“UYehova Upha Ubulumko”
LULUPHI usukelo olutya ixesha namandla akho? Ngaba eyona nto ikuxhalabisayo kukuzenzela igama elihle? Ngaba uchitha ixesha elininzi uqokelela ubutyebi? Kuthekani ngokusukela umsebenzi othile olucelomngeni okanye ukuzabalazela ukuba nobugcisa obuthile kwiinkalo ezahlukahlukeneyo zemfundo? Ngaba kubalulekile kuwe ukuhlakulela ulwalamano oluhle nabanye? Ngaba ukuxhalabele kakhulu ukuhlala usempilweni?
Zonke ezi zinto zidweliswe apha zisenokuba zixabisekile ngandlela ithile. Kodwa yintoni eza kuqala? IBhayibhile iyasiphendulela: “Ubulumko yinto eyintloko. Zuza ubulumko.” (IMizekeliso 4:7, NW) Ngoko singabuzuza njani ubulumko, yaye bunaziphi iingenelo? Isahluko sesibini sencwadi yeBhayibhile yeMizekeliso siyasiphendula.
“Uyibazele Ubulumko”
Ngamazwi anothando kabawo, uKumkani uSolomon wakwaSirayeli wamandulo uthi: “Nyana wam, ukuba uthe wazamkela iintetho zam, wayiqwebela kuwe imithetho yam, ukuze uyibazele ubulumko indlebe yakho, uyithobele ukuqonda intliziyo yakho; ewe, ukuba uthe wayibiza ingqondo, walisa ekuqondeni ilizwi lakho; ukuba uthe wabufuna njengesilivere, wabumba njengobutyebi obuselelweyo; uya kwandula ukukuqonda ukoyika uYehova, ukufumane ukumazi uThixo.”—IMizekeliso 2:1-5.
Ngaba uyambona lowo unembopheleleko yokuzuza ubulumko? Kwezi ndinyana, ibinzana elithi “ukuba uthe” livela izihlandlo ezithathu. Kucacile ukuba, kuxhomekeke kuye ngamnye wethu ukubufuna ubulumko kwakunye nabancedisi babo—ukuqonda nengqondo. Noko ke, okokuqala kufanele ‘siwamkele’ size ‘siwaqwebele kuthi’ engqondweni amazwi obulumko aseZibhalweni. Ukuze sikwenze oku sifanele sifundisise iBhayibhile.
Ubulumko ngamandla okusebenzisa kakuhle ulwazi oluvela kuThixo. Yaye hayi indlela iBhayibhile efundisa kakuhle ngayo ngobulumko! Ewe, iqulethe amazwi obulumko, njengalawo afumaneka kwincwadi yeMizekeliso neyeNtshumayeli, yaye sifanele sinikele ingqalelo kula mazwi. Kwakhona eBhayibhileni sifumana imizekelo emininzi ebonisa ngeengenelo zokusebenzisa imigaqo yobuthixo neengozi zokuyityeshela. (Roma 15:4; 1 Korinte 10:11) Ngokomzekelo, cinga ngengxelo kaGehazi, umkhonzi womprofeti uElisha. (2 Kumkani 5:20-27) Ngaba oku akusifundisi ubulumko bokuphepha ukubawa? Yaye kuthekani ngomphumo ombi wokutyelela kwentombi kaYakobi uDina “iintombi zelo lizwe” laseKanana? (Genesis 34:1-31) Ngaba asibuboni ubungozi bezinxulumani ezibi?—IMizekeliso 13:20; 1 Korinte 15:33.
Ukunikela ingqalelo kubulumko kufuna ukuzuza ukuqonda nengqiqo. Ngokutsho kweWebster’s Revised Unabridged Dictionary, ukuqonda “ngamandla okanye ubuchule bengqondo bokwahlula into ethile kwenye.” Ukuqonda kobuthixo ngamandla okwahlula okuhle kokubi uze ukhethe indlela efanelekileyo. Ngaphandle kokuba ‘siyithobela ukuqonda intliziyo yethu’ okanye silangazelela ukuyizuza, singahlala njani ‘kwindlela ekhokelela ebomini’? (Mateyu 7:14; thelekisa iDuteronomi 30:19, 20.) Ukulifundisisa nokulisebenzisa iLizwi likaThixo kunika ukuqonda.
