Unokulufumana Phi Uxolo Lwangaphakathi?
Mkhulu umahluko okhoyo phakathi kwexesha lethu nelo likaThoreau okhankanywe kwinqaku elandulelayo. Omnye umahluko ophambili kukuba namhlanje kukho amacebiso amaninzi okufumana uxolo lwengqondo. Izazi ngezigulo zengqondo nababhali beencwadi ezithetha ngeendlela zokuzinceda—kwanababhali bemihlathi kumaphephandaba—banikela ngezimvo zabo. Icebiso labo linganceda nje okwexeshana; kodwa xa sifuna izicombululo ezihlala zihleli, kufuneka okungakumbi. Oku koko kwafunyaniswa ngabantu abakhankanywe kwinqaku elandulelayo.
UANTÔNIO, uMarcos, uGerson, uVania, noMarcelo babeneemvelaphi ezahlukahlukeneyo yaye babeneengxaki ezingafaniyo. Kodwa ubuncinane zintathu izinto ababefana ngazo. Okokuqala, kukho ixesha ‘ababengenathemba yaye bengenaye uThixo ehlabathini.’ (Efese 2:12) Okwesibini, babefuna uxolo lwengqondo. Yaye okwesithathu, bonke balufumana uxolo lwengqondo ababelufuna emva kokuba bevumile ukufundisisa iBhayibhile namaNgqina kaYehova. Njengoko babesenza inkqubela, baqonda ukuba uThixo unomdla kubo. Eneneni, njengoko uPawulos waxelela ama-Athene omhla wakhe, uThixo ‘akakude kuye ngamnye wethu.’ (IZenzo 17:27) Ukweyiseka ngokunyanisekileyo ngalo mba ngundoqo wokufumana uxolo lwangaphakathi.
Kutheni Uxolo Lunqongophele Kangaka?
IBhayibhile isinika izizathu ezibini ezisisiseko ezibangela ukunqongophala koxolo—ehlabathini—enoba luxolo lwangaphakathi okanye uxolo phakathi kwabantu. Esokuqala sichazwe kuYeremiya 10:23: “Ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” Umntu akanabo ubulumko okanye ubukrelekrele bokuzilawula ngaphandle koncedo, yaye ekuphela koncedo olubaluleke ngokwenene luvela kuThixo. Abantu abangalufuniyo ukhokelo lukaThixo abasayi kuze balufumane uxolo oluhlala luhleli. Isizathu sesibini esibangela ukunqongophala koxolo sibonwa kumazwi kampostile uYohane athi: “Ihlabathi liphela lisemandleni ongendawo.” (1 Yohane 5:19) Ngaphandle kokhokelo lukaThixo, imigudu yabantu yokufumana uxolo iya kusoloko ikatyiswa yimisebenzi yalowo ukhoyo noxa engabonakali—nonamandla kakhulu—“ongendawo,” uSathana.
Ngenxa yezi zizathu zibini—esokuba uninzi lwabantu alulufuni ukhokelo lukaThixo nokuba uSathana uxakeke kakhulu kweli hlabathi—uhlanga lwabantu luphela lukwimeko elusizi. Umpostile uPawulos wakuchaza kakuhle oku xa esithi: “Yonke indalo iyagcuma kwaye isentlungwini de kube ngoku.” (Roma 8:22) Ngubani onokuphikisana naloo ngcamango? Kumazwe atyebileyo nahlwempuzekileyo, iingxaki zentsapho, ulwaphulo-mthetho, ukungabikho kokusesikweni, ukungquzulana kobuntu, imeko yezoqoqosho engazinzanga, intiyo yobuhlanga nobuzwe, ingcinezelo, ukugula nezinye izinto ezingakumbi ziye zaphanga uxolo lwengqondo ebantwini.
Indawo Onokulufumana Kuyo Uxolo Lwangaphakathi
Xa uAntônio, uMarcos, uGerson, uVania, noMarcelo bafundisisa iLizwi likaThixo iBhayibhile, bafunda izinto ezaguqula ubomi babo. Phakathi kwezinye izinto, bafunda ukuba ngenye imini imeko yehlabathi iya kuba yeyahlukileyo. Isibakala sokuba yonk’ into iya kulunga ekugqibeleni asilothemba nje elingacacanga. Yintembelo eqinisekileyo neyokwenene kuba uThixo unenjongo ngoluntu nokuba kwanangoku sinokungenelwa kuloo njongo ukuba siyakwenza ukuthanda kwakhe. Bakusebenzisa oko bakufunda eBhayibhileni, yaye izinto zaba bhetele. Bafumana ulonwabo noxolo olungakumbi kunokuba babecinga.
UAntônio akasangeneleli kuqhankqalazo nakwimizabalazo yabasebenzi. Uyazi ukuba iinguqulelo ezibakho ngenxa yoko zincinane yaye zezokwexeshana. Lo wayefudula eyinkokeli yabasebenzi uye wafunda ngoBukumkani bukaThixo. Izigidi zabantu zithandazela obo Bukumkani xa zicengceleza uMthandazo WeNkosi (okanye, uBawo Wethu Osezulwini) zisithi kuThixo: “Ubukumkani bakho mabufike.” (Mateyu 6:10a, New International Version) UAntônio wafunda ukuba uBukumkani bukaThixo ngurhulumente wokwenene wasezulwini oya kuzisela uluntu uxolo lokwenene.
