“Into Yonke Inexesha Elimisiweyo”
“Into yonke inexesha elimisiweyo, nomcimbi wonke unexesha lawo phantsi kwezulu.”—INTSHUMAYELI 3:1.
1. Bubuphi ubunzima abantu abangafezekanga abajamelana nabo, kwaye kwezinye iimeko oko kuye kwakhokelela entwenini?
SIDLA ngokuva abantu besithi, “Akwaba bendiyikhawulezele ke le nto.” Okanye sibeve bezisola besithi, “Ukuba nje bendilindile.” Ezi ndlela basabela ngazo zibonisa indlela ekunzima ngayo ukuba abantu abangafezekanga balichane kakuhle ixesha ezimele zenziwe ngalo izinto ezithile. Le nto iye yalona ulwalamano lwabantu. Iye yangunozala wokuphoxeka nokudana. Kwaye owona monakalo mkhulu ewenzileyo kukulwenza buthathaka ukholo lwabanye kuYehova nakwintlangano yakhe.
2, 3. (a) Kutheni kulikhondo lobulumko ukwamkela oko kuchazwa nguYehova ngamaxesha amiselweyo? (b) Yiyiphi imbono elungeleleneyo esinayo ngokuphathelele inzaliseko yesiprofeto seBhayibhile?
2 Ekubeni enabo ubulumko nengqiqo abayisweleyo abantu, uYehova uyakwazi ukuzazi kusengaphambili izinto xa efuna, aqonde umphumo oya kubangelwa sisenzo ngasinye. Unako ‘ukukuxela kwasekuqaleni okungasemva.’ (Isaya 46:10) Ngenxa yoko, unako ukulikhetha ngaphandle kokuphazama elona xesha lifanelekileyo lokwenza nantoni na afuna ukuyenza. Ngoko ke, kunokuba sikholose ngemvo yethu yokumisela ixesha, kububulumko ukuba samkele oko kuchazwa nguYehova ngamaxesha amiselweyo!
3 Ngokomzekelo, amaKristu aqolileyo alilinda ngokunyaniseka ixesha elimiselwe nguYehova lokuba iziprofeto ezithile zeBhayibhile zizaliseke. Azigcina exakekile enkonzweni yakhe, lonke elo xesha ezingqondweni zawo kunkenteza umgaqo okwiZililo 3:26 othi: “Kulungile ukuba umntu alulindele, ethe cwaka, usindiso lukaYehova.” (Thelekisa uHabhakuki 3:16.) Kwangaxeshanye, azi mhlophe ukuba lo mgwebo kaYehova ovakalisiweyo, “ukuba uthe wazilazila, . . . uya kuza, awuyi kubuya umva.”—Habhakuki 2:3.
4. UAmosi 3:7 noMateyu 24:45 usinceda njani ukuba silindele kuYehova ngomonde?
4 Kwelinye icala, ukuba asiziqondi kakuhle iindinyana ezithile zeBhayibhile okanye iingcaciso ezinikelwa ziimpapasho zeWatch Tower, ngaba sikho isizathu sokuba siphelelwe ngumonde? Kulikhondo lobulumko ukulinda ixesha elimiselwe nguYehova lokucacisa izinto. “Ayikhe yenze into iNkosi uYehova, ingathanga iluhlakaze ucweyo lwayo kubakhonzi bayo abaprofeti.” (Amosi 3:7) Esinjani ukuba sihle isithembiso! Kodwa ke mayisicacele into yokuba uYehova uluhlakaza ucweyo lwakhe ngexesha aligqala njengelifanelekileyo. Ngenxa yoko, uThixo uye wayalela “ikhoboka elithembekileyo neliyingqondi” ukuba linike abantu bakhe ‘ukutya kwabo kokomoya ngexesha elifanelekileyo.’ (Mateyu 24:45) Ngoko ke, asikho isizathu sokuba sizixhalabise ngokugqithiseleyo, okanye side siphazamiseke, kuba izinto ezithile zingachazwanga ngokuzeleyo. Kunoko, sinokuqiniseka ukuba xa simlinda ngomonde uYehova, uya kusinika oko kufunekayo “ngexesha elifanelekileyo,” esebenzisa ikhoboka elithembekileyo.
