Zuza Ubulumko Uze Wamkele Uqeqesho
UYEHOVA UTHIXO unguMyaleli Ozukileyo wabantu bakhe. Ubafundisa kungekuphela nje ngaye kodwa nangobomi. (Isaya 30:20; 54:13; INdumiso 27:11) Ngokomzekelo, uYehova wasinika isizwe sakwaSirayeli abaprofeti, abaLevi—ngokukodwa ababingeleli—namanye amadoda azizilumko ukuze akhonze njengabafundisi. (2 Kronike 35:3; Yeremiya 18:18) Abaprofeti babefundisa abantu ngeenjongo neempawu zikaThixo baze bababonise ikhondo elilungileyo ababemele balilandele. Ababingeleli nabaLevi babenembopheleleko yokufundisa uMthetho kaYehova. Yaye amadoda azizilumko, okanye abadala, ayenikela isiluleko esisengqiqweni kumbandela wobomi bemihla ngemihla.
USolomon, unyana kaDavide wayengoyena ubalaseleyo phakathi kwamadoda azizilumko akwaSirayeli. (1 Kumkani 4:30, 31) Esakubona uzuko nobutyebi bakhe, omnye wezona ndwendwe zakhe zibalulekileyo, ukumkanikazi waseShebha, wavuma wathi: “Bendingaxelelwanga nesiqingatha esi. Ulugqithile ngobulumko nangokulunga udaba ebendiluvile.” (1 Kumkani 10:7) Yayiyintoni imfihlelo yobulumko bukaSolomon? Xa wayemiselwa njengokumkani wakwaSirayeli ngowe-1037 B.C.E., uSolomon wathandazela “ubulumko nokwazi.” Ekholiswa koko wayekucela, uYehova wamnika ulwazi, ubulumko nentliziyo enokuqonda. (2 Kronike 1:10-12; 1 Kumkani 3:12) Akumangalisi ke ngoko ukuba uSolomon abe “wathetha amawaka amathathu emizekeliso”! (1 Kumkani 4:32) Eminye kule, kuquka “amazwi ka-Agure” nalawo “kaLemuweli, ukumkani,” yafakwa kwingxelo ekwincwadi yeBhayibhile yeMizekeliso. (IMizekeliso 30:1; 31:1) Inyaniso echazwe kule mizekeliso ityhila ubulumko bukaThixo yaye ayiguquki. (1 Kumkani 10:23, 24) Kuye nabani na onqwenela ubomi obonwabisayo nobunempumelelo, isasebenza nanamhlanje njengokuba yayinjalo ekuthethweni kwayo.
Ukuphumelela Nokucoceka Ngokokuziphatha—Njani?
Injongo yencwadi yeMizekeliso ichazwa kumazwi ayo okuqala athi: “Imizekeliso kaSolomon unyana kaDavide, ukumkani wamaSirayeli, yokuba kwaziwe ubulumko noqeqesho, yokuba kuqondwe iintetho zengqondo, yokuba kwamkelwe uqeqesho lwengqiqo, ubulungisa nesiko nokuthe tye, yokuba izidenge zinikwe ubuqili, ulutsha lunikwe ukwazi nokunkqangiyela.”—IMizekeliso 1:1-4.
Hayi indlela ebaluleke ngayo injongo efezwa ‘yimizekeliso kaSolomon!’ Yeyokuba ‘ubani azi ubulumko noqeqesho.’ Ubulumko buquka ukuzibona izinto njengokuba zinjalo uze usebenzise olo lwazi ukucombulula iingxaki, ukufikelela usukelo onalo, uphephe okanye uthintele iingozi, okanye uncede abanye ukuze benjenjalo. Enye imbekiselo yathi: “Kwincwadi yeMizekeliso, ‘ubulumko’ buthetha indlela echubekileyo yokuphila—amandla okukwazi ukwenza ukhetho oluchanileyo yaye uphile ngendlela ephumelelayo.” Hayi indlela okubaluleke ngayo ukuzuza ubulumko!—IMizekeliso 4:7.
Imizekeliso kaSolomon ikwasinika uqeqesho. Ngaba siyalufuna olu qeqesho? EZibhalweni, uqeqesho ludlulisela ingcamango yokulungisa, ukukhalimela okanye ukohlwaya. Ngokutsho komnye umphengululi weBhayibhile, “lubonisa ukuqhelisela imo yokuziphatha, equka ukulungiswa kotyekelo olusenokukhokelela ubani kwisenzo okanye iimbono zobuyatha.” Enoba siyaziqeqesha okanye siqeqeshwa ngabanye, uqeqesho alusithinteli nje ekwenzeni okubi kuphela kodwa lusishukumisela ekubeni siguqukele ekwenzeni okuhle. Ewe, siyalufuna uqeqesho ukuba sifuna ukuhlala sicocekile ngokokuziphatha.
