Ukungenelwa ‘Kwingqolowa Yasezulwini’
KUNGEKUDALA nje emva kokukhululwa ngokungummangaliso eYiputa, amaSirayeli abonakalisa ukungabi nakholo ngokunzulu kuMhlanguli wawo, uYehova. Ngenxa yoko, uYehova wawabhadulisa kwintlango yeSinayi kangangeminyaka engama-40. Ebudeni balo lonke elo xesha, amaSirayeli kunye ‘nenkitha engumxube’ yabaphambukeli abazibandakanya nawo badla basela ‘bada badikwa.’ (Eksodus 12:37, 38) Xa isichazela indlela okwenzeka ngayo oku INdumiso 78:23-25 ithi: “[UYehova] wawisela ke umthetho iingqimba zamafu ngaphezulu, wazivula iingcango zezulu; wabanisela ngemana ukuze badle, wabanika ingqolowa yasezulwini. Umntu wadla isonka sOnamandla; wabathumela umphako bada badikwa.”
Njengomnye owayidlayo imana, uMoses wanikela inkcazelo ngoku kutya kwahlukileyo. Wabhala ukuba kusasa, emva ‘kokunyuka kombethe obulele, nanko kukho phezu komhlaba entlango intwana apha ecolekileyo, ejiyileyo, encinanana njengeqabaka emhlabeni. Bayibona oonyana bakaSirayeli, bathi omnye komnye, Yintoni?’ okanye ngesiHebhere bathi: “man huʼ?” Kusenokwenzeka ukuba eli binzana liyimvelaphi yegama elithi “mana,” gama elo amaSirayeli akubiza ngalo oko kutya. UMoses wathi: “Yayinjengembewu yekoriyandire, imhlophe, isongo sayo sinjengezonkana ezinobusi.”—Eksodus 16:13-15, 31, umbhalo osemazantsi weNW.
Imana yayingekokutya nje kwemvelo, njengoko abanye besitsho. Yabakho ngenxa yamandla angaphaya kwawemvelo. Ngokomzekelo, yayingafumaneki kwiindawo ezithile kuphela yaye ngamaxesha athile. Xa ibekwe umbeko, yayiba neempethu inuke; kanti, umlinganiselo ophindwe kabini owawubuthwa yintsapho nganye kusuku olungaphambi kolweSabatha yeveki nganye wawungonakali xa ubekwe umbeko, ngoko wawunokutyiwa ngeSabatha—umhla eyayingabikho ngawo imana. Ngokuqinisekileyo, imana yayililungiselelo elingummangaliso.—Eksodus 16:19-30.
Ukukhankanywa ‘kOnamandla,’ okanye “iingelosi,” kwiNdumiso 78 kubonisa ukuba uYehova usenokuba wasebenzisa iingelosi ukuze alungiselele imana. (INdumiso 78:25, umbhalo osemazantsi weNW) Nokuba imeko yayinjani na, abantu babefanele bambulele uThixo ngobubele bakhe. Noko ke, abaninzi babonisa isimo sengqondo sokungabi nambulelo kuLowo wabakhulula ebukhobokeni eYiputa. Nathi sisenokuwathabatha lula amalungiselelo kaYehova okanye side singabi nambulelo ukuba asicamngci ngobubele bakhe bothando. Ngoko simele sibe nombulelo kuYehova ngokusinika ingxelo yokukhululwa kukaSirayeli neziganeko ezenzekayo ukwenzela “uyalelo lwethu.”—Roma 15:4.
AmaKristu Ayangenelwa Kwisifundo SikaSirayeli
Xa uYehova wayesenza ilungiselelo lemana, wayenokungakumbi engqondweni kunokwanelisa nje iintswelo zenyama zamaSirayeli awayemalunga nezigidi ezithathu. Wayefuna ‘ukuwathoba, awalinge’ ukuze awasulungekise yaye awaqeqeshele okwakuya kuwanceda. (Duteronomi 8:16; Isaya 48:17) Ukuba ayekwamkele oko kusulungekiswa nokuqeqeshwa, uYehova wayeya kukuvuyela ‘ukuwenzela okulungileyo ekupheleni kwawo’ ngokuwenza abe noxolo, inkqubela nolonwabo kwiLizwe Ledinga.
Eyona nto ibalulekileyo ekwakufuneka ayifunde kukuba “akaphili ngasonka sodwa umntu; umntu lo yena uphila ngento yonke ephuma emlonyeni kaYehova.” (Duteronomi 8:3) Ukuba uThixo wayengazange alungiselele imana, abantu ngebabefe yindlala—nto leyo ababesele beyithetha. (Eksodus 16:3, 4) AmaSirayeli anoxabiso ayekhunjuzwa mihla le ngokuxhomekeka kwawo ngokupheleleyo kuYehova ngoko ke ayethotyiwe. Esakuba nentabalala yezinto eziphathekayo kwiLizwe Ledinga, kwakungayi kuba lula ukuba amlibale uYehova nokuxhomekeka kwawo kuye.