5. Kutheni kuyingenelo ukuhlolisisa INtshumayeli 3:1-8?
5 UKumkani uSolomon owayesisilumko wathetha ngezinto ezahlukahlukeneyo ezingama-28, nganye yazo ‘enexesha elimiselweyo.’ (INtshumayeli 3:1-8) Ukuyiqonda intsingiselo noko kwakuthethwa nguSolomon kuya kusinceda sazi ixesha eligqalwa nguThixo njengelilungileyo nelingalunganga lokwenza izinto ezithile. (Hebhere 5:14) Ekugqibeleni, loo nto iya kusenza sikwazi ukubuceba kakuhle ubomi bethu.
“Ukulila Kunexesha Lako; Ukuhleka Kunexesha Lako”
6, 7. (a) Yintoni namhlanje eyenza abantu abaxhalabileyo ‘balile’? (b) Ihlabathi lizama njani ukuthibaza imeko enzima elizifumana likuyo?
6 Nangona “ukulila kunexesha lako; ukuhleka kunexesha lako,” ngubani obengayi kukhetha ukuhleka kunokulila? (INtshumayeli 3:4) Okulusizi kukuba, siphila kwihlabathi ubukhulu becala elisenza silile. Amaziko eendaba ngokufuthi aba neendaba ezimbi. Siba namasikizi xa sisiva ngabantwana abadubula abanye abafundi esikolweni, abazali abaxhaphaza abantwana babo, abagrogrisi ababulala okanye benzakalise amaxhoba amsulwa, nezinto ekufane kuthiwe ziintlekele zemvelo ezisuba imiphefumlo emininzi zize zitshabalalise izinto zabantu. Abantwana ababhuqwa yindlala, abanamehlo atshonileyo kunye neembacu eziphila ubomi bentshontsho zitsala ingqalelo yethu koomabonwakude. Amabinzana awayenqabe okwezinyo lenkuku ngaphambili anjengelithi ukutshatyalaliswa kohlanga, uGawulayo, imfazwe eliwa ngezixhobo ezisasaza iintsholongwane, nelithi El Niño ngoku athi akukhankanywa sinxube—ngalinye lisinxubisa ngeyalo indlela.
7 Alithandabuzeki elokuba, ihlabathi lanamhlanje lizaliswe zizihelegu nezinto ezixhela umphefumlo. Noko ke, ngokungathi banenjongo yokubuthibaza ubunzulu bale meko, abezolonwabo benza izinto ezingenangqondo, ezikrwada, ngokufuthi ezikhuthaza ukuziphatha okubi nogonyamelo, ezenzelwe ukusilahlekisa ukuze silubethe ngoyaba usizi abajamelana nalo abanye. Kodwa ke loo moya wokungakhathali weziqhulo ezibubudenge kunye nokuhleka izinto ezif’ amanqe zolonwabo akufanele kubhidaniswe novuyo lokwenene. Uvuyo olusisiqhamo somoya kaThixo soze ulufumane kwihlabathi likaSathana.—Galati 5:22, 23; Efese 5:3, 4.
8. Ngaba amaKristu namhlanje afanele abeke ukulila okanye ukuhleka kwindawo yokuqala? Cacisa.
8 Ekubeni sibona ukuba ihlabathi lanamhlanje likwimeko emaxongo, sinokuqonda ukuba eli xesha siphila kulo asiloxesha lakubeka ukuhleka kwindawo yokuqala. Asiloxesha lakuphilela ukuzihlaziya nokuzonwabisa kuphela okanye lokuvumela “ukonwaba” kubaluleke ngaphezu kokusukela izinto zokomoya. (Thelekisa INtshumayeli 7:2-4.) Umpostile uPawulos wathi: “Abo balisebenzisayo eli hlabathi” bafanele babe “njengabo bangalisebenzisi ngokupheleleyo.” Ngoba? Kaloku “imeko yeli hlabathi iyatshintsha.” (1 Korinte 7:31) AmaKristu okwenyaniso aphila usuku ngalunye ewuqonda mhlophe umngcipheko wamaxesha esiphila kuwo.—Filipi 4:8.
