Lisondele ‘Ixesha Loxolo’!
“Into yonke inexesha elimisiweyo, . . . kukho ixesha lemfazwe, kukho nexesha loxolo.”—INTSHUMAYELI 3:1, 8.
1. Yiyiphi imeko exakayo eye yakho ebudeni benkulungwane yama-20 ngokuphathelele imfazwe noxolo?
INKOLISO yabantu inezizathu ezihle zokululangazelela uxolo. Kule nkulungwane yama-20 luye lwanqongophala uxolo kunakuzo naziphi na iinkulungwane embalini. Into efika ixake kukuba, akuzange ngaphambili kwenziwe imigudu emininzi kangaka yokudala uxolo. Ngowe-1920 kwayilwa uManyano Lwezizwe. Ngowe-1928 iKellogg-Briand Pact (iSivumelwano sikaKellogg noBriand), enye incwadi eyayibiza ngokuthi “ingowona mgudu mkhulu wokulondoloza uxolo emva kweMfazwe Yehlabathi I,” yatyikitywa “phantse ngawo onke amazwe ehlabathi . . . evumelana ukuba akayi kuyigqala imfazwe njengendlela yokuphumeza izilangazelelo zelizwe.” Kwandula ke, ngowe-1945 kwasekwa intlangano yeZizwe Ezimanyeneyo eyangena endaweni yoManyano Lwezizwe olwalusele lunjengenja ekhonkotha ilele ngecala.
2. IZizwe Ezimanyeneyo zithi luyintoni usukelo lwazo, kwaye ziye zaphumelela ukusa kuwuphi umkhamo?
2 NjengoManyano, iZizwe Ezimanyeneyo zathi usukelo lwazo kukugcina uxolo ehlabathini. Kodwa azizange ziphumelele kuyaphi. Kuyavunywa ukuba, ayikho indawo ehlabathini ekugquba kuyo imfazwe ngomlinganiselo ofana noweemfazwe ezimbini zehlabathi. Noko ke, zininzi iimfazwe ezincinane ezisahlutha abantu abaninzi uxolo lwengqondo, zonakalise izinto zabo kwaye ngokufuthi zisube ubomi babo. Ngaba sinokuba nobuganga bokucinga ukuba iZizwe Ezimanyeneyo zinokuguqula inkulungwane yama-21 ibe ‘lixesha loxolo’?
Isiseko Soxolo Lokwenyaniso
3. Kutheni uxolo lokwenene lungenakuze lubekho kusekho intiyo?
3 Uxolo phakathi kwabantu neentlanga lufuna okungaphezulu kunokunyamezelana. Ngaba ngokwenene umntu unokuba seluxolweni nomntu amthiyileyo? Akunjalo ngokutsho kweyoku-1 kaYohane 3:15: “Wonk’ ubani omthiyileyo umzalwana wakhe usisibulala-mntu.” Njengoko imbali yakutshanje ibonisa, intiyo eyendeleyo iye izale izenzo zogonyamelo.
4. Kuphela ngoobani abanokufumana uxolo, yaye ngoba?
4 Ekubeni uYehova ‘enguThixo onika uxolo,’ uxolo lunokufunyanwa kuphela ngabantu abamthandayo uThixo nabayihlonela ngokunzulu imigaqo yakhe yobulungisa. Kucacile ukuba uYehova akaluniki nje nabani na uxolo. “Alukho uxolo kwabangendawo, utsho uThixo wam.” Oku kubangelwa kukuba abangendawo abavumi ukukhokelwa ngumoya oyingcwele kaThixo, osiqhamo sawo siluxolo.—Roma 15:33; Isaya 57:21; Galati 5:22.
