Ngaba Unokulufumana Uxolo Lwangaphakathi?
Emva phayaa ngowe-1854, umbhali waseMerika uHenry Thoreau wabhala esithi: “Abantu abaninzi babephila ubomi bokuphelelwa lithemba.”
gokucacileyo, ngexesha awayephila ngalo uninzi lwabantu lwalungenalo uxolo lwangaphakathi. Noko ke, oko kwakusenzeka malunga ne-150 leminyaka eyadlulayo. Ngaba ukho umahluko namhlanje? Okanye ngaba amazwi kaThoreau asasebenza? Kuthekani ngawe siqu? Ngaba wanelisekile, yaye useluxolweni? Okanye ngaba uziva unganqabisekanga, ungaqinisekanga ngekamva, ‘uphelelwe lithemba,’ ngokutsho kukaThoreau?
OKUBUHLUNGU kukuba, zininzi izinto ehlabathini eziphanga abantu uxolo lwangaphakathi. Masikhankanye nje ezimbalwa. Kumazwe amaninzi ukungaqeshwa nokwamkela imivuzo ephantsi kubangela ubuhlwempu nenkxalabo ngezoqoqosho. Kwamanye amazwe abaninzi bazibhokoxa ngamandla besukela ubutyebi nezinto eziphathekayo. Noko ke, ngokufuthi kubakho ukukhuphisana okubangela unxunguphalo, kungekhona uxolo. Ukugula, imfazwe, ulwaphulo-mthetho, ukungabikho kokusesikweni nengcinezelo nazo ezi ziyaluphanga uxolo ebantwini.
Bafuna Uxolo Lwangaphakathi
Abantu abaninzi abakulungele ukulinyamezela ihlabathi njengoko linjalo. UAntônioa wayeyinkokeli yabasebenzi komnye umzi-mveliso omkhulu waseSão Paulo, eBrazil. Enethemba lokuphucula iimeko zokuhlala, waba nenxaxheba kwimingcelele yokuvakalisa izikhalazo noqhankqalazo, kodwa oku akuzange kumenze abe noxolo lwengqondo.
Bambi banethemba lokuba umtshato uya kubangela inzolo ethile ebomini babo, kodwa basenokudana. UMarcos wayengusomashishini ophumelelayo. Wabandakanyeka kwezobupolitika waza waba ngusibonda wedolophu kwisixeko semizi-mveliso. Noko ke, izinto zazimaxongo ekhayeni lakhe. Bakuba abantwana bakhe belishiyile ikhaya, yena nenkosikazi yakhe bahlukana ngenxa yeengxaki ezazingasombululeki.
UGerson, umntwana owakhula ehlala esitratweni eSalvador, eBrazil wayefuna ukwenza into entsha. Wayehamba isixeko ngesixeko, ehamba nabantu abaqhuba iilori. Kungekudala waba likhoboka leziyobisi, ephanga abantu ukuze ahlawulele loo mkhwa wakhe mbi. Izihlandlo ezininzi wayebanjwa ngamapolisa. Noko ke, nangona uGerson wayenguphuma silwe yaye ethanda ugonyamelo wayelufuna uxolo lwangaphakathi. Ngaba wayenokulufumana?
Ngoxa uVania wayeselula, wafelwa ngunina yaye uVania waba nembopheleleko yokunyamekela ikhaya, kuquka nodade wabo owayegula. UVania wayesiya ecaweni kodwa wayeziva elahliwe nguThixo. Ngokuqinisekileyo wayengenalo uxolo lwengqondo.
Makhe sithethe ngoMarcelo. Yena ekuphela kwento awayeyifuna uMarcelo lulonwabo. Wayethanda ukuya emathekweni nabanye abantu abaselula—kungqungqwe, kuselwe kusetyenziswe neziyobisi kakubi. Ngasihlandlo sithile walwa waza wenzakalisa omnye oselula. Emva koko, wazisola kakhulu ngoko wayekwenzile waza wathandaza kuThixo efuna uncedo. Naye wayefuna uxolo lwengqondo.
La mava abonisa ezinye iimeko ezinokuluphelisa uxolo lwengqondo. Ngaba yayikho indlela yokuba inkokeli yabasebenzi, ilungu lezobupolitika, umntwana owayekhulele esitratweni, intombi eyayisebenza kakhulu nalowo wayethanda amatheko bafumane uxolo lwengqondo ababelufuna? Ngaba kukho nto siyifundayo koko kwenzeka kubo? Impendulo yale mibuzo yomibini nguewe, njengoko siza kubona kwinqaku elilandelayo.
[Umbhalo osemazantsi]
a Amanye amagama aguquliwe.
[Umfanekiso okwiphepha 3]
Ngaba ulangazelela uxolo lwangaphakathi?