Phezu Kwako Nje Ukulila, Sonwabe Ngokwenene!
9. Yiyiphi imeko elusizi eyayikho ngemihla yangaphambi koNogumbe, kwaye loo nto inayiphi intsingiselo kuthi namhlanje?
9 Abantu ababephila ngexesha likaNogumbe womhlaba wonke abazange babuthabathe nzulu ubomi. Baqhubeka nje nezinto zabo zemihla ngemihla baza abalila ngenxa ‘yobubi babantu obabandile ehlabathini,’ babukela nje kungekho kwanto ithi thiki njengoko ‘ihlabathi lalizaliswa lugonyamelo.’ (Genesis 6:5, 11) UYesu wathetha ngaloo meko ingathandekiyo, ibe waxela kusengaphambili ukuba abantu bomhla wethu babeza kuba nesimo sengqondo esifanayo. Walumkisa esithi: “Njengokuba babenjalo ngaloo mihla yangaphambi komkhukula, besidla yaye besela, amadoda etshata kwaye abafazi benikelwa emtshatweni, de kwaba yimini awangena ngayo uNowa emkhombeni; kwaye abazange banikele ngqalelo de wafika umkhukula waza wabatshayela bonke, nobukho boNyana womntu buya kuba njalo.”—Mateyu 24:38, 39.
10. AmaSirayeli awayephila ngemihla kaHagayi abonisa njani ukuba ayengenaluxabiso ngamaxesha kaYehova amiselweyo?
10 Kwiminyaka emalunga ne-1 850 emva koMkhukula, ngemihla kaHagayi, amaSirayeli amaninzi abonakalisa ukungazixhalabeli ngendlela efanayo izinto zokomoya. Ethe swii zizilangazelelo zobuqu, akazange aqonde ukuba ngexesha awayenalo ayefanele abeke izilangazelelo zikaYehova kwindawo yokuqala. Sifunda oku: “Aba bantu bathi, asikabi lixesha lokuba kuziwe, asikabi lixesha lokuba yakhiwe indlu kaYehova. Kwafika ke ilizwi likaYehova ngoHagayi umprofeti, lisithi, Lixesha na kuni nina, lokuba nihlale ezindlwini zenu zalekiwe, ibe le ndlu yam yona ilinxuwa? Kaloku ke, utsho uYehova wemikhosi ukuthi, Zigqaleni iindlela zenu.”—Hagayi 1:1-5.
11. Yiyiphi imibuzo esifanele sizibuze yona?
11 NjengamaNgqina kaYehova anamhlanje, athwaliswe iimbopheleleko namalungelo kuYehova afana nawamaSirayeli omhla kaHagayi, siya kuba siyatyapha xa sizigqala iindlela zethu, sikugqale nzulu ukwenjenjalo. Ngaba ‘siyalila’ ngenxa yeemeko zehlabathi nangenxa yogculelo olubangelwa zizo kwigama likaThixo? Ngaba siba buhlungu xa abantu besithi uThixo akakho okanye bengenazintloni zokutyeshela imigaqo yakhe yobulungisa? Ngaba sisabela ngendlela ababesabela ngayo abantu abaphawuliweyo ababonwa nguHezekile embonweni kwiminyaka engama-2 500 eyadlulayo? Sifunda oku ngabo bantu: “Wathi uYehova kuyo [indoda eyayinezinto zokubhala], Canda esazulwini somzi, esazulwini seYerusalem, ubeke uphawu emabunzini amadoda agcumayo, ancwinayo ngenxa yamasikizi onke awenzekayo esazulwini sayo.”—Hezekile 9:4.