5. Yintoni angayicingi kwaukuyicinga amaKristu okwenyaniso?
5 Ukulwa nabanye abantu—njengoko abo bafane babizwe ngokuba bangamaKristu beye bakwenza kumaxesha amaninzi, ngokukodwa kwinkulungwane yama-20—akuyonto ayicingayo kwaukuyicinga amaKristu okwenyaniso. (Yakobi 4:1-4) Kuyinyaniso ukuba, wona alwa neemfundiso ezimmela kakubi uThixo, kodwa ke loo mfazwe iliwa ngenjongo yokunceda abantu, kungekhona ukubenzakalisa. Ukutshutshisa abanye ngenxa yokungavisisani ngonqulo okanye ukusebenzisa izigalo kwimibandela yobuzwe kuchasene mpela nobuKristu bokwenyaniso. UPawulos wayalela amaKristu aseRoma esithi: “Ukuba kunokwenzeka, ngokuxhomekeke kuni, yibani noxolo nabantu bonke.”—Roma 12:17-19; 2 Timoti 2:24, 25.
6. Yiyiphi ekuphela kwendawo olunokufunyanwa kuyo uxolo lokwenene namhlanje?
6 Namhlanje, uxolo oluvela kuThixo lunokufunyanwa kuphela phakathi kwabanquli bakaYehova uThixo. (INdumiso 119:165; Isaya 48:18) Azikho iimbambano zezobupolitika ezichithachitha umanyano lwabo, kuba kaloku kuyo yonke indawo bangoondilele kwezobupolitika. (Yohane 15:19; 17:14) Ngenxa yokuba ‘bemanyene ngokufanelekileyo engqondweni enye nasengcamangweni enye,’ ababi nazo iimbambano zonqulo ezisongela uxolo lwabo. (1 Korinte 1:10) Uxolo analo amaNgqina kaYehova lungummangaliso kule mihla siphila kuyo, ummangaliso owenziwe nguThixo ngokuvisisana nesithembiso sakhe esithi: “Isiveleli sakho ndisenze uxolo, abaphathi bakho ndibenze ubulungisa.”—Isaya 60:17; Hebhere 8:10.
Kutheni “Kukho Ixesha Lemfazwe”?
7, 8. (a) Phezu kwako nje ukuma kwawo koxolo, amaNgqina kaYehova aligqala njani eli xesha siphila kulo? (b) Sisiphi isixhobo esiyintloko semfazwe yamaKristu?
7 Phezu kwako nje ukuma kwawo koxolo, amaNgqina kaYehova aligqala eli xesha siphila kulo ngokuyintloko ‘njengexesha lemfazwe.’ Kakade ke, asiyomfazwe yokoqobo leyo kuba ukunyanzelisa isigidimi seBhayibhile ngezigalo bekuya kuchasana nesimemo sikaThixo sokuba “nabani na onqwenelayo makathabathe amanzi obomi ngesisa.” (ISityhilelo 22:17) Akukho mntu utyhalwa ngesixhanti ukuba aguquke apha! Imfazwe eliwa ngamaNgqina kaYehova yeyokomoya kuphela. UPawulos wabhala: “Izixhobo zomlo wethu azizezenyama, kodwa ngaye uThixo zinamandla okubhukuqa izinto ezinqatyiswe ngamandla.”—2 Korinte 10:4; 1 Timoti 1:18.
8 Esona siphambili ‘kwizixhobo zomlo wethu’ ‘likrele lomoya, oko kukuthi, ilizwi likaThixo.’ (Efese 6:17) Eli krele linamandla. “Ilizwi likaThixo liphilile kwaye linamandla yaye libukhali ngakumbi kunalo naliphi na ikrele elintlangothi-mbini ibe lihlaba de kuse ekwahlulweni komphefumlo nomoya, nokwamalungu nomongo wawo, yaye liyakwazi ukuqonda iingcamango nozimiselo lwentliziyo.” (Hebhere 4:12) Xa esebenzisa eli krele, amaKristu ayakwazi ukubhukuqa “iingqiqo nayo yonke into ephakamileyo ephakanyiswa nxamnye nolwazi lukaThixo.” (2 Korinte 10:5) Liwenza akwazi ukubhenca iimfundiso zobuxoki, imikhwa eyingozi, neentanda-bulumko ezisekelwe kubulumko babantu kunokuba zisekelwe kobukaThixo.—1 Korinte 2:6-8; Efese 6:11-13.
