‘Ngobulumko Imihla Yethu Iya Kuba Mininzi’
NGUBANI onokukhanyela ukuba ubulumko buyafuneka xa sijamelene neengxaki zobomi? Ubulumko bokwenene kukwazi ukusebenzisa ulwazi nokuqonda ngendlela efanelekileyo. Busisichasi sobuyatha, ubudenge kunye nempambano. Ngoko iZibhalo zisibongoza ukuba sizuze ubulumko. (IMizekeliso 4:7) Eneneni, incwadi yeBhayibhile yeMizekeliso yabhalelwa ukuze isinike ubulumko noqeqesho. Amazwi ayo okuvula afundeka ngolu hlobo: “Imizekeliso kaSolomon unyana kaDavide, ukumkani wakwaSirayeli, yokuba ubani azi ubulumko nengqeqesho, kuqondwe amazwi okuqonda.”—IMizekeliso 1:1, 2.
Khawuhlolisise iimfundiso ezisengqiqweni nezinokuthenjwa zezahluko ezimbalwa zokuqala zeMizekeliso. Njengobawo onothando ebongoza unyana wakhe, uSolomon ukhuthaza abafundi bakhe ukuba bamkele ingqeqesho baze banikele ingqalelo kubulumko. (Isahluko 1 nesesi-2) Usibonisa indlela yokuhlakulela ubuhlobo obusondeleyo noYehova nendlela yokulondoloza intliziyo yethu. (Isahluko 3 nesesi-4) Silulekwa ukuba sihlale siziphethe kakuhle. (Isahluko 5 nesesi-6) Ewe, sikuxabisa gqitha ukubhencwa kwamacebo omntu oziphethe kakubi. (Isahluko 7) Yaye esinjani ukubangel’ umdla kumntu wonke isibongozo sobulumko obumntwisiweyo! (Isahluko 8) Ngaphambi kokuba ahambele phambili kwimizekeliso emifutshane yobuqu kwizahluko ezilandelayo, uKumkani uSolomon wenza ushwankathelo oluvuselela oko sele ethethe ngako ukuza kuthi ga ngoku.—Isahluko 9.
‘Yizani, Nidle Isonka Sam Nize Nisele Iwayini Yam’
Umqukumbelo wezahluko zokuqala zeMizekeliso awuloshwankathelo nje olungenamfundiso oluphinda kuphela icebiso esele likhankanyiwe ngaphambili. Kunoko, ubekwa ngendlela engumzekelo echulumancisayo nechukumisayo, eshukumisela umfundi ukuba afune ubulumko.
Isahluko 9 sencwadi yeBhayibhile yeMizekeliso sivula ngala mazwi: “Ubulumko bokwenyaniso buyakhile indlu yabo; buzimbele iintsika zabo zosixhenxe.” (IMizekeliso 9:1) Omnye umphengululi uthi ibinzana elithi “iintsika ezisixhenxe, lithetha ipomakazi lendlu elakhiwe entendelezweni, laza laxhaswa ngeentsika ezintathu kumacala amabini ize enye ibe sesazulwini enye ibe kwicala lesithathu elijonge kwicala elivulekileyo elijonge ngasesangweni.” Nokuba oku kunjalo okanye akunjalo, ubulumko bokwenene bakhele iindwendwe ezininzi indlu eyomeleleyo.
Yonke into ilungele isidlo esikhulu. Kukho inyama kunye newayini. Ubulumko bunikele ingqalelo ngokwabo ekulungiseleleni esi sidlo nasekulungiseni itafile. “Buyilungisile inyama exheliweyo; buyiphithikezile iwayini yabo; ngaphezu koko buyimise ngolungelelwano itafile yabo.” (Mizekeliso 9:2) Ukudla kokomoya okukhanyisayo ngokucacileyo kukho kule tafile yokomfuziselo.—Isaya 55:1, 2.
Ngoobani abamenyiweyo kwesi sidlo silungiselelwe bubulumko? “Buthumele iimpelesi zabo, ukuze bumemeze phezu kweendawo eziphakamileyo zedolophu, busithi: ‘Nabani na ongenamava, makaphambukele apha.’ Nabani na oswele intliziyo—buthe kuye: ‘Yizani, nidle isonka sam nize nabelane ngokusela iwayini endiyiphithikezileyo. Yekani abangenamava nize niphile, yaye hambani ngqo endleleni yokuqonda.’”—IMizekeliso 9:3-6.