12. Unayiphi intsingiselo uHezekile 9:5, 6 kubantu namhlanje?
12 Namhlanje ukubaluleka kwale ngxelo sinokukubona xa sifunda imiyalelo enikwa amadoda amathandathu anezixhobo zokutshabalalisa: “Candani esazulwini somzi emva kwayo, nixabele; malingabi nanceba iliso lenu, ningabacongi. Amaxhego, amadodana nomthinjana, abantwana nabafazi, babulaleni, ukuze batshabalale; ke bonke abantu abanophawu olo, musani ukufika kubo; nize niqalele ke engcweleni yam.” (Hezekile 9:5, 6) Ukusinda kwethu kuloo mbandezelo enkulu eza ixhabashile kuxhomekeke ekuqondeni kwethu ukuba eli xesha siphila kulo ngokuyintloko lixesha lokulila.
13, 14. (a) Luhlobo luni lwabantu awathi uYesu lunoyolo? (b) Chaza isizathu sokuba ucinge ukuba le nkcazelo iwafanela kakuhle amaNgqina kaYehova.
13 Kakade ke, isibakala sokuba abakhonzi bakaYehova ‘belila’ ngenxa yemeko elusizi ehlabathini asithethi kuthi mabangonwabi. Hayi akuthethwa loo nto! Kaloku balelona qela labantu lonwabileyo emhlabeni. UYesu wachaza umlinganiselo wolonwabo xa wathi: “Banoyolo abo bayiphapheleyo intswelo yabo yokomoya, . . . abo bakhedamileyo, . . . abo banomoya wobulali, . . . abo balambela baze banxanelwe ubulungisa, . . . abanenceba, . . . abasulungekileyo entliziyweni, . . . abanoxolo, . . . abo baye batshutshiswa ngenxa yobulungisa.” (Mateyu 5:3-10) Buninzi ubungqina obubonisa ukuba le nkcazelo ingena gingci kumaNgqina kaYehova njengeqela, kunokuba ifanele nayiphi na enye intlangano yonqulo.
14 Ngokukodwa ukususela ekubuyiselweni konqulo lokwenyaniso ngowe-1919, abantu bakaYehova abonwabileyo banesizathu ‘sokuhleka.’ Ngokomoya, baba nemincili efana neyabo babebuya ekuthinjweni eBhabhiloni ngenkulungwane yesithandathu ngaphambi kweXesha Eliqhelekileyo: “Ekubabuyiseleni kukaYehova ababuyayo baseZiyon, saba njengabaphuphayo; waza wazala kukuhleka umlomo wethu, lwazala kukumemelela ulwimi lwethu. . . . UYehova usenzele izinto ezinkulu, saba ngabavuyayo.” (INdumiso 126:1-3) Sekunjalo, ehleka enjalo ngokomoya, ngobulumko amaNgqina kaYehova ayawukhumbula umngcipheko wala maxesha. Liya kuthi lakufika ihlabathi elitsha baze nabemi bomhlaba “babubambe ngokuqinileyo ubomi benene,” libe lifikile ke ixesha apho ukuhleka kuya kuthabatha indawo yokulila ngonaphakade.—1 Timoti 6:19; ISityhilelo 21:3, 4.
“Ukuwola Kunexesha Lako, Ukuyeka Ukuwola Kunexesha Lako”
15. Kutheni amaKristu ebakhetha ngenyameko abahlobo?
15 AmaKristu abakhetha ngenyameko abantu anokubawola ebonisa ubuhlobo kubo. Ayasikhumbula isilumkiso sikaPawulos esithi: “Ningalahlekiswa. Unxulumano olubi lonakalisa imikhwa esebenzisekayo.” (1 Korinte 15:33) Kwaye uKumkani uSolomon owayesisilumko wathi: “Ohamba nezilumko uba sisilumko naye; ke olikholwane lesidenge uya konakaliswa.”—IMizekeliso 13:20.