9. Kutheni kungayi kubakho kuyekelela kwimfazwe yethu enxamnye nenyama enesono?
9 Olunye uhlobo lwemfazwe yokomoya lolo lunxamnye nenyama enesono. AmaKristu alandela umzekelo kaPawulos, owavuma esithi: “Ndiyawuqoba umzimba wam ndize ndiwuphathe njengekhoboka, ukuze, emva kokuba ndishumayele kwabanye, mna ngokwam ndingabi ngongakholekileyo ngandlel’ ithile.” (1 Korinte 9:27) AmaKristu aseKolose abongozwa ukuba abhubhise ‘amalungu awo omzimba asemhlabeni ngokuphathelele uhenyuzo, ukungahlambuluki, umnqweno wesini, umnqweno owenzakalisayo, nenkanuko, elunqulo-zithixo.’ (Kolose 3:5) Kwaye umbhali weBhayibhile uYude wabongoza amaKristu ukuba ‘alulwele nzima ukholo olwanikelwa kwaba kanye okwexesha lonke kwabo bangcwele.’ (Yude 3) Kutheni simele senjenjalo nje? UPawulos uyaphendula: “Ukuba niphila ngokuvumelana nenyama ngokuqinisekileyo niza kufa; kodwa ukuba nithi ngawo umoya nilubulale uqheliselo lomzimba olusa ekufeni, niza kuphila.” (Roma 8:13) Ngenxa yala mazwi acacileyo, asinakuyekela kwidabi lethu elinxamnye notyekelo olubi.
10. Yintoni eyenzeka ngowe-1914, yaye kungekudala iza kukhokelela entwenini?
10 Kanti esinye isizathu sokuba eli xesha siphila kulo ligqalwe njengexesha lemfazwe sesokuba ‘umhla wempindezelo kaThixo wethu’ usemnyango. (Isaya 61:1, 2) Ngowe-1914, lalifikile ixesha elalimiselwe nguYehova lokuseka uBukumkani obungoMesiya nelokubunika igunya lokuba bulwe kanobom nxamnye nenkqubo kaSathana. Ixesha elalisikelwe abantu ukuba bazame ukuzilawula ngaphandle kokungenelela kukaThixo laphela ngoko. Kunokuba yamkele uMlawuli kaThixo onguMesiya, inkoliso yabantu yaqhubeka imchasa, kanye njengenkoliso yabantu benkulungwane yokuqala. (IZenzo 28:27) Ekugqibeleni, ngenxa yokuchaswa koBukumkani, uKristu uye wanyanzeleka ukuba ‘abe nobukhosi phakathi kweentshaba zakhe.’ (INdumiso 110:2) Okuvuyisayo kukuba, ISityhilelo 6:2 sithembisa ukuba uya ‘kukuphelelisa ukoyisa kwakhe.’ Oko uya kukwenza ebudeni ‘bemfazwe yemini enkulu kaThixo uSomandla ebizwa ngesiHebhere ngokuba yiHar–Magedon.’—ISityhilelo 16:14, 16.
Lifikile ‘Ixesha Lokuthetha’
11. Kutheni uYehova ebenomonde ngokugqithiseleyo, kodwa ekugqibeleni yintoni eza kufika?
11 Sele kudlule iminyaka engama-85 kwenzeke utshintsho kwimicimbi yabantu ngowe-1914. UYehova ebenomonde gqitha eluntwini. Uye wawenza akuqonda kakuhle amaNgqina akhe ukungxamiseka kwale meko. Ubomi bezigidi zabantu busemngciphekweni. Aba bantu baninzi kangaka bamele balunyukiswe kuba “uYehova . . . akanqweneli ukuba kutshabalale nabani na kodwa unqwenela ukuba bonke bafikelele enguqukweni.” (2 Petros 3:9) Noko ke, kungekudala kuza kufika ‘ukutyhileka kweNkosi uYesu ivela ezulwini kunye neengelosi zayo ezinamandla.’ Bandule ke bonke abo baye basichasa ngabom isigidimi soBukumkani bukaThixo bafumane ‘impindezelo’ uYesu aza kuyizisa ‘phezu kwabo bangamaziyo uThixo nabo bangazithobeliyo iindaba ezilungileyo ezingeNkosi yethu uYesu.’—2 Tesalonika 1:6-9.
