Ngaba UMtyholi Uyasigulisa?

UKUGULA NGEKUNGAZANGA KUBEKHO. UThixo wasidala ukuba siphile ngonaphakade siphile qete. Yayisisidalwa sokomoya, uSathana, esabangela ukugula, intlungu nokufa ukuba kuthuthumbise abantu xa sakhokelela abazali bethu bokuqala, uAdam noEva esonweni.​—⁠GENESIS 3:​1-5, 17-19; ROMA 5:⁠12.

NGABA oku kuthetha ukuba konke ukugula kubangelwa kukungenelela kwemimoya? Njengokuba kuphawulwe kwinqaku elandulelayo, namhlanje abaninzi bacinga njalo. Umakhulu kaOwmadji oselula wayecinga njalo. Kodwa isifo sokuhambisa sikaOwmadji​—⁠maxa wambi iba sisifo esibabulalayo abo baselula kweleenjiko​—⁠ngaba sibangelwa yimimoya engabonakaliyo?

Indima KaSathana

IBhayibhile iwuphendula ngokucacileyo lo mbuzo. Okokuqala, ibonisa ukuba imimoya yabafileyo ayinakubachaphazela abaphilayo. Xa abantu besifa, “abazi lutho.” Abanamoya usalayo xa besifa. Balele engcwabeni, apho ‘kungekho kwenza, nakucinga, nakwazi, nakulumka.’ (INtshumayeli 9:​5, 10) Abafileyo abanakubagulisa nangayiphi na indlela abo baphilayo!

Noko ke, iBhayibhile ityhila ukuba ikho imimoya engendawo. Umvukeli wokuqala kwindalo iphela yayisisidalwa sokomoya ngoku esaziwa ngokuba nguSathana. Ezinye ezamthelelayo zazibizwa ngokuba ziidemon. Ngaba abantu bangaguliswa nguSathana needemon? Oko kwakhe kwenzeka. Enye indlela yokuphilisa kukaYesu ngommangaliso yayiquka ukugxotha iidemon. (Luka 9:​37-43; 13:​10-16) Noko ke, ukuphilisa okuninzi awakwenzayo uYesu yayikukugula okwakungabangelwa ngokuthe ngqo ziidemon. (Mateyu 12:​15; 14:​14; 19:⁠2) Ngokufanayo namhlanje, ngokuqhelekileyo, ukugula kubangelwa ziimeko zemvelo, kungekhona iimeko ezingaphaya kwamandla emvelo.

Kuthekani ngobugqwirha? IMizekeliso 18:​10 iyasiqinisekisa: “Yinqaba ende eliqele igama likaYehova; ilungisa ligidimela kulo, libe sengxondeni.” UYakobi 4:⁠7 uthi: “Mchaseni uMtyholi, yaye uya kusaba kuni.” Ewe, uThixo unako ukubakhusela abakhe abathembekileyo kubugqwirha nakwezinye izinto ezoyikisayo. Leyo yenye intsingiselo yamazwi kaYesu athi: “Inyaniso iya kunikhulula.”​—⁠Yohane 8:⁠32.

Bambi basenokubuza, ‘Kuthekani ngoYobhi? Ngaba akazange aguliswe ngumoya ongendawo?’ Ewe, iBhayibhile ithi ukugula kukaYobhi kwabangelwa nguSathana. Kodwa imeko kaYobhi yayahlukile. Kwakudala uYobhi wayekhuselwe nguThixo kwiidemon. Emva koko uSathana wamcel’ umngeni uYehova ngokuthi ahlasele uYobhi, yaye ngenxa yokuba kwakubandakanyeke iimbambano ezinkulu, uYehova wakhetha ukuba angamkhuseli umkhonzi wakhe ngesi sihlandlo sinye.

Noko ke, uThixo unemida ayimiselayo. Xa wavumela uSathana ukuba athuthumbise uYobhi, uSathana wamgulisa uYobhi kangangexesha elithile, kodwa akazange akwazi ukumbulala. (Yobhi 2:​5, 6) Ekugqibeleni, ukubandezeleka kukaYobhi kwaphela, yaye uYehova wamvuza ngokutyebileyo ngokugcina ingqibelelo yakhe. (Yobhi 42:​10-17) Imilinganiselo eyaboniswa yingqibelelo kaYobhi kudala yabhalwa eBhayibhileni yaye bukho ubungqina boko. Akukho mfuneko yolunye uvavanyo olunjalo.