Ngoko ke injongo yemizekeliso intlu-mbini—kukusinika ubulumko noqeqesho. Uqeqesho lokuziphatha okuhle namandla engqondo luneenkalo ezininzi. Ngokomzekelo, ubulungisa nokusesikweni ziimpawu zokuziphatha okuhle, yaye zisinceda sikwazi ukunamathela kwimilinganiselo ephakamileyo kaYehova.
Ubulumko bubandakanya iinkalo ezininzi, kuquka ukuqonda, ingqiqo, ubuqili namandla okucinga. Ukuqonda ngamandla okukwazi ukubona into uze ukuqonde oko ikuko ngokufumanisa izinto ezibandakanyekileyo kuyo, ngaloo ndlela ufumana ingqiqo yayo. Ingqiqo ifuna ulwazi lokuqiqa nokuqonda isizathu sokuba ikhondo elithile libe lelilungileyo okanye eliphosakeleyo. Ngokomzekelo, umntu oqondayo unokumbona ubani onxaxhayo, yaye usenokukhawuleza amlumkise ngaloo ngozi. Kodwa kufuneka abe nengqiqo ukuze aqonde isizathu sokuba loo mntu athabathe elo khondo nokuze akwazi ukufumanisa eyona ndlela iphumelelayo yokumhlangula.
Abantu abanobuqili balumkile—abakhohliseki. (IMizekeliso 14:15) Bayakwazi ukubona ububi kusengaphambili baze babulungiselele. Yaye ubulumko businceda sikwazi ukuyila iingcinga neembono ezakhayo ezibonisa ikhondo lobomi obunenjongo. Kuvuza ngokwenene ukufunda imizekeliso yeBhayibhile kuba yabhalelwa ukuze sibazi ubulumko noqeqesho. ‘Kwaneziyatha’ ezinikela ingqalelo kwimizekeliso ziya kuzuza ubuqili, luze “ulutsha,” luzuze ulwazi namandla okucinga.
Imizekeliso Kwabazizilumko
Noko ke, imizekeliso yeBhayibhile asiyoyeziyatha nabaselula nje kuphela. Yeyakhe nabani na osisilumko ngokwaneleyo ukuba ayiphulaphule. UKumkani uSolomon uthi: “Ukuze eve osisilumko, aqokele afunde, oqondayo azuze amacebo obulumko, yokuba kuqondwe umzekeliso nezafobe zokuthetha, amazwi ezilumko nezintsonkotha zazo.” (IMizekeliso 1:5, 6) Umntu osele enobulumko uya kongeza imfundo yakhe ngokunikela ingqalelo kwimizekeliso, yaye indoda enokuqonda iya kuhlaziya amandla ayo ayikhokelele kubomi obunempumelelo.
Umzekeliso ngokufuthi uchaza inyaniso enzulu ngamazwi nje ambalwa. Imizekeliso yeBhayibhile isenokusebenzisa amazwi antsonkothileyo. (IMizekeliso 1:17-19) Yimbi imizekeliso ingamaqhina—iyadida yaye iyintetho engaqondakali msinya efuna ukucaciswa. Umzekeliso usenokuba nesifaniso, isikweko nezinye izigaba-ntetho. Ukuze uyiqonde kufuneka uchithe ixesha uze ucamngce. USolomon, umqambi wemizekeliso emininzi, ngokuqinisekileyo wayekwazi oko kuthethwa kukuqonda umzekeliso. Kwincwadi yeMizekeliso, wenza umsebenzi wokubethelela loo mandla kubafundi bakhe, nto leyo umntu osisilumko ebeya kufuna ukunikela ingqalelo kuyo.
Isiqalo Esikhokelela Kusukelo
Umntu unokuluqalisa njani usukelo lobulumko noqeqesho? USolomon uyaphendula: “Ukoyika uYehova kukuqala kokwazi. Ubulumko noqeqesho izimathane ziludelile.” (IMizekeliso 1:7) Ulwazi luqala ngokoyika uYehova. Ngaphandle kolwazi akunakubakho ubulumko okanye uqeqesho. Ngoko ke, ukoyika uYehova, sisiqalo sobulumko noqeqesho.—IMizekeliso 9:10; 15:33.