12. (a) Kutheni kunokuba lilize ukufunisela ngexesha eza kuqalisa ngalo imbandezelo enkulu? (b) Ngokuphathelele lo mba, yiyiphi ingozi uYesu awalumkisa ngayo?
12 Uya kuphela nini umonde kaYehova? Nakuphi na ukufunisela ukuba iya kuqalisa nini na “imbandezelo enkulu” kulilize. UYesu wayibeka yacaca into yokuba: “Ngokuphathelele loo mhla nelo lixa akukho bani waziyo.” Kwelinye icala, wabongoza esithi: “Ngoko ke, hlalani nilindile, ngenxa yokuba aniwazi umhla eza ngawo iNkosi yenu. . . . Zingqineni nilungile, ngenxa yokuba uNyana womntu uza ngelixa eningacinganga ukuba lilo.” (Mateyu 24:21, 36, 42, 44) Ngamany’ amazwi, oku kuthetha ukuba yonke imihla sifanele sibeke iliso kwiziganeko zehlabathi yaye sicinge ngokuqhambuka kwembandezelo enkulu. (1 Tesalonika 5:1-5) Hayi indlela ekuyingozi ngayo ukucinga ukuba sinako ukungcemba nje kakuhle, siphile ubomi obufane bubizwe ngokuba bobuqhelekileyo, silinde ukubona ukuba yozala nkomoni na! UYesu wathi: “Nikelani ingqalelo kuni ngokwenu ukuba iintliziyo zenu zingaze zisindwe kukuzingxala ngokutya nokusela kakhulu namaxhala obomi, ize ngequbuliso loo mini inifikele ngephanyazo njengomgibe.” (Luka 21:34, 35) Nantsi into esinokuqiniseka ngayo: ‘Imimoya emine’ yentshabalalo ebanjwe ‘ziingelosi ezine’ zikaYehova ayiyi kuhlala ibanjiwe.—ISityhilelo 7:1-3.
13. Yintoni abaye bayiphawula abantu ababalelwa kufutshane nezigidi ezithandathu?
13 Ngenxa yale mini eza ixhabashile yokuziphendulela, amazwi kaSolomon athi “ukuthetha kunexesha lako” aba nentsingiselo ekhethekileyo. (INtshumayeli 3:7) Akuba ephawulile ukuba enyanisweni ngoku lixesha lokuthetha, amaNgqina kaYehova abalelwa kufutshane nezigidi ezithandathu athetha ngenzondelelo ngozuko lukaThixo njengokumkani kwaye alumkisa ngomhla wempindezelo yakhe. Azinikela ngokuvumayo kulo mhla womkhosi wabaphumi-mkhosi bakaKristu.—INdumiso 110:3; 145:10-12.
Abo Bathetha Besithi “Luxolo; Kungekho Luxolo”
14. Ngabaphi abaprofeti bobuxoki ababekho ebudeni benkulungwane yesixhenxe ngaphambi kweXesha Eliqhelekileyo?
14 Ebudeni benkulungwane yesixhenxe ngaphambi kweXesha Eliqhelekileyo, abaprofeti bakaThixo uYeremiya noHezekile badlulisela izigidimi zakhe zomgwebo ezinxamnye neYerusalem ngenxa yokunxaxha kwayo ekumthobeleni uThixo. Intshabalalo ababeyixele kusengaphambili yafika ngowama-607 B.C.E., nangona aba bathunywa bakaThixo babechasiwe ziinkokeli zonqulo eziphambili nezazinempembelelo. Ezo nkokeli zangqineka ‘zingabaprofeti abanobudenge, ababendwendwisa abantu bakaThixo, besithi, Luxolo, kungekho luxolo.’—Hezekile 13:1-16; Yeremiya 6:14, 15; 8:8-12.