UMarcos wafunda ukusebenzisa isiluleko sobulumko esiseBhayibhileni esithetha ngomtshato. Ngenxa yoko, lo wayefudula elilungu lezobupolitika ngoku wonwabile yaye wabuyela enkosikazini yakhe. Naye ukhangele phambili kwixesha elingekude, xa uBukumkani bukaThixo buya kushenxisa le nkqubo yezinto yeli hlabathi yokunyoluka nokuzingca buze buzise enye elunge ngakumbi. Usiqonda ngokunzulu ngakumbi isivakalisi esikuMthandazo WeNkosi esithi: “Kwenziwe ukuthanda kwakho emhlabeni njengasezulwini.” (Mateyu 6:10b, NIV) Xa ukuthanda kukaThixo kusenziwa emhlabeni, abantu baya kunandipha uhlobo lobomi olungazange lubonwe ngaphambili.
Kuthekani ngoGerson? Wayeka ukuba ngusithubeni nesela. Ubomi balo wayefudula ehlala esitratweni ngoku bunentsingiselo ngenxa yokuba usebenzisa amandla akhe ekuncedeni abanye ukuba bafumane uxolo lwangaphakathi. Njengoko la mava ebonisa, ukufundisisa iBhayibhile nokusebenzisa oko ikuthethayo kunokubuguqula gqitha ubomi bomntu ibe bobulunge ngakumbi.
Uxolo Lwangaphakathi Kwihlabathi Elineenkathazo
Oyena mntu udumileyo kwimbali yokuphunyezwa kokuthanda kukaThixo nguYesu Kristu, yaye xa abantu befundisisa iBhayibhile namaNgqina kaYehova, bafunda lukhulu ngaye. Ngobusuku bokuzalwa kwakhe, iingelosi zavuma iindumiso zikaThixo zisithi: “Uzuko kwiindawo eziphakamileyo phezulu kuThixo, uxolo emhlabeni phakathi kwabantu abakholekileyo.” (Luka 2:14) Ekukhuleni kwakhe, uYesu wayexhalabele ukuphucula ubomi babantu. Wayeyiqonda indlela abavakalelwa ngayo yaye wayebonisa imfesane enkulu kwabo babebandezelekile nababegula. Yaye ngokuvisisana namazwi eengelosi, wazisa umlinganiselo othile woxolo lwangaphakathi kubantu abalulamileyo. Ekupheleni kobulungiseleli bakhe, wathi kubafundi bakhe: “Ndinishiyela uxolo, ndininika uxolo lwam. Andininiki ngendlela yokunika kwehlabathi. Mazingakhathazeki iintliziyo zenu, zingarhwaqeli ngenxa yoloyiko.”—Yohane 14:27.
UYesu wayengaququzeleli intlalo-ntle yabantu nje kuphela. Wazifanisa nomalusi, yaye wafanisa abalandeli bakhe abalulamileyo nezimvu xa wathi: “Mna ndizele ukuba zibe nobomi yaye zibe nabo ngokuyintabalala. Ndingumalusi omhle, umalusi omhle unikezela umphefumlo wakhe ngenxa yezimvu.” (Yohane 10:10, 11) Ewe, ngokungafaniyo neenkokeli ezininzi namhlanje ezikhathalela iziqu zazo, uYesu wanikela ngobomi bakhe ngenxa yezimvu zakhe.
Sinokungenelwa njani koko kwenziwa nguYesu? Abaninzi baqhelene nala mazwi athi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.” (Yohane 3:16) Ukubonisa ukholo kuYesu kufuna ukuba okokuqala, ubani abe nolwazi ngaye nangoYise, uYehova. Ukwazi uThixo noYesu Kristu kunokukhokelela kulwalamano olusenyongweni noYehova uThixo oluya kusinceda sifumane uxolo lwengqondo.
UYesu wathi: “Izimvu zam ziyaliphulaphula ilizwi lam, kwaye ndiyazazi, zona ziyandilandela. Ndizinika ubomi obungunaphakade, yaye aziyi kuze zitshatyalaliswe, kungekho namnye uya kuzixhwila esandleni sam.” (Yohane 10:27, 28) Anjani wona ukubangel’ umdla nokuba yintuthuzelo amazwi! Liyinyaniso elokuba uYesu wawathetha la mazwi malunga namawaka amabini eminyaka eyadlulayo, kodwa asenamandla awayenawo ngelo xesha. Ungaze ulibale ukuba uYesu Kristu usaphila yaye usasebenza, ngoku ulawula njengoKumkani woBukumkani bukaThixo basezulwini. Kanye njengoko wayenjalo ngoxa wayesemhlabeni kuloo minyaka mininzi yadlulayo, usabaxhalabele abantu abalulamileyo abalangazelela uxolo lwengqondo. Ngaphezu koko, usenguMalusi wezimvu zakhe. Ukuba siyamlandela, uya kusinceda sifumane uxolo lwangaphakathi, oluquka ulindelo oluqinisekisiweyo lokubona uxolo olupheleleyo kwixesha elizayo—okuya kuthetha ukungabikho kogonyamelo, imfazwe nolwaphulo-mthetho.
