Isiluleko Sobulumko Sikamama

“Nyana wam, yiva uqeqesho lukayihlo, ungawulahli umyalo kanyoko.”—IMizekeliso 1:8.

ABAZALI bethu—utata nomama—banokuba ngumthombo oxabisekileyo wokhuthazo, inkxaso nesiluleko. Incwadi yeBhayibhile yeMizekeliso isixelela ngokumkani othile oselula, uLemuweli, owafumana “isigidimi esinzima” sivela kunina ukuze ‘simlungise.’ La mazwi abhalwe kwiMizekeliso isahluko 31, yaye nathi singangenelwa kwesi siluleko sobulumko salo mama.—IMizekeliso 31:1.

Isiluleko Esifanele Ukumkani

Unina kaLemuweli uqala ngokubuza imibuzo eliqela esibangela sibe nomdla: “Yini, nyana wam? Yini, nyana wesizalo sam? Yini nyana wezibhambathiso zam?” Isibongozo sakhe asiphinda kude kube kathathu sibonisa indlela akuxhalabele ngayo ukuba unyana wakhe anikele ingqalelo kula mazwi akhe. (IMizekeliso 31:2) Ukuxhalabela kwakhe impilo-ntle yokomoya yabantwana bakhe kungumzekelo omhle kubazali abangamaKristu namhlanje.

Ngokuphathelele impilo-ntle yonyana wakhe, yintoni enokuxhalabisa umama ngaphezu kweziyunguma nokuzifica okuquka izinto ezixhaphake gqitha njengewayini, amabhinqa nomculo? Unina kaLemuweli ungqala ngqo engongomeni esithi: “Amandla akho musa ukuwanika amankazana.” Ubhekisela kwihambo enguvula-zibhuqe ‘njengetshabalalisa ookumkani.’—IMizekeliso 31:3.

Ukusela ngokugqithiseleyo akumele kubethwe ngoyaba. Uyalumkisa, “Lemuweli, asiyindawo yokumkani ukusela iwayini.” Kunokwenzeka njani ukuba ukumkani agwebe kakuhle ‘angakulibali oko kumiselweyo yaye angalijiki ityala loonyana bonke beentsizi’ ukuba usoloko enxilile?—IMizekeliso 31:4-7.

Ngokwahlukileyo koko, ngokuba msulwa kwimikhwa enjalo, ukumkani uya kukwazi ‘ukugweba ngobulungisa, agwebe ityala lolusizana nolihlwempu.’—IMizekeliso 31:8, 9.

Nangona ulutsha olungamaKristu lusenokungabi ‘ngookumkani’ namhlanje, isiluleko sobulumko sikanina kaLemuweli sifike ngexesha elililo, mhlawumbi nangaphezu kokuba kwakunjalo kuye. Ukusetyenziswa kakubi kotywala, ukusetyenziswa kwecuba nokuziphatha kakubi ngokwesini kuxhaphakile kubantu abaselula kule mihla, yaye kubalulekile ukuba ulutsha olungamaKristu lunikele ingqalelo xa abazali balo belunika “isigidimi esinzima.”

Umfazi Ofanelekileyo

Kufanelekile ukuba oomama baxhalabe ngemitshato yexesha elizayo yoonyana babo abafikisa ebuntwini obukhulu. Ngokulandelayo unina kaLemuweli uphethulela ingqalelo yakhe kwiimpawu zenkosikazi efanelekileyo. Alithandabuzeki elokuba umfana unokungenelwa kakhulu ngokuqwalasela imbono yebhinqa ngalo mbandela ubalulekileyo.

Kwindinyana 10 (NW), “umfazi ofanelekileyo” ufaniswa nekorale enqabileyo nexabisekileyo, leyo ngamaxesha okubhalwa kweBhayibhile kwakufuneka wenze umgudu ukuze uyifumane. Ngokufanayo, ukufumana umfazi ofanelekileyo kufuna umgudu. Kunokuba angxamele ukutshata, umfana unokuba wenza kakuhle ukuzinika ithuba elaneleyo ukuze akhethe. Unokwandula ke, akuxabise kakhulu oko akufumeneyo.

Ngokuphathelele umfazi ofanelekileyo, uLemuweli uxelelwa oku: “Ikholose ngaye intliziyo yendoda yakhe.” (Indinyana 11) Ngamany’ amazwi, ayifanele inyanzelise ukuba inkosikazi yayo ifumane imvume yayo kuyo yonk’ into. Kakade ke, amaqabane omtshato afanele axubushe kunye ngaphambi kokwenza izigqibo ezinzulu, ezinjengokuthenga izinto ezixabisa kakhulu okanye ukukhuliswa kwabantwana. Unxibelelwano kwimibandela elolu hlobo lufak’ isandla ekomeleleni kolwalamano lwawo.