Ubulumko buthumele izicakazana zabo ukuba zikhuphe isimemo. Zihambile zaya kwiindawo zikawonke-wonke apho ziza kukwazi ukumema abona bantu baninzi. Bonke bayamenywa—nabani na “oswele intliziyo,” okanye abo baswele ukuqonda, nabo bangenamava. (IMizekeliso 9:4) Yaye bathenjiswa ubomi obungunaphakade. Ubulumko obufumaneka eLizwini likaThixo, kuquka nobo busencwadini yeMizekeliso, ngokuqinisekileyo buyafumaneka phantse kuye wonk’ ubani. Namhlanje, njengabathunywa besigidimi sobulumko bokwenene, amaNgqina kaYehova axakekile emema abantu, naphi na apho bafumaneka khona, ukuba bafunde iBhayibhile. Eneneni, ukungenisa ulwazi olunjalo kunokuphumela kubomi obungunaphakade.—Yohane 17:3.
AmaKristu ngokuthobeka afanele amkele uqeqesho lobulumko. Oku kuyinyaniso ngokukhethekileyo ngabantu abaselula kunye nabo baqalise ukufunda ngoYehova kutshanje. Kuba bengenamava kangako ngeendlela zikaThixo, basenokuba ‘baswele intliziyo.’ Oku akuthethi ukuba zonke iintshukumisa zabo zimbi, kodwa kuthabatha ixesha nomgudu ukuvisisanisa intliziyo neendlela ezikholisa uYehova uThixo. Oku kufuna ubani avisisanise iingcinga, iminqweno, utyekelo kunye nosukelo analo noko uThixo akuvumelayo. Kubaluleke kakhulu ukuba ‘balangazelele ubisi olungangxengwanga lwelizwi.’—1 Petros 2:2.
Eneneni, ngaba asifanele sonke sifune okungaphaya ‘kwemfundiso esisiqalelo’? Ngokuqinisekileyo sonke sifanele sakhe ulangazelelo ‘ezintweni ezinzulu zikaThixo’ size sifumane isondlo kukutya okuqinileyo kwabantu abaqolileyo. (Hebhere 5:12–6:1; 1 Korinte 2:10) “Ikhoboka elithembekileyo neliyingqondi,” elonganyelwe nguYesu Kristu ngokwakhe, ngokukhuthala linika abantu bonke ukutya ngexesha elifanelekileyo. (Mateyu 24:45-47) Kwanga singazondla kule tafile yobulumko ngokulifundisisa ngokukhutheleyo iLizwi likaThixo neempapasho ezisekelwe eBhayibhileni ezilungiselelwa leli khoboka.
“Musa Ukumohlwaya Umgculeli”
Iimfundiso zobulumko ziquka ukululeka nokukhalimela. Asinguye wonk’ ubani oyamkelayo le nkalo yobulumko. Ngenxa yoko, umqukumbelo wecandelo lokuqala lencwadi yeMizekeliso unesi siluleko: “Olungisa umgculeli uzizisela ihlazo, nowohlwaya ongendawo—uzizisela isiphene. Musa ukumohlwaya umgculeli, ukuze angakuthiyi.”—IMizekeliso 9:7, 8a.
Umgculeli uyamqumbela aze amthiye lowo uzama ukumnceda ukuba alungise iindlela zakhe. Umntu ongendawo akasixabisi isiluleko. Asibobulumko ukuzama ukufundisa iLizwi likaThixo elihle kumntu oyithiyileyo inyaniso okanye ozama ukuyigculela! Xa umpostile uPawulos wayeshumayela kwa-Antiyokwe, wadibana neqela lamaYuda angayithandiyo inyaniso. Lazama ukumbandakanya kwingxoxo ngobuqhophololo limphikisa, kodwa uPawulos wasuka wathi: “Ekubeni nina nilityhalela kude kuni [ilizwi likaThixo] yaye ningazigwebi ningababufanelekeleyo ubomi obungunaphakade, khangelani! siphethukela ezintlangeni.”—IZenzo 13:45, 46.