‘Sinokuyibiza njani ingqondo’—amandla okubona indlela iinkalo ezithile zombandela othile ezinxulumana ngayo nakumbandela uphela? Kakade ke, ubudala namava ziinkalo ezinokusinceda ukuba sibe nokuqonda okungakumbi—kodwa oko akuthethi ukuba kusoloko kunjalo. (Yobhi 12:12; 32:6-12) Umdumisi wathi: “Ndinokuqonda ngaphezu kwamadoda amakhulu, ngokuba ndizibamba iziyalelo zakho [zikaYehova].” Kwakhona wavuma esithi: “Ukutyhila kwamazwi akho kuyakhanyisa, kuqondisa abazizidenge.” (INdumiso 119:100, 130) UYehova ‘unguNyangelemihla,’ yaye unokuqonda okungaphezu kwako konke abanako abantu. (Daniyeli 7:13) UThixo unokunikela ukuqonda kulowo ungenamava, amenze ongenamava abe namava nangaphezu kwabo bakhulileyo ngeminyaka. Ngoko ke, sifanele sikukhuthalele ukufundisisa nokusebenzisa iLizwi likaThixo, iBhayibhile.
Ibinzana eliphindaphindiweyo elithi “ukuba uthe” ekuqaleni kwesahluko sesibini seMizekeliso lilandelwa ngamazwi anjengathi ‘ukuzamkela,’ ‘ukuqwebela,’ ‘ukuyibiza,’ “wabufuna,” “wabumba.” Kutheni lo mbhali esebenzisa amazwi anamandla ngolu hlobo? Enye incwadi ithi: “Le nkcuba-buchopho [apha] igxininisa imfuneko yokunyaniseka ekusukeleni ubulumko.” Ewe, simele sibusukele ngokunyanisekileyo ubulumko nezinye iimpawu ezinokuthanani nako—ukuqonda nengqiqo.
Ngaba Uya Kwenza Umgudu?
Inkalo enkulu ekusukeleni ubulumko kukukhuthalela ukufundisisa iBhayibhile. Noko ke, oku kufundisisa kufanele kube ngaphezulu nje kunokufundela ukufumana inkcazelo. Ukucamngca okunenjongo koko sikufundileyo kuyinxalenye ebalulekileyo ekufundisiseni iZibhalo. Ukuzuza ubulumko nokuqonda kuquka ukuphonononga indlela esinokukusebenzisa ngayo oko sikufundileyo ekucombululeni iingxaki nasekwenzeni izigqibo. Ukuzuza ukuqonda kufuna ukuceba indlela inkcazelo entsha engena ngayo koko sele ukwazi. Ngubani onokuyikhanyela into yokuba ufundisiso lweBhayibhile olunentsingiselo ngolo hlobo lufuna ixesha nomgudu omkhulu? Ukuziqwebela ixesha namandla kuyafana noko ukuchithayo ‘ekufuneni isilivere nobutyebi obuselelweyo.’ Ngaba uya kuwenza umgudu ofunekayo? Ngaba uya ‘kuzithengela ixesha elifanelekileyo’ lokwenza oko?—Efese 5:15, 16.
Qwalasela ubutyebi obuninzi obusilindeleyo ukuba somba ngokunzulu eBhayibhileni ngentliziyo enyanisekileyo. Ewe, siya ‘kufumana ukumazi uThixo’—ulwazi oluzinzileyo nolunika ubomi loMdali wethu! (Yohane 17:3) “Ukoyika uYehova” nako kukwabubutyebi ekufuneka sibuzuze. Hayi indlela ekubaluleke ngayo ukumoyika! Ukoyika okufanelekileyo kokungamkholisi kumele kulawule inkalo nganye yobomi bethu, kongeze intsingiselo yokomoya kuko konke esikwenzayo.—INtshumayeli 12:13.
Umnqweno omkhulu wokufuna nokomba ubutyebi bokomoya ufanele ube namandla kuthi. Ukwenza ukufuna kwethu kube lula, uYehova uye walungiselela izixhobo ezisemagqabini zokomba—oolindixesha abasexesheni benyaniso IMboniselo noVukani!, kwakunye nezinye iimpapasho ezisekelwe eBhayibhileni. (Mateyu 24:45-47) Ukuze asifundise iLizwi neendlela zakhe, kwakhona uYehova uye walungiselela iintlanganiso zamaKristu. Sifanele siye kuzo rhoqo, siphulaphule koko kuthethwayo, senze umgudu onyanisekileyo wokunikela ingqalelo size sigcine iingongoma eziziintloko, size sicinge ngokunzulu ngolwalamano lwethu noYehova.—Hebhere 10:24, 25.