Usebenza Njani USathana?

Phantse kuzo zonke iimeko, into edibanisa uSathana nokugula kwabantu sisibakala sokuba uSathana walinga isibini sokuqala esingabantu, yaye sawela esonweni. Yena needemon zakhe asingabo abazibangela ngokoqobo izifo ezikhoyo. Noko ke, uSathana akakayeki ukuzama ukusiphembelela ukuba senze izigqibo ezingezozabulumko size silalanise kukholo lwethu, nto leyo esenokonakalisa impilo yethu. Akazange amthakathe, ambulale, okanye amgulise uAdam noEva. Wamlukuhla uEva ukuba angamthobeli uThixo, yaye uAdam walandela ikhondo lakhe lokungathobeli. Umphumo waba kukugula nokufa.​—⁠Roma 5:⁠19.

Umprofeti onguBhileham ongathembekanga wakha waqeshwa ngukumkani wakwaMowabhi ukuba aqalekise uhlanga lwakwaSirayeli, olwaluyingozi luhleli kwimida yakwaMowabhi. UBhileham wazama ukuqalekisa uSirayeli, kodwa akazange akwazi ngenxa yokuba uhlanga lwalukhuselwe nguYehova. Emva koko amaMowabhi aphuma ukuze abahende ukuba bakrexeze baze baziphathe kakubi ngokwesini. Eli cebo laphumelela, yaye uSirayeli waphulukana nenkuselo kaYehova.​—⁠Numeri 22:​5, 6, 12, 35; 24:​10; 25:​1-⁠9; ISityhilelo 2:⁠14.

Sinokufunda isifundo esibalulekileyo kweso senzo sakudala. UThixo uyabanceda abakhonzi bakhe abathembekileyo ngokubakhusela ekuhlaselweni yimimoya engendawo. Noko ke, uSathana usenokuzama ukulinga abathile ukuba balalanise kukholo lwabo. Usenokuzama ukubahenda ngokuba baziphathe kakubi. Okanye, njengengonyama egqumayo, usenokuzama ukuboyikisa ngokuba benze izinto eziza kubenza balahlekelwe yinkuselo kaThixo. (1 Petros 5:⁠8) Kungenxa yeso sizathu lento umpostile uPawulos embiza uSathana ngokuba ‘ngulowo unendlela yokubangela ukufa.’​—⁠Hebhere 2:⁠14.

Umakhulu kaOwmadji wazama ukulukuhla uHawa ukuba asebenzise iintambo namakhubalo ukuze amkhusele ekuguleni. Kwakuza kwenzeka ntoni ukuba uHawa wayenikezele? Wayeza kuba ubonakalise ukungabi nantembelo epheleleyo kuYehova uThixo, yaye wayengenakukwazi ukuphinda aqiniseke ngenkuselo yakhe.​—⁠Eksodus 20:⁠5; Mateyu 4:​10; 1 Korinte 10:⁠21.

USathana wazama ukumlukuhla noYobhi. Wathabatha intsapho yakhe, ubutyebi bakhe, yaye naye wayengekho sempilweni. Kwakhona uYobhi walulekwa ngumfazi wakhe kabuhlungu xa wathi: “Mlahle uThixo ufe!” (Yobhi 2:⁠9) Emva koko watyelelwa “ngabahlobo” bakhe abathathu abazama ngamandla ukumenza avume ukuba nguye obekek’ ityala ngokugula kwakhe. (Yobhi 19:​1-⁠3) Ngale ndlela uSathana wazama ukumdimaza nokumenza aphelelwe yintembelo kubulungisa bukaYehova ngenxa yokuba uYobhi wayebuthathaka. Ukanti, uYobhi waqhubeka ebambelele kuYehova njengokuphela kwethemba lakhe.​—⁠Thelekisa INdumiso 55:⁠22.