Njengoko sisenza umgudu wokufikelela abo bantliziyo zinyanisekileyo ngeendaba ezilungileyo zoBukumkani, sifanele silumke singabandakanyeki kwiingxoxo neempikiswano nabagculeli. UKristu Yesu wabayalela oku abafundi bakhe: “Xa ningena endlwini, ze nibabulise abakuloo ndlu; yaye ukuba indlu leyo iyafaneleka, uxolo eniyinqwenelela lona malube kuyo; kodwa ukuba ayifaneleki, uxolo lwenu malubuyele kuni. Naphi na apho kungekho bani uningenisayo okanye uwaphulaphulayo amazwi enu, ekuphumeni kwenu kuloo ndlu okanye kweso sixeko vuthululani uthuli ezinyaweni zenu.”—Mateyu 10:12-14.
Indlela asabela ngayo umntu onobulumko xa elulekwa yahlukile kuleyo yomgculeli. USolomon uthi: “Nika umntu osisilumko isohlwayo yaye uya kukuthanda. Nika umntu osisilumko uya kulumka ngakumbi.” (IMizekeliso 9:8b, 9a) Umntu osisilumko uyazi ukuba “akukho ngqeqesho ibonakala ivuyisa okwangoku, kodwa ibuhlungu; ukanti kamva ivelisa isiqhamo soxolo, oko kukuthi, ubulungisa, kwabo baqeqeshiweyo yiyo.” (Hebhere 12:11) Nangona uqeqesho lunokubonakala lubuhlungu, ngaba sikho isizathu sokuba siqumbe okanye sizithethelele ukuba xa silwamkela luza kusenza sibe nobulumko?
Lo kumkani usisilumko uyaqhubeka, “Nika ilungisa ukwazi liya kwandisa ukuqonda.” (IMizekeliso 9:9b) Akakho umntu olumke okanye omdala kakhulu kangangokuba akukho nto anokuyifunda. Olunjani uvuyo ekuba lulo ukubona amaxhego namaxhegokazi esamkela inyaniso aze azahlulele kuYehova! Kwanga nathi singazama ukuhlala sinomnqweno wokufunda size sigcine iingqondo zethu zisebenza.
“Uya Kongezelelwa Iminyaka Yobomi”
Ebethelela umongo walo mxholo sithetha ngawo, uSolomon wongezelela enye into ebalulekileyo ukuze sifumane ubulumko. Ubhala enjenje: “Ukoyika uYehova kukuqala kobulumko, nokwaziwa kwaLowo Ungoyena Ungcwele kukuqonda.” (IMizekeliso 9:10) Akunakuze kubekho ubulumko bobuthixo singekho isisekelo esiqinileyo, uloyiko olufanelekileyo ngoThixo oyinyaniso. Umntu unokuba nolwazi oluninzi kakhulu, kodwa ukuba akamoyiki uYehova, akanako ukulusebenzisa olo lwazi ngendlela ezukisa uMdali. Unokude enze izigqibo eziphosakeleyo ngoxa ezazi kakuhle izibakala, aze abonakale esisidenge. Ukongezelela, ulwazi ngoYehova, Oyena uNgcwele, lubalulekile ukuze ubani afumane ukuqonda, uphawu olubalulekileyo lobulumko.
Ziziphi iziqhamo zobulumko? (IMizekeliso 8:12-21, 35) Ukumkani wakwaSirayeli uthi: “Ngam imihla yakho iya kuba mininzi, yaye uya kongezelelwa iminyaka yobomi.” (IMizekeliso 9:11) Ukuba ngumhlobo nobulumko kunokubangela ukuba uphile iminyaka emininzi. Ewe, “ubulumko bubagcina bephila abo banabo.”—INtshumayeli 7:12.
Ukuzibhokoxa sifuna ubulumko yimbopheleleko yethu. Egxininisa le nkalo, uSolomon wathi: “Ukuba uthe walumka, uzilumkela kwawena; nokuba uye wagculela, oko uya kukuthwala, kanye wedwa.” (IMizekeliso 9:12) Osisilumko usiso ukuze kungenelwe yena, yaye ogculelayo nguye kuphela obekeka ityala ngokubandezeleka kwakhe. Eneneni, sivuna oko sikuhlwayelayo. Kwanga thina, ‘singanikela ingqalelo kubulumko.’—IMizekeliso 2:2.