NjengamaSirayeli, amaKristu amele akuphaphele ukuxhomekeka kwawo kuThixo ngezinto eziyimfuneko zobomi—ezokwenyama nezokomoya. (Mateyu 5:3; 6:31-33) Xa wayephendula esinye sezilingo zikaMtyholi, uYesu Kristu wacaphula amazwi kaMoses njengoko efumaneka kwiDuteronomi 8:3, athi: “Kubhaliwe kwathiwa, ‘Umntu umele aphile, kungekhona ngesonka sodwa, kodwa ngamazwi onke aphuma emlonyeni kaYehova.’ ” (Mateyu 4:4) Ewe, abanquli bokwenyaniso bakaThixo bondliwa ngokufunda amazwi kaYehova afumaneka eLizwini lakhe. Ukongezelela koko, ukholo lwabo lomelezwa yimiphumo emihle yala mazwi kubomi babo njengoko behamba noThixo yaye bebeka izilangazelelo zoBukumkani bakhe kwindawo yokuqala.
Abantu abangafezekanga banokuphelelwa luxabiso ngezinto ezifumaneka rhoqo ebomini—kwanokuba ezi zinto ziyimbonakaliso yenkxalabo yothando lukaYehova. Ngokomzekelo, ilungiselelo lemana elingaphaya kwamandla emvelo lawamangalisa yaye lawanelisa amaSirayeli ekuqaleni, kodwa ekuhambeni kwexesha abaninzi kuwo bakhalaza. Ngokungenantlonelo bakhalaza besithi: “Umphefumlo wethu ukruqukile sesi sonka sinkatshunkatshu,” nto leyo eyabonisa ukuba babeqalisa ‘ukumka kuThixo ophilayo.’ (Numeri 11:6; 21:5; Hebhere 3:12) Ngaloo ndlela, umzekelo wabo ukho “ukuze kulunyukiswe thina bafikelwe ziziphelo zeenkqubo zezinto.”—1 Korinte 10:11.
Sinokusabela njani kwesi silumkiso singumzekelo? Inye indlela esinokukwenza ngayo oku, kukuba singaze sivumele iimfundiso zeBhayibhile okanye amalungiselelo esiwafumana ngodidi lwekhoboka elithembekileyo neliyingqondi abe yinto nje eqhelekileyo, okanye into nje engenamsebenzi. (Mateyu 24:45) Ukuqalisa nje kwethu ukuzithabatha lula izipho zikaYehova okanye ukungazikhathaleli, ulwalamano lwethu naye luqalisa ukuphela.
Ngesizathu esifanelekileyo, uYehova akasixhinxi ngezinto ezintsha ezibangela imihlali. Kunoko, usinika ukukhanya okwandayo kweLizwi lakhe ngokuthe ngcembe. (IMizekeliso 4:18) Oku kunika abantu bakhe ithuba lokucamngca yaye baqhelisele izinto abazifundayo. UYesu wayexelisa umzekelo kaYise xa wayefundisa abafundi bakhe bokuqala. Wayebacacisela iLizwi likaThixo “kangangoko babekwazi ukuphulaphula,” okanye “ukuqonda,” njengoko ezinye iinguqulelo zikubeka ngolu hlobo oku.—Marko 4:33; thelekisa uYohane 16:12.
Yomeleza Uxabiso Lwakho Ngamalungiselelo KaThixo
NoYesu wayesoloko eziphindaphinda izinto. Kakade ke, ingqondo isenokuba sele iyiqonda ingongoma ethile—ngokomzekelo, umgaqo weBhayibhile—kodwa ukuwugcina entliziyweni uze uwenze inxalenye ‘yobuntu obutsha’ bobuKristu kusenokuthabatha ithuba elidana, ngakumbi ukuba iindlela ezindala zehlabathi nesimo salo sengqondo sezendele ngokunzulu. (Efese 4:22-24) Ngokuqinisekileyo leyo yimeko ababekuyo abafundi bakaYesu xa kwakufuneka boyise ikratshi baze babonakalise ukuthobeka. Kwizihlandlo eziliqela, uYesu kwafuneka abafundise ngokuthobeka, sihlandlo ngasinye ebethelela kwale nkalo inye ngeendlela ezahlukahlukeneyo khon’ ukuze ingene izike, nto leyo ekugqibeleni eyenzekayo.—Mateyu 18:1-4; 23:11, 12; Luka 14:7-11; Yohane 13:5, 12-17.