Ukoyika uThixo asikokunkwantya ngenxa yakhe. Kunoko, kukubonakalisa intlonelo noloyiko olufanelekileyo. Alunakubakho ulwazi lwenyaniso ngaphandle kolu loyiko. Kakade ke, ubomi buvela kuYehova uThixo, yaye ubomi bubalulekile ukuze sibe nalo naluphi na ulwazi. (INdumiso 36:9; IZenzo 17:25, 28) Ukongezelela koko, uThixo wadala zonke izinto; ngoko lonke ulwazi abanalo abantu lusekelwe ekufundeni ngomsebenzi wezandla zakhe. (INdumiso 19:1, 2; ISityhilelo 4:11) UThixo uphefumlele neLizwi lakhe, ‘eliyingenelo ekufundiseni, ekohlwayeni, ekubekeni izinto ngokuthe tye, ekuqeqesheleni ebulungiseni.’ (2 Timoti 3:16, 17) Ngoko ke, esona siseko sibalulekileyo salo lonke ulwazi lwenyaniso nguYehova, yaye umntu olufunayo umele amoyike ngokumhlonela.
Luxabiseke kangakanani ulwazi lwabantu nobulumko behlabathi ngaphandle kokoyika uThixo? Umpostile uPawulos wabhala: “Uphi na umntu osisilumko? Uphi na umbhali? Uphi na umxambulisi wale nkqubo yezinto? UThixo akabenzanga baba bubudenge na ubulumko behlabathi?” (1 Korinte 1:20) Ngenxa yokuswela uloyiko lobuthixo, umntu onobulumko behlabathi wenza izigqibo eziphosakeleyo nakwiinkalo ezaziwayo aze agqibele ngokuba ‘sisidenge.’
‘Izambalo Emqaleni Wakho’
Wandula ke ukumkani osisilumko alumkise ulutsha athi: “Nyana wam, yiva uqeqesho lukayihlo, ungawulahli umyalo kanyoko. Kuba ezo zinto zisisangqawe esihle entlokweni yakho, nezambalo emqaleni wakho.”—IMizekeliso 1:8, 9.
KuSirayeli wamandulo, abazali babenikwe imbopheleleko yokufundisa abantwana babo nguThixo. UMoses wabongoza oobawo wathi: “La mazwi ndikuwisela umthetho ngawo namhlanje, aze abe sentliziyweni yakho. Uze uwatsolise koonyana bakho, uthethe ngawo ekuhlaleni kwakho endlwini yakho, nasekuhambeni kwakho ngendlela, nasekulaleni kwakho, nasekuvukeni kwakho.” (Duteronomi 6:6, 7) Noomama babenempembelelo ephawulekayo. Esebenza ngaphantsi kwegunya lomyeni wakhe, umfazi ongumHebhere wayenako ukubethelela imithetho yentsapho.
Enyanisweni, kuyo yonke iBhayibhile intsapho isisiseko imfundiso edluliselwa kuso. (Efese 6:1-3) Ukuze abantwana bakwazi ukuthobela abazali babo abakholwayo bamele babe bahonjiswe ngokomfuziselo ngesangqawe esihle entlokweni nezambalo emqaleni.
“Imka Nomphefumlo Womniniyo”
Ngaphambi kokuba amthumele eUnited States ukuya kufumana imfundo ephakamileyo, omnye ubawo waseAsia wacebisa unyana wakhe oneminyaka eli-16 ubudala ukuba angazibandakanyi nabantu ababi. Eli cebiso lalikukuphinda isilumkiso sikaSolomon esithi: “Nyana wam, ukuba aboni bathe bakuhenda, uze ungavumi ke.” (IMizekeliso 1:10) Noko ke, uSolomon walatha umgibe abawusebenzisayo esithi: “Ukuba bathe, hamba nathi, masilalele igazi, masibalalele abamsulwa bengenatyala; Masibaginye njengabafileyo behleli, begqibelele njengabehla baye emhadini; Sofumana ubuncwane obunqabileyo, sozizalisa izindlu zethu ngamaxhoba; Wena ke woliphosa phakathi kwethu iqashiso lakho, yoba nye ingxowa yethu sonke.”—IMizekeliso 1:11-14.
