Impumelelo Ngenxa Yokuzingisa

UKUZINGISA kuye kwaba yinto enqabileyo kula maxesha anamhla. Abantu abaninzi bakholelwa kukuba impumelelo ixhomekeke ekubeni kwindawo ethile ngexesha elifanelekileyo kunokuba ixhomekeke ekuzingiseni. Ngubani onokubagxeka? Amaziko eendaba azele zizibhengezo zentengiso ezithi ngendlela ebalaseleyo zenze kubonakale ngathi phantse yonke into oyifunayo ungayifumana ungenzanga mgudu ungako yaye uhlawule imalana nje ethe kratya. Amaphephandaba apapasha uthotho lwamabali ngempumelelo efumaneka ngephanyazo nempumelelo kurhwebo olwenziwa zizigidi zabantwana abasandul’ ukuphuma esikolweni.

Umbhali wemihlathi uLeonard Pitts ukhalaza enjenje: “Kwibutho labantu abazicingela ukuba bayazi, kubonakala kulula. . . . Kubonakala ngathi nabani na angakwenza oko ukuba nje anganecebo lokukwenza, abe namandla, okanye afumane uncedo oluvela kuThixo.”

Kukuthini Ukuzingisa?

Ukuzingisa kuthetha ‘ukubambelela ngokuqinileyo nangokuqhubekayo kwinjongo ethile, imeko, okanye umsebenzi nangona kukho imiqobo okanye iziphazamiso.’ Kuthetha ukuqhubeka ngozimiselo nakuba kunzima, ume ngokuqinileyo, unganikezeli. IBhayibhile ibalaselisa ukubaluleka kolu phawu. Ngokomzekelo, iLizwi likaThixo liyasiluleka lisithi: “Qhubekani, ke ngoko, nifuna kuqala ubukumkani,” “qhubekani ninkqonkqoza, kwaye niya kuvulelwa,” “emthandazweni zingisani,” nize “nibambelele nkqi koko kuhle.”—Mateyu 6:33; Luka 11:9; Roma 12:12; 1 Tesalonika 5:21.

Inxalenye ebalulekileyo yokuzingisa kukuhlangabezana neziphazamiso ezingenakuphepheka. IMizekeliso 24:16 ithi: “Ilungisa liwa kasixhenxe, livuke.” Kunokuba ‘anikezele’ xa ejamelene nobunzima okanye xa engaphumeleli umntu ozingisayo ‘uyavuka,’ ‘uyaqhubeka,’ azame kwakhona.

Noko ke, abaninzi abakulungelanga ukujamelana nobunzima nokungaphumeleli. Bengakhange bawuhlakulele umoya wokuzingisa, banikezela lula. Umbhali uMorley Callaghan uphawula oku: “Abantu abaninzi xa bengaphumeleli basabela ngendlela ebenzakalisayo. Bazisizela ngokugqith’ emgceni, babek’ ityala kuye wonk’ umntu, baba nengqumbo baze . . . banikezele.”

Oku kulusizi. Lo kaPitts uphawula oku: “Siyalibala ukuba sikho isizathu sokuba sityhubele uvavanyo oluthile, kukho ingenelo efumanekayo ebunzimeni.” Yiyiphi loo ngenelo? Uqukumbela ngelithi: “[Ubani] ufumanisa ukuba ukungaphumeleli akubulali, yaye akoyisakali ngonaphakade. Uzuza amandla okuqonda ngakumbi. Ingqondo yakhe ithi qwa.” IBhayibhile ikubeka ngokucacileyo oku isithi: “Ekubulalekeni konke kubakho ungeniselo.”—IMizekeliso 14:23.

Kakade ke, akusoloko kulula ukuqala ekuqaleni emva kokuphazamiseka. Maxa wambi sijamelana nocelomngeni olunokubonakala lukatyisa yonke imizamo yethu yokulwa nalo. Kunokuba luye lusondela, usukelo lwethu lunokubonakala luhlehlela emva. Sinokuziva sisoyisakala, singafanelekanga, yaye sisenokudimazeka, side sixinezeleke. (IMizekeliso 24:10) Ukanti, iBhayibhile iyasikhuthaza isithi: “Masingayeki ukwenza oko kuhle, kuba ngexesha elililo siya kuvuna ukuba asidinwa.”—Galati 6:9.

Yintoni Enokusinceda Sizingise?