Xa sigula, nathi sisenokudandatheka. Kwimeko enjalo, uSathana uyakhawuleza ukusibangela senze izinto ngendlela eya kusenza silalanise kukholo lwethu. Ngenxa yoko, xa sigula, kubalulekile ukwazi ukuba oyena nobangela wokubandezeleka kwethu kusenokwenzeka ukuba kungenxa yokungafezeki esakuzuz’ ilifa, kungekhona ngenxa yamandla angaphaya kwawemvelo. Khumbula ukuba, uIsake othembekileyo wayeyimfama kangangeminyaka emininzi ngaphambi kokufa kwakhe. (Genesis 27:⁠1) Oko kwakungabangelwa yimimoya engendawo kodwa wayaluphele. URakeli wafa ngoxa wayezala, yayingengoSathana, kodwa yayibubuthathaka nje bobuntu. (Genesis 35:​17-19) Ekugqibeleni, bonke abo bathembekileyo bakudala bafa​—⁠kungekhona ngenxa yokuthakathwa okanye yokushwatyulelwa kodwa ngenxa yesono abasizuza ilifa.

Ukucinga ukuba imimoya engabonakaliyo inempembelelo enayo kuzo zonke izigulo esigula zizo ngumgibe. Kunokusibangela siyoyike ngakumbi imimoya. Ngoko, xa sigula, sisenokulingeka ekubeni singxengxeze kwiidemon kunokuba sizigcine kude kunazo. Ukuba uSathana usoyikisa side sibhenele kwimimoya engendawo, oko kuya kuba kukungcatsha uThixo oyinyaniso, uYehova. (2 Korinte 6:​15) Simele sikhokelwe yintlonelo yokoyika uThixo, kungekhona iinkolelo zokoyika uTshaba.​—⁠ISityhilelo 14:⁠7.

UOwmadji oselula sele ekhuseleke gqitha kwimimoya engendawo. Ngokutsho kompostile uPawulos, uThixo umgqala ‘engcwele’ ngenxa yokuba unina uyakholwa, yaye unina unokuthandaza kuThixo ukuba alondoloze intombi yakhe ngomoya oyingcwele. (1 Korinte 7:​14) Ngenxa yokuba esikelelwe ngolwazi oluchanileyo olunjalo, uHawa wakwazi ukumfunela amayeza anokumnceda uOwmadji kunokuba athembele kumakhubalo.

Abanye Oonobangela Bokugula

Inkoliso yabantu ayikholelwa kwimimoya. Xa igula, iya kugqirha​—⁠ukuba inokukwazi ukumhlawula. Kakade ke, umntu ogulayo unokuya kugqirha aze angaphili. Oogqirha abanakukwazi ukwenza imimangaliso. Kodwa abaninzi abaneenkolelo abebenokunyangeka baya kugqirha kuphela xa sebegula kakhulu. Bazama izinto zokunyanga ezinxulumene nemimoya kuqala, yaye xa zingaphumeleli ezo bagqibela ngokuya kugqirha. Abaninzi bafa kungekho mfuneko.

Abanye bafa ngesiquphe ngenxa yokungazi. Abaziboni iimpawu zokugula yaye abazi ukuba ngawaphi amanyathelo okwenene abanokuwathabatha ukuthintela ukugula. Ulwazi luyabanceda ukuba bazikhusele ekubandezelekeni okungeyomfuneko. Kuyaphawuleka ukuba oomama abafundileyo bafelwa ngabantwana abambalwa ngenxa yokugula kunabo bangafundanga. Ewe ukungazi kunokuba yingozi.

Ukungakhathali ngomnye unobangela wokugula. Ngokomzekelo, abaninzi baguliswa kukuba beyeka izinambuzane zihambe phezu kokutya ngaphambi kokuba kutyiwe okanye ngenxa yokuba abo balungiselela ukutya abazihlambi izandla zabo ngaphambi kokuba bakulungise. Ukulala ngaphandle komnatha wengcongconi kwiindawo ezinesifo seengcongconi nako kuyingozi.a Kwiimeko zempilo, ngokufuthi kuba yinyaniso ukuba “kubhetele ukuzikhusela kunokuzinyanga.”

Ukuphila ngendlela engeyoyabulumko kuye kwagulisa izigidi zabantu kwaza kwazibulala ngaphambi kwethuba. Ukunxila, ukuziphatha okubi ngokwesini, ukusebenzisa kakubi iziyobisi, nokusebenzisa icuba kuye kwayonakalisa impilo yabaninzi. Ukuba ubani uzifica ngale mikhwa mibi aze agule, ngaba kungenxa yokuba ethakathwe ngothile okanye kukho umoya omhlaseleyo? Akunjalo. Nguye onetyala ngokugula kwakhe. Ukutyhola imimoya kuya kuba kukwala ukwamkela imbopheleleko ngenxa yokukhetha ukuphila ubomi obuvakalala.

