeminyaka emithathu enesiqingatha, uYesu wabulawa ngabo babemchasile. Wabonisa ukuba umntu ofezekileyo unako ukumthobela uMdali phezu kwazo nezona zilingo zinzima. (1 Petros 2:​22) Umzimba wakhe ofezekileyo awawuncamayo waba lidini lentlawulelo, elalikwazi ukukhulula abantu esonweni nasekufeni. UYesu Kristu wathi: “Akukho bani unothando olukhulu ngakumbi kunolu, lokuba uthile anikezele umphefumlo wakhe ngenxa yabahlobo bakhe.” (Yohane 15:​13) Ngosuku lwesithathu emva kokufa kwakhe, uYesu wavuselwa kubomi bokomoya, yaye kwiiveki kamva wanyukela ezulwini ukuze anikele ngedini lentlawulelo kuYehova uThixo. (1 Korinte 15:​3, 4; Hebhere 9:​11-14) Ngokwenjenjalo, uYesu wakwazi ukunikela ngedini eliyintlawulelo kwabo bamlandelayo.

Ngaba uyafuna ukungenelwa ngale ndlela yokunyanga ngokomoya, ngokweemvakalelo nangokwenyama? Ukwenjenjalo kufuna sibe nokholo kuYesu Kristu. Kutheni ungaziyeli kuGqirha ngokwakho? Unokukwenza oko ngokufunda ngoYesu Kristu nenxaxheba anayo ekusindiseni uluntu oluthembekileyo. AmaNgqina kaYehova aya kukuvuyela ukukunceda.

[Caption on page 5]

UYesu uyafuna yaye unamandla okuphilisa abo bagulayo

[Caption on page 7]

Ukufa kukaYesu kukuchaphazela njani?