Ukunikezelwa KweZiko Lemfundo LeWatchtower​—Umbhiyozo Owenzelwa UYehova

UKUSUSELA mandulo, imibhiyozo yovuyo yayiyinxalenye yonqulo lokwenyaniso. Eminye yaloo mibhiyozo eyayiqhutywa kuSirayeli wamandulo yayithabatha iintsuku yaye kusibakho amawaka abanquli bakaYehova. Umbhiyozo wokunikezelwa kwetempile kaSolomon wathabatha iintsuku ezisixhenxe waza walandelwa nguMthendeleko Weminquba owathabatha iveki. Loo nto yanika amaSirayeli ithuba lokucamngca ngendlela emangalisayo uYehova awayeqhubene ngayo nawo. Abuyela emakhaya ‘evuya, echwayithile ngenxa yokulunga konke awakwenzayo uYehova.’​—⁠1 Kumkani 8:⁠66.

Okwenzeka kwiZiko Lemfundo LeWatchtower ePatterson, eNew York, eUnited States, ngoMeyi 17-22, 1999, kwakhumbuza iindwendwe ngaloo mibhiyozo yovuyo yamandulo. Leyo yayiyiveki ekhethekileyo ekwakuza kunikezelwa ngayo ubuxhakaxhaka bezakhiwo ezingama-28 ezakhelwe ukuhambisela phambili imfundo yeBhayibhile ehlabathini lonke. Kwenziwa amalungiselelo okuba abasebenzi abangama-5 400 bekomkhulu abaseBrooklyn, abaseWallkill nabasePatterson benze ukhenketho olupheleleyo kwizakhiwo zasePatterson ebudeni baloo veki ingalibalekiyo. Phakathi kweendwendwe kwakukho abangama-500 ababesakuba ngabasebenzi balapho nababebe nesabelo ekwakhiweni kweli ziko lemfundo, kukho namalungu amasebe eWatch Tower Society angama-23, kunye nabanye abasuka kumabandla akufutshane​—⁠bebonke ubuncinane babengama-8 100.

Imiboniso Eyenzelwe Abakhenkethi Iyafundisa

Ukuze iindwendwe ziqhelane neli ziko lemfundo, kwalungiselelwa imiboniso ekhethekileyo, imiboniso yevidiyo kwaza kwalungiselelwa nokuba iindwendwe zizikhenkethele ngokwazo. Kwigumbi elisekungeneni, zisuka nje ingqalelo yeendwendwe yayithinjwa ngumboniso wetempile eyayiseYerusalem ngexesha lobulungiseleli bukaYesu basemhlabeni. Eminye imiboniso yayibalaselisa imbali yangaphambili yeSikolo SeBhayibhile SeWatchtower saseGiliyadi, iindibano ezibalulekileyo kwimbali, iintlanganiso zebandla, ulwando lwale mihla lwezifundo zeBhayibhile zamakhaya​—⁠izigidi zazo eziqhutywa veki nganye sithethanje​—⁠kunye nomsebenzi owenziwa liSebe Lezomthetho ukuze loo msebenzi ungabi namiqobo, yonke loo nto isenziwa ukuze kuthotyelwe umyalelo kaYesu.​—⁠Mateyu 28:​19, 20.

Kwiholo esecaleni kwalo, enokuhlala abantu abali-1 700, iindwendwe ezazikho ebudeni bemibhiyozo yokunikezelwa zaboniswa ividiyo ethabatha imizuzu engama-33 enomxholo othi “Kungengamandla​—⁠Kungomoya Wam!” Le vidiyo yayibonisa indlela iZiko Lemfundo LeWatchtower elasekwa ngayo. Udliwano-ndlebe olukuyo luchaza iziganeko ezalwenza lwacaca ulwalathiso kunye nentsikelelo kaYehova kwimigudu yokuwuqabelisa ngempumelelo loo msebenzi othabathe iminyaka eli-15. Bangamawaka abantu ababe nesabelo kumsebenzi wokwakha. Ngowe-1994 ngaxa lithile, kwakukho abasebenzi abangama-526 esizeni, kuquka namatsha-ntliziyo exesha elizeleyo angama-350, abasebenzi bexeshana abali-113, kunye nabangama-63 ababefika suku ngalunye beze kufak’ isandla. Abanye abaninzi baye bawuxhasa ngeminikelo loo msebenzi. Bonke bayayiqonda into yokuba ubungasoze uphumelele loo msebenzi ngaphandle komoya kaYehova.​—⁠Zekariya 4:⁠6.

