Imibuzo Evela Kubafundi
Ngaba kwityeya yomnqophiso kwakukho amacwecwe amabini kuphela okanye kwakukho nezinye izinto?
Ngexesha lokunikezelwa kwetempile kaSolomon ngowe-1026 B.C.E., “kwakungekho nto kwiTyeya ngaphandle kwamacwecwe amabini awayebekwe nguMoses apho eHorebhe, xa uYehova wenza umnqophiso noonyana bakaSirayeli ngoxa babephuma eYiputa.” (2 Kronike 5:10) Kodwa izinto zatshintsha.
“Ngenyanga yesithathu emva kokuphuma koonyana bakaSirayeli ezweni laseYiputa,” bangena kwintlango yaseSinayi. (Eksodus 19:1, 2) Emva koko, uMoses wenyuka waya kwiNtaba yeSinayi waza wanikwa amacwecwe amabini oMthetho. Uthi: “Ndajika ke ndehla entabeni ndaza ndawabeka amacwecwe etyeyeni endayenzayo, ukuze ahlale khona, kanye njengoko uYehova wandiyalelayo.” (Duteronomi 10:5) Le yayiyityeya yokwexeshana, leyo uYehova wayeyalele uMoses ukuba ayenze ukuze afake kuyo amacwecwe oMthetho. (Duteronomi 10:1) Ityeya yomnqophiso ayizange isetyenziswe de kwaba malunga nasekupheleni kowe-1513 B.C.E.
Emva kokukhululwa kwawo eYiputa, amaSirayeli aqalisa ukukhalazela ukutya. Ngoko uYehova wawanika imana. (Eksodus 12:17, 18; 16:1-5) Ngelo xesha uMoses wathi kuAron: “Thabatha ingqayi uze ufake kuyo iomere ezeleyo yemana, uyibeke phambi koYehova ukuze igcinelwe izizukulwana zenu.” Ingxelo ithi: “Wayibeka uAron phambi kweSingqino [indawo ekugcinwa kuyo amaxwebhu abalulekileyo] ukuba igcinwe, kanye njengoko uYehova wamyalelayo uMoses.” (Eksodus 16:33, 34) Ngokuqinisekileyo uAron wayiqokelela imana wayifaka engqayini, kodwa ngaphambi kokuba ayibeke apho kwafuneka alinde uMoses enze ityeya aze afake amacwecwe kwiTyeya leyo.
Njengoko sele kuchaziwe, ityeya yomnqophiso yakhiwa ekupheleni kowe-1513 B.C.E. Intonga ka-Aron yafakwa kwiTyeya kamva, emva kwemvukelo kaKora nabanye. Umpostile uPawulos ukhankanya ’ityeya yomnqophiso ekwakukho kuyo ingqayi yegolide enemana kunye nentonga ka-Aron eyayimile amathupha kunye namacwecwe omnqophiso.’—Hebhere 9:4.
UThixo wenza ilungiselelo lemana ebudeni beminyaka engama-40 xa amaSirayeli ayesentlango. Elo lungiselelo lalingasekho xa ‘babesidla imveliso yelizwe’ lesithembiso. (Yoshuwa 5:11, 12) Intonga ka-Aron yayibekwe kwityeya yomnqophiso ngenjongo—ukuze ibe ngumqondiso kwisizukulwana esinemvukelo. Oku kubonisa ukuba le ntonga yayiphambi kweSingqino ngexesha amaSirayeli ayesentlango. Ngoko, kubonakala kusengqiqweni ukugqiba kwelokuba intonga ka-Aron nengqayi yegolide enemana zashenxiswa kwityeya yomnqophiso emva kokuba amaSirayeli engene kwiLizwe Lesithembiso ngaphambi kokunikezelwa kwetempile kaSolomon.