Bebancinanana Benjalo, Hayi Inkalipho Abanayo
BEKUNOKUBA njani ukuthetha nabantu ongabaziyo ngoBukumkani bukaThixo xa uziisentimitha ezingama-76 kuphela ubude? ULaura unokukuxelela. Eneminyaka engama-33 ubudala, bubude bakhe obo, iisentimitha ezingama-76 kuphela. Yena nodade wabo, uMaría, oneminyaka engama-24 noziisentimitha ezingama-86 ubude, bahlala eQuito, e-Ecuador. Makhe babalise ngemiqobo abajamelana nayo kubulungiseleli babo bobuKristu.
“Ukuze siye kumhlaba esishumayela kuwo nakwiintlanganiso zamaKristu, sihamba isiqingatha sekhilomitha sisiya kukhwela ibhasi. Ukusuka apho isibeka khona, sihamba esinye isiqingatha sekhilomitha ukufika kwibhasi yesibini. Ngelishwa, endleleni kuhlala izinja ezintlanu ezineengcwangu. Izinja ziyasothusa kuba kuthi zikhangeleka zinkulu okwamahashe. Ukuba kuyimfuneko ukuzigxotha, sidla ngokuthabatha induku, size siyifihle kuloo ndlela ngaphambi kokukhwela ibhasi ukuze siyichole xa sigoduka.
“Ukukhwela ebhasini kungumsebenzi omkhulu kakhulu kuthi. Sikhwela kwindulana yomhlaba kwindawo yokumisa ibhasi ukuze sikwazi ukukhwela lula. Abanye abaqhubi bayasondela ngakule ndulana, ukanti abanye abakwenzi oko. Kuloo meko, lowo mde uncedisa omfutshane ukuba akhwele. Ukuze sifumane ibhasi yesibini kufuneka sinqumle uhola wendlela oxakekileyo—oko kungumgudu omkhulu kuloo milenzana yethu mifutshane. Ngenxa yokuba sibancinane ngomzimba, ukuba nengxowa yeencwadi enzima kuba lolunye ucelomngeni. Ukuze sigcine ingxowa ilula, sisebenzisa iBhayibhile elingana ipokotho size sifake uncwadi olumbalwa esihamba nalo.
“Ukususela ebuntwaneni, sobabini sasingabantu abathule gqitha. Abamelwane bethu bayazi ukuba ukuthetha nabantu ongabaziyo bekusoloko kungumsebenzi omkhulu kuthi. Ngoko ke bayothuka yaye bayamangaliswa xa besibona sinkqonkqoza kwizindlu zabo, yaye ngokufuthi bayasiphulaphula. Kodwa apho singaziwayo khona, ngokufuthi abantu basijonga njengabantu abancinane; ngenxa yoko, abasoloko benikela ingqalelo engako kwisigidimi sethu. Sekunjalo, ukwazi ukuba uYehova uyasithanda kusinika inkalipho yokuqhubeka nomsebenzi wokushumayela. Ukucamngca ngeMizekeliso 3:5, 6 nako kusinika inkalipho.”
Njengoko uLaura noMaría bebonisa, ukuzingisa phezu kwayo nje imiqobo esemzimbeni kungamzukisa uThixo. Umpostile uPawulos wathandazela ukuba “iliva enyameni,” ekunokuba yayiyinkxwaleko emzimbeni, lisuswe kuye. Kodwa uThixo wamxelela oku: “Ububele bam obunganifanelanga bukulingene; kuba amandla am enziwa agqibelele kubuthathaka.” Ewe, akuyomfuneko ukuba sisuswe isiphene ukuze sikwazi ukukhonza uThixo. Ukuthembela ngokupheleleyo kuThixo kungasinceda senze oko singakwenza kwiimeko zethu. Kuba uPawulos wayelijonga ngale ndlela “iliva enyameni,” wayenokuthi: “Xa ndibuthathaka, ndithi ke ndibe namandla.” (2 Korinte 12:7, 9, 10) Kwiminyaka kamva uPawulos wabhala: “Ezintweni zonke ndinamandla ngenxa yalowo undomelezayo.”—Filipi 4:13.
Kula maxesha okhanyo, uThixo ufeza umsebenzi omkhulu esebenzisa amadoda, abafazi, nabantwana abazinikela kuye ngokupheleleyo. Abathile kubo baneziphene ngandlel’ ithile. Nangona bonke benethemba lokuba baya kuphiliswa phantsi koBukumkani bukaThixo, abalindelanga ukuba uThixo ade aphelise iingxaki zabo ngaphambi kokuba benze okuthile enkonzweni yakhe.
Ngaba unesiphene esithile? Yiba nenkalipho! Ngokholo lwakho unokuba phakathi kwabo banjengoPawulos, uLaura noMaría. Kungathiwa ngabo, njengamadoda namabhinqa anokholo kumaxesha amandulo: “Bekwimo yobuthathaka basuka benziwa baba namandla.”—Hebhere 11:34.
[Umfanekiso okwiphepha 8]
UMaría
ULaura
[Umfanekiso okwiphepha 9]
UMaría uncedisa uLaura ukukhwela ebhasini
[Imifanekiso ekwiphepha 9]
“Izinja ziyasothusa kuba kuthi zikhangeleka zinkulu okwamahashe”
Ngezantsi: ULaura noMaría nabo bafundisisa nabo iBhayibhile