Kule mihla, iintlanganiso zamaKristu neempapasho zeWatch Tower zilandela umzekelo kaYesu ekufundiseni kakuhle ngokuphindaphinda. Ngoko simele sikuxabise oku njengoko kuyimbonakaliso yothando yokusikhathalela kukaThixo yaye singaze sidikwe koko sikufumanayo, njengamaSirayeli awadikwa yimana. Eneneni, njengoko ngomonde sicingisisa nzulu ngezikhumbuzo zikaYehova ezithe rhoqo, siya kusibona isiqhamo esihle kubomi bethu. (2 Petros 3:1) Isimo sengqondo esinjalo soxabiso enyanisweni sibonisa ukuba ‘siyayifumana ingqiqo’ yeLizwi likaThixo ezintliziyweni nasezingqondweni zethu. (Mateyu 13:15, 19, 23) Ngokuphathelele oku, sinomzekelo omhle womdumisi uDavide, owathi nakubeni wayengenakutya kokomoya okwahlukahlukeneyo esikufumanayo thina namhlanje, wayichaza imithetho kaYehova ‘njengemnandi kunobusi, kunencindi yobusi’!—INdumiso 19:10.
“Imana” Enika Ubomi Obungunaphakade
UYesu wathi kumaYuda: “Ndim isonka sobomi. Ookhokho benu badla imana entlango ukanti bafa. . . . Ndim isonka esiphilayo esehla sivela ezulwini; ukuba nabani na udla kwesi sonka uya kuphila ngonaphakade . . . Isonka endiya kusinikela yinyama yam ngenxa yobomi behlabathi.” (Yohane 6:48-51) Isonka sokoqobo okanye imana ayizange yaye ayinakuze inike ubomi obungunaphakade. Kodwa abo banokholo kwidini lentlawulelo likaYesu ekugqibeleni baya kunandipha intsikelelo yobomi obungunaphakade.—Mateyu 20:28.
Inkoliso yabo bangenelwayo kwintlawulelo kaYesu iya kunandipha ubomi obungunaphakade kwiparadesi esemhlabeni. “Isihlwele esikhulu” saba—esafuziselwa kwangaphambili ‘yinkitha engumxube’ yabaphambukeli abazibandakanya namaSirayeli kwiMfuduko yawo ukusuka eYiputa—siya kusinda “kwimbandezelo enkulu” ezayo eya kuphelisa ihlabathi labo bonke ubungendawo. (ISityhilelo 7:9, 10, 14; Eksodus 12:38) Kwanowona mvuzo mkhulu unanditshwa ngabo babefuziselwa ngamaSirayeli ngokwawo. Umpostile uPawulos wabachaza aba, bali-144 000, njengababumba uSirayeli kaThixo wokomoya. Umvuzo wabo ekufeni kukuvuselwa kubomi basezulwini. (Galati 6:16; Hebhere 3:1; ISityhilelo 14:1) Apho uYesu uya kubanika uhlobo olukhethekileyo lwemana.
Oko Kuthethwa ‘Yimana Efihlakeleyo’
UYesu ovusiweyo wathi kuSirayeli wokomoya: “Lowo woyisayo ndiza kumnika inxalenye yemana efihlakeleyo.” (ISityhilelo 2:17) Le mana ifihlakeleyo yokomfuziselo isikhumbuza imana uThixo awayalela uMoses ukuba ayigcine kwingqayi yegolide ngaphakathi kwetyeya engcwele yomnqophiso. ITyeya yayigcinwa kwigumbi leYona Ngcwele yomnquba. Apho yayikwindawo engabonakaliyo, ngokungathi kunjalo yayifihlakele. Njengoko yayigcinwe njengesikhumbuzo, le mana yomboniso ayizange yonakale ngoxa yayikwiTyeya, ngoko ke yayiza kuba ngumfuziselo ofanelekileyo wokondliwa ngokutya okungonakaliyo. (Eksodus 16:32; Hebhere 9:3, 4, 23, 24) Ngokunika abali-144 000 imana efihlakeleyo, uYesu uqinisekisa ukufumana kwabo ukungafi nokungabi nakonakala njengoonyana bakaThixo bokomoya.—Yohane 6:51; 1 Korinte 15:54.
Umdumisi wathi: “Ngokuba likuwe [Yehova] ithende lobomi.” (INdumiso 36:9) Hayi indlela elo lungiselelo lemana—eyokoqobo neyokomfuziselo—elisiqinisa ngayo eso siseko senyaniso! Imana uThixo awayinika uSirayeli wamandulo, eyokomfuziselo awayidlulisela ngenyama kaYesu eyanikelwa ngenxa yethu, kwaneyokomfuziselo efihlakeleyo awayinikela ngoYesu kwabali-144 000, sonke isikhumbuza ngokuxhomekeka kwethu ngokupheleleyo kuThixo ukuze sifumane ubomi. (INdumiso 39:5, 7) Masizithobe, sithozame yaye sisoloko sikuvuma oku kuxhomekeka kwethu kuye. Ngenxa yoko, uYehova uya ‘kusenzela okulungileyo ekupheleni kwethu.’—Duteronomi 8:16.
[Imifanekiso ekwiphepha 26]
Ukuze bafumane ubomi obungunaphakade, bonke abantu baxhomekeke ‘kwisonka esiphilayo esehla sivela ezulwini’
[Umfanekiso okwiphepha 28]
Ukubakho kuzo zonke iintlanganiso zamaKristu kubonisa uxabiso lwethu ngezikhumbuzo zikaYehova