“Ibhinqa Elinobuyatha Liyaphithizela”
Ngokwahlukileyo koko, uSolomon uqhubeka esithi: “Ibhinqa elinobuyatha liyaphithizela. Limathile yaye alazi nto konke konke. Yaye lihleli emnyangweni wendlu yalo, esihlalweni, kwiindawo eziphakamileyo zedolophu, ukuze limemeze kwabo badlula ngendlela, abahamba ngqo ngomendo wabo, lisithi: ‘Nabani na ongenamava, makaphambukele apha.’”—IMizekeliso 9:13-16a.
Ubuyatha bufaniswa nebhinqa elikhwazayo, elingaqeqeshekanga yaye elingakhathaliyo. Nalo lakhe indlu. Yaye liqalise umsebenzi wokubiza bonke abo bangenamava. Ngoko abo badlula ngendlela banako ukwenza ukhetho. Ngaba baza kwamkela isimemo sobulumko okanye sobuyatha?
“Amanzi Abiweyo Amnandi”
Ubulumko nobuyatha bumema abo baphulaphuleyo ukuba ‘baphambukele apha.’ Noko ke, ezi zimemo zahlukile. Ubulumko bumema abantu ukuba baze kuzanelisa ngewayini, inyama kunye nesonka. Isimemo esikhutshwa bubuyatha sisikhumbuza iindlela zebhinqa eliphila vakalala. USolomon uthi, “Nabani na oswele intliziyo—lithi kuye: ‘Amanzi abiweyo amnandi, nesonka esidlelwa emfihlekweni—siyathandeka.’”—IMizekeliso 9:16b, 17.
Kunokuba abanike iwayini ephithikeziweyo, “umfazi onguNobudenge” ubanika amanzi abiweyo. (IMizekeliso 9:13, IBhayibhile yesiXhosa yowe-1996) EZibhalweni, ukunandipha iintlobano zesini nomfazi wakho omthandayo kufaniswa nokusela amanzi ahlaziyayo. (IMizekeliso 5:15-17) Ngoko, amanzi abiweyo, afanekisela iintlobano zesini ezingavumelekanga ezenzelwa emfihlakalweni. Amanzi anjalo enziwa abonakale emnandi—kunewayini—kuba kaloku abiwe yaye kukho ingcamango yokuba ungakwazi ukusifihla eso senzo. Isonka esityelwa emfihlakalweni senziwa sibonakale simnandi kakhulu kunesonka nenyama yobulumko kuba nje sifumaneka ngendlela engafanelekanga. Ukugqala into engavumelekanga eyenzelwa emfihlakalweni njengento enomtsalane luphawu lobudenge.
Nangona isimemo sobulumko sithembisa ubomi, isimemo somfazi osisidenge asiyichazi imiphumo yokulandela iindlela zakhe. Kodwa uSolomon uyalumkisa: “Akazi ukuba abo bangenamandla basekufeni apho, ukuba abo babizwa lilo basezinzulwini zeShiyol.” (IMizekeliso 9:18) Omnye umphengululi ubhala enjenje: “Indlu kaNobudenge asilokhaya kodwa lingcwaba. Ukuba uyangena kuyo akuyi kuphuma uphila.” Ukulandela ikhondo lokuziphatha okubi asibobulumko; kukuzibulala.
UYesu Kristu wathi: “Ngenani ngesango elimxinwa; ngokuba ibanzi kwaye iphangalele indlela esa entshabalalweni, yaye baninzi abangena ngayo; kanti limxinwa isango kwaye imxinwa indlela esa ebomini, yaye bambalwa abayifumanayo.” (Mateyu 7:13, 14) Kwanga singasoloko sisidla etafileni yobulumko size sibe phakathi kwabo basendleleni eya ebomini.
[Umfanekiso okwiphepha 31]
Ukufumana ubulumko yimbopheleleko yethu
[Umfanekiso okwiphepha 31]
Umntu onobulumko uyasamkela isiluleko