Awusokuze Uwe Phantsi
Ngokufuthi, ukufuna amatye anqabileyo afihliweyo, igolide okanye isilivere kudla ngokungaphumeleli. Oku akunjalo kwimeko yokufuna ubutyebi bokomoya. Ngoba? USolomon usiqinisekisa esithi: “UYehova upha ubulumko; emlonyeni wakhe kuphuma ukwazi nokuqonda.”—IMizekeliso 2:6.
UKumkani uSolomon wayesaziwa ngobulumko bakhe. (1 Kumkani 4:30-32) IZibhalo zibonisa ukuba wayenolwazi kwimibandela eyahlukahlukeneyo, kuquka izityalo, izilwanyana, abantu neLizwi likaThixo. Ukuqonda awakubonisa njengokumkani oselula ekucombululeni imbambano phakathi kwamabhinqa amabini, ngamnye ezibanga njengonina womntwana omnye, kwamnceda wangumntu odumileyo emhlabeni wonke. (1 Kumkani 3:16-28) Wayeyifumene phi imfundo enkulu kangaka? USolomon wathandazela “ubulumko nokwazi” kuYehova namandla ‘okwahlula phakathi kokulungileyo nokungendawo.’ UYehova wamnika ezi zinto.—2 Kronike 1:10-12; 1 Kumkani 3:9.
Nathi sifanele sithandazele uncedo lukaYehova njengoko sifundisisa ngenkuthalo iLizwi lakhe. Umdumisi wathandaza wathi: “Ndiyalele, Yehova, indlela yakho, ndihambe ngenyaniso yakho; yibandakanye intliziyo yam ukuba ndiloyike igama lakho.” (INdumiso 86:11) UYehova wawamkela loo mthandazo, kuba wawenza wabhalwa eBhayibhileni. Sinokuqiniseka ukuba xa sithandaza ngokunyanisekileyo nangokufuthi ukuba asincede sifumane ubutyebi bokomoya eBhayibhileni uya kusiphendula.—Luka 18:1-8.
USolomon uthi: “Ubaqwebela uzimaso abathe tye, uyingweletshetshe kwabahamba ngengqibelelo, ukuze alondoloze umendo wesiko, agcine nendlela yabakhe benceba. Uya kwandula uqonde ubulungisa, nesiko nokuthe tye, nayo yonke imikhondo yokulungileyo.” (IMizekeliso 2:7-9) Hayi indlela okusiqinisekisa ngayo oku! UYehova akaniki kuphela ubulumko bokwenene kwabo babufuna ngokunyanisekileyo kodwa ukwayingweletshetshe kwabo bangamalungisa kuba babonakalisa ubulumko bokwenyaniso yaye bayithobela ngokunyanisekileyo imilinganiselo yakhe elungileyo. Kwanga singaphakathi kwabo uYehova abanceda ukuba baqonde “imikhondo yokulungileyo.”
Xa “Ukwazi Kwenze Mnandi”
Ufundisiso lobuqu lweBhayibhile—into ebalulekileyo ekufuneni ubulumko—asiyonto ekumnandi ukuyenza kubantu abaninzi. Ngokomzekelo, uLawrence oneminyaka engama-58 ubudala uthi: “Bendisoloko ndisebenza ngezandla zam. Kunzima ukuba ndifunde.” Yaye uMichael oneminyaka engama-24 ubudala, owayengakunandiphi ukufundisisa esikolweni, uthi: “Kwakufuneka ndizinyanzele ukuba ndihlale phantsi ndize ndifunde.” Sekunjalo, umnqweno wokufundisisa unokuhlakulelwa.
Cinga ngoko uMichael wakwenzayo. Uthi: “Ndaziqeqesha ukuba ndifundisise isiqingatha seyure imihla ngemihla. Kungekudala ndandiwubona umphumo kwisimo sam sengqondo, amagqabaza am kwiintlanganiso zamaKristu, nendlela endincokola ngayo nabanye. Ngoku ndikhangele phambili kumaxesha am okufundisisa, yaye andivumeli nantoni na iphazamisane nawo.” Ewe, ufundisiso lobuqu luba yinto esiyinandiphayo xa sibona inkqubela esiyenzayo. NoLawrence wazibhokoxa ekufundisiseni iBhayibhile yaye, ekuhambeni kwexesha, wakhonza njengomdala kwibandla lamaNgqina kaYehova.