16, 17. AmaNgqina kaYehova abugqala njani ubuhlobo, ukwenza amadinga nomtshato, yaye ngoba?
16 Abakhonzi bakaYehova bakhetha abahlobo kubantu abafana nabo ekuthandeni uYehova nobulungisa bakhe. Ngoxa bebuxabisa yaye bebunandipha ubuqabane babahlobo babo, ngobulumko bayaziphepha iimbono zikavula-zibhuqe, neziyekelela gqitha zokwenza amadinga ezesamele kwamanye amazwe namhlanje. Kunokuba bazifice kuko ngelithi ziyindlela yokuzonwabisa engeyongozi, bakugqala ukwenza amadinga njengenyathelo elibalulekileyo elikhokelela emtshatweni, elifanele lithatyathwe kuphela xa ubani ekulungele ngomzimba, ngengqondo nangokomoya—kwaye evumelekile ngokweZibhalo—ukuba angene kulwalamano olusisigxina.—1 Korinte 7:36.
17 Bambi basenokukugqala ikukushiywa lixesha ukukujonga ngolo hlobo ukwenza amadinga nomtshato. Kodwa amaNgqina kaYehova akavumeli ingcinezelo yoontanga ukuba iphembelele indlela abakhetha ngayo abahlobo okanye izigqibo zawo eziphathelele ukwenza amadinga nomtshato. Ayazi ukuba “ubulumko bungqineka bububulungisa ngemisebenzi yabo.” (Mateyu 11:19) UYehova usoloko ezazi bhetele izinto, ngoko asithabatha nzulu isiluleko sakhe sokutshata “kuphela eNkosini.” (1 Korinte 7:39; 2 Korinte 6:14) Ayakuphepha ukungxamela umtshato, ngempazamo ecinga ukuba kwamkelekile ukuqhawula okanye ukwahlukana neqabane xa ungaphumeleli. Azipha ixesha lokukhangela iqabane elifanelekayo, eqonda ukuba zakuba zenziwe izifungo zomtshato, kusebenza umthetho kaYehova othi: “Abasebabini, kodwa banyama-nye. Ngoko ke, oko uThixo akubophelele ngedyokhwe ndawonye makungabikho mntu ukwahlukanisayo.”—Mateyu 19:6; Marko 10:9.
18. Yintoni esenokuba sisiqalo somtshato owonwabisayo?
18 Umtshato usisivumelwano esiya kuhlala ubomi bonke ibe ufuna ubani awucebe kakuhle. Indoda iya kuba yenza kakuhle xa izibuza, ‘Ngaba ngokwenene lo ngumntu ofanelekileyo?’ Kodwa kubaluleke ngokufanayo nokuba izibuze ithi, ‘Ngaba ngokwenene ndingumntu ofanelekileyo kuye? Ngaba ndingumKristu oqolileyo, onako ukunyamekela izilangazelelo zakhe zokomoya?’ Bobabini aba bantu baza kuba ngamaqabane banembopheleleko kuYehova yokomelela ngokomoya, bakwazi ukuyila umanyano lomtshato olomeleleyo nolukholekileyo kuThixo. Izibini ezininzi ezingamaKristu ziya kungqina ukuba, ubulungiseleli bexesha elizeleyo busisiqalo esihle somtshato owonwabisayo, kuba kaloku bugxininisa ekupheni kunasekwamkeleni.