Iingenelo zokwenene zifumaneka ngokwazi nokukholelwa ukuba uYehova, esebenzisa uYesu uya kusinceda. Usamkhumbula uVania, intwazana eyashiywa neembopheleleko ezinzima waza wacinga ukuba uThixo umlibele? Ngoku uVania uyazi ukuba uThixo akamlahlanga. Uthi: “Ndafunda ukuba uThixo ungumntu wokwenene yaye uneempawu ezintle. Uthando lwakhe lwamshukumisela ukuba athumele uNyana wakhe emhlabeni ukuze asinike ubomi. Ukwazi oku kubaluleke kakhulu.”
UMarcelo unikela ubungqina bokuba ulwalamano lwakhe noThixo lolokwenene. Lo wayefudula ehamba amatheko ugqabaza enjenje: “Ngokufuthi abantu abaselula abayazi into amabayenze, yaye bagqibela ngokuzenzakalisa. Abanye babandakanyeka ekusebenziseni kakubi iziyobisi, njengam. Ndinethemba lokuba abaninzi ngakumbi baya kusikelelwa, njengoko kwaba njalo kum, ngokufunda inyaniso engoThixo noNyana wakhe.”
Ngokufundisisa iBhayibhile ngenyameko, uVania noMarcelo baba nokholo olomeleleyo kuThixo baza baba nentembelo kuye ukuba uyafuna ukubanceda bahlangabezane neengxaki zabo. Ukuba senza njengabo—sifundisise iBhayibhile size sikusebenzise oko ikuthethayo—siya kufumana umlinganiselo omkhulu woxolo lwangaphakathi, kanye njengokuba benzayo. Luya kwandula ke ukhuthazo lukampostile uPawulos lusebenze ngokwenene kuthi: “Musani ukuxhalela nantoni na, kodwa ezintweni zonke zaziseni izibongozo zenu kuThixo ngomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.”—Filipi 4:6, 7.
Ukufumana Uxolo Lokwenene Namhlanje
UYesu Kristu ukhokela abantu abalambele inyaniso kwindlela esa kubomi obungunaphakade kwiparadesi esemhlabeni. Njengoko ebakhokelela kunqulo olunyulu lukaThixo, bafumana uxolo olufana nolo luchazwe eBhayibhileni: “Abantu bam baya kuhlala kwindawo yokuhlala enoxolo nankwiindawo zokuhlala zentembelo epheleleyo nakwiindawo zokuphumla ezingaphazamisekiyo.” (Isaya 32:18) Yaye ngaloo ndlela bangcamla uxolo abaya kulunandipha kwixesha elizayo. Siyafunda: “Abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo. Amalungisa aya kuwudla ilifa umhlaba, ahlale kuwo ngonaphakade.”—INdumiso 37:11, 29.
Ngoko ngaba sinokuba nalo uxolo lwangaphakathi namhlanje? Ewe. Ngaphezu koko, sinokuqiniseka ukuba kwixesha elizayo elingekude, uThixo uya kusikelela uluntu oluthobelayo ngoxolo olungazange lubekho ngaphambili. Ngoko kutheni ungamceli emthandazweni ukuba akunike uxolo lwakhe? Ukuba uneengxaki ezikuphanga uxolo, thandaza ngendlela awathandaza ngayo uKumkani uDavide: “Ukubandezeleka kwentliziyo yam kwandile; kwiingcinezelo eziphezu kwam ndikhuphe. Yibone inkxwaleko yam nenkathazo yam, uze uzixolele zonke izono zam.” (INdumiso 25:17, 18) Qiniseka ukuba uThixo uyayiphulaphula imithandazo enjalo. Wolula isandla sakhe aze abanike uxolo abo balufuna ngentliziyo enyanisekileyo. Ngothando siqinisekiswa ukuba: “Usondele uYehova kubo bonke abo bambizayo, kubo bonke abo bambiza ngenyaniso. Uya kukwenza oko kunqwenelwa ngabo bamoyikayo, nokukhalela kwabo uncedo uya kukuva, yaye uya kubasindisa.”—INdumiso 145:18, 19.
[Amagama acatshulweyo akwiphepha 5]
Umntu akanabo ubulumko okanye ubukrelekrele bokuzilawula ngaphandle koncedo yaye okuphela koncedo olubaluleke ngokwenene luvela kuThixo
[Amagama acatshulweyo akwiphepha 6]
Ukwazi uThixo noYesu Kristu kunokukhokelela kulwalamano olusenyongweni noYehova uThixo oluya kusinceda sifumane uxolo lwengqondo
[Umfanekiso okwiphepha 7]
Ukulandela isiluleko seBhayibhile kufak’ isandla kubomi bentsapho obuseluxolweni