Ukwenza ufundisiso lobuqu lube yinto enandiphekayo kufuna umgudu oqhubekayo. Noko ke, iingenelo zinkulu. USolomon uthi: “Kuba ubulumko buya kungena entliziyweni yakho, ukwazi kwenze mnandi umphefumlo wakho. Ukunkqangiyela kokugcina, ukuqonda kokulondoloza.”—IMizekeliso 2:10, 11.
“Ukuba Kukuhlangule Endleleni Embi”
Kungakulondoloza njani ubulumko, ulwazi, ukunkqangiyela nokuqonda? USolomon uthi: “Ukuba [ezi zinto zikuhlangule] endleleni embi, kubantu abathetha impenduka; kwabashiya umendo wokuthe tye, ukuze bahambe ngeendlela zobumnyama; kwabavuyela ukwenza ububi, bagcobe ngeempenduka zabenza ububi; abamendo ujibilizayo, abathi gu bucala ngemikhondo yabo.”—IMizekeliso 2:12-15.
Ewe, abo babuxabisayo ubulumko bokwenyaniso bayakuphepha ukunxulumana nabaphi na “abathetha impenduka,” oko kukuthi, izinto ezingavisisaniyo noko kuyinyaniso nokulungileyo. Ukunkqangiyela nokuqonda kusikhusela kwabo bayikhaba ngawo omane inyaniso baze bahambe ngeendlela zobumnyama nabo bathe gu bucala nabakunandiphayo ukwenza okubi.—IMizekeliso 3:32.
Hayi indlela esinokuba nombulelo ngayo ngokuba ubulumko bokwenyaniso nezinye iimpawu ezinxulumene noko kwakhona zisikhusela kwindlela embi yamadoda namabhinqa aziphethe kakubi! USolomon wongezelela esithi ezi mpawu zikunceda “ukuze uhlangulwe [“kumfazi wasemzini,” NW ], kowolunye uhlanga, ontetho yakhe igudileyo; lowo ushiya ikholwane lobutsha bakhe, awulibale umnqophiso woThixo wakhe. Kuba utshona ekufeni nendlu yakhe, nemikhondo yakhe itshonela kwabangasekhoyo; bonke abangevayo kuye ababuyi, abafiki kumendo wobomi.”—IMizekeliso 2:16-19.
“Umfazi wasemzini,” ihenyukazi, uchazwe njengalowo “ushiya ikholwane lobutsha bakhe”—ekunokwenzeka ukuba lo ngumyeni wobutsha bakhe.a (Thelekisa uMalaki 2:14.) Uye wakulibala ukuba ukukrexeza akuvumelekanga ngokomqophiso woMthetho. (Eksodus 20:14) Iindlela zakhe zikhokelela ekufeni. Abo banxulumana naye kusenokwenzeka ukuba bangaphinde ‘bafike kumendo wobomi,’ ekubeni kungekudala basenokufika kwantsonganyawana, oko kukuthi ekufeni, apho kungayi lubuyayo. Umntu onokuqonda nocingayo uyakulumkela ukuhendelwa ekuziphatheni okubi yaye ngobulumko uyakuphepha ukulukuhlelwa kuko.
‘Abathe Tye Baya Kulima Ilizwe’
Eshwankathela injongo yakhe yokululeka ngobulumko, uSolomon uthi: “Ukuze uhambe ngendlela yabalungileyo, ugcine umendo wamalungisa.” (IMizekeliso 2:20) Hayi indlela entle ngayo injongo efezwa bubulumko! Businceda siphile ubomi obonwabisayo nobanelisayo obumkholisayo uThixo.
Kwakhona cinga ngeentsikelelo ezizukileyo ezigcinelwe abo ‘bahamba ngendlela yabalungileyo.’ USolomon uhlabela mgama esithi: “Abathe tye baya kulima ilizwe, basale kulo abagqibeleleyo, banqunyulwe ezweni abangendawo, abanginizayo bancothulwe kulo.” (IMizekeliso 2:21, 22) Kwanga ungaphakathi kwabo bagqibeleleyo abaya kuphila kwihlabathi likaThixo elitsha elinobulungisa.—2 Petros 3:13.
[Imibhalo esemazantsi]
a Igama elithi “wasemzini” lalisetyenziswa kwabo baphambuke koko kwakuvisisana noMthetho yaye ngoko bakreqa kuYehova. Ngenxa yoko, ihenyukazi—nangona isenokuba akanguye umntu wasemzini—lichazwa ‘njengomfazi wasemzini.’
[Umfanekiso okwiphepha 26]
USolomon wathandazela ubulumko. Nathi sifanele senjenjalo