19. Kutheni amanye amaKristu ehlala engatshatanga?
19 Amanye amaKristu ‘ayayeka ukuwola’ ngokukhetha ukuhlala engatshatanga ngenxa yeendaba ezilungileyo. (INtshumayeli 3:5) Amanye ayawuhlehlisa umtshato de avakalelwe kukuba ayakufanelekela ngokomoya ukufumana iqabane elifanelekileyo. Kodwa ke masingawalibali loo maKristu angatshatanga alufunayo uthando neengenelo zomtshato kodwa angalifumaniyo iqabane. Sinokuqiniseka ukuba uYehova uyavuya xa engavumi ukulalanisa kwimigaqo yakhe njengoko efuna umtshato. Kwaye senza kakuhle xa sikuxabisa ukunyaniseka kwawo yaye siwanika inkxaso ewafaneleyo.
20. Kuxa kutheni xa amaqabane omtshato maxa wambi ‘eyeka ukuwola’?
20 Ngaba nezibini ezitshatileyo zifanele ‘ziyeke ukuwola’ ngamaxesha athile? Kuyabonakala ukuba zifanele, kuba uPawulos wathi: “Oku ndiyakutsho, bazalwana, ixesha eliseleyo lifinyele. Ukususela ngoku abo banabafazi mababe njengokungathi bebengenabo.” (1 Korinte 7:29) Ngokufanelekileyo, maxa wambi uvuyo kunye neentsikelelo zomtshato zifanele zibekelwe ecaleni kuze kunikelw’ ingqalelo kwiimbopheleleko ezingokobuthixo. Ukuba nembono elungeleleneyo ngalo mba akuyi kuwenza buthathaka umtshato kodwa kuya kuwomeleza kuba kuya kuwakhumbuza omabini la maqabane ukuba uYehova umele asoloko engoyena mntu ubalulekileyo kulwalamano lwawo.—INtshumayeli 4:12.
21. Kutheni singafanele sizigwebe izibini ezitshatileyo kumbandela wokuba nabantwana?
21 Ngaphezu koko, ezinye izibini ezitshatileyo ziye azabi nabantwana ngenjongo yokuba zikhululeke nangakumbi ukuze ziqhubeke nenkonzo kaThixo. Oku kuye kwafuna ukuba zizincame, ibe uYehova uya kuzivuza ngokufanelekileyo. Kambe ke, ngoxa iBhayibhile ikhuthaza ukungatshati ngenxa yeendaba ezilungileyo, ayithethi ngokungqalileyo ngokuhlala ungenabantwana ngenxa yesizathu esifanayo. (Mateyu 19:10-12; 1 Korinte 7:38; thelekisa uMateyu 24:19 noLuka 23:28-30.) Ngaloo ndlela, izibini ezitshatileyo zimele zizenzele isigqibo ngokuya ngokweemeko zazo nezazela zazo. Enoba zigqibe zathini na, ezo zibini zitshatileyo azimele zigxekwe.
22. Yintoni ekubalulekileyo ukuba siyazi?
22 Ewe, “into yonke inexesha elimisiweyo, nomcimbi wonke unexesha lawo phantsi kwezulu.” ‘Kukho ixesha lemfazwe, kukho nexesha loxolo.’ (INtshumayeli 3:1, 8) Inqaku elilandelayo liza kuchaza isizathu sokuba kubaluleke ukwazi ukuba ngoku siphila kwiliphi kula maxesha mabini.
Ngaba Unokuchaza?
◻ Kutheni kubalulekile ukwazi ukuba “into yonke inexesha elimisiweyo”?
◻ Kutheni namhlanje ubukhulu becala ‘ilixesha lokulila’?
◻ Kutheni amaKristu onwabe ngokwenene, nangona ‘elila’?
◻ Amanye amaKristu abonisa njani ukuba eli xesha siphila kulo aligqala ‘njengexesha lokuyeka ukuwola’?
[Imifanekiso ekwiphepha 6, 7]
Nangona amaKristu ‘elila’ ngenxa yeemeko zehlabathi . . .
. . . enyanisweni angabona bantu bonwabileyo ehlabathini
[Umfanekiso okwiphepha 8]
Ubulungiseleli bexesha elizeleyo busisiseko esiluqilima somtshato owonwabisayo