Yintoni Oyena Ndoqo Wempumelelo?

AMATYENDYANA amabini azimiseleyo ayelungisa ngocwangco umatshini ongaqhelekanga elungiselela uvavanyo olubalulekileyo. Ngequbuliso, kwavuthuza umoya onamandla waphaphathekisa lo matshini uethe-ethe, wawuphosa phezulu, emva koko wathi sa-a phantsi. Edimazekile la madoda athi nkamalala ema nematha. Eso sixhobo sawo sasenziwe ngononophelo, saba bubutyobo bamaplanga nentsimbi.

UOrville noWilbur Wright, babengaqali ukoyisakala ngolu hlobo ngaloo mini yango-Oktobha 1900 kwilinge labo lokwenza inqwelo-moya enzima kunomoya. Babesele bechithe iminyaka ethile nesixa esininzi semali besenza ulingelo.

Noko ke, ekugqibeleni ukuzingisa kwabo kwaba nemivuzo. NgoDisemba 17, 1903, eKitty Hawk, eNorth Carolina, eUnited States, aba nyana bakwaWright bakwazi ukuseka umfanekiso wesithuthi esabhabha imizuzwana eli-12—ixesha elifutshane xa kuthelekiswa neenqwelo-moya zanamhlanje, kodwa ixesha elide ngokwaneleyo ukuguqula ihlabathi ngonaphakade!

Impumelelo kwimigudu emininzi ixhomekeke kakhulu ekuzingiseni ngomonde. Enoba kukukwazi ukuthetha ulwimi olutsha, ukufunda ubugcisa, okanye ukwakha ubuhlobo, izinto ezininzi ezixabisekileyo zifunyanwa kuphela ngokwenza umgudu ozingisileyo. Umbhali uCharles Templeton uthi, “phantse ngamaxesha onke impumelelo inxulunyaniswa nento enye: ukusebenza nzima.” Umbhali wemihlathi uLeonard Pitts, Omnci., uphawula oku: “Sithetha ngetalente, sibulele ithamsanqa, kodwa ngokufuthi, siyazityeshela ezona zinto zibalulekileyo. Ukuzibhokoxa nokoyisakala izihlando ezininzi. Ukusebenza ixesha elide.”

Oku kungqinelana noko kwathethwa yiBhayibhile kudala isithi: “Isandla sabakhutheleyo siyalawula.” (IMizekeliso 12:24) Ukukhuthala kuthetha ukuba sifanele sizingise kwimigudu yethu. Oku kuyimfuneko ukuba sifuna ukukufeza oko sizimisele ukukwenza. Kukuthini ukuzingisa? Sinokuzingisa njani kusukelo lwethu, yaye yintoni esifanele sizingise kuyo? Le mibuzo iza kuphendulwa kwinqaku elilandelayo.

[Inkcazelo Ngomfanekiso okwiphepha 3]

U.S. National Archives photo