Siluhlobo Olunokholo
Ukwakha Ukholo Ngesifundo SeBhayibhile EIndiya
UKUSUKA emntla kwiiNtaba zeHimalaya ezinkulu nezinekhephu, ukuya emzantsi kunxweme olugqunywe yinkungu kuLwandlekazi i-Indiya, i-Indiya lilizwe lezinto ezahlukahlukeneyo, ngokwemeko-bume nangokonqulo. Phakathi kwabantu abahlala apho abangaphezu kwewaka lezigidi, malunga nabangama-83 ekhulwini ngamaHindu, abali-11 ekhulwini ngamaSilamsi, yaye abaseleyo ngabo bazibiza ngokuba ngamaKristu, amaSikh, amaBhuda namaJain. Bonke banandipha inkululeko yonqulo. IThe World Book Encyclopedia ithi: “Unqulo lunendima ebalulekileyo kubomi bamaIndiya.”
AmaNgqina kaYehova angaphezu kwama-21 200 eIndiya achazwa kakuhle xa kusithiwa ngabantu abaphila ngokuvisisana nokholo lwamaKristu. Njengamaqabane awo okomoya akweminye imimandla yehlabathi, amaNgqina aseIndiya akugqala njengelungelo ukunceda abamelwane bawo ukuba bakhe ukholo oluqinileyo kwiLizwi likaThixo, iBhayibhile Engcwele. (2 Timoti 3:16, 17) Qwalasela indlela enye intsapho yaseChennai emzantsi weIndiya eye yalufumana ngayo ulwazi lwenyaniso yeBhayibhile.
Ngaphambi kokuba idibane namaNgqina kaYehova, le ntsapho yayibandakanyeke kakhulu kwicawa yomoya yamaKatolika, isithi ibona imibono, ithetha ngeelwimi yaye iphilisa abagulayo. Yayibalulekile ecaweni nasekuhlaleni, nabantu babebiza amanye amalungu ale ntsapho ngokuthi “swami,” igama elithetha ukuthi “nkosi.” Kwandula ke ngenye imini elinye iNgqina latyelela le ntsapho laza layibonisa eBhayibhileni ukuba uYesu nguNyana kaThixo, kungekhona uThixo uSomandla, njengoko ngokuqhelekileyo abantu bekholelwa oko. Eli Ngqina layibonisa nokuba igama likaThixo nguYehova yaye injongo kaYehova ngomhlaba kukuba awenze ube yiparadesi entle.—INdumiso 83:18; Luka 23:43; Yohane 3:16.
Ngenxa yokuba yayihlonela iLizwi likaThixo yaye ikuthanda oko ikuvileyo, amalungu ale ntsapho asamkela isifundo seBhayibhile esithe rhoqo namaNgqina kaYehova. Oku kwawenza agculelwa ngamaqabane awo ecawa. Sekunjalo, le ntsapho yahlala izimisele ukuqhubeka nesifundo sayo seBhayibhile. Njengoko ulwazi lwayo lwalusanda yaye ukholo lwayo luqina, yayiyeka imikhwa yayo yonqulo lobuxoki. Namhlanje, amalungu amathathu ale ntsapho angamaNgqina anenzondelelo abhaptiziweyo, yaye umama wayo ukhonza njengovulindlela ongumncedani nanini na iimeko zivuma.
Ukholo Ukuze Woyise Imiqobo
USunder Lal, umfana ohlala kwidolophana yasePunjab, kwakufuneka abe nokholo oluqinileyo nenkalipho ukuze abelane nabanye ngeendaba ezilungileyo zoBukumkani bukaThixo. (Mateyu 24:14) Phakathi kwezinye izinto, wayesele ekuyekile ukunqula oothixo abaninzi ababenqulwa yintsapho yakowabo nakuloo dolophana waza wanqula uThixo oyinyaniso, uYehova. Okwesibini, uSunder Lal akanamilenze.