Abo babekhenketha babona ukuba eyona nto iphambili kumsebenzi owawusenziwa kwelo ziko lemfundo yayikukuhambisela phambili imfundiso kaThixo. Umboniso ongasemnyango kumgangatho wokuqala wesakhiwo seSikolo saseGiliyadi wawubalaselisa ubuncwane obulilifa lokomoya kunye nembali yeso sikolo. ISikolo saseGiliyadi siye saqeqesha abafundi abangaphezu kwama-7 000 ukuze bangenele inkonzo yobuvangeli basemazweni ukususela oko sasekwayo ngowe-1943 kwindawo esasikuyo ngaphambili eSouth Lansing, eNew York. Imiboniso ekumgangatho wesibini wesakhiwo sesikolo yayibonisa iSikolo Samalungu eKomiti yeSebe neSikolo Sabaveleli Abahambahambayo, nabo abaqhuba iiklasi zabo apho. Ukususela oko sasekwayo ebutsheni bukaNovemba wowe-1995, isikolo samalungu esebe siye sadlulisela imfundo ekumgangatho ophezulu kumalungu angama-360 eeKomiti zamaSebe zamazwe ali-106.

Njengoko iindwendwe zazikhenketha, zakhawuleza zaphawula ukuba kwezinye iindawo zazingapheleli ekuboneni imifanekiso nje kuphela. Zakwazi ukuya kumasebe athile, zatyelela eziofisini nakwezinye iindawo ekusetyenzelwa kuzo, zaza zawubona kakuhle umsebenzi owenziwayo. Eyona ndawo eyayibalasele kolo khenketho yayisisakhiwo seAudio/​Vid⁠eo Services (iSebe Leekhasethi neeVidiyo). Ezinjani ukuba semagqabini izinto ezisetyenziswa apho ukuhambisela phambili imfundo yeBhayibhile! Ungcelele lwemiboniso neevidiyo ezimfutshane lwanceda iindwendwe zaqonda indlela arekhodwa ngayo amazwi nendlela ezilungiselelwa ngayo iividiyo. Zafunda nangophando olunzulu olwenziwayo xa kulungiselelwa izinto zokuhombisa kunye nezinxibo. Zabona indlela iqonga elilungiswa ngayo kungangenwanga zindlekweni zinkulu kodwa kwangaxeshanye kulandelwe zonke iinkcukacha. Zazibonela indlela umculo osetyenziswa ngayo ukuze wenze abantu bazibone bekuloo ndawo bayibukeleyo. Ukususela ngowe-1990 uMbutho uye wavelisa iividiyo ezilishumi ngeelwimi ezingama-41, ezinemixholo eyahlukeneyo yeBhayibhile, ukongezelela kwezinye iividiyo zabo basebenzisa iNtetho Yezandla YaseMerika.

Uninzi lwabo babekhenketha lwaya kwiPhoto Lab, kwiSebe Lobugcisa, kwiSebe Lenkcazelo, eliqeqesha lize linikele uncedo lweekhompyutha, iSebe Lenkonzo, elalathisa umsebenzi wamabandla ali-11 242 kunye nabaveleli abahambahambayo abangama-572, kunye neSebe Lembalelwano, elisingatha imibuzo emalunga nama-14 000 nyaka ngamnye. Imilomo yabo yayingahlangani bakubona uphando olwenziwayo kwiileta ezithunyelwayo kunye nenkxalabo yokwenene ebakho ngabo imibuzo yabo ebonisa ukuba bazama ukuhlangabezana neengxaki ezinzulu.