15. Ngaba bakho abaprofeti abafanayo nanamhlanje? Cacisa.
15 ‘Njengabaprofeti abanobudenge’ belo xesha, inkoliso yeenkokeli zonqulo zanamhlanje ayibalumkisi abantu bakaThixo ngomhla womgwebo ozayo. Kunoko, ibathembisa ukuba amaqela ezobupolitika ekugqibeleni aza kulufumana uxolo nonqabiseko. Ixhalabele ukwanelisa abantu kunokwanelisa uThixo, ixelela amarhamente ayo oko afuna ukukuva kunokuba iwachazele ukuba uBukumkani bukaThixo bumiselwe kwaye kungekudala uKumkani onguMesiya uza kukuphelelisa ukoyisa kwakhe. (Daniyeli 2:44; 2 Timoti 4:3, 4; ISityhilelo 6:2) Njengabaprofeti bobuxoki, nayo ithetha ‘ngoxolo, kungekho luxolo.’ Kodwa ke isikhuni siza kubuya nomkhwezeli xa kufuneka ijamelene nengqumbo yaLowo iye yammela kakubi yaza yezisa ugculelo olukhulu egameni lakhe. Iinkokeli zobukhosi behlabathi bonqulo lobuxoki, ezichazwe eBhayibhileni njengebhinqa eliziphethe kakubi, ziya koselwa zisaxakeke kukukhwaza zilahlekisa ngelithi kukho uxolo.—ISityhilelo 18:7, 8.
16. (a) AmaNgqina kaYehova aye aziwa ngantoni? (b) Ahluke njani kwabo bamemelela besithi “luxolo; kungekho luxolo”?
16 Isibakala sokuba inkoliso yeenkokeli eziphambili nezinempembelelo zihanahanisa ngokuthembisa ngoxolo asiyigungqisi kwaphela intembelo yabo banokholo kumadinga kaThixo oxolo lokwenyaniso. Sekudlule inkulungwane amaNgqina kaYehova esaziwa njengabameli abanyanisekileyo beLizwi likaThixo, iintshaba ezingacengi ndolalaphi zonqulo lobuxoki, nabaxhasi abazimiseleyo boBukumkani bukaThixo. Kunokuba abonwaye iindlebe abantu ngamazwi amyoli oxolo, akukhuthalele ukubavusa ukuze babone ukuba namhlanje lixesha lemfazwe.—Isaya 56:10-12; Roma 13:11, 12; 1 Tesalonika 5:6.
UYehova Uyathetha
17. Ithetha ntoni into yokuba uYehova kungekudala uza kuthetha?
17 Kwakhona uSolomon wathi: “Nolilungisa nongendawo, uThixo uya kulithetha ityala labo; ngokuba umise ixesha layo yonke imicimbi.” (INtshumayeli 3:17) Ewe, uYehova umisele ixesha lokugweba unqulo lobuxoki kunye ‘nookumkani bomhlaba abazimise nxamnye noYehova noMthanjiswa wakhe.’ (INdumiso 2:1-6; ISityhilelo 16:13-16) Lakufika elo xesha, imihla kaYehova ‘yokuthi cwaka’ iya kuphela. (INdumiso 83:1; Isaya 62:1; Yeremiya 47:6, 7) Esebenzisa uKumkani wakhe obekwe etroneni onguMesiya, uYesu Kristu, uya ‘kuthetha’ ekuphela kolwimi ekubonakala ukuba abo bamchasayo bayaluva: “UYehova uya kuphuma njengegorha, uya kuxhoxha ikhwele njengendoda yokulwa; uya kuduma, ewe, uya kunkqangaza; uya kuba ligorha ezintshabeni zakhe. Kususela kwakude ndithe quthu, ndathi tu, ndazibamba; ngoku ndiya kubefuza njengozalayo, ndibe nephika, ndifuthe nokufutha. Ndobharhisa iintaba neenduli, ndiyitshise yonke imifuno yazo, imilambo ndiyenze iziqithi, ndiwatshise amadike. Ndozihambisa iimfama ngendlela ezingayaziyo, ndizinyathelise kwiingqushu ezingazaziyo; ubumnyama ndibenza ukukhanya phambi kwazo, iindawo ezingamagqagala zibe zithabazi. Zizo ezo izinto endiya kuzenza, ndingazishiyi.” (Akekeliswe sithi.)—Isaya 42:13-16.