De kwaba ngowe-1992, ubomi bukaSunder Lal babungumgca wempuku. Wayesebenza njengomncedisi kagqirha aze athelele intsapho yakhe ekunquleni oothixo abahlukahlukeneyo phantsi kokhokelo lomfundisi wabo oyiguru. Kwandula ke ngobunye ubusuku, wawa ngoxa wayenqumla isiporo sikaloliwe. Uloliwe wamnyathela waza wamnqumla imilenze yomibini emathangeni. Nangona waphila, wayenxunguphele gqitha. Ngesizathu esibonakalayo, uSunder Lal wadandatheka gqitha waza wafuna nokuzibulala. Intsapho yakhe yayimxhasa, kodwa ikamva lakhe lalimfiliba.
Kwandula ke omnye wamaNgqina kaYehova wamtyelela uSunder Lal waza wambonisa eBhayibhileni ukuba uThixo uthembise ukwenza umhlaba ube yiparadesi emyoli aze enze bonke abantu abamthandayo nabamoyikayo babe nempilo efezekileyo. USunder Lal wasamkela isifundo seBhayibhile, waza wafundisisa ngokukhutheleyo kangangonyaka. Wamenywa ukuba aye kwiintlanganiso zamaKristu waza ekugqibeleni wahamba ekhwele emva kwibhayisekile yomhlobo wakhe. Nangona kwakubuhlungu ukukhwela apho, wafumana umvuzo omkhulu. Waqiniseka ngoko wayekufunda kwisifundo sakhe seBhayibhile njengoko wadibana nabantu ababekholelwa ngokwenene kumadinga eLizwi likaThixo nabaphila ngokuvisisana neemfundiso zeBhayibhile.
USunder Lal waqalisa ukwabelana ngeendaba ezilungileyo nabamelwane bakhe, yaye ngowe-1995 wabhaptizwa. Ekuqaleni, wayesiba nenxaxheba kubulungiseleli ngokuzirhuqa ukuya kwindlu ngendlu kwidolophana yakhe, indlela awayeqhele ukuhambahamba ngayo. Kodwa ngoku unesipho esivela kubazalwana bakhe bokomoya—itrayisikile ekhethekileyo elungiselelwe ukuba “ayinyawuze” ngezandla. Ngoncedo lwale trayisikile yakhe, ngoku akaxhomekekanga mntwini njengoko ekwazi ukuhamba uhambo lweekhilomitha ezili-12 ukuya kwiintlanganiso zebandla. Maxa wambi uqhuba kwizandyondyo zemvula; maxa wambi iqondo lobushushu liba ngama-43 ngokukaCelsius.
Ukongezelela ekuyeni kwiintlanganiso, uSunder Lal uqhuba izifundo ezininzi zeBhayibhile nabanye abafuna uncedo ukuze bakhe ukholo oluqinileyo kuThixo oyinyaniso, uYehova. Enyanisweni, abasixhenxe ababezizifundo zakhe zeBhayibhile ngoku babhaptiziwe, njengabanye abantu abathathu awaqhagamshelana nabo kodwa abathi bafunda iBhayibhile namanye amaNgqina.
Ngokutsho kweBhayibhile, “ukholo asinto banayo bonke abantu.” (2 Tesalonika 3:2) Kodwa abo “banotyekelo olufanelekileyo ngobomi obungunaphakade,” ukufundisisa rhoqo iLizwi likaThixo kunokwakha ukholo oluqinileyo. (IZenzo 13:48) Ufundisiso olunjalo lunokwenza namehlo abonakale eqaqambile ngenxa yethemba elihle ngekamva—nto leyo inani labantu elandayo eIndiya liyikholelwayo.
[Imaphu ekwiphepha 30]
(Ukuba ufuna inkcazelo ehlahlelwe kakuhle, yiya kwimpapasho)
AFGHANISTAN
PAKISTAN
NEPAL
BHUTAN
CHINA
BANGLADESH
MYANMAR
LAOS
THAILAND
VIETNAM
CAMBODIA
SRI LANKA
INDIA
[Inkcazelo]
Mountain High Maps® Copyright © 1997 Digital Wisdom, Inc.