Kwakusoloko kukho umsinga othile wabakhenkethi abatyelela iSebe Lokuguqulela. Bamangaliswa kukuva ukuba ebudeni beminyaka emihlanu edluleyo, kuye kongezelelwa iilwimi ezingakumbi ezili-102 kwiilwimi uMbutho ovelisa uncwadi lweBhayibhile ngazo. Ehlabathini lonke, amalunga nama-80 ekhulwini amaNgqina kaYehova angafundi iimpapasho zoMbutho ngesiNgesi. Ukuze kuhlangatyezwane neemfuno zawo, kukho amatsha-ntliziyo angaphezu kwe-1 700 angabaguquleli kumazwe ali-100. Kwaboniswa IMboniselo ngeelwimi zaseMzantsi naseMntla MerikaOk for X, eYurophu, eAsia naseAfrika. Iindwendwe zabona iBhayibhile iNew World Translation ngeelwimi ezingama-31 epapashwe ngazo. Zafumanisa ukuba sithethanje iimpapasho zeWatch Tower zifumaneka ngeelwimi ezingama-332 nokuba incwadana enemifanekiso ethi Yintoni uThixo Ayifunayo Kuthi? iye yapapashwa ngeelwimi ezingama-219.

Ababetyelele iSebe Lezomthetho baboniswa iindawo ezahlukeneyo ezifuna ingqalelo yezomthetho ehlabathini lonke. Kwividiyo, babona ukuchotshelwa kwetyala enkundleni apho igqwetha eliliNgqina lalithetha kwityala elibandakanya utofelo-gazi. Kwakhona babona oko kwenziwayo ukuze ukushunyayelwa kweendaba ezilungileyo kungabi namiqobo. (Filipi 1:⁠7) Ingqalelo yabo yatsalelwa kwisigqibo esenziwa ngoMatshi kulo nyaka, sisenziwa yinkundla karhulumente wesithili, iyalela idolophu yaseOradell, eNew Jersey, eUnited States, ukuba iguqule imithetho yayo ukuze kushenxiswe imfuneko yokuba amaNgqina kaYehova afumane imvume yaye anxibe iibheji xa efuna ukuba nesabelo kubulungiseleli bawo basesidlangalaleni bendlu ngendlu kuloo ndawo.

Ungacingi ukuba ziphelele apho izinto ezabonwa ziindwendwe. Phakathi kwezinye izinto, zabona nemiboniso yokwakha kwiPrecast Shop zaza zakhenketha nezakhiwo zeWastewater Treatment, iPowerhouse, iWater-Softening Facility, kunye neendawo ezininzi zokulungisa izinto. Elo yayilithuba eliza kube kanye ebomini.

Ucwangciso Lokunikezela Lubalaselisa Imfundo Yobuthixo

Olona cwangciso lokunikezela lwaqhutywa ngoLwesithathu, Meyi 19, luqaliswa ngeyesi-​4:⁠00 p.m. Kwezo zihlwele zichwayitileyo ezingama-6 929 kwakukho abasebenzi bekomkhulu, iindwendwe zoMbutho kunye nabangama-372 ababehlanganisene kwisebe laseKhanada, nalo elalinxityelelanisiwe ngobuxhakaxhaka be-elektroniki.

Abaphulaphuli bavuya bakuva amazwi afudumeleyo okubamkela awenziwa nguMilton G. Henschel, umongameli weWatch Tower Society. Emva koko uTheodore Jaracz, olilungu leQumrhu Elilawulayo nowayengusihlalo kweso sihlandlo, wabiza uWilliam Malenfant. Xa wayethetha ngomxholo othi “Iimbalasane Zocwangciso Lokwakha,” wadlan’ indlebe nabazalwana abathathu ababebe nendima ebalulekileyo ekuphuhliseni, ekucebeni nasekwakheni iZiko Lemfundo LeWatchtower. Ebudeni bolo dliwano-ndlebe, kwachazwa ukuba ngaloo minyaka ekwakusakhiwa ngayo, bangaphezu kwama-8 700 abasebenzi bexeshana ababezizele ngeendleko zabo ukuza kusebenza kweso sakhiwo. Obunjani ubungqina bomanyano nokuba nesisa okubangelwa yimfundiso kaThixo!