Kakade ke, kukho izinto esingenakukwazi ukuzilawula. Ngokomzekelo, sisenokugula ngenxa yeentsholongwane okanye ngenxa yokungcoliswa komoya. Oku koko kwenzeka kuOwmadji. Unina, wayengakwazi oko kubangela isifo sokuhambisa. Abantwana bakhe abaguli ngokufuthi njengabanye abantwana ngenxa yokuba ugcina indlu nebala lakhe licocekile yaye uzihlamba rhoqo izandla zakhe ngaphambi kokuba alungise ukutya. Kodwa bonke abantwana bakhe bagule ngamaxesha athile. Kukho malunga neentsholongwane ezingama-25 ezahlukahlukeneyo ezinokubangela isifo sokuhambisa. Kubonakala ukuba, akakho umntu onokwazi ukuba yiyiphi eyabangela ingxaki kuOwmadji.

Isicombululo Esihlala Sihleli

Ukugula asililo ityala likaThixo. “UThixo akanakulingwa ngezinto ezimbi yaye naye akalingi namnye.” (Yakobi 1:​13) Ukuba omnye wabakhonzi bakhe uyagula, uYehova uyamomeleza ngokomoya. “UYehova uya kumxhasa elukhukweni lobulwelwe; uya kuluguqula ukhuko lwakhe lonke esifeni sakhe.” (INdumiso 41:⁠3) Ewe uThixo unemfesane. Ufuna ukusinceda, akafuni kusenzakalisa.

Enyanisweni, uYehova unaso isicombululo esihlala sihleli sokugula​—⁠ukufa nokuvuswa kukaYesu. Ngenxa yedini lentlawulelo likaYesu, abantliziyo zinyanisekileyo bayakhululwa kwimeko yabo yesono yaye ekugqibeleni baya kufumana ubomi obugqibeleleyo nobungenasiphelo kwiparadesi esemhlabeni. (Mateyu 5:⁠5; Yohane 3:​16) Imimangaliso kaYesu yayibonisa ukuphilisa ngokwenene okuya kuziswa buBukumkani bukaThixo. Kwakhona uThixo uya kumsusa uSathana needemon zakhe. (Roma 16:​20) Enyanisweni, uYehova unezinto ezintle azigcinele abo bahlakulela ukholo kuye. Kufuneka sibe nomonde size sinyamezele.

Okwangoku, uThixo usinika ubulumko obusebenzisekayo nolwalathiso lokomoya ngeBhayibhile nangabazalwana bethu bazwenibanzi abakhonza nathi ngokunyaniseka. Usibonisa indlela yokuphepha imikhwa emibi ebangela ingxaki empilweni yethu. Yaye usinika nabahlobo bokwenene abaya kusinceda xa kuvela iingxaki.

Cinga kwakhona ngoYobhi. Ukuya egqirheni kwakuya kuba yeyona nto imbi uYobhi awayenokuyenza! Kwakuza kumbangela ukuba angakhuselwa nguThixo yaye wayeza kulahlekelwa zizo zonke iintsikelelo awayeza kuzifumana emva kwaloo ntlungu yakhe. UThixo akazange amlibale uYobhi, yaye akayi kusilibala nathi. “Nivile ngonyamezelo lukaYobhi yaye niwubonile umphumo uYehova awawunikelayo,” utsho umfundi uYakobi. (Yakobi 5:​11) Ukuba asinikezeli, nathi siya kufumana iintsikelelo ezizukileyo zikaThixo ngexesha elifanelekileyo.

Kwenzeka ntoni kuOwmadji oselula? Unina wakhumbula inqaku elikwiphephancwadi eliliqabane leMboniselo, uVukani!, elithetha ngeoral rehydration therapy.b Ngoko walandela izalathiso waza wamenzela iyeza uOwmadji ukuba asele. Ngoku intwazana isempilweni entle.

[Imibhalo esemazantsi]

[Imifanekiso ekwiphepha 7]

UYehova ulungiselele isicombululo esiya kuhlala sihleli kwingxaki yokugula