Wazi Ntoni Ngobugqwirha?

UBUGQWIRHA! Yintoni ethi qatha engqondweni yakho xa usiva elo gama?

Kwabaninzi, bungumxube weenkolelo namaphupha, asinto yakukhathalelwa. Kubo, ubugqwirha buba yinto yokwenene kuphela kubomi bentelekelelo—apho amagqwirha amadala anxiba izambatho ezineminqwazi afake amaphiko amalulwane kwimbiza ebilayo, ajike abantu babe ngamasele, aze aphaphazele esibhakabhakeni ebusuku ekhwele kwimiphini yemitshayelo yaye exokozela.

Kwabanye, ubugqwirha buyinto ehlekisayo. Abanye abaphandi bathi abemi behlabathi abangaphezu kwesiqingatha bakholelwa ukuba amagqwirha ngabantu bokwenene yaye anokubuphembelela ubomi babanye abantu. Izigidi zikholelwa ukuba ubugqwirha bubungendawo, buyingozi, yaye bumele boyikwe kakhulu. Ngokomzekelo, incwadi ethetha ngonqulo lwaseAfrika ithi: “Inkolelo yokusebenza nobungozi bomlingo ongendawo, ubugqi nobugqwirha yendele nzulu kubomi baseAfrika . . . Amagqwirha nabenzi bobugqi ngabona bantu bathiyiweyo kuluntu lwalapho ngokubanzi. Nanamhla oku, kukho iindawo nezihlandlo apho babethelwa ukufa ngabanye abantu basekuhlaleni.”

Noko ke, kumazwe aseNtshona into entsha eye yenzeka kukuba ubugqwirha buye bahlonelwa. Iincwadi, umabonwakude nemifanekiso eshukumayo ziye zanegalelo elikhulu ekunciphiseni ukoyikwa kobugqwirha. Umhlalutyi wezolonwabo uDavid Davis uthi: “Amagqwirha aya esiba ngabantu abaselula yaye aba nomtsalane ngakumbi, anomtsalane ngokuqinisekileyo. IHollywood iyakhawuleza ukuqonda utyekelo olukhoyo. . . . Ngokwenza amagqwirha abe nomtsalane yaye athandeke ngakumbi, anokubukelwa ngabantu abaninzi ngakumbi, kuquka amabhinqa nabantwana abancinane.” IHollywood iyakwazi ukuguqula naluphi na utyekelo ukuze luzise ingeniso.

Abanye bathi ubugqwirha buye baba ngomnye wemibutho yonqulo ekhula ngokukhawuleza eUnited States. Kuwo onke amazwe ahambele phambili, inani elandayo labantu, eliphenjelelwe yimibutho yokulwelwa kwamalungelo abafazi ephelelwe ngumdla kwezona nkonzo ziphambili, lifuna ulwaneliseko lokomoya kwiintlobo ezahlukahlukeneyo zobugqwirha. Enyanisweni, iintlobo zobugqwirha zininzi kangangokuba abantu bayaphikisana nangentsingiselo yegama elithi “igqwirha.” Noko ke, ngokufuthi abo bazibanga bengamagqwirha banxulunyaniswa neWicca—kwesinye isichazi-magama echazwa ngokuba “lunqulo lobuhedeni oluvela kwiYurophu yasentshona olwalukho kumaxesha angaphambi kobuKristu noluye lwavuselelwa kwinkulungwane yama-20.”a Ngenxa yoko, abaninzi bazibiza ngokuba bangabahedeni.

Ukutyhubela imbali, amagqwirha ebethiyiwe, etshutshiswa, ethuthunjiswa ade abulawe nokubulawa. Akumangalisi ke ngoko ukuba abantu abaqhelisela ubugqwirha namhlanje belangazelela ukuyiphucula indlela abakhangeleka ngayo. Kolunye uhlolisiso, kwabuzwa amagqwirha amaninzi ukuba sisiphi isigidimi abengathanda ukusidlulisela kubantu bonke. Impendulo yawo, eyashwankathelwa ngumphengululi uMargot Adler, yathi: “Asingobantu abangendawo. Asinquli uMtyholi. Abantu asibenzakalisi okanye sibalukuhle. Asiyongozi. Singabantu abaqhelekileyo njengani. Sineentsapho, siyaphangela, sinamathemba namaphupha. Asilohlelo. Asingobantu abangaqhelekanga. . . . Akuyomfuneko ukuba nisoyike. . . . Sifana kakhulu nani kunokuba nicinga.”

Eso sigidimi siya sisamkelwa nangakumbi. Kodwa ngaba oku kuthetha ukuba asikho isizathu sokuxhalaba ngenxa yobugqwirha? Masiwuhlalutye lo mbuzo kwinqaku elilandelayo.

[Umbhalo osemazantsi]