Emva koko kwalandela ungcelele lweentetho olwalunomxholo othi “Imfundo Yobuthixo Ehlabathini Lonke.” Olu ngcelele lwanikelwa ngamalungu amane eQumrhu Elilawulayo. UJohn E. Barr wagxininisa ukuba imfundo kaThixo isekelwe kwiLizwi likaThixo, iBhayibhile, elikhuthaza amaKristu ukuba ‘aqhubeke ethwala isiqhamo kuwo wonke umsebenzi olungileyo yaye esanda elwazini oluchanileyo ngoThixo.’ (Kolose 1:​10) UDaniel Sydlik waxubusha ngendlela imfundo kaThixo elungiselelwa ngayo ukusuka kwintloko yebandla lamaKristu, uYesu Kristu, ukuhla ukuya kutsho kwilungu ngalinye lobuzalwana behlabathi lonke. (1 Korinte 12:​12-27) Iinxalenye ezimbini zokugqibela kolo ngcelele, ezanikelwa nguGerrit Lösch noCarey Barber, zabonisa indlela imfundo yobuthixo eyenza abalungiseleli bakufanelekele ngayo ukufikelela abantu kuyo yonke indawo baze babafundise ukuze nabo bahambe kwindlela kaThixo.​—⁠Isaya 2:​1-⁠4; 2 Korinte 3:⁠5.

Ukuze abaphulaphuli bazazi izikolo ezahlukeneyo eziqhutywa kweli ziko lemfundo, kwabakho udliwano-ndlebe neengxubusho nabahlohli kunye nabo babandakanyekileyo kumsebenzi wabo. Kwaboniswa indima ephunyezwa sisikolo ngasinye ekuhambiseleni phambili inkqubo yemfundo ehlabathini lonke. Kwaboniswa ukuba iSikolo saseGiliyadi sasigxininisa ekufundisiseni incwadi nganye yeBhayibhile, imbali yale mihla yabantu bakaYehova, nokulungiselela inkonzo yobuvangeli basemazweni. Isikolo samalungu esebe sisifundo esilungelelaniswe kakuhle semisebenzi emininzi abandakanyeka kuyo amalungu eKomiti yeSebe. ISikolo Sabaveleli Abahambahambayo asenzelwanga kwanelisa iintswelo zabaveleli abahambahambayo kuphela kodwa sikwabaxhobisa ukuze banikele uncedo lokomoya oluya kuba yingenelo ngokukhethekileyo emabandleni.

Ukuqukumbela olo cwangciso lumnandi, uLloyd Barry weQumrhu Elilawulayo wanikela intetho yokunikezela eyayinomxholo othi “Ukwakha Kunye Nomdali Wethu Ozukileyo.” Wachaza ukuba uMdali, uYehova, uyayivuyela yonke indalo yakhe kwaye uyasimema ukuba sivuye kunye naye. (Isaya 65:​18) Ekubeni ‘lowo wazakhayo zonke izinto inguThixo,’ lonke uzuko lumele luye kuYehova uThixo ngawo wonke loo msebenzi wokwakha. (Hebhere 3:⁠4) Emva kokudlulisela ezo ngcamango, isithethi sathandaza ngokusuka entliziyweni, sinikezela iZiko Lemfundo LeWatchtower kuYehova, uMdali wethu Ozukileyo.a

Alithandabuzeki elokuba loo mibhiyozo eyathabatha iveki yonke iya kuhlala ezinkumbulweni zabo babekho. Kutheni ungenzi amalungiselelo okutyelela kwiZiko Lemfundo LeWatchtower nje? Siqinisekile ukuba ukutyelela nokukhenketha kulo kuya kuba lukhuthazo kuwe njengoko usenza umgudu wokufunda okungakumbi ngoMdali wethu onothando nowokuphila ngemilinganiselo yakhe yobulungisa.

[Imibhalo esemazantsi]

[Imifanekiso ekwiphepha 10]

Iholo eyayizele imi nge-​embambo kunye naba-​phulaphuli ababehleli kwigumbi lokutyela

[Imifanekiso ekwiphepha 10]

Ukhenketho lwaluyinkalo eyayibangel’ uvuyo ngokukhethekileyo