Inyathelo lokuqala lokuzingisa kwikhondo elithile kukuzibekela usukelo olufanelekileyo nolufikelelekayo. Ngokuqinisekileyo umpostile uPawulos wayekuqonda oku. Waxelela abaseKorinte oku: “Indlela endibaleka ngayo asiyiyo eyokungaqiniseki; indlela endalathisa ngayo izithonga zam yeyokuze ndingabethi umoya.” UPawulos wayesazi ukuba xa efuna imigudu yakhe iphumelele, kwakufuneka abe nosukelo olucacileyo, njengembaleki ejonge ukufikelela entanjeni. Wababongoza wathi: “Anazi na ukuba iimbaleki elugqatsweni zibaleka zonke, kodwa inye kuphela eyamkela ibhaso? Balekani ngendlela yokuba nilifikelele.” (1 Korinte 9:24, 26) Sinokukwenza njani oku?

IMizekeliso 14:15 ithi “onobuqili uyakuqonda ukunyathela kwakhe.” Ngamathuba athile kububulumko ukuhlola indlela esenza ngayo izinto ebomini, sizibuze apho sisinge khona nokuba akukho luhlengahlengiso kufuneka silwenze kusini na. Kubalulekile ukuba sikuqonde ngokucacileyo oko sifuna ukukufeza nesizathu sokufuna ukwenjenjalo. Asiyi kutyekela ekunikezeleni ukuba oko sifuna ukukufikelela kuhlala kuthe tha ezingqondweni zethu. Umzekeliso ophefumlelweyo uyabongoza, “amehlo akho makakhangele athi gca,” ukuze “zonke iindlela zakho zizimaseke.”—IMizekeliso 4:25, 26.

Xa uluqonda usukelo lwakho, inyathelo elilandelayo kukuba uhlolisise indlela yokulufikelela. UYesu wabuza oku: “Ngubani na kuni othi efuna ukwakha inqaba angahlali phantsi kuqala aze abale iindleko.” (Luka 14:28) Ngokuvisisana nalo mgaqo, enye ingcali ngokusebenza kwengqondo yaphawula oku: “Enye yezinto endiye ndaziphawula kubantu abaphumelelayo kukuba bayiqonda kakuhle indlela edibana ngayo injongo yokwenza okuthile nomphumo othi ubekho ebomini babo. Abantu abaphumelelayo bayaqonda ukuba xa befuna into ethile, kufuneka benze konke okufunekayo ukuze bayifumane.” Xa siwaqonda kakuhle onke amanyathelo ekufuneka siwathabathe ukuze sifumane oko sikufunayo oko kuya kusinceda ukuba sinikele ingqalelo kuko. Kuya kusinceda nokuba kube lula ngathi ukuqala ekuqaleni emva kokuphazamiseka. Ukuhlolisisa izinto ngolo hlobo kwakungoyena ndoqo kwimpumelelo kaOrville noWilbur Wright.

Ngenxa yoko, xa ufumana iziphazamiso, zama kangangoko ukuba ube nesimo sengqondo esingqalileyo ngazo uze uzigqale njengamava onokufunda kuwo. Yihlolisise imeko, zama ukuqonda apho uphazame khona, uze ulungise impazamo okanye ulwe nobuthathaka. Kuyanceda ukuthetha nabanye, kuba “iingcinga zizinyaswa yingcebiswano.” (IMizekeliso 20:18) Ngokuzenzekelayo, sihlandlo ngasinye usenza umgudu, oko kubangela ukuba ube nobuchule nobugcisa obungakumbi, yaye ekugqibeleni oko kuba negalelo kwimpumelelo yakho.

Inkalo yesithathu ebalulekileyo ekuzingiseni kukungaguquguquki kwinto oyenzayo. Umpostile uPawulos uyasibongoza esithi: “Ngokwenqanaba esiye senza inkqubela ukusa kulo, masiqhubeke sihamba ngokulungeleleneyo kulo mzila mnye.” (Filipi 3:16) Kunjengokuba omnye umqeqeshi wakubekayo, “ukulungelelana nokungaguquguquki kwinto oyenzayo ekuhambeni kwexesha kuvelisa imiphumo ebalaseleyo.” Oku kuchazwe kakuhle kwintsomi eyaziwayo ka-Aesop ethetha ngofudo nomvundla. Ufudo lwaphuma emagqabini elugqatsweni, nangona lwalucotha kakhulu kunomvundla. Ngoba? Ngenxa yokuba ufudo lwalubetha ngesantya esinye. Aluzange lunikezele kodwa lwakhetha isantya elalinokukwazi ukuqhubeka ngaso, lwaza lwanamathela kuso de lwaya kufika entanjeni. Ekubeni umntu olungeleleneyo nobetha ngesantya esinye esenza inkqubela, uhlala ekhuthele yaye ngaloo ndlela akanakufane anikezele okanye akhutshwe elugqatsweni. Ewe, “balekani ngendlela yokuba” nilufikelele usukelo lwenu.