Kucacile ukuba lo mgibe uba bubutyebi. Ngenxa yokwenza inzuzo ekhawulezayo, “aboni” balukuhla abanye ukuba babandakanyeke kubundlobongela okanye iindlela ezingekho sikweni. Ngenxa yokufuna ukuzuza izinto eziphathekayo aba bangendawo ababi mathidala ukuphalaza igazi. ‘Baliginya ixhoba labo lihleli njengeSheol, sele liphelele,’ baliphange yonke into elinayo, njengokuba ingcwaba liwamkela wonke umzimba. Isimemo sabo silusukelo lolwaphulo-mthetho—bafuna ‘ukuzalisa izindlu zabo ngamaxhoba,’ yaye bafuna abaziziyatha ukuze ‘bahlulelane nabo ngeqashiso labo.’ Esinjani ukuba sexesheni isilumko kuthi! Ngaba imigulukudu yolutsha nabathengisi beziyobisi abasebenzisi indlela efanayo ukuze bafumane amalungu amatsha? Ngaba asikokuthenjiswa ngokuba sisityebi ngokukhawuleza okuhenda abaninzi xa becengelwa kumashishini athandabuzekayo?
Ukumkani osisilumko ucebisa athi, “Nyana wam, musa ukuhamba ngendlela nabo; Lunqande unyawo lwakho emendweni wabo. Kuba iinyawo zabo zigidimela ububi, zikhawulezela ukuphalaza igazi.” Xa echaza isiphelo sabo kusengaphambili esibazisela intlekele, wongezelela athi: “Kuba ufumana usanekwa umnatha emehlweni eentaka ezi zonke; Ke bona balalela elabo igazi, bazonda owabo umphefumlo. Unjalo umendo wabo bonke abangxamele inzuzo embi; Imka nomphefumlo womniniyo.”—IMizekeliso 1:15-19.
“Wonk’ ubani owenza inzuzo yokungalungisi” uya kutshabalala kwikhondo lakhe. Kwaloo ndawo abangendawo balalela kuyo abanye iya kuba ngumgibe kwakubo. Ngaba abenza ububi ngabom baya kuguquka kwikhondo labo? Akunjalo. Umnatha usenokubekwa kwindawo ebonakalayo, kodwa iintaka—izidalwa ‘ezinamaphiko’—sekunjalo zibhabha ziye kuwo. Ngendlela efanayo, abangendawo bemfanyekiswe kukubawa, batyhalela phambili nezenzo zabo zolwaphulo-mthetho, nangona kungekudala okanye kamva beya kubhajiswa.
Ngubani Oya Kuphulaphula Kwilizwi Lobulumko?
Ngaba ngokwenene aboni bayaliqonda ukuba ikhondo labo libazisela intlekele? Ngaba balunyukisiwe ngemiphumo yeendlela zabo? Ukungakhathali akusosingxengxezo, kuba sona kanye esi sigidimi sivakaliswa kwiindawo zikawonke-wonke.
USolomon uthi: “Ubulumko bumemeza ngaphandle, buvakalisa izwi labo ezitratweni. Bumemeza emantloko eendawo zembutho; Ekungeneni kwamasango, phakathi komzi, buthetha iintetho zabo.” (IMizekeliso 1:20, 21) Ngelizwi elikhulu nelicacileyo, ubulumko bumemeza kwiindawo zikawonke-wonke ukuze beve bonke. KuSirayeli wamandulo amadoda amakhulu ayenikela iziluleko zobulumko yaye edlulisela izigwebo emasangweni esixeko. Ukulungiselela thina, uYehova uye wabangela ukuba ubulumko bubhalwe eLizwini lakhe iBhayibhile, efumaneka ngokubanzi. Yaye abakhonzi bakhe namhlanje baxakekile bevakalisa isigidimi sabo esidlangalaleni kuyo yonk’ indawo. Ngokwenene ubulumko bukaThixo buvakaliswe phambi kwabo bonke.
Yintoni obuyithethayo ubulumko bokwenyaniso? Buthi: “Kunini na, ziyathandini, nithanda ubuyatha, abagxeki befuna ukugxeka, . . . ? Ngokuba ndinibizile, anavuma, ndolule isandla sam, akwabakho ukhathalayo.” Izidenge aziliphulaphuli ilizwi lobulumko. Umphumo woku kukuba, “baya kudla ke isiqhamo sendlela yabo.” Kuba “ukuphamba kweziyatha kuyazibulala, nobunqobo bezinyabi buyazitshabalalisa.”—IMizekeliso 1:22-32.
Noko ke, kuthekani ke ngalowo oye wazipha ixesha lokuphulaphula amazwi obulumko? “Ke yena . . . uhleli ekholosile, wonwabile ekunkwantyiseni kobubi.” (IMizekeliso 1:33) Ngamana ungaphakathi kwabo bazuza ubulumko baze bamkele uqeqesho ngokunikela ingqalelo kwimizekeliso yeBhayibhile.
[Umfanekiso okwiphepha 15]
Ubulumko bokwenyaniso bufumaneka ngokubanzi