18. Kungayiphi ingqiqo abaya kuthi kungekudala abantu bakaThixo ‘bathi cwaka’?
18 Xa uYehova ‘ethethelela’ ukuba nguThixo kwakhe, akusayi kuba yimfuneko ukuba abantu bakhe bazithethelele. Iza kube ilithuba labo ‘lokuthi cwaka.’ La mazwi aza kusebenza kanye ngendlela awasebenza ngayo kubakhonzi bakaThixo bamandulo: “Le yanamhla asiyeyenu; zimiseni nime, nilubone usindiso lukaYehova onani.”—2 Kronike 20:17.
19. Liliphi ilungelo abaza kulifumana kungekudala abazalwana bokomoya bakaKristu?
19 Hayi indlela aya kungqulwa kabuhlungu ngayo uSathana nentlangano yakhe! Abazalwana bakaKristu abazukisiweyo baya kuba negalelo elibalulekileyo kuloyiso lobulungisa, ngokuvisisana neli dinga: “Ngokukokwakhe, uThixo onika uxolo uya kumtyumza uSathana kamsinya phantsi kweenyawo zenu.” (Roma 16:20) Lide lafika ixesha loxolo ekukudala lilindiwe.
20. Lixesha lantoni eliza kufika kungentsuku zatywala?
20 Hayi indlela abasikeleleke ngayo bonke abasemhlabeni abasinda kule mbonakaliso ibalaseleyo yamandla kaYehova! Kungekudala emva koko baya kuthelelwa ngamadoda namabhinqa athembekileyo amandulo eliya kuba lifikile ixesha elimiselwe ukuvuswa kwawo ekufeni. Ngokwenene uLawulo Lweminyaka Eliwaka lukaKristu luya kuba ‘lixesha lokutyala, ixesha lokuphilisa, ixesha lokwakha, ixesha lokuhleka, ixesha lokudloba, ixesha lokuwola kunye nexesha lokuthanda.’ Ewe, liya kuba ‘lixesha loxolo’ ngonaphakade!—INtshumayeli 3:1-8; INdumiso 29:11; 37:11; 72:7.
Ithini Impendulo Yakho?
◻ Siyintoni isiseko soxolo oluhlala luhleli?
◻ Kutheni amaNgqina kaYehova egqala eli xesha siphila kulo ‘njengexesha lemfazwe’?
◻ Kubantu bakaThixo linini ixesha ‘lokuthetha,’ yaye linini ixesha ‘lokuthi cwaka’?
◻ UYehova uya kuthetha njani yaye nini?
[Ibhokisi/Imifanekiso ekwiphepha 13]
UYehova Unexesha Alimiseleyo Ukuze
◻ atsalele uGogi ekubeni ahlasele abantu bakaThixo.—Hezekile 38:3, 4, 10-12
◻ abeke ezintliziyweni zabalawuli abanga-bantu ukuba batshabalalise iBhabhiloni Enkulu.—ISityhilelo 17:15-17; 19:2
◻ kuqhutywe umtshato weMvana.—ISityhilelo 19:6, 7
◻ kuqalise imfazwe yeHar-magedon.—ISityhilelo 19:11-16, 19-21
◻ kubotshwe uSathana kuze kuqalise uLawulo Lweminyaka Eliwaka lukaKristu.—ISityhilelo 20:1-3
Ezi ziganeko zidweliswe ngokulandelelana kwazo eZibhalweni. Sinokuqiniseka ukuba zonke ezi ziganeko ziya kwenzeka ngendlela uYehova afuna ngayo yaye ngale ndlela kanye afuna ngayo.
[Imifanekiso ekwiphepha 15]
Ngokwenene uLawulo Lweminyaka Eliwaka lukaKristu luya kuba lixesha . . .
lokuhleka . . .
lokuwola . . .
lokuthanda . . .
lokutyala . . .
lokudloba . . .
lokwakha . . .