Ukukhetha Usukelo Olufanelekileyo

Kakade ke, ukuze ukuzingisa kwethu kuxabiseke, kufuneka sizibekele usukelo olufanelekileyo. Abantu abaninzi basukela izinto ezingazisi lonwabo. Kodwa iBhayibhile ithi: “Lowo uqondela kumthetho ogqibeleleyo wenkululeko nalowo uzingisayo kuwo . . . uya kuba noyolo ekuwenzeni kwakhe.” (Yakobi 1:25) Ewe, lusukelo olufanelekileyo ukufundisisa umthetho kaThixo ukuze uwuqonde njengoko wandlalwe eBhayibhileni. Ngoba? Ngokusisiseko, kungenxa yokuba umthetho kaThixo usekelwe kwimilinganiselo yakhe egqibeleleyo yobulungisa. NjengoMdali, uyakwazi oko kulungele izidalwa zakhe. Ngoko ukuba siyazingisa ekufundeni imiyalelo kaThixo size siyisebenzise ebomini bethu, oko kuzingisa, ngokuqinisekileyo kuya kusizisela ulonwabo. IMizekeliso 3:5, 6 inesi sithembiso, “kholosa ngoYehova ngentliziyo yakho yonke . . . Uze umazi yena ezindleleni zakho zonke; wowulungelelanisa umendo wakho.”

Ukongezelela, uYesu uthi, ukungenisa ulwazi ngoThixo nangoYesu “kuthetha ubomi obungunaphakade.” (Yohane 17:3) Isiprofeto seBhayibhile sibonisa ukuba siphila ‘kwimihla yokugqibela’ yale nkqubo. (2 Timoti 3:1-5; Mateyu 24:3-13) Kungekudala uBukumkani bukaThixo, urhulumente wakhe wobulungisa, uya kulawula abemi bomhlaba. (Daniyeli 2:44; Mateyu 6:10) Lo rhulumente uya kumisela isihlandlo soxolo, sempumelelo, nempilo-ntle kulo lonke uluntu oluthobelayo. (INdumiso 37:10, 11; ISityhilelo 21:4) IZenzo 10:34 zithi, “UThixo akakhethi buso.” Ewe wonk’ ubani uyamenywa ukuze anandiphe iingenelo!

IBhayibhile yincwadi yamandulo ezele bubulumko yaye inentsingiselo. Ukuze uyiqonde kufuneka ixesha nomgudu. Kodwa ngoncedo lukaThixo—yaye ukuba siyazingisa ekufuneni ulwazi kuyo—sinokuyityhilelwa. (IMizekeliso 2:4, 5; Yakobi 1:5) Kuyavunywa ukuba, ukukusebenzisa oko sikufundayo kunokuba lucelomngeni. Kusenokufuneka senze uhlengahlengiso kwindlela esicinga ngayo okanye kwimikhwa yethu. Abahlobo bethu esibathandayo okanye amalungu eentsapho zethu asenokukuchasa ukufundisisa kwethu iBhayibhile. Ngoko ke ukuzingisa kubalulekile. Umpostile uPawulos usikhumbuza ukuba uThixo uya kubanika ubomi obungunaphakade abo babonakalisa ‘unyamezelo kumsebenzi olungileyo.’ (Roma 2:7) AmaNgqina kaYehova aya kukuvuyela ukukunceda ufikelele olu sukelo.

Qiniseka ukuba uya kuphumelela ukuba uyazingisa ekufundeni ngoThixo nangokuthanda kwakhe uze uzingise ekusebenziseni oko ukufundayo.—INdumiso 1:1-3.

[Umfanekiso okwiphepha 6]

Uya kuphumelela ukuba uyazingisa ekufundeni ngoThixo nangokuthanda kwakhe

[Inkcazelo Ngomfanekiso okwiphepha 4]

Culver Pictures