Kakade ke, umfazi ofanelekileyo unezinto ezininzi azenzayo. Kwindinyana 13 ukusa kweye-17 kudweliswe iziluleko nemigaqo enokusetyenziswa ngamakhosikazi enokuba aphila kweliphi na ixesha, ukuze kungenelwe iintsapho zawo. Ngokomzekelo, njengoko amaxabiso empahla yokunxiba neyendlu esiya enyuka, umfazi ofanelekileyo ufunda ubugcisa nokuba noqoqosho ukuze intsapho yakhe inxibe kakuhle yaye ifaneleke. (Indinyana 13, 19, 21, 22) Ukuze angathengi ukutya kwentsapho ngexabiso eliphezulu, utyala oko angakwazi ukukutyala aze asebenzise ubulumko xa ethenga.—Indinyana 14, 16.

Ngokucacileyo, lo mfazi ‘akasidli isonka sobuvila.’ Uyazibhokoxa, aze alungelelanise imisebenzi yendlu yakhe ngokuphumelelayo. (Indinyana 27) Ubhinqa “amandla emanqeni akhe,” okuthetha ukuthi uyazilungiselela ukuze enze umsebenzi onzima. (Indinyana 17) Uvuka aqalise umsebenzi wakhe wosuku lingekaphumi ilanga, aze asebenze ngenkuthalo de kube sebusuku. Kuba ngathi isibane esikhanyisela umsebenzi wakhe sisoloko sivutha.—Indinyana 15, 18.

Ngaphezu kwako konke, umfazi ofanelekileyo uyazixabisa izinto zokomoya. Uyamoyika uThixo aze amkhonze ngentlonelo enzulu noloyiko olufanelekileyo. (Indinyana 30) Ngokufanayo uncedisa umyeni wakhe ekuqeqesheni abantwana bakhe ukuba benze okufanayo. Indinyana 26 ithi: “Ngobulumko,” ufundisa abantwana bakhe, yaye “umyalelo onenceba uselulwimini lwakhe.”

Umyeni Ofanelekileyo

Ukuze abe nomtsalane kumfazi ofanelekileyo, uLemuweli kwakuya kufuneka aphumeze iimbopheleleko zomyeni ofanelekileyo. Unina kaLemuweli umkhumbuza ngeqela lezinye zazo.

Umyeni ofanelekileyo bekuya kuthethwa kakuhle ngaye ‘ngamadoda amakhulu elizwe.’ (IMizekeliso 31:23) Oku kuthetha ukuba ebeya kuba ngulowo unobuchule, unyanisekileyo, uthembekileyo nowoyika uThixo. (Eksodus 18:21; Duteronomi 16:18-20) Ngenxa yoko, ubeya ‘kwaziwa emasangweni,’ apho ahlanganisana khona amadoda adumileyo ukuze alungise imicimbi yesixeko. Ukuze ‘aziwe’ njengendoda eyoyik’ uThixo, bekuya kufuneka abe nolwazelelelo aze asebenzisane nabadala ‘belizwe,’ mhlawumbi okuthetha ukuthi isithili okanye ummandla.

Ngokungathandabuzekiyo ethetha ngokusuka kumava obuqu, unina kaLemuweli ukhumbuza unyana wakhe ngokubaluleka kokubonakalisa uxabiso ngalowo uza kuba yinkosikazi yakhe. Akukho namnye emhlabeni ebeya kumthanda ngaphezu kwakhe. Ngoko khawuthelekelele indlela achukumiseke ngayo xa evuma phambi kwabo bonke esithi: “Zininzi iintombi ezibonakala zifanelekile, kodwa wena—wena uzigqwesa zonke.”—IMizekeliso 31:29, thelekisa iNW.

Kuyabonakala ukuba uLemuweli waba noxabiso ngesiluleko sobulumko sikanina. Ngokomzekelo, siphawula ukuba kwindinyana 1, ubhekisela kumazwi kanina ngokungathi athethwa nguye. Ngenxa yoko, wakwamkela “ukumlungisa” kwakhe waza wangenelwa kwicebiso lakhe. Ngamana nathi singangenelwa ‘kwisigidimi esinzima’ ngokusebenzisa imigaqo yaso ebomini bethu.

[Imifanekiso ekwiphepha 31]

Inkosikazi efanelekileyo ayisidli “isonka sobuvila”